Ñee zanda guiéneluʼ Biblia la?

«Dxiqué bidúʼndadu Biblia ralidxeʼ guiráʼ domingu. Neca nannaʼ zeedani de Dios huaxiéʼ guyuuladxeʼ guundaʼ ni, purtiʼ qué rieneʼ stale de cani zeeda luni.» (Steven, de Gran Bretaña)

«Dxi gupa 17 iza bizuluáʼ biindaʼ Biblia, peru bisaanaʼ ni purtiʼ biiyaʼ guizáʼ nagana ni.» (Valvanera, de España)

«Cumu católica naa la? ngue runi nannaʼ naquiiñeʼ guundaʼ Stiidxaʼ Dios neca ti biaje si lu xquendanabaneʼ. Yeniáʼ chonna iza para biluxe ni, neca zaqué qué ñenediáʼ gastiʼ.» (Jo-Anne, de Australia)

DXANDÍʼ nga gástiruʼ sti libru jma risaca que Biblia. Laasini nga libru ni jma ridoo, ni jma nagueenda ridxela binni ne nuuni lu stale diidxaʼ ni riníʼ binni, dede nuuni lu discu para gucaadiaga binni. Neca zacá, raca nagana para stale binni guiene ni. Ñee laaca rizaacaluʼ zacá la?

Ñee qué náʼ ni gudixhestí Biblia ca guiénenu ni la?

Ante guicábinu nga naquiiñeʼ gánnanu tu gudixhestí guicá Biblia. Lu 2 Timoteo 3:16 na sicaríʼ: «Irá Xquiʼchi Dios, Espíritu Santu uníʼ xi icá». Yanna pue, ñee dxandíʼ nga racaláʼdxibe guiénenu Stiidxabe la? O bisaanabe ni para guiene caadxi si binni ni, casi ca teólogo, ne cani rusiidiʼ ndaaniʼ ca yuʼduʼ ca.

Ca versículo ni zeeda raríʼ cusiénecaʼ ni:

«Mandamientu ni cudieeʼ lii yannadxí riʼ cadi nagana diʼ ni para lii, ne cadi zitu diʼ nuu ni.» (Deuteronomio 30:11.)

«Nayaʼni modo rusiene Stiidxaluʼ, ne rusiéneni cani qué ganna.» (Salmo 119:130.)

«Óraque pe bichá Espíritu Santu ladxidóʼ Jesús de enda nayecheʼ, ne na: [Xquíxepeʼ] lii, Bixhozeʼ. Lii nga xpixuaana ibáʼ ne guidxilayú. Rudiee [xquíxepeʼ] lii purti qué nudiiu lugar ñene cani riene ne cani nuu xpiaani irá ndiʼ, sínuque bicaachi lu ni para biluíʼ lu ni cani zeda gaca casi baʼduʼ.» (Lucas 10:21.)

Rihuinni dxichi ca racalaʼdxiʼ Dios ni gudixhestí Biblia ca guiénenu ni. Peru stale binni qué randa riene ni neca ribee tiempu para guʼndaʼ ni. Nouʼ nuu xiixa ni zacané laacabe la? ¡Nuu pue! Lu xcaadxi tema ca zadúʼyanu chonna cosa ni zanda gacané laanu guiénenu Biblia.