Ni zanda gúniluʼ para guiéneluʼ Biblia

1. Gunabaʼ Dios gacané lii

Sicaríʼ guníʼ Ninfa, ti gunaa nabeza Italia: «Dxiqué ruundaʼ Biblia ante gaseʼ. Nannaʼ zeeda libru ca de Dios ne racaladxeʼ gannaʼ xi bisaanabe para binni. Nga runi, neca qué riuuladxeʼ guundaʼ, gudixhe iqueʼ guundaʼ guidubi ni. Galán bizuluáʼ, peru ora biindaʼ caadxi historia ni biiyaʼ nagana la? biree gana ne bisaanaʼ ni».

STALE binni rizaaca ni guca Ninfa ca. Peru lu tema ni gudídinu ca bizíʼdinu racalaʼdxiʼ Jiobá, Dios ni gudixhestí Biblia ca guiénenu ni. Xi zacané laanu para ganda gúninu nga yaʼ. Primeru caquiiñeʼ guinábanu gacanebe laanu.

Guidúʼyanu ejemplu stiʼ ca apóstol stiʼ Jesús. Laacabe que ñécabe scuela stiʼ ca maestru de ley que para niziidicabe de religión, ngue runi na ca binni que «huaxiéʼ [scuela] napa ca ne iruti naca ca» (Hechos 4:13). Peru cadi pur ngue qué ñanda ñénecabe Stiidxaʼ Dios. Ximodo nánnanu nga yaʼ. Purtiʼ gudxi Jesús laacabe: «Zuseenda Bixhoze Espíritu Santu gueda acané laatu ne usieche laatu, casi ñaca naa nuseenda laa. Ne laa zusiene laatu irá xixé cosa» (Juan 14:26). Espíritu santu ca nga stipa ni biquiiñeʼ Dios para bizáʼ Guidxilayú ne guiráʼ ni nabani luni (Génesis 1:2). Laaca stipa ca nga biquiiñebe para gúdxibe 40 hombre xi gucaacaʼ lu Biblia (2 Pedro 1:20, 21). Ngaca nga espíritu ni na Dios zudii tutiica binni ni gacalaʼdxiʼ guiene Stiidxabe.

Para gudiibe laanu espíritu ca caquiiñeʼ guni crenu zudiibe ni laanu. Ne zándaca naquiiñeʼ guinábanu ni laabe stale biaje. Jesús bidii conseju riʼ: «Lainaba lu Dios, zudii laatu». De raqué guniʼbe: «Pa laatu [...] nanna tu gudii tu ni galán xiiñi tu la? lágaxa Bixhoze tu ni nuu ibáʼ qué udii Espíritu Santu ni inaba laa» (Lucas 11:9, 13). Racá ridúʼyanu zudii Jiobá espíritu santu stiʼ cani guinabaʼ ni laabe de guidubi ladxidóʼ. Yanna ximodo zanda gacané espíritu ca laanu yaʼ. Primé la? racaneni laanu guiénenu xiná Stiidxaʼ Dios ni gucuá maʼ raca stale iza. Ne guiropa la? ruluiʼni laanu ximodo gúninu ni na ca conseju ni cazíʼdinu (Hebreos 4:12; Santiago 1:5, 6).

Nga runi, cada biaje gúʼndaluʼ Biblia biʼniʼ orar Dios ne gunabaʼ laa espíritu santu ti guiéneluʼ ni.