Ni rinabadiidxaʼ cani ruundaʼ

Ñee naquiiñeʼ guchii ca gunaa xpinni Cristu íquecaʼ pa chigutiixhicaʼ xiixa libana lu diidxaʼ seña ra ridagulisaanu o lu ca guendaridagulisaa naroʼbaʼ ca la?

Ni dxandíʼ nga guiráʼ gunaa naquiiñeʼ guchii ique ora guni xiixa dxiiñaʼ ni naquiiñeʼ guni xheelaʼ o tuuxa xpinni Cristu ni nuu lade ca binni ridagulisaa. Zacá rihuínnini lu conseju ni bidii apóstol Pablu riʼ: «Tutiisi gunaa iníʼ né Dios o güi né binni ni biluíʼ Dios laa xie ique la? rusituí lú xheelaʼ». Xiñee yaʼ. Purtiʼ «hombre nga xaíque sti gunaa» (1 Cor. 11:3-10). Zacá nga laani, ti gunaa ni iquiiñeʼ ti lari ni guihuinni galán para guchii ique la? rusihuinni zinanda modo gudixhe Dios gaca mandar lade ca binni ridagulisaa (1 Tim. 2:11, 12).a

Ñee laaca naquiiñeʼ chinanda ca gunaa conseju ca ora gutiixhicaʼ libana ni gudii ti xpinni Cristu lu sti diidxaʼ la? Ora guni ti gunaa xpinni Cristu zacá qué riníʼ diʼ nga laabe cusiidibe, sínuque cayábisibe binni ni caníʼ ni cudii libana ca. Zacá nga rúnicabe ora rutiixhicabe xiixa diidxaʼ ni riníʼ binni, cani cucaadiaga ca jma nga ruuyadxícabe ni cudii libana ca peru zaqueca rucaadiágacabe ni cutiixhi libana ca. Nga runi ca gunaa xpinni Cristu ni gutiixhi xiixa libana la? cadi laadicabe nga cani jma ruuyadxí cani rucaadiaga. Nuu biaje zanda guuyadxícabe ni cudii libana ca o dede zanda cuícabe para gúnicabe ni. Pur ni maʼ guninu ca rihuinni cadi naquiiñeʼ guchiicabe íquecabe. Peru maʼ gadxé nga ora gutiixhicabe xiixa libana lu diidxaʼ seña.

Casi lu diidxaʼ seña la? ca xpinni Dios riquiiñeʼ ca cosa ni nacubi caree casi ca pantalla naroʼbaʼ, ne luni rihuinni ni cutiixhi diidxaʼ ca, nga runi jma nga ruuyacabe binni ca luni que ni cudii libana ca. Pur nga la? ca gunaa xpinni Cristu ni gutiixhi diidxaʼ seña ca naquiiñeʼ guchiicaʼ íquecaʼ, zacá zusihuínnicabe hombre ca nga ni cusiidiʼ ne laacabe cayacanésicabe.

Yanna, ñee laaca zuchii ti gunaa xpinni Cristu ique ora gutiixhi diidxaʼ lu Scuela stiʼ cani Rucheeche Diidxaʼ, ora gutiidicabe lu plataforma ximodo guireeche diidxaʼ ne ora guicábicabe lu Guendaridagulisaa ra Riuundaʼ Biblia, lu Guendaridagulisaa stiʼ Dxiiñaʼ Stinu o ra guiuundaʼ Torre stiʼ ni rapa la? Nuu ora cadi caquiiñeʼ diʼ guchii ti gunaa ique purtiʼ cani cayuuyaʼ laabe zudiicaʼ cuenta cadi laadibe nga cayúnibe guendaridagulisaa ca. Casi pa gutiixhibe ni guicabi tuuxa binni, gudii tuuxa gunaa libana o cani gutiidiʼ ximodo guireeche diidxaʼ lu plataforma la? cadi caquiiñepeʼ guchiibe íquebe. Peru naquiiñeʼ guchiibe íquebe ora ti hombre xpinni Cristu gudii xiixa libana ne ora guiuundaʼ Torre stiʼ ni rapa ne ora gaca Guendaridagulisaa ra Riuundaʼ Biblia ne ora gutiixhicabe ca diidxaʼ riuundaʼ. Zándaca ora maʼ cayaca guendaridagulisaa ca gábicabe laabe gutiixhibe lu diidxaʼ seña ni guiníʼ ti xpinni Cristu, casi tuuxa hombre, gunaa, cani nahuiiniʼ ne ca binnigola. Pur nga la? zándaca jma galán guchiibe íquebe lu guidubi guendaridagulisaa ca.

[Cani cá ñee yaza]