Gusisácanu dxiiñaʼ ni nápanu lade ca binni ridagulisaa
«Cada ndaa gudixhe chaahui Dios lu cuerpu modo ucalaʼdxiʼ.» (1 COR. 12:18)
1, 2. 1) Xiñee zanda guininu guiráʼ ca xpinni Cristu risaca dxiiñaʼ ni rúnicaʼ lade ca binni ridagulisaa. 2) Xi chiguicábinu lu tema riʼ.
DEDE ca dxi stiʼ Israel que riquiiñeʼ Jiobá ca neza binni ridagulisaa para gapa ca xpinni ne gabi laacabe xi naquiiñeʼ gúnicabe. Casi despué de biʼniʼ ganar ca israelita que guidxi Hai, «biindaʼ Josué nadipaʼ guiráʼ ni cá lu ley, casi cá lu libru stiʼ ley, ra caníʼ de ca ndaayaʼ ni zacaacabe ora gúnicabe ni na ley ne ca guendananá ni zápacabe pa qué gúnicabe ni na ley» (Jos. 8:34, 35).
2 Lu primé siglu que gudxi apóstol Pablu Timoteu ca binni ridagulisaa nga «lidxi Dios» (NM), ne «laacabe cayapa cabe stiidxa be ndaani guidxilayú riʼ, ne cucueeza cabe cani rucaa lú ni» (1 Tim. 3:15). Ca dxi stinu riʼ «lidxi Dios» nga guiráʼ cani dxandíʼ xpínnibe ni nuu lu guidubi naca Guidxilayú riʼ. Lu capítulo 12 stiʼ primé carta ni bicaa Pablu pur espíritu santu ra nuu ca xpinni Cristu de Corinto que, bichaagabe ca neza binni ridagulisaa casi cuerpu stiʼ ti binni. Laabe guniʼbe neca gadxé gadxé ni runi cada ndaa xcuerpu binni la? guirani riquiiñecani. Sicaríʼ bicaabe: «Cada ndaa gudixhe chaahui Dios lu cuerpu modo ucalaʼdxiʼ». Ne laaca guniʼbe «ca ndaa ni jma huaxiéʼ risaca la? jma pe rusichaʼhui nu [o, rusisácanu] laacaʼ» (1 Cor. 12:18, 23). Zaqueca nga dxiiñaʼ ni napa ti xpinni Cristu ndaaniʼ «lidxi Dios», cadi jma risaca diʼ ni o huaxiéʼ risaca ni que ni runi xcaadxi xpinni Dios, sínuque gadxé si ni. Ximodo zanda gánnanu xi dxiiñaʼ nápanu lade ca binni ridagulisaa ne gusihuínninu rusisácanu ni yaʼ. Xi zacané cada tobi de laanu gánnanu xi dxiiñaʼ nápanu lade ca binni ridagulisaa yaʼ. Xi zanda gúninu «ti guʼya cabe ze dxi ziyene [n]u jma» yaʼ (1 Tim. 4:15).
Ximodo rusihuínninu rusisácanu xhiiñanu
3. Ximodo zanda gánnanu xi dxiiñaʼ nápanu lade ca binni ridagulisaa ne gusihuínninu rusisácanu ni.
3 Ti modo zanda gánnanu xi dxiiñaʼ nápanu lade ca binni ridagulisaa ne gusihuínninu rusisácanu ni nga gacanenu «mozo ni nuu xpiaani ne ni runi jneza» ne Grupu ni Zaniruʼ stiʼ ne stale gana (biindaʼ Mateo 24:45-47). Nga runi, naquiiñeʼ guiduʼyaʼ chaahuinu pa dxandíʼ rinándanu ni rabi mozo ni nuu xpiaaniʼ ca laanu. Casi lu ca iza ni maʼ gudiʼdiʼ ca la? huayabi mozo ca laanu ximodo gácunu lari ne guzucháʼhuinu, ora gúninu xiixa casi chizanu o modo iquiiñenu Internet. Ñee rinándanu ca conseju ni rudiicabe laanu para cadi guixélenu de Dios la? Laaca huayábicabe laanu quíxhenu ti dxi para guni adorarnu Dios ne binnilídxinu. Ñee cayúninu ni huayábicabe laanu gúninu ca la? Ñee cabeenu tiempu para gúninu ni la? Ne pa caʼruʼ guichagananu, ñee caquiiñenu tiempu stinu para guidúʼndanu Stiidxaʼ Dios la? Pa gúninu ni na mozo ni nuu xpiaaniʼ ne ni runi jneza ca zaguu ndaayaʼ Jiobá laanu ne binnilídxinu.
4. Xi naquiiñeʼ gánnanu ora quixhe íquenu gúninu xiixa ni riuuláʼdxinu.
4 Zándaca nuu tu guiníʼ ique cada tobi nga guʼyaʼ ximodo gacu lari ne guzuchaahuiʼ, ne zaqueca cuí xi guni o ni guʼyaʼ. Peru ca xpinni Cristu ni rusisaca dxiiñaʼ ni nápacaʼ lade ca binni ridagulisaa la? nánnacaʼ ora quixhe íquecaʼ gúnicaʼ xiixa cadi naquiiñeʼ si gúʼyacaʼ xii nga ni jma riuuláʼdxicaʼ lu cani maʼ guninu ca. Ni jma naquiiñeʼ guiníʼ íquecabe nga ximodo ruuyaʼ Jiobá ni, ne lu Biblia zeeda ximodo riníʼ íquebe de laacani. Ni zeeda lu Stiidxaʼ Dios ca naquiiñeʼ gácani casi «ti biaaniʼ para ñee[nu]» ne casi «ti biaaniʼ para neza riza[nu]» (Sal. 119:105). Laaca naquiiñeʼ gánnanu xi zabeendunu ne cani quixhe íquenu gúninu ca ora chigúninu xhiiñaʼ Dios ne xi zaníʼ ique binni de laanu neca xpinni Jiobá laacabe o coʼ (biindaʼ 2 Corintios 6:3, 4).
5. Xiñee cadi jneza nga gácanu casi cani qué riuulaʼdxiʼ chuʼ tu guni mandar laa.
5 «Espíritu ni runi dxiiñaʼ ndaaniʼ ladxidóʼ cani qué ruzuubaʼ stiidxaʼ Dios» nuuni guiráʼ ladu casi bi ni ricaanu (Efe. 2:2). Espíritu o modo riníʼ ique binni zanda gucaani laanu guiníʼ íquenu cadi caquiiñenu gabi xquidxi Jiobá laanu xi naquiiñeʼ gúninu. Nin tobi de laanu qué racaláʼdxinu gácanu casi Diótrefes ni qué niná nulabi ca conseju ni bidii apóstol Juan laa (3 Juan 9, 10). Nga runi, cadi jneza diʼ nga gácanu casi cani qué riuulaʼdxiʼ chuʼ tu guni mandar laa. Qué chuʼ dxi guininu o gúninu xiixa ni gusihuinni qué nanu guzúʼbanu stiidxaʼ mozo ni nuu xpiaaniʼ (Núm. 16:1-3). Lugar de gúninu nga la? naquiiñeʼ gusisácanu dxiiñaʼ ni cayuninenu mozo ni nuu xpiaaniʼ ca ne gúninu stipa pur guzúʼbanu stiidxaʼ ne gúninu ni na ca hombre ni zaniruʼ lade ca binni ridagulisaa ra riuunu (biindaʼ Hebreos 13:7, 17).
6. Xiñee naquiiñeʼ guiduʼyaʼ chaahuinu ximodo nuunu.
6 Xiruʼ zanda gúninu para gusihuínninu rusisácanu dxiiñaʼ ni nápanu lade ca binni ridagulisaa yaʼ. Naquiiñeʼ guiduʼyaʼ chaahuinu ximodo nuunu ne guidúʼyanu pa cayúninu stipa pur gusihuínninu «rusisaca[nu] xhiiña[nu]» ne rusisácanu Jiobá (Rom. 11:13). Nuu tu zanda gaca precursor regular. Xcaadxi xpinni Cristu zanda gácacaʼ misioneru, binnigola ni riganna ca binni ridagulisaa o betelita. Stale tu racané ra cabí Yoo stiʼ Reinu. Ne nécapeʼ stale de ca xpinni Cristu qué zanda diʼ gúnicaʼ xhiiñaʼ Jiobá casi maʼ bizéʼtenu ca la? rúnicabe stipa pur gacanécabe binnilídxicabe chuʼcaʼ galán ne Jiobá ne guiráʼ semana rucheechecabe diidxaʼ ne stale gana (biindaʼ Colosenses 3:23, 24). Naquiiñeʼ gánnanu pa gúninu ni na Jiobá de guidubi ladxidoʼno la? guiráʼ ora zápanu ni gúninu ndaaniʼ xquídxibe.
Cani zacané laanu gánnanu xi dxiiñaʼ nápanu lade ca binni ridagulisaa
7. Ora guidúʼyanu ximodo nuunu, ximodo zacané nga laanu gánnanu xi dxiiñaʼ zanda gúninu ndaaniʼ xquidxi Jiobá.
7 Naquiiñeʼ guidúʼyanu ximodo nuunu, purtiʼ laaca zacané nga laanu gánnanu xi zanda gúninu lu xhiiñaʼ Jiobá. Casi nuu dxiiñaʼ ni runi ti hombre ndaaniʼ xquidxi Dios la? maʼ gadxé ni de ni runi ti gunaa. Xcaadxi cosa casi guendanayooxhoʼ ne guendahuará ca laaca zucaacani laanu guidúʼyanu xi zanda gúninu lu xhiiñaʼ Jiobá. Proverbios 20:29 na: «Ni galán stiʼ cani nahuiiniʼ ca nga stipa sticaʼ», ne «ni galán stiʼ ca binnigola ca nga guicha toope sticaʼ». Casi maʼ bidúʼyanu ca, cani nahuiiniʼ ca nga cani zanda gúnicaʼ jma lu xhiiñaʼ Dios purtiʼ nápacaʼ jma stipa, yanna cani maʼ nagola ca la? risácacaʼ purtiʼ nácacaʼ binni nuu xpiaaniʼ ne nánnacaʼ stale pur maʼ xadxí nuucaʼ ndaaniʼ xquidxi Dios. Peru guiranu naquiiñeʼ gánnanu intiica guenda ugaandanu ndaaniʼ xquidxi Dios rugaandanu ni purtiʼ nadxii Dios laanu (Hech. 14:26; Rom. 12:6-8).
8. Ora guiníʼ íquenu xi racaláʼdxinu, ximodo zacané nga laanu gánnanu xi dxiiñaʼ zanda gúninu ndaaniʼ xquidxi Jiobá.
8 Peru nuu sti cosa ni zacané laanu guidúʼyanu xi zanda gúninu lade ca binni ridagulisaa. Guidúʼyanu ni lu ejemplu stiʼ chupa xpinni Cristu ne béndacaʼ. Guirópacabe tobi si modo nabánicabe. Bixhózecabe ne jñaacabe riguucaʼ gana laacabe gácacabe precursora regular guiluxesícabe scuela. Peru biluxesícabe scuela stícabe dxi maʼ nápacabe 18 iza la? tobi de laacabe guca precursora, peru stobi que biyubi ti dxiiñaʼ ni rúnicabe guidubi dxi. Xiñee gadxé gadxé ni gulícabe gúnicabe yaʼ. Purtiʼ cadi ngueca diʼ nga ni racaláʼdxicabe gúnicabe. Ñee cadi dxandíʼ stale de laanu rúninu ni rinabaʼ ladxidoʼno laanu la? Nga runi, naquiiñeʼ guiníʼ ique chaahuinu xii nga ca guenda ni racaláʼdxinu ugaandanu ndaaniʼ xquidxi Dios. Ñee zuchaʼnu modo nabáninu para gúninu jma lu xhiiñaʼ Jiobá pa caquiiñeʼ gúninu ni la? (2 Cor. 9:7.)
9, 10. Xi naquiiñeʼ gúninu pa huaxiéʼ riuuláʼdxinu gúninu jma lu xhiiñaʼ Jiobá.
9 Laga pa huaxiéʼ stipa rúninu pur gúninu xhiiñaʼ Dios lade ca binni ridagulisaa ne ni riaadxaʼ si laanu nga chuuláʼdxinu gúninu jma lu xhiiñaʼ Dios yaʼ. Lu carta ni bicaa Pablu ra nuu ca xpinni Cristu de Filipos guniʼbe sicaríʼ: «Dios cayacané laatu uluiʼlaʼdxi tu guni tu ni na, ne zaqueca ti ganda guni tu ni». Ca diidxaʼ ca culuíʼcani laanu zanda gacané Jiobá laanu guiale de ladxidoʼno gúninu jma lu xhiiñabe (Fili. 2:13; 4:13).
10 Ñee cadi dxandíʼ nga nga ni naquiiñeʼ guinábanu laabe la? Zacá biʼniʼ rey David, laabe biʼniʼ orarbe sicaríʼ: «Biluíʼ naa ca neza stiluʼ, Jiobá; bisiidiʼ naa [sayaʼ lu] ca neza stiluʼ. Buluíʼ naa ni dxandíʼ ne bisiidiʼ naa, purtiʼ lii nga Dios stinneʼ ni rulá naa. Guidubi dxi lii nga cabezaʼ gacaneluʼ naa» (Sal. 25:4, 5). Laanu laaca zanda guinábanu Jiobá gacané laanu guiale de ladxidoʼnoʼ gúninu ni riuulaʼdxiʼ. Ora guiníʼ íquenu pabiáʼ rusisaca Jiobá ne Xiiñiʼ dxiiñaʼ ni rúninu la? rucaa nga laanu gudiʼnu xquíxepeʼ laacabe (Mat. 26:6-10; Luc. 21:1-4). Ne cumu rudiʼnu xquíxepeʼ laacabe la? zucaa nga laanu guinábanu Dios gacané laanu guiale de ladxidoʼnoʼ gúninu jma lu xhiiñabe. Galán chinándanu ejemplu stiʼ Isaías. Ora gunabadiidxaʼ Jiobá laabe: «Tu guseendaʼ, ne tu cheʼ pur laanu yaʼ», óraque bicábibe: «¡Raríʼ nuaaʼ! Biseendaʼ naa» (Isa. 6:8).
Ximodo gúninu jma lu xhiiñaʼ Dios
11. 1) Xiñee naquiiñeʼ guni ca hombre stipa para gúnicaʼ jma dxiiñaʼ lade ca binni ridagulisaa. 2) Xi naquiiñeʼ guni ti xpinni Cristu para gudiicabe laa jma dxiiñaʼ lade ca binni ridagulisaa.
11 Lu iza dxiiñaʼ stiʼ 2008 guyuunisa 289,678 binni lu guidubi naca Guidxilayú, nga rusihuinni nabé caquiiñeʼ jma hombre ni gapa ca binni ridagulisaa. Yanna, xi naquiiñeʼ guni ca hombre ni nuu lade ca binni ridagulisaa ca yaʼ. Laacabe naquiiñeʼ gúnicabe ni canabaʼ Biblia guni cani racalaʼdxiʼ gaca siervu ministerial ne binnigola (1 Tim. 3:1-10, 12, 13; Tito 1:5-9). Para ugaandacabe ca dxiiñaʼ ca la? cadi naquiiñeʼ gusaanacabe de gucheechecabe diidxaʼ, gúnicabe ca dxiiñaʼ ni ricaacabe lade ca binni ridagulisaa, ne ora guicábicabe naquiiñeʼ guiníʼcabe xiixa ni gacané ca binni ridagulisaa ne guizaaláʼdxicabe xcaadxi xpinni Cristu. Pa gúnicabe zacá la? zusihuínnicabe rusisácacabe dxiiñaʼ ni rúnicabe lade ca binni ridagulisaa.
12. Ximodo zanda gusihuinni cani nahuiiniʼ riuuláʼdxicaʼ gúnicaʼ xhiiñaʼ Dios.
12 Xi zanda guni ca hombre ni nahuiiniʼ ca, para ugaandacaʼ xiixa dxiiñaʼ lade ca binni ridagulisaa yaʼ. Naquiiñeʼ gunibiáʼ chaahuicabe Stiidxaʼ Dios ti gudii «enda biaani laa[cabe] ne usiene laa[cabe]» (Col. 1:9). Para nga naquiiñeʼ guʼndaʼ chaahuicabe Biblia ne guicábicabe lu ca guendaridagulisaa ca. Laaca naquiiñeʼ gúnicabe ni canabaʼ Stiidxaʼ Dios laacabe para ganda gúnicabe jma lu xhiiñaʼ Dios, zacá nga casi ora ñuucabe ra «puerta» ni zuxaleʼ ndaga ra nuu stale dxiiñaʼ ni gúnicabe (1 Cor. 16:9). Pa jma gusisácacabe gúnicabe xhiiñaʼ Dios lu xquendanabánicabe la? ziuucabe nayecheʼ ne zacaacabe stale ndaayaʼ (biindaʼ Eclesiastés 12:1).
13, 14. Ximodo zanda gusihuinni ca gunaa rusisácacaʼ dxiiñaʼ ni nápacaʼ lade ca binni ridagulisaa.
13 Ca gunaa xpinni Cristu zanda gusihuínnicaʼ nabé riéchecaʼ gúnicaʼ ni na ca diidxaʼ ni zeeda lu Salmo 68:11: «Jiobá peʼ caníʼ; nabé stale gunaa nga cucheeche ca diidxaʼ nacubi ne galán ca». Laacabe zanda gusihuínnicabe rusisácacabe ni na ca diidxaʼ ca ora gacanécabe binni gaca xpinni Cristu (Mat. 28:19, 20). Ora rucheechecabe diidxaʼ ne stale gana neca gusaanacabe de gúnicabe cani riuuláʼdxicabe la? rusihuínnicabe rusisácacabe dxiiñaʼ ni nápacabe lade ca binni ridagulisaa.
14 Pablu bicaa ca diidxaʼ riʼ ra nuu Tito: «Zaqueca bisiidi ca hermana ni ma nagola sa modo naquiiñe sa ca xpinni Dios. [...] [U]siidi ca ni jneza pur modo ibani caʼ, para guʼya ca gunaa ni nahuiini ruʼ, ti ganaxhii ca xheela ca ne ca xiiñi caʼ, cuʼ xpiaani caʼ ne guiaana ca para si xheela caʼ, guni ca xhiiña ca jneza, gaca ca nachaʼhui ne binni, ne uzuuba ca stiidxa xheela caʼ, ti qué gapa binni xi pur iníʼ stiidxa Dios» (Tito 2:3-5). Casi maʼ bidúʼyanu ca, guiráʼ gunaa xpinni Cristu ni maʼ huaniisi zanda gacanécabe xcaadxi xpinni Cristu gúnicaʼ ni jneza. Laacabe runi respetárcabe ca hermanu ni naca xaíque lade ca binni ridagulisaa, ne riguixhe íquecabe gúnicabe ni jneza ora gúnicabe xiixa ni riuuláʼdxicabe, casi chizácabe ne ora cuícabe lari ni gácucabe ne guzuchaahuicabe. Zacá rudiicabe ti ejemplu nabé sicarú ne rusihuínnicabe rusisácacabe dxiiñaʼ ni nápacabe lade ca binni ridagulisaa.
15. Xi zanda guni ca gunaa ni caʼruʼ guichaganáʼ para cadi guni sentircaʼ nuucaʼ stúbicaʼ.
15 Nuu tiru zándaca gaca nagana para ca gunaa ni caʼruʼ guichaganáʼ gánnacaʼ ximodo zanda gacanecaʼ ca binni ridagulisaa. Sicaríʼ guníʼ ti gunaa xpinni Cristu: «Nuu biaje runeʼ sentir nuaaʼ stubeʼ». Ora gunabadiidxacabe laabe xi rúnibe ora runi sentirbe zacá, guniʼbe: «Runeʼ orar Dios ne ruundaʼ Stiidxabe, nga racané naa gannaʼ napaʼ ti dxiiñaʼ ndaaniʼ xquidxi Dios. Ruyubeʼ xiixa tema ni gacané naa gannaʼ xi runi sentir Jiobá pur naa, ne de racá ruyubeʼ ximodo gacaniáʼ ca binni ridagulisaa. Nga racané naa cadi guiníʼ ique ximodo nuaaʼ». Sicaríʼ gudxi Jiobá David lu Salmo 32:8: «Dxandipeʼ zudieeʼ conseju lii ne qué zaxhaluáʼ luguialuʼ». Rihuinni dxíchica rizaalaʼdxiʼ Jiobá ca xpinni, ne ládecabe nuu ca gunna ni caʼruʼ guichaganáʼ. Laabe zacanebe guiranu gánnanu gunáʼ nga dxiiñaʼ ni nápanu ndaaniʼ xquídxibe.
Cadi gusaanaluʼ dxiiñaʼ ni nápaluʼ lade ca binni ridagulisaa
16, 17. 1) Xiñee jneza bíninu gucuaanu invitación ni bidii Jiobá laanu para chuʼnu ndaaniʼ xquidxi. 2) Xi naquiiñeʼ gúninu para cadi gunítinu dxiiñaʼ ni nápanu ndaaniʼ xquidxi Jiobá.
16 Cumu nabé nadxii Jiobá binni la? laabe nga gulídxibe cada tobi de ca xpínnibe ne rudiibe lugar chuʼcaʼ galán ne laabe. Sicaríʼ guníʼ Jesús: «Iruti zanda gueeda ra nuaaʼ, pa qué cuidxi [Bixhozeʼ] laa» (Juan 6:44). Lade ca millón de binni ni nuu yanna riʼ, laanu nga ni maʼ biʼniʼ invitar Dios para chuʼnu ndaaniʼ xquidxi. Ne ni jma jneza bíninu nga gucuaanu invitación ni bidii Dios laanu, purtiʼ nga huayacané laanu gánnanu xi pur nabáninu. ¡Guizáʼ nayecheʼ riuʼnu purtiʼ nápanu ti dxiiñaʼ lade ca binni ridagulisaa!
17 Sicaríʼ guníʼ hombre bicaa salmo que: «Jiobá, nadxieeʼ yoo ra nabézaluʼ». Ne despué guniʼbe: «Zuzuhuaa dxiichiʼ ñee ti lugar ra napampa; lade stale binni dagulisaa zusisacaʼ Jiobá» (Sal. 26:8, 12). Dios ni dxandíʼ ca napa ti dxiiñaʼ ni guni cada tobi laanu ndaaniʼ xquidxi. Cadi gusaananu de chinándanu ni gabi xquidxi Dios laanu ne cadi gusaananu de gúninu xhiiñabe; zacá qué ziuu dxi gusaananu de gúninu dxiiñaʼ risaca ni nápanu lade ca binni ridagulisaa.
Rietenalaʼdxuʼ la?
• Xiñee zanda guininu cada tobi de ca xpinni Cristu napa ti dxiiñaʼ lade ca binni ridagulisaa.
• Ximodo zanda gusihuínninu rusisácanu dxiiñaʼ ni nápanu ndaaniʼ xquidxi Dios.
• Xii nga cani zacané laanu gánnanu xi dxiiñaʼ nápanu lade ca binni ridagulisaa.
• Ximodo zanda gusihuinni cani nahuiiniʼ ne cani huaniisi rusisácacaʼ dxiiñaʼ ni nápacaʼ ndaaniʼ xquidxi Dios.
[Dibuju/foto ni zeeda lu yaza 16]
Xi naquiiñeʼ guni ca hombre ca para gápacaʼ jma dxiiñaʼ lade ca binni ridagulisaa
[Dibuju/foto ni zeeda lu yaza 17]
Xi zanda guni ca gunaa para gusihuínnicaʼ rusisácacaʼ dxiiñaʼ ni nápacaʼ lade ca binni ridagulisaa