Ximodo riquiiñeʼ Jiobá espíritu santu stiʼ para guni ni naguixhe ique

«Zacá zaca stiidxaʼ ni guiree ruaa [...] dxandíʼ zácani purtiʼ para nga biseendaʼ ni.» (ISA. 55:11)

1. Bidii ti ejemplu ni gusihuinni gadxé nga ora quixhe binni ximódopeʼ ugaanda xiixa ni maca gudixhe ique ne gadxé nga ora guchaa binni stale cosa para ugaanda guni ni.

BIXHUIʼLÚ chupa hombre ni rusá carru ne cayuucaʼ listu para checaʼ viaje sticaʼ. Tobi de laacabe caguixhe chaahuiʼ xi neza cheʼ para chindá ra racalaʼdxiʼ ne qué liica zuchaabe de neza para chindabe ra racaláʼdxibe. Stobi que laaca nanna paraa racalaʼdxiʼ chindá, peru laabe nánnabe nuu xcaadxi modo para chindabe raqué ne pa gápabe xiixa guendanagana la? zacaabe sti neza para chindabe. Ejemplu ca cusihuinni gadxé nga ora naguixhe tuuxa ximódopeʼ guni xiixa ne qué zuchaabe ni, ne gadxé nga ora guchaa tuuxa modo gudixhe gaca xiixa para ugaanda ni maca gudixhe ique pa qué ganda gaca ni ti modo.

2, 3. 1) Xiruʼ nga chigaca ora guni Dios ni naguixhe ique, ne xi biʼniʼ Jiobá ora bicaalú Adán ne Eva laa. 2)  Xiñee naquiiñeʼ guʼyaʼ chaahuinu modo cayuni Jiobá ni naguixhe ique.

² Para guni Jiobá ni na, qué riguixhedibe xi guiráʼ naquiiñeʼ gúnibe sin guchaabe cani, sínuque chaahuidugá maʼ ziyuuyabe ximodo nga jma jneza gaca ni naguixhe íquebe (Efe. 3:11). Ni racaláʼdxibe gúnibe nga ni maca gudixhe íquebe dede primé que: gaca Guidxilayú riʼ ti paraísu ne guibani binni sin qué chuʼ dxi gati ne chuʼ nayecheʼ, ne sin donda ne gapa guendariuudxi (Gén. 1:28). Dxi bichee Adán ne Eva, gupa xidé gudixhe Jiobá xcaadxi cosa ni zacané gaca ni maca gudixhe ique (biindaʼ Génesis 3:15). Jiobá gudixhe gapa xheelaʼ ti xiiñiʼ, ne xiiñiʼ gunaa ca nga chigunitilú Binidxabaʼ, ángel malu ni bizulú bicaalú Dios que, ne zuni chaahuiʼ guiráʼ ra bininá Binidxabaʼ (Heb. 2:14; 1 Juan 3:8).

³ Gastiʼ xiixa guibáʼ nin lu Guidxilayú ni gucueeza Jiobá de guni ni racalaʼdxiʼ (Isa. 46:9-11). «Dxandíʼ zácani» (Isa. 55:10, 11.) Xiñee yaʼ. Purtiʼ nuu ti stipa ni guirutiʼ zanda gucueeza: espíritu santu. Cumu zacaanu ti guendanabani ni qué zaluxe ora guni Dios ni maʼ naguixhe ique la? galán nga guuyaʼ chaahuinu ximodo cayúnibe ni ne cadi gusaananu de guzúʼbanu stiidxabe. Ne ra guidúʼndanu modo riquiiñeʼ Jiobá espíritu santu stiʼ zuquídxini fe stinu. Nga runi, guidúʼyanu xi dxiiñaʼ huayúnini, ni cayúnini yanna ne xi dxiiñaʼ chigúnini para gaca ni na Dios.

Dxiiñaʼ ni biʼniʼ espíritu santu dxiqué

4. Xi huayuni Jiobá para gusihuinni xii nga ni naguixhe ique.

⁴ Dxiqué chaahuidugá bisihuinni Jiobá xcaadxi cosa ni chiguni para gaca ni na. Dxiqué «qué ñanna binni» tuu nga ni za de gunaa que (1 Cor. 2:7). Ne bidiibe lugar gudiʼdiʼ chupa mil iza para guniʼbe de laani sti biaje. Dxi bidii stiidxabe Abrahán que nga jma bisiénebe xcaadxi cosa de laani (biindaʼ Génesis 12:7 ne 22:15-18). Racá nga guniʼbe «pur ni za de lii», ne pur nga nga nánnanu caniʼbe de ti binni ni zale lade binnilidxi Abrahán. Nanna dxíchinu bicaadiaga chaahuiʼ Binidxabaʼ ni guníʼ Jiobá ca ne biʼniʼ stale cosa para nunitilú cani za de Abrahán ti cadi gaca ni gudixhe ique Dios que. Peru qué ñanda ñúnibe gastiʼ, purtiʼ stipa stiʼ Dios gupa laacabe. Ximodo guca nga yaʼ.

5, 6. Ximodo biquiiñeʼ Jiobá espíritu stiʼ para gupa ca binnilidxi ni za de gunaa que.

⁵ Jiobá biquiiñeʼ espíritu stiʼ para gupa binnilidxi Abrahán ti gale ni za de gunaa que. Sicaríʼ gudxi Jiobá Abrahán (dxi lárube Abrán que): «Naa zeeda gacaʼ ti escudu para lii» (Gén. 15:1). Ne cadi guníʼ si Jiobá ca diidxaʼ ca. Guiníʼ íquenu ni bizaaca biaʼ lu iza 1919 ante de ca dxi stiʼ Jesús. Dxi yendeza Abrahán ne xheelaʼ Guerar ti tiempu la? gucuaa Abimélec, rey stiʼ guidxi ca, Sara para guichaganaʼ laabe, purtiʼ qué ganna pa maʼ bichaganabe. Ñee nga nga tobi de ca cosa ni biʼniʼ Binidxabaʼ para cadi ñápabe ti xiiñiʼ Abrahán la? Cadi cusiene chaahuiʼ diʼ Biblia ni, peru nga cusihuinni gupa Jiobá laabe. Ne lu ti bacaandaʼ gudxi Jiobá rey que cadi canaʼ Sara (Gén. 20:1-18).

⁶ Peru nga nga tobi de ca biaje bilá Jiobá Abrahán ne binnilidxi (Gén. 12:14-20; 14:13-20; 26:26-29). Nga runi, ne stale razón nga bicaa salmista que ca diidxaʼ riʼ: «Qué nudiidibe lugar ñuniná nin ti binni laacaʼ, sínuque gulídxibe ca rey runi laacaʼ, sicaríʼ guniʼbe: “Cadi canatu cani maʼ guliéʼ, ne cani riguixhená stinneʼ cadi gúnitu laacaʼ xiixa cosa malu”» (Sal. 105:14, 15).

7. Ximodo gupa Jiobá guidxi Israel.

⁷ Jiobá laaca biquiiñeʼ stipa stiʼ para gupa guidxi Israel ni guyuu dxiqué, ra chigale ni za de gunaa que. Primé la? biquiiñebe espíritu ca para gucuá Ley ni gucuaa Moisés que, ti zaqué cadi gusaanacabe de guni adorárcabe Dios jneza ne para cadi chuʼ xiixa ni guxheleʼ laacabe de Jiobá, ne guibánicabe jneza ne chúʼcabe nazaaca (Éxo. 31:18; 2 Cor. 3:3). De racá la? ca dxi guyuu ca juez que, bidiibe espíritu stibe caadxi hombre para gulá guidxi Israel de ca xhenemigu (Jue. 3:9, 10). Ne lu ca siglu ni gudiʼdiʼ ante gale Jesús, binni ni jma risaca ni za de Abrahán que, laaca biquiiñebe stipa para gúpabe guidxi Jerusalén, Belén ne yuʼduʼ que, ca lugar ni rieeteʼ lu ca diidxaʼ riguixhená ni caníʼ de Mesías que.

8. Xi ejemplu nápanu ni rusihuinni modo gucané espíritu santu Jesús lu xquendanabani ne ora bicheeche diidxaʼ.

⁸ Espíritu santu gucané Cristu lu xquendanabani ne para bicheeche diidxaʼ. Ni bíʼnini primé nga, gucaneni María binnidxaapaʼ que para gaca xiixa ni qué huayuu dxi guihuinni: gacaxiiñiʼ ti gunaa ni gulené donda ne gapa ti baʼduhuiiniʼ sin donda, ni qué zati pur donda ni bisaanané Adán laanu (Luc. 1:26-31, 34, 35). Laaca gucaneni para cadi ñuuticabe Jesús dxi nahuiiniʼ, ante guedandá dxi nexheʼ gátibe (Mat. 2:7, 8, 12, 13). Despué dxi nápabe 30 iza, gulí Dios laabe ne espíritu ne zacá nga gucuaabe trono stiʼ David ne ti dxiiñaʼ: gucheechebe stiidxaʼ Reinu (Luc. 1:32, 33; 4:16-21). Laaca espíritu ca nga gucané laabe gúnibe milagru para bisiándabe binni huará, biyaanabe stale binni ne gundísabe gueʼtuʼ. Ca milagru ni bíʼnibe ca rusihuínnicani xi ndaayaʼ zabézanu gudiibe laanu dxi guni mandarbe.

9, 10. 1) Xii nga cani rusihuinni gupa ca primé xpinni Cristu que espíritu santu. 2) Xii nga ti cosa nacubi bihuinni lu primé siglu que.

⁹ Dede lu saa Pentecostés ni guca lu iza 33 que, biquiiñeʼ Jiobá stipa stiʼ para gulí xcaadxi binni ni beeda gácacaʼ ni za de Abrahán, ne stale de ca xpinni Cristu ca cadi dxandíʼ diʼ bixhozególacaʼ laabe (Rom. 8:15-17; Gál. 3:29). Bihuinni dxichi nápacabe espíritu stiʼ Dios, purtiʼ gucaneni laacabe gucheechecabe diidxaʼ ne stale gana ne gunda bíʼnicabe milagru (Hech. 1:8; 2:1-4; 1 Cor. 12:7-11). Pur ca milagru ni bíʼnicabe ca bihuinni ti cosa nacubi ni biʼniʼ Dios para guni ni naguixhe ique. Laabe maʼ qué ñacaláʼdxibe ñuni adorárcabe laabe ndaaniʼ yuʼduʼ stiʼ Jerusalén que, sínuque maʼ ca xpinni Cristu ni bibí que nga biquiiñebe para gúnibe ni naguixhe íquebe.

¹⁰ Casi maʼ bidúʼyanu ca, dxiqué biquiiñeʼ Jiobá espíritu stiʼ para biʼniʼ stale cosa, casi gápabe ca xpínnibe, gudiibe laacaʼ poder para gúnicaʼ milagru ne para gulibe laacaʼ. Guiráʼ ca cosa ca nga bíʼnibe para gaca ni naguixhe íquebe. Ximodo caquiiñebe espíritu stibe para gaca ni nabe ca dxi stinu riʼ yaʼ. Nabé risaca nga gánnanu ni, purtiʼ naquiiñeʼ guninenu espíritu ca dxiiñaʼ. Nga runi, guidúʼyanu tapa modo caquiiñeʼ Dios espíritu stiʼ yanna.

Modo caquiiñeʼ Jiobá espíritu stiʼ yanna

11. Xi ejemplu rusihuinni racané espíritu santu ca xpinni Dios guibánicaʼ nayá, ne ximodo rusihuinni ca xpinni Cristu cudiicaʼ lugar gabi espíritu santu laacaʼ modo guibánicaʼ.

¹¹ Primé la? espíritu santu ca racaneni guibani cani dxandíʼ xpinni Cristu nayá nezalú Dios. Ca hombre ne ca gunaa ni cayacané para gaca ni na Jiobá naquiiñeʼ guibánicaʼ jneza (biindaʼ 1 Corintios 6:9-11). Ante gácacabe xpinni Dios bíʼnicabe stale cosa dxabaʼ, nuu de laacabe guyuuné ni cadi xheelaʼ, gúcacaʼ muxeʼ ne guyuu de laacaʼ maʼ biaacaʼ gúnicaʼ cosa dxabaʼ (Sant. 1:14, 15). Peru stale de laacabe guizáʼ maʼ bichaacabe para gusiéchecabe Jiobá, ne pur nga rieeteʼ «ma bia ladxidóʼ[cabe]». Xi racané laacabe para gucaanácabe ca cosa dxabaʼ ca yaʼ. Casi na 1 Corintios 6:11, «espíritu sti Dios stinu» nga racané laacabe. Ora rúnicabe stipa pur guibánicabe nayá la? rusihuínnicabe cudiicabe lugar gabi espíritu santu laacabe ximodo guibánicabe.

12. 1) Casi na visión ni biʼyaʼ Ezequiel que, ximodo ruluíʼ Jiobá xquidxi ni naquiiñeʼ guni. 2) Ximodo rusihuínninu cayuninenu espíritu santu dxiiñaʼ.

¹² Guiropa la? Jiobá riquiiñeʼ espíritu stiʼ para guluíʼ xquidxi xi naquiiñeʼ guni ne nápabe caadxi de laacaʼ lu Guidxilayú ne xcaadxi guibáʼ. Lu ti visión ni biʼyaʼ Ezequiel rieeteʼ naca xquidxi Dios ni nuu guibáʼ casi ti carru ni zeʼ sin guiaanadxí lu bi para ganda guni ni na Jiobá. Xi racané carru ca para ganda guicá bieque guiráʼ ladu yaʼ. Espíritu santu (Eze. 1:20, 21). Ne laaca espíritu santu ca nga rabi xquidxi Dios ni nuu lu Guidxilayú xi naquiiñeʼ guni. Nga runi, ora chinándanu guiráʼ ni na xquidxi Dios la? zizanu biaʼ ca zeʼ carru stiʼ Jiobá ne cayacanenu espíritu santu stibe para gaca ni naguixhe íquebe (Heb. 13:17).

13, 14. 1) Tuu nga zeeda gaca «ca binni nuu yanna riʼ», ni bizeeteʼ Jesús que. 2) Bidii caadxi ejemplu ni cusihuinni modo cusiene espíritu ca laanu ni dxandíʼ ca (biiyaʼ cuadru ra na: «Ñee nánnanu xii nga ni jma nacubi cusiene xquidxi Dios la?»).

¹³ Guionna la? espíritu santu ca laaca cusiene laanu caadxi cosa zeeda lu Biblia (Pro. 4:18). Dede maʼ raca stale iza riquiiñeʼ «mozo ni nuu xpiaani ne ni runi jneza» ca revista riʼ para gusiene chaahuiʼ laanu cani zeeda lu Biblia (Mat. 24:45). Guidúʼyanu ni bisiénecabe de «ca binni nuu yanna riʼ», ni bizeeteʼ Jesús que (biindaʼ Mateo 24:32-34). Tuu nga ca binni ca yaʼ. Lu tema ni láʼ: «Ñee nánnaluʼ pora nga maʼ nuu Cristu lade binni la?», na cadi caníʼ diʼ Jesús de ca binni malu, sínuque caniʼbe de ca xpínnibe, cani chindibe laacaʼ pur espíritu.a Dxi gaca ni na ca diidxaʼ ni guniʼbe ca, cásica lu primé siglu que ne zaqueca yanna la? ca discípulo stibe ni gulibe pur espíritu nga zuuyacaʼ seña ni bidiibe que ne zudiicaʼ cuenta cusihuínnini «maʼ gaxha nuu [Cristu], maʼ ra puertaʼ» (NM).

¹⁴ Xi riníʼ ni bizéʼtenu ca yaʼ. Nécapeʼ qué zanda gánnanu pabiáʼ zabani «ca binni nuu yanna riʼ», naquiiñeʼ gánnanu ti cosa: ca diidxaʼ, ca binni nuu yanna riʼ riníʼcani de ca binni ni napa gadxé gadxé iza ni ribánicaʼ lu ti tiempu si ne cadi xadxipeʼ zandaani ne zalúxeni (Éxo. 1:6). Yanna, ximodo zanda guiénenu ca diidxaʼ ni guníʼ Jesús de «ca binni nuu yanna riʼ» yaʼ. Nga runi zanda guininu ca binni ni bibí pur espíritu santu ni bibani lu iza 1914 —dxi bizulú cahuinni seña maʼ nuu Cristu lade binni que— nabanirúcabe ora cuí Dios xcaadxi xpinni Cristu pur espíritu santu, ne cani bibí despué riʼ nga gúʼyacaʼ dxi guzulú ca dxi ni jma nagana ca. Ne cásica guyuu ti dxi bizulú xquendanabani ca binni ni nuu yanna riʼ la? zadxiña ti dxi maʼ qué ziuu nin tobi de laacabe lu guidxilayú riʼ. Modo cayaca caadxi de cosa ni zeeda lu seña ni guníʼ Jesús que cusihuínnicani mayaca guzulú ca dxi jma nagana ca. Yanna nga jma naquiiñeʼ gatananu ne gúninu xhiiñaʼ Jiobá ne stale gana (Mar. 13:37). Pa gúninu zacá la? zusihuínninu cayénenu xii nga ni jma nacubi cusiene Jiobá xquidxi yanna ne zusihuínninu zinándanu ni culuíʼ espíritu ca laanu.

15. Ximodo nánnanu espíritu ca nga ni cudii stipa laanu para gucheechenu diidxaʼ.

¹⁵ Guidapa la? espíritu ca rudii stipa ca xpinni Cristu ni rucheeche diidxaʼ (Hech. 1:8). Pa ñaca cadi zacá ni la? qué ñanda diʼ nireeche ca diidxaʼ nacubi ne galán ca lu guidubi naca Guidxilayú. Guiníʼ íquenu de laanu. Zándaca dxiqué natuinu ne huaxiéʼ rininu ne pur nga guníʼ íquenu: «Naa zuluaʼsiaʼ qué ziuu dxi gucheecheʼ diidxaʼ de yoo pur yoo». Peru yanna maʼ randa rucheechenu diidxaʼ ne stale gana.b Ne stale Testigu nga qué huasaana de gucheeche diidxaʼ neca nuu tu cucaalú laacaʼ o canazananda laacaʼ. Nga runi, espíritu santu nga ni rudii stipa ni caquiiñenu ti ganda gudxíʼlunu ca guendanagana ca ne gúninu ca dxiiñaʼ ni qué ñanda ñúninu ne stipa si stinu (Miq. 3:8; Mat. 17:20). Pa gúninu guiráʼ ni ganda para gucheechenu diidxaʼ la? cusihuínninu cayuninenu espíritu ca dxiiñaʼ.

Dxiiñaʼ ni chiguni espíritu ca despué

16. Xiñee nanna dxíchinu zapa Jiobá xquidxi lu ca dxi jma nagana ca.

¹⁶ Despué zaquiiñeʼ Jiobá espíritu stiʼ para guni stale cosa ni risaca ti gaca ni naguixhe ique. Ne zaquiiñebe ni para gápabe ca xpínnibe. Ñee cadi dxandíʼ maʼ biquiiñebe ni para gúpabe caadxi xpínnibe ne guidubi guidxi Israel la? Nga runi nápanu stale razón para guni crenu zaquiiñebe ni sti biaje para gacanebe xquídxibe lu ca dxi jma nagana ca. Cadi jneza diʼ de laasinu quíxhenu ximódopeʼ chigacaneni laanu dxi ca. Cadi cadxíbinu pur ni zeeda despué purtiʼ nánnanu qué zusaana Jiobá de guyadxí laanu para gapa laanu ne paraa gudii espíritu santu stiʼ laanu, ne zúnibe ni purtiʼ nadxiibe laanu (2 Cró. 16:9; Sal. 139:7-12).

17. Ximodo chiguiquiiñeʼ Jiobá espíritu stiʼ lu guidxilayú cubi ca.

¹⁷ Xi para chiguiquiiñeʼ Jiobá stipa stiʼ lu guidxilayú cubi ca yaʼ. Para guicá caadxi rollo nacubi ne para gúnibe xcaadxi cosa (Apo. 20:12). Xi chiguicá lu ca rollo ca yaʼ. Ruluíʼ si lúcani zacá ca ley ni chichuu dxi guni mandar Cristu lu ti mil iza. Maʼ racaláʼdxinu guedandá dxi guidúʼndanu ca rollo ca ne guicaanu ca ndaayaʼ ni chigudii Dios lu Paraísu ca. Qué zanda diʼ guxuíʼlunu ximodo nga zabani binni dxi gaca ni naguixhe ique Dios guni para Guidxilayú riʼ ne para binni, dxi iquiiñebe espíritu stibe.

18. Xi naquiiñeʼ quixhe íquenu gúninu.

¹⁸ Naquiiñeʼ gánnanu zaca guiráʼ ni maʼ gudixhe ique Dios purtiʼ zaquiiñebe espíritu ca para gúnibe cani, ne laani nga ti stipa ni jma napa poder lu guidubi naca guibáʼ ne Guidxilayú. Cumu ne laanu nga chiguiquiiñeʼ Jiobá para gaca ni naguixhe ique guni la? guinábanu Jiobá espíritu stiʼ ne gudiʼnu lugar gabi ni laanu xi gúninu (Luc. 11:13). Zacá zacaanu ni chigudii Dios binni guidxilayú: guibánicaʼ sin qué chuʼ dxi gáticaʼ ndaaniʼ ti paraísu.

[Cani cá ñee yaza]

Maʼ biénenu ni la?

• Ximodo biquiiñeʼ Jiobá espíritu stiʼ dxiqué para gaca guiráʼ ni naguixhe ique.

• Ximodo riquiiñeʼ Jiobá espíritu stiʼ yanna.

• Ximodo chiguiquiiñeʼ Jiobá espíritu stiʼ despué para guni ni naguixhe ique.

[Cuadru ni zeeda lu yaza 10]

Ñee nánnanu xii nga ni jma nacubi cusiene xquidxi Dios la?

Jiobá cadi cusaana de gusiene xquidxi. Xii nga cani huasiene revista Torre stiʼ ni rapa lu ca últimu iza riʼ.

▪ Xi rizíʼdinu lu ejemplu ra cayeeteʼ de levadura de modo riniisi ti binni lu stiidxaʼ Dios (Mat. 13:33; 15 stiʼ julio 2008, yaza 19, 20).

▪ Padxí nga maʼ gusaana Jiobá de cuí ca xpinni Cristu ni cheʼ guibáʼ (1 stiʼ mayo 2007, yaza 30, 31).

▪ Xi riníʼ guni adorarnu Jiobá «ne espíritu» (Juan 4:24, NM; 15 stiʼ julio 2002, yaza 15).

▪ Gunáʼ ndiʼ patiu ra cayuni «jma binni» que dxiiñaʼ (Apo. 7:15; 1 stiʼ mayo 2002, yaza 30, 31).

▪ Padxí nga guireechú ca dendxuʼ de ca chiva (Mat. 25:31-33; 15 stiʼ octubre 1995, yaza 18 dede 28).