Guiníʼ íquenu casi riníʼ ique Cristu
«[Laguiníʼ ique] casi riníʼ ique Cristu Jesús.» (ROM. 15:5, NM)
1. Xiñee naquiiñeʼ guiníʼ íquenu casi riníʼ ique Jesús.
«LATÁʼ ra nuaaʼ», guníʼ Jesucristu. Ne despué bizeetebe: «Lagudii lugar gusiideʼ laatu purtiʼ binni nadóʼ naa ne qué rudxiibaʼ laca naa ne zatadxí ladxidoʼto» (Mat. 11:28, 29, NM). Invitación ni biʼniʼ Jesús ca rusihuínnini pabiáʼ nadxiibe binni. Nabé sicarú ejemplu bisaanabe para laanu ne qué huayuuruʼ sti hombre guni ni. Neca Xiiñiʼ Dios laabe ne gúpabe poder ne derechu para guni mandarbe la? biabe binni ne gunnaxhiibe laacaʼ jmaruʼ si ne cani jma caquiiñecaʼ ni.
2. Xi ca guenda napa Jesús zadúʼyanu lu guionnaʼ tema zeeda lu revista riʼ.
2 Tema riʼ ne xhupa ni chiguidúʼndanu ca zuluíʼcani laanu ximodo zanda guiníʼ íquenu casi Jesús, ne laaca zuluíʼcani laanu ximodo zanda gápanu ni riníʼ Biblia «xquendabiaaniʼ Cristu» (1 Cor. 2:16, NM). Ni jma zaninu nga de gaayuʼ guenda gupa Jesús: gúcabe nadóʼ, qué nudxiibabe laca laabe, gúcabe nachaʼhuiʼ, bizuubabe diidxaʼ, gúcabe nadxibalú ne gunnaxhiibe binni sin nibézabe nudiicaʼ laabe xiixa.
Gácanu nadóʼ casi guca Cristu
3. 1) Ximodo bisiidiʼ Jesús ca discípulo stiʼ para cadi gudxiibacaʼ laca laacaʼ. 2) Xi biʼniʼ Jesús ora qué ñuni ca discípulo que ni gúdxibe laacaʼ.
3 Nécapeʼ guca Jesús Xiiñiʼ Dios ne qué ñalené donda la? gunabe gueedabe lu Guidxilayú riʼ ne guibánibe lade binni ni ruchee ne gulené donda, ne caadxi de laacaʼ dede biiticaʼ laabe. Peru laabe qué ñuu dxi nusaanabe de ñuube nayecheʼ ne qué nidxiichi xhaatabe (1 Ped. 2:21-23). Pa qué gusaananu de gúʼyadxinu Jesús ne chinándanu ejemplu stiʼ la? laaca qué zadxiichinu ora guidúʼyanu guchee xcaadxi binni (Heb. 12:2). Jesús bidii invitación riʼ ca discípulo stiʼ: «Laudxiiba ayubu stinne xa yanni tu» ne despué, gúdxibe laacaʼ gúnicaʼ casi cayúnibe (Mat. 11:29). Caadxi de ca cosa ni zanda guiziidiʼ ca discípulo que de Maestru sticaʼ nga gácacaʼ nadóʼ ne cadi guidxiichicaʼ nagueenda ora gúʼyacaʼ guchee stobi. Gueelaʼ ante gátibe que bisiidibe laacaʼ pabiáʼ nga risaca cadi gudxiibacaʼ laca laacaʼ ora gudiibibe ñeecaʼ. ¡Qué ziuu dxi guiaandaʼ ni bíʼnibe que! (Biindaʼ Juan 13:14-17.) Despué, dxi qué ñanda ñataná Pedru, Santiagu ne Juan ne gúsicaʼ la? qué nidindené Jesús laacaʼ, sínuque biénebe laacaʼ. Laabe guniʼbe: «Simón, nisiaasi lu la?». De raqué gúdxibe guiónnacaʼ: «Lagataná ne la iníʼ né Dios ti cadi uquiinde binidxaba laatu». Ne cumu nánnabe binni ruchee laacaʼ la? gúdxibe laacaʼ: «Neca ndaani ladxidóʼ to racalaʼdxi tu guni tu jneza, peru cuerpu stitu, nagueenda riguudxi» (Mar. 14:32-38).
4, 5. Ximodo rusiidiʼ ejemplu stiʼ Jesús laanu cadi guidxiichinu nagueendaca ora gucheenécabe laanu.
4 Xi zúninu pa ti xpinni Cristu riuulaʼdxiʼ gusihuinni jma risaca que stobi, nagueenda ridxiichi ora gúnicabe laa xiixa o qué rinagá chinanda conseju ni gudii ca binnigola laa o ni gudii «mozo ni nuu xpiaani ne ni runi jneza» yaʼ (Mat. 24:45-47). Laanu maca biaʼnu guidúʼyanu pabiáʼ feu xpiaʼ binni guidxilayú, peru ni qué ribézanu nga gaca ca xpinni Cristu casi laacabe. Pa gudiʼnu cuenta nagueenda ridxiichinu pur xiixa ni gúnicabe laanu la? naquiiñeʼ guiníʼ íquenu: «Xi naquiiñeʼ guneʼ para gusihuinneʼ riníʼ iqueʼ cásica riníʼ ique Cristu yaʼ». Naquiiñeʼ guietenaláʼdxinu qué liica nidxiichi Jesús ora bichee ca apóstol stiʼ.
5 Guidúʼyanu ni bizaaca apóstol Pedru. Ti biaje, dxi zizá Jesús lu nisa gudxi laabe guiétebe de ndaaniʼ canuá que ne chebe ra nuu, ne gunda guzá Pedru lu nisa que. Peru ora biʼyaʼ Pedru nadipaʼ cundubi bí que la? bidxibi ne biaaziʼ ndaaniʼ nisa que. Ñee bidxiichiné Jesús laabe la? Ñee gudxi laabe: «Huazaacaʼ, zaa bizaacaluʼ ni. Tila zacá guiéneluʼ». Coʼ njaʼ, Biblia na «bisigaa ná Jesús gundisa laabe ne na rabi laabe: Aque huaxiéʼ fe napu xa. Xiñee bidxibi lu» (Mat. 14:28-31). Pa tuuxa xpinni Cristu maʼ cadi naguídxipeʼ nuu fe stiʼ la? gacanenu laa iguidxi fe stiʼ. Zacá zusihuínninu nácanu binni nadóʼ cásica guca Jesús nadóʼ ne Pedru.
6. Ximodo bisiidiʼ Jesús ca discípulo stiʼ cadi guyúbicaʼ guisácacaʼ jma que sti binni.
6 Cada biaje gudinde diidxaʼ ca apóstol que ora guniʼcaʼ tuu nga jma risaca ládecaʼ la? laaca guyuu Pedru ládecabe. Ti dxi guyé Santiagu ne Juan ra nuu Jesús para guinábacaʼ laabe gudiibe lugar cuicaʼ cueʼbe, tobi ladu derechu ne stobi ladu bigaʼ lu Reinu stibe. Ni bíʼnicabe ca nabé bichiichini Pedru ne xcaadxi apóstol que. Zándaca gúcacabe zacá purtiʼ zaqué ca binni ni biniisinécabe, nisi riuuláʼdxicaʼ guisácacaʼ jma que xcaadxi ne nanna Jesús modo biniisicabe que. Ngue runi gúdxibe laacaʼ: «Nanna tu modo sti cani runi mandar ndaani guidxilayú, runi stica irá binni ni runi mandar caʼ. Ne zaqueca ca hombre ni risaca, riulaʼdxi ca guni binni ni na caʼ. Peru laatu cadi guni tu zacá lade tu, sínuque tu gacalaʼdxi isaca jma la? napa xidé gaca casi jmozo ca xcaadxi». Ne despué gúdxibe laacaʼ ni bíʼnibe: «Naa nga Hombre Biseenda Dios ne benda cadi para gacané cabe naa, sínuque para gacaniá laacabe ne para udiee xpida para ilá stale binni» (Mat. 20:20-28).
7. Ximodo zanda gacané cada tobi de laanu chuʼ ca binni ridagulisaa tobi si.
7 Pa guiníʼ íquenu qué nudxiibaʼ Jesús laca laa la? qué zaca diʼ nagana para laanu gácanu casi tobi de cani «jma huaxiéʼ risaca» lade cani ridagulisaanenu (Luc. 9:46-48). Ne pa gúninu zacá jma zacané nga laanu chuʼnu tobi si. Cásica runi bixhoze binni la? Jiobá laaca qué racalaʼdxiʼ chúʼdinde ca xiiñiʼ, sínuque chuʼcaʼ tobi si (Sal. 133:1). Jesús gunabaʼ Bixhoze chuʼ ca discípulo stiʼ tobi si. Xiñee yaʼ. Laabe guniʼbe: «Zacá ganna binni lii biseenda lu naa ne nadxiiu laacabe casi nadxiiu naa» (Juan 17:23). Zacá ni, ora chuʼnu tobi si rusihuínninu dxandíʼ xpinni Cristu laanu. Peru para ganda chuʼnu tobi si, cadi naquiiñeʼ guidúʼyanu ra cuchee xcaadxi xpinni Dios cásica qué ñuni Jesús ni. Laabe bitiidiláʼdxibe stonda binni ne guniʼbe zutiidilaʼdxiʼ Jiobá stóndanu pa gúninu casi rúnibe (biindaʼ Mateo 6:14, 15).
8. Xi zanda guizíʼdinu de ca xpinni Cristu ni maʼ xadxí de cayuni adorarcaʼ Jiobá.
8 Laaca zanda guizíʼdinu stale de ca xpinni Cristu ni maʼ xadxí de zinándacaʼ ejemplu stiʼ Jesús. Laacabe zinándacabe ejemplu stibe ne rúnicabe stipa pur guiénecabe xcaadxi xpinni Cristu ora gucheecaʼ. Ne maʼ biziidicabe ora riácabe binni cadi racanésini laacabe para «cadi ixhacalaʼdxi[cabe] de acané[cabe] ca hermanu ni huaxiéʼ [...] riene», sínuque laaca racaneni ca binni ridagulisaa chuʼcaʼ tobi si ne zucaani laacaʼ guiníʼ íquecaʼ casi riníʼ ique Jesús. Laacabe racaláʼdxicabe chuʼ ca xpinni Cristu galán cásica gucalaʼdxiʼ Pablu chuʼ ca xpinni Cristu de Roma, laabe guniʼbe: «Dios nga runi pur qué ixhacalaʼdxi nu ne rusieche laanu, ne laca laa guni laatu tobi si ra chi nanda tu ejemplu sti Cristu ne óraque irá tu zusisaca tu Dios Bixhoze Jesucristu Señor stinu, ne zuni tu ni juntu casi ñaca tobi si caníʼ» (Rom. 15:1, 5, 6). Zacá ni, rusisácanu Jiobá ora runi adorarnu laabe tobi si.
9. Xiñee caquiiñenu espíritu santu para chinándanu ejemplu stiʼ Jesús.
9 Jesús qué nudxiibaʼ laca laa ne guca nadóʼ, ne guendanadóʼ ca nga tobi de ca guenda ni rudii espíritu santu stiʼ Dios. Nga runi, cadi naquiiñeʼ si guidúʼndanu de Jesús para chinándanu ejemplu stiʼ, sínuque naquiiñeʼ gápanu espíritu santu stiʼ Jiobá para gúninu ni. Guinábanu Jiobá espíritu santu stiʼ ne gúninu stipa pur gápanu ca guenda ni rudiini, purtiʼ ca binni ni napa ca guenda ca «nadxii binni ne nayeche nuu, ne nuu dxí ladxidóʼ. Qué rixhacalaʼdxi stobi, ne qué runiná binni, ne nachaʼhuiʼ. Qué zaree chu de neza sti Dios, ne nadóʼ, ne rapa xpiaʼ» (Gál. 5:22, 23). Pa qué gudxíʼbanu laca laanu ne gácanu nadóʼ casi guca Jesús la? ziuulaʼdxiʼ Bixhózenu ni nuu guibáʼ ni cayúninu.
Guca Jesús nachaʼhuiʼ ne binni
10. Ximodo bisihuinni Jesús guca nachaʼhuiʼ.
10 Sti guenda stiʼ espíritu santu nga guendanachaʼhuiʼ. Jesús qué nusaana de ñaca nachaʼhuiʼ ne binni. Laabe nabé «[sicarú] bichagalú be» guiráʼ ca binni gucalaʼdxiʼ guidxiña laabe (biindaʼ Lucas 9:11). ¡Nabé stale nga ni rizíʼdinu de ejemplu stibe! Ti binni ni nachaʼhuiʼ riá binni, rudii ni napa ne sicarú modo riniʼné binni. Zacá nga guca Jesús. Laabe biabe binni purtiʼ biiyabe «qué ganna ca xi guni ca ne iruti cayaca né laacaʼ. Nuu ca casi dendxu ni qué gapa pastor» (Mat. 9:35, 36).
11, 12. 1) Bizeeteʼ pora bisihuinni Jesús biá binni. 2) Xi zanda guizíʼdinu de ejemplu ni bidúʼyanu lu ca párrafo ca.
11 Peru Jesús cadi biá si binni, sínuque laaca biyúbibe modo gacanebe laacaʼ. Guidúʼyanu ejemplu stiʼ ti gunaa ni maʼ ziné doce iza de caxii rini. Laabe nánnabe lu Ley ni gucuaa Moisés que na qué zanda diʼ chuʼbe lade binni ni nazaaca nin canaʼ tuuxa laabe (Lev. 15:25-27). Peru guiráʼ ni binadiágabe de Jesús ne modo riníʼnebe binni bicaani gunaa que guni cré zusiándabe laa. Sicaríʼ guníʼ ique gunaa que: «Neca xhaba si Jesús can[aʼ], zianda». Ngue runi qué nidxíbibe ne bidxíñabe ra nuu ne gudáʼnabe laa ne óraqueca bidiibe cuenta biándabe.
12 Jesús bidii cuenta guyuu tu gudaʼnaʼ laa ne biyúbibe tu biʼniʼ ni. Zándaca bidxibi gunaa que purtiʼ nanna bicheené Ley que, ngue runi bizuxibi xañeebe ne gudxi laabe xi biʼniʼ. Ñee gudindené Jesús laabe la? Coʼ, Jesús gudixhedxí ladxidoʼbe ne gudxi laabe: «Bianda lu, xiiñeʼ, purti bini cre luʼ. Yanna, sicarú uyé» (Mar. 5:25-34). ¡Nabé galán biʼniʼ sentir gunaa que ora binadiaga ca diidxaʼ sicarú ca!
13. 1) Ximodo bihuinni gadxé guca Jesús de ca fariseu. 2) Ximodo guca Jesús ne ca baʼduhuiiniʼ.
13 Jesús qué ñuni casi biʼniʼ ca fariseu que purtiʼ laacaʼ bicaacaʼ binni guni stale cosa purtiʼ si runi mandarcaʼ (Mat. 23:4). Lugar de ñúnibe zacá, bisihuínnibe nadxiibe binni ora bisiidibe laacaʼ ca ley stiʼ Jiobá. Ca discípulo stibe biiyacaʼ nadxiibe laacaʼ ne biiyacaʼ laabe casi ti xhamígucaʼ (Pro. 17:17; Juan 15:11-15). Dede ca baʼduhuiiniʼ que guyuuláʼdxicaʼ chuʼcaʼ ra nuube ne laabe laacaʼ guyuuláʼdxibe chuʼbe ra nuucaʼ. Qué niníʼdibe nabé nuu xhiiñabe para gucaadiágabe laacaʼ. Ti biaje bisihuinni ca discípulo que risácacaʼ cásica runi ca xaíque yuʼduʼ que ora gucaláʼdxicaʼ nucueezacaʼ ca binni ni ziné xiiñiʼ ra nuu Jesús. Peru laabe qué ñuuláʼdxidibe ni biʼniʼ ca discípulo stibe, ngue runi gúdxibe laacaʼ: «Cadi ucueeza tu ca baʼdu ca. Zaa gueeda cabe ra nuaaʼ purti [...] irá casi laacabe» ziuu lu Reinu stiʼ Dios. Ne biquiiñebe ca baʼduhuiiniʼ que para gusiidibe ca discípulo stibe ti cosa nabé risaca: «Iruti qué ziuu ra runi mandar Dios pa qué guni cre Dios casi runi cre ti baʼduʼ» (Mar. 10:13-15).
14. Xi ribeendú ca baʼduhuiiniʼ ca ora guizaalaʼdxiʼ ca binni ridagulisaa laacaʼ.
14 Guníʼ ique ni biʼniʼ sentir ca baʼduhuiiniʼ que dxi maʼ huaniisicaʼ, bietenaláʼdxicaʼ bidxiibalunaʼ Jesús laacaʼ ne guluube ndaayaʼ laacaʼ (Mar. 10:16). Ca dxi stinu riʼ, laaca nabé rizaalaʼdxiʼ ca binnigola ca baʼduhuiiniʼ ni nuu ndaaniʼ xquidxi Dios ne rápacabe laacaʼ ne zacaca runi xcaadxi binni ridagulisaa, ne ora guiniisicabe ziéchecabe ora guietenaláʼdxicabe ni. Ne ni jma risaca nga rudii ca baʼduhuiiniʼ ca cuenta napa xquidxi Jiobá espíritu stiʼ.
Gácanu binni nachaʼhuiʼ ndaaniʼ ti guidxilayú malu
15. Xiñee qué ridxagayaanu purtiʼ cadi nachaʼhuiʼ binni yanna.
15 Ca dxi stinu riʼ, stale binni na qué gapa tiempu para gacané binni, ne pur nga nabé ricá íquecaʼ guyúbicaʼ puru si para laacaʼ ne zacá ridúʼyanu ni guiráʼ dxi ra scuela, ra dxiiñaʼ, lu calle ne ora maʼ zigucheechenu diidxaʼ. Nécapeʼ qué riuuláʼdxinu modo laacabe la? cadi naquiiñeʼ diʼ guidxagayaanu nga. Ne Jiobá gudxi Pablu gucaa zabani cani dxandíʼ xpinni Cristu lade binni ni «zuyubi [...] para laa si» ne «qué zanaxhii [...] binni» lu ca últimu dxi riʼ (2 Tim. 3:1-3).
16. Ximodo zanda gusihuínninu nacháʼhuinu lade ca binni ridagulisaa.
16 ¡Nabé gadxepeʼ nga modo nabani guiráʼ ca xpinni Cristu! Cumu guiranu rinándanu ejemplu stiʼ Jesús la? racanenu chuʼ ca xpinni Cristu tobi si. Ximodo rúninu ni yaʼ. Rúninu ni ora racanenu ne riguʼnu gana guiráʼ ca xpinni Cristu ni huará o ni napa xiixa guendanagana. Nécapeʼ zeʼ dxi jma cadxaagalú binni guendanagana lu ca últimu dxi riʼ la? maca xadxí nga nabani binni zacá. Dede dxiqué maca huadxaagalú ca xpinni Cristu guendanagana cásica yanna. Ngue runi gupa xidé gúcacabe nachaʼhuiʼ ora gucanécabe ca binni que. Pablu bidii conseju riʼ ca xpinni Cristu de dxiqué: «Lagacané cani cadxibi, ne cani caʼru uzuhuaa chaahui, ne cadi ixhacalaʼdxi tu laacaʼ» (1 Tes. 5:14). Ca dxi stinu riʼ laaca naquiiñeʼ gusihuínninu nacháʼhuinu.
17, 18. Ximodo zanda gácanu nachaʼhuiʼ casi guca Jesús.
17 Nabé sicarú modo bidxaagalú Jesús ca binni ni yenanda laa, laanu laaca naquiiñeʼ gúninu zacá ne xcaadxi xpinni Cristu cásica ora ñúnibe ni laabe. Naquiiñeʼ guizaaláʼdxinu guirácabe de guidubi ladxidoʼno, casi cani maʼ xadxí de runibiaʼnu laacaʼ ne zaqueca cani nacubi cayunibiaʼnu (3 Juan 5-8). Jesús biyubi modo gucané binni ne bisihuínnibe biabe laacaʼ ora gucanebe laacaʼ. Naquiiñeʼ chinándanu ejemplu stibe ne uguʼnu gana cani nuu gaxha de laanu (Isa. 32:2; Mat. 11:28-30).
18 Laaca zanda gusihuínninu nacháʼhuinu ora gacanenu xcaadxi binni. Peru naquiiñeʼ guyúbinu modo gúninu ni ne cadi ora ganda si. Pablu guníʼ sicaríʼ: «Laganaxhii saa casi enda biʼchiʼ, cada tobi usisaca stobi ne cadi laca laa» (Rom. 12:10). Ximodo zanda gúninu zacá yaʼ. Zúninu ni ora chinándanu ejemplu stiʼ Cristu, ne ora gusihuínninu «nadxii[n]u binni de idubi ladxidóʼ do[no]» (2 Cor. 6:6). Sicaríʼ guníʼ apóstol ca modo naquiiñeʼ gannaxhiinu: «Pa nadxii lu stobi la? qué zadxiichi né gá lu laa, ne ziá lu laa. Pa nadxii lu stobi la? qué zuyubu tidu lú, ne qué zuchá lu enda naróʼ stiuʼ lú, ne qué zuʼnu lii nandxóʼ» (1 Cor. 13:4). Lugar de guidaʼnu xiana ne tuuxa xpinni Cristu la? naquiiñeʼ chinándanu conseju riʼ: «Lagaca nachaʼhui ne stobi, ne lailaselaʼdxi saa. Laguni perdonar saa casi bini perdonar Dios laatu ra guca né tu Cristu tobi si» (Efe. 4:32).
19. Xi zabeendunu pa gácanu binni nachaʼhuiʼ.
19 Pa gusihuínninu nácanu binni nachaʼhuiʼ lu guiráʼ ni gúninu ne guidxaagalunu binni galán la? zacaanu stale ndaayaʼ. Zacané espíritu santu ca binni ridagulisaa ne qué ziuu xiixa ni guchiiñaʼ espíritu ca ne zucaani laanu gápanu ca guenda ni rudiini. Pa chinándanu ejemplu stiʼ Jesús ne gacanenu xcaadxi xpinni Cristu guni zacaca la? jma ziuu ca binni ridagulisaa tobi si ne ziuucaʼ nayecheʼ ne laaca zusiéchenu Jiobá. Nga runi, cadi gusaana de gácanu binni nadóʼ ne nachaʼhuiʼ cásica modo guca Jesús.
Ñee zanda gusiéneluʼ ni la?
• Ximodo bisihuinni Jesús guca nadóʼ ne qué nudxiibaʼ laca laa.
• Ximodo bisihuinni Jesús guca nachaʼhuiʼ.
• Ximodo zanda gusihuínninu nácanu binni nadóʼ ne nachaʼhuiʼ neca nabáninu ndaaniʼ guidxilayú malu riʼ.
[Dibuju/foto ni zeeda lu yaza 8]
Pa ti xpinni Cristu maʼ cadi naguídxipeʼ nuu fe stiʼ, casi bizaaca Pedru que, ñee zacanenu laabe la?
[Dibuju/foto ni zeeda lu yaza 10]
Xi zanda gúniluʼ para gacaneluʼ ca binni ridagulisaa gácacaʼ nachaʼhuiʼ