Ni rusiidiʼ Biblia laanu de ni guníʼ xi guicá luni

1. ¿Xiñee rudiiluʼ xquixe peʼ Jehová pur bidii laanu Biblia?

¡GUIZÁʼ rudiʼnu xquixe peʼ Jehová purtiʼ bidii laanu Biblia! Lu libru riʼ rudiibe laanu conseju galán ni racané laanu gánnanu xi gúninu ora nápanu guendanagana. Laaca rudiini laanu ti esperanza galán de ni chiguizaaca despué. Ne ni jma risaca rusiidini laanu ximodo naca Jehová. Ora guiníʼ íquenu ca cualidad sicarú napa Jehová rucaa ni laanu chuʼnu jma gaxha de laa ne gaca xhamígunu laa (Sal. 25:14).

2. ¿Ximodo rabi Jehová laanu modo laa?

² Racalaʼdxiʼ Jehová gunibiáʼ binni laa. Dxiqué biquiiñebe bacaandaʼ, visión ne ángel para gábibe binni ximodo laabe (Núm. 12:6; Hech. 10:3, 4). Peru pa ñaca guirutiʼ nucaa guiráʼ ndiʼ qué ñanda ñuni estudiarnu ca ni. Nga runi gudxi Jehová caadxi hombre gucaacaʼ «lu ti libru» ni racaláʼdxibe gánnanu (Jer. 30:2). Zanda guni crenu laabe guniʼbe xi guicá lu Biblia, purtiʼ nánnanu biaʼsi ca neza stiʼ Dios (Sal. 18:30).

3. ¿Xi biʼniʼ Jehová para ganda gápanu Biblia tiempu riʼ? (Isaías 40:8).

³ (Biindaʼ Isaías 40:8). Maʼ raca stale iza, huayacané Stiidxaʼ Dios ca xpinni. ¿Ximodo yaʼ? Dxandíʼ, maʼ xadxí bicaacabe Biblia lu material ni qué rindaa ne gastiʼ nin ti guiʼchiʼ original stini. Peru biiyaʼ Jehová guni binni copia stiʼ Stiidxaʼ. Ca binni ni biʼniʼ copia que nácacaʼ binni ruchee, peru gúpacaʼ stale cuidadu ora bíʼnicaʼ dxiiñaʼ riʼ. Sicaríʼ guníʼ ti hombre ni runi estudiar chaahuiʼ Biblia de Escrituras Hebreas: «Zanda guni crenu gastiʼ nin ti libru ni maʼ xadxí de gucuá ni huayaca copiar biaʼsi peʼ casi laani». Neca maʼ xadxí bicaa binni ruchee Biblia ne bicaacaʼ ni lu material ni qué rindaa, peru nánnanu cá guiráʼ ni guníʼ Jehová luni.

4. ¿Xi zadúʼyanu lu artículo riʼ?

⁴ «Guiráʼ regalu sicarú ne guiráʼ cosa nachaʼhuiʼ» zeeda ni de Jehová ne Biblia nga tobi de ca regalu jma risaca bidiibe laanu (Sant. 1:17). Ora rudii tuuxa laanu ti regalu rusihuinni ni runibiaʼbe laanu ne nánnabe caquiiñenu ni. Nga nga rizaaca né Biblia. Ora ridúʼndanu ni rizíʼdinu stale de Jehová. Rudiʼnu cuenta runibiáʼ chaahuibe laanu ne nánnabe xi caquiiñenu. Lu artículo riʼ zadúʼyanu chonna cualidad stiʼ Jehová ne zeeda ca ni lu Biblia, laacani nga: guendanuuxpiaaniʼ, justicia ne guendarannaxhii. Guininu primeru xi ruzeeteʼ Biblia de guendanuuxpiaaniʼ stiʼ Dios.

RUSIHUINNI BIBLIA GUENDANUUXPIAANIʼ STIʼ DIOS

5. ¿Ximodo rusihuinni Biblia guendanuuxpiaaniʼ stiʼ Dios?

⁵ Nanna Jehová caquiiñenu ca conseju stiʼ. Nga runi maʼ bidiibe laanu Biblia, racá nuu guendanuuxpiaaniʼ stibe. Guizáʼ racané ca conseju stibe laanu. Ne dede zanda guchaa Biblia xquendanabani binni. Ora bicaa Moisés ca primé libru stiʼ Biblia, gúdxibe xquidxi Dios, ca israelita: «Cadi naca ca diidxaʼ riʼ xiixa ni qué risaca, sínuque zanda gulá ni xquendanabánitu» (Deut. 32:47). Ca israelita ni chinanda Stiidxaʼ Dios zabánicaʼ nayecheʼ (Sal. 1:2, 3). Neca maʼ xadxí de gucuá Biblia, napa ni poder para guchaa ni xquendanabani binni. Guzéʼtenu ti ejemplu, ca artículo ni zeeda lu sección ni láʼ «Gucané Biblia laacabe para bichaacabe», ni nuu lu jw.org, zadxélaluʼ stale historia stiʼ binni ni bíʼnicaʼ stipa pur guchaacaʼ ne yanna nabánicaʼ nayecheʼ ra zinándacaʼ ca conseju ni zeeda lu Biblia (1 Tes. 2:13).

6. ¿Xiñee zanda guininu gástiruʼ sti libru casi Biblia?

⁶ Gástiruʼ sti libru casi Biblia. ¿Xiñee yaʼ? Purtiʼ Jehová nga guníʼ xi guicá luni, laabe nga Dios ni jma napa poder, qué ziuu dxi guinitilube ne guirútiruʼ jma nuu xpiaaniʼ que laabe. Tiempu riʼ, ruundaruʼ binni libru ni gucuaa dxiqué. Ne stale biaje ca conseju zeeda lúcani maʼ qué racanécani binni. Peru ca conseju zeeda lu Biblia siempre racanécani ne huayacanécani binni de gadxé gadxé tiempu. Ora ridúʼndanu Stiidxaʼ Dios ne riníʼ íquenu ca conseju stini, riquiiñeʼ Jehová espíritu santu stiʼ para gacané laanu chinándanu ni lu xquendanabáninu (Sal. 119:27; Mal. 3:16; Heb. 4:12). Guníʼ ique si ndiʼ, Jehová peʼ racalaʼdxiʼ gacané lii. ¿Cadi dxandíʼ riguu ndiʼ gana lii gúʼndaluʼ Biblia guiráʼ dxi la?

7. ¿Ximodo gucané Biblia chuʼ xquidxi Dios tobi si?

⁷ Nuu sti cosa ni rusihuinni zeeda guendanuuxpiaaniʼ stiʼ Dios lu Biblia, ¿xiñee yaʼ? Purtiʼ racaneni chuʼ xquidxi Dios tobi si. Dxi guyuu ca israelita ndaaniʼ Tierra Prometida, gadxé gadxé lugar gulézacaʼ. Nuu de laacaʼ gúcacaʼ pescador, xcaadxi gúpacaʼ yuze ne xcaadxi bíʼnicaʼ dxiiñaʼ lu layú. Ngue runi ca israelita ni nabeza gadxé ladu ñándaca nusiaandacaʼ ca israelita ni nabeza sti lugar. Peru gatigá biʼniʼ reunir Jehová laacabe para gucaadiágacabe Stiidxaʼ ne guiziidicabe jma (Deut. 31:10-13; Neh. 8:2, 8, 18). Guxuíʼlunu ximodo biʼniʼ sentir ti israelita ora chindá Jerusalén ne guʼyaʼ millón israelita ni zeeda de xcaadxi lugar para guni adorarcaʼ Jehová. Zaqué nga gucané Jehová laacabe chúʼcabe tobi si. Ne despué, lu primé siglu, ndaaniʼ congregación stiʼ ca xpinni Cristu. Guyuu hombre ne gunaa, nuu de laacaʼ gúcacaʼ ricu, pobre ne guniʼcaʼ gadxé gadxé idioma. Peru cumu nadxiicabe Stiidxaʼ Dios biʼniʼ adorárcabe Jehová tobi si. Ne ca ni nacubi chuʼ ndaaniʼ congregación que, nagueenda biénecaʼ Stiidxaʼ Dios purtiʼ guyuu xpinni Cristu ni gucané laacaʼ ne purtiʼ laaca guca reunircaʼ (Hech. 2:42; 8:30, 31).

8. ¿Ximodo riquiiñeʼ Jehová Biblia para chuʼ xquidxi tobi si?

⁸ Tiempu riʼ, riquiiñeʼ Jehová Biblia para gusiidiʼ xquidxi ne chuʼcaʼ tobi si. Lu Biblia riree guiráʼ guendaró espiritual ni ricaanu. Laanu, ca xpinni Cristu, riuunu ca reunión ne ca asamblea, racá ridúʼndanu Biblia ne rizíʼdinu stale cosa de laani. Ndiʼ rusihuinni riquiiñeʼ Jehová Biblia para guni ni naguixhe ique ne laani nga guni ca xpínnibe «xhiiñabe tobi si» (Sof. 3:9).

9. ¿Xi cualidad naquiiñeʼ gápanu para ganda guiénenu ni zeeda lu Biblia? (Lucas 10:21).

⁹ Guidúʼyanu sti cosa ni rusihuinni pabiáʼ nuu xpiaaniʼ Jehová. Biiyabe guicá ndaaniʼ stale lugar stiʼ Biblia ni zanda guiene si ca binni humilde (biindaʼ Lucas 10:21). Naca Biblia ti libru ni ruundaʼ binni de guiráʼ guidxi. Ti especialista guníʼ «laani nga libru ni jma ruundaʼ binni ne jma ruundaʼ chaahuicabe ni que intiica libru», o zanda guininu ni jma huayaca estudiar. Peru ca binni humilde si zanda guiene ni ne guni ni ná ni (2 Cor. 3:15, 16).

10. ¿Gunáʼ nga sti modo ridúʼyanu guendanuuxpiaaniʼ stiʼ Jehová lu Biblia?

¹⁰ Guidúʼyanu sti modo rihuinni guendanuuxpiaaniʼ stiʼ Jehová lu Biblia. Riquiiñebe Stiidxabe para gusiidibe guiranu casi xquídxibe ne para gusiidibe ne quixhedxibe ladxidóʼ cada tobi de laanu. Ra guidúʼndanu Stiidxabe, ridúʼyanu rizaaláʼdxibe cada tobi de laanu (Is. 30:21). Ora rápanu guendanagana, stale biaje ridúʼndanu xiixa textu stiʼ Biblia ni peʼ caquiiñenu ne ni racané laanu. Peru pa gucuá Biblia para gacané millón de binni, ¿ximodo nga napa ni información ni peʼ caquiiñeʼ cada binni yaʼ? Purtiʼ binni ni guníʼ xi guicá lu Biblia nga ni jma nuu xpiaaniʼ lu guidubi naca universu (2 Tim. 3:16, 17).

RUSIHUINNI BIBLIA JUSTICIA STIʼ DIOS

11. ¿Ximodo bisihuinni Dios biaʼca risaca guiráʼ binni para laa tiempu gucuá Biblia?

¹¹ Sti cualidad nabé risaca napa Jehová nga justicia (Deut. 32:4). Tuuxa ni rusihuinni cualidad riʼ, biaʼca risaca guiráʼ binni para laa ne zacá nga Jehová (Hech. 10:34, 35; Rom. 2:11). Ne bisihuínnibe ni purtiʼ dxi gucuá Biblia, gucuá ni lu idioma ni nabé riníʼ binni dxiqué. Ca primé 39 libru stini gucuá ca ni lu idioma hebreu, ne laani nga idioma ni nabé guníʼ xquidxi Dios tiempu que. Peru tiempu guyuu ca primé xpinni Cristu, stale binni riníʼ griegu. Nga runi ca últimu 27 libru stiʼ Biblia gucuá ca ni lu idioma ca. Racá ridúʼyanu gucalaʼdxiʼ Jehová cadi lu ti idioma si guicá Stiidxaʼ. Tiempu riʼ, nuu biaʼ 8,000 millón de binni lu Guidxilayú riʼ ne rininu gadxé gadxé idioma. ¿Xi racané laanu gunibiaʼnu Jehová yaʼ?

12. ¿Ximodo huayaca cumplir Daniel 12:4 lu ca últimu dxi riʼ?

¹² Biquiiñeʼ Jehová profeta Daniel para guiníʼ tiempu gueeda fin «stale tu ziene chaahuiʼ» ne «stale tu zaziidiʼ ni dxandíʼ» rusiidiʼ Biblia (biindaʼ Daniel 12:4). Cumu huayaca traducir, huayaca imprimir ne riaaziʼ Biblia ne ca publicación ni riree de lu Stiidxaʼ Dios la? huayacané ndiʼ binni guiziidiʼ ne guiene chaahuiʼ Biblia. Ne laani nga libru ni jma huayaca traducir ne huacaa stale binni. Stale de ca Biblia ni huayuni traducir binni nabé caru ridoo ca ni. Peru xquidxi Jehová maʼ biʼniʼ traducir Biblia guidubi ni o ti ndaa ni lu jma de chupa gayuaa cuarenta idioma ne tutiica binni zanda guinabaʼ tobi sin quixe. Pur huayaca nga la? stale binni de guiráʼ guidxi caziidicaʼ de «ca noticia galán stiʼ Reinu» ante gueeda fin (Mat. 24:14). Naca Jehová ti Dios ni rusihuinni justicia ne racaláʼdxibe gunibiáʼ stale binni laabe ra gúʼndacaʼ Stiidxabe, Biblia. ¿Xi rucaa laabe gúnibe nga yaʼ? Guendarannaxhii ni nápabe laanu.

RUSIHUINNI BIBLIA GUENDARANNAXHII STIʼ DIOS

13. ¿Xiñee zanda guininu rusihuinni Biblia guendarannaxhii stiʼ Dios? (Juan 21:25).

¹³ Racané Biblia laanu guiénenu cualidad ni jma risaca stiʼ Jehová nga guendarannaxhii (1 Juan 4:8). Guiníʼ íquenu gunáʼ nga ca cosa ni guníʼ Dios guicá lu Biblia ne gunáʼ nga ca cosa ni qué nicá. Lu Biblia maʼ gúdxibe laanu guiráʼ ca cosa ni caquiiñeʼ gánnanu para gácanu xhamígube, guibáninu nayecheʼ ne guibáninu sin qué chuʼ dxi gátinu. Peru cumu nadxii Jehová laanu la? bidiibe laanu información ni caquiiñeʼ si gánnanu para gúninu ni nabe (biindaʼ Juan 21:25).

14. ¿Gunáʼ nga sti modo rusihuinni Biblia guendarannaxhii stiʼ Dios?

¹⁴ Rusihuinni Jehová nadxii laanu ora guiniʼné laanu. Qué nucaabe lu Biblia ti lista naroʼbaʼ para gábibe laanu xi caquiiñeʼ gúninu ne xi cadi caquiiñeʼ gúninu. Ni bíʼnibe nga guniʼbe guicá ni bizaaca binni dxiqué, profecía ne stale conseju para gacané ca ni laanu guicaanu decisión jneza. Zacá nga racané Biblia laanu gannaxhiinu Dios ne guzúʼbanu stiidxaʼ de guidubi ladxidoʼno.

15. a) ¿Ximodo rusihuinni Biblia nabé rizaalaʼdxiʼ Jehová laanu? b) ¿Tudé caníʼ ique dxaapahuiiniʼ, hermanu ne hermana ni rihuinni lu imagen ca? (Gén. 39:1, 10-12; 2 Rey. 5:1-3; Luc. 2:25-38).

¹⁵ Biblia rusiidiʼ nabé rizaalaʼdxiʼ Jehová laanu. Ne nánnanu zacá ni purtiʼ luni zeeda stale relatu ni racané laanu guni sentirnu casi biʼniʼ sentir ca binni ni riete lu Biblia purtiʼ gúpacabe «sentimientu cásica laanu» (Sant. 5:17). Ne ora guidúʼndanu modo gucanebe ca binni de dxiqué, ni naca casi laanu, riene chaahuinu «nadxii Jehová binni» ne riá laanu (Sant. 5:11).

16. Ra gánnanu ximodo gucané Jehová ca binni ni bichee ni riete lu Biblia, ¿xi rusiidiʼ ni laanu de laabe? (Isaías 55:7).

¹⁶ Lu Biblia ridxélanu sti modo rusihuinni Jehová nadxii laanu. Stiidxaʼ Dios rabi laanu qué zusaana Jehová laanu pa gucheʼnu. Nabé bicheené ca israelita Jehová, peru ora guca arrepentírcabe de guidubi ladxidóʼcabe siempre biʼniʼ perdonar Jehová laacabe (biindaʼ Isaías 55:7). Ca xpinni Cristu ni bibani lu primé siglu gúnnacaʼ guizáʼ nadxii Jehová laacaʼ. Guzéʼtenu ti ejemplu, gudxi Dios apóstol Pablo cuʼ gana ca hermanu que ne gánnacaʼ naquiiñeʼ guni perdonarcaʼ ne quixhedxicaʼ ladxidóʼ ti hombre ni dxandíʼ guca arrepentir pur ti pecadu sexual grave ni biʼniʼ (1 Cor. 5:1-5; 2 Cor. 2:6, 7). Guizáʼ ridxagayaanu gánnanu qué rudxiideche Jehová ca xpinni ni guni ti cosa ni cadi jneza, sínuque né stale cariñu racanebe, riguu jnézabe ne rábibe laacaʼ guidxíñacaʼ ra nuube sti biaje. Ne maʼ guniʼbe laaca ngaca zúnibe né binni ni guchee ne gaca arrepentir tiempu riʼ (Sant. 4:8-10).

NACA BIBLIA TI REGALU GUIZÁʼ SICARÚ

17. ¿Xiñee naca Biblia ti regalu guizáʼ sicarú?

¹⁷ Maʼ bidii Jehová laanu ti regalu guizáʼ sicarú. ¿Xiñee nabé sicarú Stiidxabe yaʼ? Purtiʼ casi maʼ bizíʼdinu, Biblia rusiidiʼ laanu naca Jehová ti Dios ni rusihuinni justicia, guizáʼ nuu xpiaanibe ne guizáʼ nadxiibe laanu. Laaca rusiidiʼ libru riʼ laanu racalaʼdxiʼ Jehová gunibiaʼnu laa ne gácanu xhamigu.

18. ¿Ximodo zanda gusihuínninu cudiʼnu xquixe peʼ Jehová pur bidii laanu Biblia?

¹⁸ Qué chuʼ dxi guiaandaʼ laanu naca Stiidxaʼ Dios ti regalu nabé risaca. Laani nga tobi de ca «regalu sicarú» ni bidii Jehová laanu (Sant. 1:17). Nga runi, siempre gusihuínninu cudiʼnu xquixe peʼ laabe pur regalu riʼ. Rúninu ni ora runi orarnu, ridúʼndanu Stiidxabe ne riníʼ íquenu ni. Nanna dxíchinu zaguu Jehová ndaayaʼ laanu pur stipa ni gúninu ne zunibiáʼ chaahuinu laabe (Prov. 2:5).