Cadi gusiguiinu binni
«Lausaana de usiguii tu, ne ora güi tu diidxa lainíʼ ni dxandíʼ [ne sti binni].» (EFE. 4:25)
1, 2. Ximodo riene stale binni diidxaʼ ni dxandíʼ.
MAʼ XADXÍ gadxé gadxé modo riene ca hombre ca xii nga ni dxandíʼ. Lu siglu VI ante de ca dxi stiʼ Jesús, ti poeta griegu ni láʼ Alceo guníʼ: «Lu vinu ca nuu ni dxandíʼ». Ni nabe nga ora si naxudxi binni riníʼ ni dxandíʼ. Lu primé siglu que, Poncio Pilatu gobernador stiʼ Roma bisihuinni qué ñuni cré ni dxandíʼ ora gunabadiidxaʼ Jesús: «Xii nga ni dxandí» (Juan 18:38).
2 Ca dxi stinu riʼ gadxé gadxé modo rusiene binni de tema riʼ. Nuu tu na diidxaʼ dxandíʼ ca zanda guiénecabe ni gadxé gadxé modo, o maʼ binni guʼyaʼ ximodo guiéneni. Ne nuu tu na naquiiñeʼ guiníʼ binni ni dxandíʼ ora si nanna zabeendú xiixa ni galán o nanna qué zuninani laa. Ti libru na sicaríʼ: «Zándaca rusisácanu tuuxa ora riníʼ ni dxandíʼ, peru ora nuu binni ca lu xiixa guendanagana ne qué racalaʼdxiʼ guizaaca xiixa la? naquiiñeʼ gusiguii» (The Importance of Lying [Xiñee rusiguii binni]).
3. Xiñee nabé sicarú ejemplu bisaana Jesús para laanu.
3 Peru laanu, ca xpinni Cristu, gadxé modo rúʼyanu ni. Ne Jesús, Maestru stinu qué ñuuyabe ni dxandíʼ ca casi modo ruuyaʼ binni ni, purtiʼ laabe qué ñuu dxi nusiguiibe ne dede ca xhenemígube bidii cuenta de laani, ngue runi guniʼcaʼ: «Ma[e]stru, nanna du jneza runi luʼ ne dxandí neza sti Dios rusiidi luʼ» (Mat. 22:16). Laanu zinándanu ejemplu stiʼ Jesús, nga runi rininu ni dxandíʼ. Laaca jneza chinándanu conseju ni bidii apóstol Pablu ca xpinni Cristu de dxiqué: «Lausaana de usiguii tu, ne ora güi tu diidxa lainíʼ ni dxandíʼ [ne sti binni]» (Efe. 4:25). Chiguidúʼyanu xii ndiʼ guníʼ Pablu raríʼ. Primeru guidúʼyanu tuu nga sti binni ni naquiiñeʼ guinínenu ni dxandíʼ. Despué zaninu xi gucalaʼdxiʼ Pablu niníʼ ne diidxaʼ «guininu ni dxandíʼ [ne sti binni]», ne últimu zusiénenu ximodo zanda gúninu ni na ca conseju riʼ lu xquendanabáninu.
Tuu nga sti binni ni naquiiñeʼ guinínenu ni dxandíʼ
4. Ximodo bisihuinni Jesús risaca guiráʼ binni para Dios ne cadi casi modo guníʼ ca judíu que.
4 Ca dxi bibani Jesús, caadxi xaíque yuʼduʼ que bisiidicaʼ para ca judíu que si nga ca diidxaʼ «sti binni» ni bizéʼtenu ca, ngue runi para laacaʼ ca ngue si nga naquiiñeʼ guidxaagacaʼ o gaca xhamígucaʼ. Peru Jesús bisihuinni ximodo ruuyaʼ Bixhózebe ni (Juan 14:9). Tobi de cani bisiidibe ca discípulo stibe nga qué rusisaca Dios ti raza si o ti guidxi jma que stobi (Juan 4:5-26). Despué gucané espíritu santu apóstol Pedru guiene «risaca irá binni nezalú Dios. Tutiica idxibi laabe ne guni jneza, runi xiiñi be laa, gasti naca xi raza laa» (Hech. 10:28, 34, 35). Nga runi, naquiiñeʼ gannaxhiinu guiráʼ binni dede ne cani rucaalú laanu (Mat. 5:43-45).
5. Xi gucalaʼdxiʼ Pablu niníʼ ne ca diidxaʼ «ora güi tu diidxa lainíʼ ni dxandíʼ [ne sti binni]».
5 Yanna, xi gucalaʼdxiʼ Pablu niníʼ ne ca diidxaʼ: «Ora güi tu diidxa lainíʼ ni dxandíʼ [ne sti binni]» yaʼ. Ni nabe nga cadi naquiiñeʼ gusiguiinu ora guininu. Nuu binni qué riníʼ ni dxandíʼ ne rucaacaʼ stobi guni cré ni caniʼcaʼ, neca cadi dxandíʼ ni. Peru laanu ca xpinni Cristu cadi naquiiñeʼ gúninu zacá. Ni naquiiñeʼ gúninu nga ni na ca diidxaʼ riʼ: «Laucaa ná ni nadxabaʼ, ne lachinanda ni nachaʼhuiʼ» (Rom. 12:9). Cumu racaláʼdxinu chinándanu ejemplu stiʼ «Dios ni dxandíʼ» la? rúninu stipa para cadi gusiguiinu binni ora maʼ caninu ne ora maʼ cayúninu xiixa (Sal. 15:1, 2; 31:5). Pa guyúbinu modo guininu la? zándaca gacanenu gacachaahuiʼ xiixa guendanagana, neca guituílunu peru naquiiñeʼ guininu ni dxandíʼ (biindaʼ Colosenses 3:9, 10).
6, 7. 1) Xiñee cadi naquiiñepeʼ guininu guiráʼ ni nánnanu de tuuxa binni o de xiixa cosa. 2) Tu laa si nga naquiiñeʼ gábinu ni nánnanu pa guinabadiidxacaʼ laanu.
6 Ñee riníʼ ndiʼ naquiiñeʼ guicábinu guiráʼ ni guinabadiidxacabe laanu ne guininu guiráʼ ni nánnanu de xiixa cosa la? Coʼ. Jesús guníʼ nuu binni cadi naquiiñeʼ guicábinu laa ni canabadiidxaʼ laanu o gábinu laa guiráʼ ni nánnanu. Dxi gunabadiidxaʼ ca xaíque yuʼduʼ que Jesús tu bidii laa poder o tu gudxi laa guni ca milagru que, laabe bicábibe laacaʼ: «Naa laca napa tobi ni inaba diidxa laatu ne pa gabi tu ni naa la? óraque zabe laatu tu nacaʼ para cayune cani cayune riʼ». Cumu qué nicábicaʼ laabe la? gúdxibe laacaʼ: «Nin naa qué zabe laatu tu gudxi naa gune ni cayune riʼ» (Mar. 11:27-33). Cumu cadi galán xpiaʼ ca hombre que ne qué ñápacaʼ fe Jesús la? ngue runi qué nicábibe laacaʼ (Mat. 12:10-13; 23:27, 28). Ca dxi stinu riʼ caquiiñeʼ gápanu laanu de ca binni ni maʼ bidxii deche Dios ne cani racalaʼdxiʼ quite laanu o cani cuee diidxaʼ laanu para si guninacaʼ laanu (Mat. 10:16; Efe. 4:14).
7 Pablu laaca bizeeteʼ nuu caadxi binni ni cadi naquiiñeʼ gánnacaʼ gastiʼ. Laabe bizeetebe de ca binni ni riníʼ chisme ne riguu ruaa ratiica si «ne riníʼ cabe ni cadi jneza iníʼ cabe» (1 Tim. 5:13). Pa nuu tuuxa nabé runibiáʼ binni laa purtiʼ riguu ruaa ratiica si ne qué randa rapa xiixa ni cadi naquiiñeʼ ganna binni la? nagana gábicabe laabe xiixa ni cayácacabe. Nga runi, Pablu bidii conseju riʼ: «Cadi ma canazá tu cherí chericaʼ, sínuque laucaa ique xhiiña si tu» (1 Tes. 4:11). Peru nuu biaje ca binnigola ni nuu ra ridagulisaanu zanabadiidxacaʼ laanu xiixa ni bíʼyanu o ni nánnanu ti ganda gúnicaʼ xhiiñacaʼ. Ora gaca nga, naquiiñeʼ guininu ni dxandíʼ ti ganda gacanenu laacabe gúnicabe xhiiñacabe jneza (1 Ped. 5:2).
Guininu ni dxandíʼ ndaaniʼ lídxinu
8. Xi ribeendunu ora rábinu binnilídxinu ni dxandíʼ.
8 Ca binni ni jma ridxaaganu nga ca binnilídxinu, ne pa qué gusiguiinu laacabe la? ziuʼnu jma gaxha de laacabe. Pa guininu ni dxandíʼ ne binnilídxinu, ne guininu ne diidxaʼ nadóʼ la? qué zápapenu guendanagana ne ziénecabe laanu ni nuunu gábinu laacabe. Ora gucheʼnu, ñee raca nagana para laanu gábinu xheelanu, xiiñinu o sti binnilídxinu dxandíʼ bicheʼnu la? O rinábanu gutiidiláʼdxicabe donda stinu de guidubi ladxidoʼno. Pa guinábanu laacabe gutiidiláʼdxicabe stóndanu ziuʼnu tobi si ne qué ziuu bichenda ndaaniʼ lídxinu (biindaʼ 1 Pedro 3:8-10).
9. Xiñee gadxé nga guininu ni dxandíʼ ne gadxé nga gácanu naduxhuʼ ora maʼ caninu.
9 Ti cosa nga guininu ni dxandíʼ ne sti cosa nga gácanu naduxhuʼ ora maʼ caninu. Pa tuuxa qué ganna ximodo guiníʼ, neca dxandíʼ guiráʼ ni guiniʼbe guirutiʼ zusisaca ni guiniʼbe. Apóstol Pablu bidii conseju riʼ: «Lausaana de aca nanalaʼdxi tu binni, ne de idxiichi né tu laacaʼ, ne de chuʼ tu xiana, ne de guni char tu tuuxa o cuʼ dí tu laa. Lausaana de uyubi tu izaaca stobi xiixa. Ni guni tu la? lagaca nachaʼhui ne stobi, ne lailaselaʼdxi saa. Laguni perdonar saa casi bini perdonar Dios laatu ra guca né tu Cristu tobi si» (Efe. 4:31, 32). Pa guyúbinu modo guininu para cadi guniná stiidxanu tuuxa, jma zusisaca binni cani gábinu laa ne zusihuínninu runi respetarnu ni cucaadiaga laanu (Mat. 23:12).
Guininu ni dxandíʼ ra ridagulisaanu
10. Xi zanda guiziidiʼ ca binnigola de ejemplu stiʼ Jesús.
10 Ora guniʼné Jesús ca discípulo stiʼ biquiiñebe diidxaʼ ni zanda guiénecaʼ ne qué nutalenebe laacaʼ diidxaʼ. Neca biquiiñeʼ Jesús diidxaʼ nadóʼ ora bidii conseju ca discípulo stiʼ, bisiabe stiidxabe ora gúdxibe laacaʼ xi caquiiñeʼ gúnicaʼ, neca zándaca qué ñuuláʼdxicaʼ ni gúdxibe laacaʼ (Juan 15:9-12). Guzéʼtenu ti ejemplu. Cada tinde diidxaʼ ca discípulo stibe para gánnacaʼ tu laa jma risaca ládecaʼ, qué niníʼ ique Jesús qué zabi laacabe gastiʼ, sínuque bidii conseju laacabe para cadi gudxiibacabe laca laacabe (Mar. 9:33-37; Luc. 9:46-48; 22:24-27; Juan 13:14). Ca dxi stinu riʼ, ca binnigola ca laaca ruuyacaʼ gaca ni jneza ndaaniʼ ca neza binni ridagulisaa ca, peru qué runi stícabe ca dendxuʼ stiʼ Dios (Mar. 10:42-44). Rúnicabe stipa pur chinándacabe ejemplu stiʼ Cristu ora gácacabe nachaʼhuiʼ ne guiácabe binni.
11. Xi zúninu pa nadxiinu ca xpinni Cristu.
11 Naquiiñeʼ guininu ni dxandíʼ ne xcaadxi xpinni Cristu, peru pa casi ziuunu gábinu ni laacabe la? zándaca guninanu laacabe. Qué racaláʼdxinu gusituinu lú tuuxa o guninanu laaca pur ni guininu, pacaa zeeda gaca lúdxinu casi ti gudxíu naduxhuʼ (Sal. 52:2; Pro. 12:18). Pa nadxiinu laacabe zinándanu conseju riʼ: «Bicueeza ruaaluʼ para cadi guiniʼluʼ cosa malu, ne cadi gusiguiiluʼ» (Sal. 34:13). Pa gúninu zacá zusisácanu Dios ne zacanenu chuʼ ca binni ridagulisaanenu tobi si.
12. Pora nga caquiiñeʼ cuidxi ca binnigola ca ti binni ni bisiguii, ne xiñee.
12 Ca binnigola ca rúnicaʼ stipa para gápacaʼ ca binni ridagulisaa de ca binni ni rusiguii para si guniná stobi (biindaʼ Santiago 3:14-16). Ximodo raca ndiʼ yaʼ. Nuu tiru riníʼ binni xiixa maca para guniná stobi o para gusaana mal sti binni neca cadi dxandíʼ guiráʼ ni riníʼ. Dxandíʼ, cadi jneza diʼ nga gusiguii binni, peru cadi guiráʼ ora gusiguii binni caquiiñeʼ gaca juzgar. Nga runi, ca binnigola ca naquiiñeʼ gúʼyacaʼ xiñee bisiguii binni ca ne guiníʼ ique chaahuicaʼ xi gúnicaʼ. Ante guiníʼ íquecaʼ guni juzgarcaʼ laabe la? naquiiñeʼ guinabadiidxacaʼ laca laacaʼ: «Ñee xpiáʼpebe gusiguiibe ne rúnibe ni maca para guninabe ne gusaanabe mal sti binni la? O cadi tan naróʼbapeʼ ni bíʼnibe ca, ne caquiiñeʼ si guicaabe conseju para cadi guibiguetaʼ gúnibe ni».
Cadi gusiguiinu ra rúninu dxiiñaʼ ne lu ca negocio stinu
13, 14. 1) Xi runi stale binni para ganda guidxela dxiiñaʼ. 2) Xi zabeendunu pa gúninu xhiiñanu jneza ne pa qué cuánanu.
13 Ca dxi stinu riʼ stale binni rusiguii para ganda gudiicabe laa ti dxiiñaʼ, nga runi raca nagana para ti xpinni Cristu cadi guni casi rúnicabe. Guzéʼtenu ti ejemplu. Nuu tu laa rusiguii ora maʼ ziyubi dxiiñaʼ, riniʼcaʼ nánnacaʼ gúnicaʼ dxiiñaʼ o nabé biindacaʼ para gudiicabe laacaʼ ti dxiiñaʼ jma risaca ne guiáxacaʼ jma. Ne xcaadxi ni maʼ napa dxiiñaʼ rúnicaʼ casi ora cayúnicaʼ xhiiñacaʼ, peru gadxé ni maʼ cayúnicaʼ. Casi nuu tu laa maʼ cayuundaʼ ni qué zacané laa lu xhiiñaʼ, maʼ caníʼ pur teléfono, maʼ cuseendaʼ correu o maʼ nuu lu Internet.
14 Cani dxandíʼ xpinni Cristu, cadi jneza guiníʼ íquecaʼ maʼ de laacaʼ guiaana guiniʼcaʼ ni dxandíʼ o gusiguiicaʼ (biindaʼ Proverbios 6:16-19). Pablu guníʼ: «Ni racalaʼdxi du nga irá ni guni du, guni du jneza» (Heb. 13:18). Nga runi, pa caguíxecabe laanu ti dxi dxiiñaʼ la? naquiiñeʼ gúninu ti dxi dxiiñaʼ ca (Efe. 6:5-8). Ne pa nabé rúninu dxiiñaʼ jneza la? zusisaca binni lá Jiobá (1 Ped. 2:12). Zacá bisihuinni Roberto ni, ti Testigu ni nabeza España. Bisisaca jefe stibe laabe purtiʼ nabé rúnibe dxiiñaʼ jneza ne qué ribáʼnabe. Ne empresa ra rúnibe dxiiñaʼ que biseendacaa jma Testigu para guni dxiiñaʼ raqué, ne laaca rúnicaʼ dxiiñaʼ jneza. Dede dxiqué huayacané Roberto veintitres xpinni Cristu ne xhono binni ni nacubi cayuundanécabe Biblia guidxélacaʼ dxiiñaʼ raqué.
15. Pa stinu dxiiñaʼ ni rúninu, ximodo zanda gusihuínninu qué rusiguiinu.
15 Pa stinu dxiiñaʼ ni rúninu la? laaca cadi naquiiñeʼ gusiguiinu ne qué chuʼ dxi gusaana de guininu ni dxandíʼ. Ti xpinni Cristu cadi naquiiñeʼ gusiguii para si gutoo xiixa cosa ne ora guni xiixa dxiiñaʼ stiʼ binni. Laaca cadi naquiiñeʼ gudii o guicaa bueltu para guni xiixa ni cadi jneza. Nga runi naquiiñeʼ gúninu binni guiráʼ ni racaláʼdxinu gúnicabe laanu (Pro. 11:1; Luc. 6:31).
Cadi gusiguiinu ca binni runi mandar xquídxinu
16. 1) Xii nga naquiiñeʼ gudiʼnu cani runi mandar ndaaniʼ xquídxinu. 2) Ne xi naquiiñeʼ gudiʼnu Jiobá.
16 Jesús biʼniʼ mandar: «Laudii César sti César, ne laudii Dios sti Dios» (Mat. 22:21). Xii nga naquiiñeʼ gudiʼnu César o cani runi mandar ndaaniʼ xquídxinu yaʼ. Ora guníʼ Jesús ca diidxaʼ riʼ caniʼbe de impuestu. Para gápanu xquendabiaaninu nayá nezalú Dios ne nezalú ca hombre ca la? naquiiñeʼ gúninu ni na ca ley stiʼ guidxi ra nabézanu ne quíxenu impuestu (Rom. 13:5, 6). Peru nánnanu jma naquiiñeʼ guzúʼbanu stiidxaʼ Jiobá, tobi lucha Dios ni dxandíʼ, purtiʼ laa nga napa derechu de guni mandar ne nadxiinu laabe de guidubi ladxidoʼno, xhiálmanu, xquendabiaaninu ne stipa stinu (Mar. 12:30; Apo. 4:11). Nga runi, laasibe nga jma naquiiñeʼ guzúʼbanu stiidxabe sin cuézanu gudiibe laanu xiixa (biindaʼ Salmo 86:11, 12).
17. Xi naquiiñeʼ gánnanu de cani rudii gobiernu para gacané binni pobre.
17 Ndaaniʼ stale guidxi racané gobiernu ca binni pobre. Gastiʼ naca guicaa ca xpinni Cristu ni gudii gobiernu, peru pa dxandíʼ caquiiñebe ni. Laanu casi xpinni Cristu qué rusiguiinu para si gudii gobiernu laanu ni rudii binni pobre.
Ca ndaayaʼ ni ricaanu ora rininu ni dxandíʼ
18-20. Xi ndaayaʼ ricaa cani riníʼ ni dxandíʼ.
18 Pa guininu ni dxandíʼ zacaanu stale ndaayaʼ. Tobi de laacani nga zápanu xquendabiaaninu nayá ne zatadxí ladxidoʼno, nga nga ni nabé rusisaca Dios (Pro. 14:30; Fili. 4:6, 7). Stobi de laacani nga qué zadxíbinu ora chuʼ tu guiníʼ bisiguiinu (1 Tim. 5:24).
19 Guidúʼyanu xiruʼ ndaayaʼ zacaanu. Pablu guníʼ: «Irá modo racalaʼdxi du usihuinni du xhiiña Dios cayuni du, [...] rui du ni dxandí» (2 Cor. 6:4, 7). Ngapeʼ nga ni bizaaca ti hombre Testigu de Gran Bretaña dxi cutoo carru stiʼ. Ora guyé ti hombre yeguuya carru que para sini, Testigu que bisiene laabe xi guiráʼ cayácani dede ne ca cosa ni qué zudiibe cuenta ora gúʼyabe ni. Despué de bisá hombre que ni ti ratu gunabadiidxaʼ pa testigu stiʼ Jiobá laabe. Xiñee guníʼ ique hombre que zaqué yaʼ. Purtiʼ biiyaʼ guniʼbe ni dxandíʼ ne jneza modo nácube lari. Oraqueca bizulú Testigu que guniʼné laabe de Biblia.
20 Laanu yaʼ. Ñee racanenu gusisácacabe lá Jiobá purtiʼ rúninu ni jneza ne rininu ni dxandíʼ la? Pablu bicaa: «Qué rucaʼchi du gasti ne qué runi du gasti ni nituí lú du pa ñanna binni. Purti cadi canaguite du binni» (2 Cor. 4:2). Nga runi, gúninu stipa para cadi gusiguiinu binni. Zacá, zusisaca binni Bixhózenu ni nuu guibáʼ ne zusisácacaʼ xquídxibe.
Xi nicábiluʼ
• Tuu nga ca binni ni naquiiñeʼ guinínenu ni dxandíʼ.
• Ximodo zanda gusihuínninu rininu ni dxandíʼ.
• Ximodo zanda gacanenu guisaca lá Jiobá ora guininu ni dxandíʼ.
• Xi ndaayaʼ ricaa cani riníʼ ni dxandíʼ.
[Ca dibuju/foto ni zeeda lu yaza 17]
Neca cadi málupeʼ ni bíninu, ñee rininu dxandíʼ bicheʼnu la?
[Ca dibuju/foto ni zeeda lu yaza 18]
Ñee riniʼluʼ ni dxandíʼ ora maʼ ziyúbiluʼ dxiiñaʼ la?