Ni zanda gúniluʼ para guiéneluʼ Biblia
3. Bidii lugar gacanécabe lii
Ti explorador láʼ Edward John Eyre bidii lugar gucané ca binni de Australia laa dxi zidiʼdiʼ ti lugar napampa ni nuu Nullarbor. Bisiidiʼ ca binni que laabe cueebe nisa ndaaniʼ ca loma yú ne lu ca yaga eucalipto, zaqué nga gunda bilabe.
NI BIZAACA hombre riʼ rusihuinni ti cosa nabé risaca: gatigá riquiiñeʼ chuʼ sti binni ni jma nanna para gacané laanu gúninu xiixa dxiiñaʼ nagana. Zándaca ngaca nga ni naquiiñeʼ guʼnuʼ ora quixhe íqueluʼ gúʼndaluʼ Biblia.
Jesús laaca qué nibeza ñene ca discípulo que Stiidxaʼ Dios laasicaʼ. Ti biaje, laapebe «bixhele be xquenda biaani ca para guiene ca ni cá lu Xquiʼchi Dios» (Lucas 24:45). Racá ridúʼyanu nanna Jesús caquiiñeʼ chuʼ stobi tu gacané binni para guiene chaahuiʼ ni zeeda lu Biblia.
Tu zanda gacané lii
Jesús biʼniʼ mandar ca discípulo stiʼ gacanecaʼ binni. Ante guibiguétabe guibáʼ gúdxibe laacaʼ: «Laché irá xixé guidxi, lachiusiidi irá xixé binni sa nanda naa [...]. Lausiidi laaca guni ca irá ni ma gudxe laatu» (Mateo 28:19, 20). Nga runi, dxiiñaʼ ni jma naquiiñeʼ guni ca xpinni Cristu nga gusiidicaʼ binni, ne laaca naquiiñeʼ gusiénecabe binni ximodo guni ni na ca conseju stini lu xquendanabani guiráʼ dxi. Cani dxandíʼ xpinni Cristu naquiiñeʼ gacanecaʼ binni guiene ni zeeda lu Biblia.
Guidúʼyanu ni bizaaca ti biaje cadi xadxí de bisaanané Jesús ca discípulo stiʼ dxiiñaʼ riʼ. Biblia cuzeeteʼ historia stiʼ ti hombre ni biʼniʼ xhiiñaʼ gobiernu de Etiopía, laabe cayuundabe ca diidxaʼ riguixhená stiʼ Isaías ne yendabe ti relatu ni cadi cayénebe. Ndiʼ nga ca versículo ni cayuundabe: «Yené cabe laabe casi riné cabe dendxu ra chi gati, ne casi qué ribidxiaa dendxu huiini ora ugá cabe guicha ladi, zaqueca nin ti diidxa qué niníʼ be. Gupa cabe laabe casi ni qué risaca ne bidxiiba cabe donda ique be sin ñuni be gastiʼ. Iruti qué zuzeete cani za de laabe purti biluxe xpida be ndaani guidxilayú» (Hechos 8:32, 33; Isaías 53:7, 8).
Xi biʼniʼ hombre riʼ yaʼ. Bidiibe lugar gucané Felipe laabe, ti xpinni Cristu ni jma runibiáʼ de Stiidxaʼ Dios. Gunabadiidxabe Felipe: «Tu cuzeete profeta Isaías raríʼ, de laca laa la? o de stobi» (Hechos 8:34). Cumu zeeda hombre riʼ de Jerusalén la? nánnanu guyebe ndaaniʼ yuʼduʼ que yeguni adorarbe Dios ni dxandíʼ. Nga runi zándaca maca gunábabe Dios gacané laabe para ganda guiénebe ni cayuundabe que. Ne nánnanu cayuuláʼdxibe ni cayuundabe que ne nuube guiénebe ni. Neca zaqué qué ganda diʼ guiénebe ni. Peru qué nudxiibabe laca laabe ne gunábabe Felipe gacané laabe, nagueendaca gucané Felipe hombre riʼ para biene ni. Biéchebe stale ora biénebe ni cayuundabe que ne oraqueca gunábabe gácabe xpinni Cristu (Hechos 8:35-39).
Ca dxi stinu riʼ laaca cayuni ca testigu stiʼ Jiobá dxiiñaʼ ni biʼniʼ Felipe ne xcaadxi xpinni Cristu ni bibani lu primé siglu que. Rusiidicabe binni ni cá lu Biblia lu jma de chupa gayuaa treinta y cinco guidxi roʼ sin guiáxacabe. Maca nexheʼ ximodo rusiidicabe binni ni zeeda lu Biblia.a (Biiyaʼ cuadru ra na «Ti libru ni ricabi cani zeeda lu Biblia».)
«Bicabi Biblia guiráʼ ni gunabadiidxaʼ»
Steven, Valvanera ne Jo-Anne, ca binni bizéʼtenu lu primé tema stiʼ revista riʼ, bizulú biindacaʼ Biblia ne ca testigu stiʼ Jiobá. Xi guleendúcabe yaʼ. Steven guníʼ: «Bidxagayaa ora biiyaʼ cadi nagana para bieneʼ cani rinabadiidxaʼ que. Ni bineʼ nga biiyaʼ ximodo rusiene caadxi versículo ne relatu zeeda lu Biblia ni rapaʼ gana gannaʼ que. Qué huayuu dxi guneʼ zacá dxiqué. Biecheʼ stale ora biiyaʼ cadi caquiiñeʼ diʼ tinde diidxaʼ binni para guiene cani cá lu Biblia».
Ngaca nga ni bizaaca Valvanera. Laabe guniʼbe sicaríʼ: «Bidieeʼ cuenta cadi nagana diʼ guiráʼ ni rusiidiʼ Biblia ne jneza cani. Bineʼ cré cani zeeda luni purtiʼ dxandíʼ cani, ne cadi purtiʼ cayábicabe ni naa ra yuʼduʼ». Jo-Anne laaca guníʼ: «Ora biiyaʼ modo bicabi Biblia guiráʼ ni gunabadiidxaʼ la? biale de ndaaniʼ ladxiduáʼ guneʼ respetar Dios. Bidxagayaaʼ purtiʼ maca bisaanabe lu Biblia guiráʼ ni naquiiñeʼ gánnanu».
Lii yaʼ, ñee runibiaʼluʼ tuuxa testigu stiʼ Jiobá la? Zanda guinábaluʼ laabe guluiʼbe lii modo ruundanécabe binni Biblia. Pa qué runibiaʼluʼ nin tobi de laacabe la? bicaa ra nuu tobi de ca lugar ni zeeda lu yaza 2 stiʼ revista riʼ ti chigánnacabe lii. Bietenalaʼdxiʼ, cadi guiníʼ íqueluʼ nagana nga para guiene binni Biblia. Guionnaʼ cosa ni maʼ bizéʼtenu ca nga ni naquiiñeʼ guʼnuʼ: guinabuʼ Dios espíritu santu, cadi guiníʼ íqueluʼ cadi jneza cani zeeda luni ne bidii lugar gacané ti binni ni jma nanna lii.
[Cani cá ñee yaza]
a Para gusiidicabe binni ni cá lu Stiidxaʼ Dios la? jma nga riquiiñecabe libru Xipeʼ ndiʼ cusiidiʼ Biblia, ni biʼniʼ ca testigu stiʼ Jiobá.
[Cuadro ne dibuju/foto ni zeeda lu yaza 8]
Ti libru ni ricabi cani zeeda lu Biblia
[Cuadro ne dibuju/foto ni zeeda lu yaza 8]
Ora ruundané ca testigu stiʼ Jiobá binni ricábicabe cani zeeda raríʼ:
• Xi naguixhe ique Dios guni lu Guidxilayú riʼ
• Paraa nuu ca gueʼtuʼ ca
• Ñee nabáninu lu ca «últimu dxi» la?
• Xiñee cudii Dios lugar nuu guendananá
• Ximodo zanda guibaninenu binnilídxinu nayecheʼ
[Ca dibuju/foto ni zeeda lu yaza 7]
Para guiene binni Biblia naquiiñeʼ guinabaʼ Dios espíritu santu, cadi guiníʼ ique cadi jneza cani zeeda luni ne gudii lugar gacanécabe laa