Tapa cosa ni rinabadiidxaʼ binni ora rieeteʼ zanitilú Guidxilayú

JESUCRISTU guníʼ zedandá tiempu guinitilú guidxilayú ne bisiénebe ni sicaríʼ: «Nabé naná zaca ni ca dxi que. Qué huayuu dxi gaca ni naná biaʼ qué, dede dxi bizáʼ Dios guidxilayú, ne ma qué ziuu ru dxi aca ni sti tiru» (Mateo 24:14, 21).

Ca diidxaʼ riguixhená ni guniʼbe ca ne xcaadxi casi laani ni zeeda lu Biblia, rucaacani binni guinabadiidxaʼ stale cosa. Guidúʼyanu ximodo ricabi Stiidxaʼ Dios tapa de laacani. Pa riuulaʼdxuʼ la? zanda guyubuʼ ca versículo ca lu Biblia stiluʼ.

1 Xi chiguinitilú

Biblia qué rusiidiʼ zanitilú Guidxilayú ra nabáninu riʼ, sínuque rusiidini qué ziuu dxi guinitilú Guidxilayú. Lu Salmo 104:5 na sicaríʼ: «Guluu [Dios] guidxilayú riʼ ra naquiiñeʼ guiaanani; qué ziuu dxi guiniibini de ra nuuni». Laaca qué rusiidiʼ Biblia zanitilú guiráʼ cani nabani luni pur ti guendaridinde ni gaca lu guidubi Guidxilayú (Isaías 45:18). Jesucristu peʼ guníʼ ziuu ti grupu de binni ni zalá ora guedandá dxi ca (Mateo 24:21, 22). Yanna, xii nga na Biblia chiguinitilú yaʼ.

Ca gobiernu ni qué runi mandar jneza. Dios gudxi Daniel, ni riguixhená que, gucaa ca diidxaʼ riʼ: «Dios ni nuu guibáʼ zucuí ti reinu ni qué ziuu dxi guinitilú. Ne reinu riʼ qué zadíʼdini lu náʼ nin sti guidxi. Zunideni ne zunduuxeni guiráʼ ca reinu riʼ, ne laani ziaanani ne qué ziuu dxi guilúxeni» (Daniel 2:44).

Guendaridinde stiʼ ca guidxi ca ne modo cayaca biidiʼ lu Guidxilayú riʼ. Ti hombre ni bicaa tobi de ca salmo, sicaríʼ guníʼ de ni chiguni Dios: «Runduuxebe guendaridinde stiʼ ca guidxi ca dede ra jma zitu de guidxilayú. Rigúzabe arcu ne dxandipeʼ ruchuugube lanza pur pedazu; rucaaguibe ca carru ca lu guí» (Salmo 46:9). Ne laaca caníʼ Biblia «zunitilú [Dios] cani [cu]nitilú guidxilayú» (Apocalipsis 11:18).

Cani runiná binni ne cani qué runi ni jneza. Stiidxaʼ Dios na: «Cani runi jneza ca nga zabánicaʼ lu guidxilayú riʼ, ne cani qué gapa donda nga ziaanacaʼ luni. Peru ca malu ca la? zaruugucaʼ de lu guidxilayú; ne cani rudxiideche, ziaaxhacaʼ luni» (Proverbios 2:21, 22).

2 Padxí gueeda ni

Dxandíʼ nga maʼ gudixhe Dios «padxí» gunitilú ca binni malu ca ne padxí guzulú gobiernu stibe guni dxiiñaʼ ndaaniʼ Guidxilayú riʼ (Marcos 13:33). Peru guirutiʼ qué zanda guiníʼ padxipeʼ nga chigácani. Jesús bisiene: «Peru padxí ne pora la? iruti ganna, nin ca ángel ni nuu ibáʼ, dede nin naa qué gannaʼ sínuque Bixhoze siaʼ nga nanna» (Mateo 24:36). Neca zacá, Jesús ne chupa chonna de ca discípulo stiʼ bicaacaʼ xi guiráʼ zazaaca ndaaniʼ Guidxilayú riʼ ora mayaca guinitilú ca cosa ca. Nga runi, ora maʼ gaca guiráʼ ca cosa ni guníʼcabe que lu ti tiempu si lu guidubi Guidxilayú la? naquiiñeʼ gánnanu mayaca guinitilú ca cosa malu ca. Gunáʼ nga caadxi de ca cosa ni guníʼcabe chigaca yaʼ.

Zaca stale desgracia, ziuu stale clase de gobiernu ne qué ziuudxí binni ndaaniʼ stale guidxi. Ti biaje gunabadiidxaʼ ca discípulo stiʼ Jesús laa ximodo zanda gánnacaʼ pora nga maʼ chiguinitilú ca cosa ca. Laabe bicábibe laacaʼ sicaríʼ: «Zucaa lú ti guidxi sti guidxi ne ti gobiernu sti gobiernu, ne zaca xu stale lugar ne zaca gubiña ne bulla, ne ora aca irá nga la? deru cuzulú yuuba que nga» (Marcos 13:8). Apóstol Pablu guniʼruʼ xcaadxi cosa ni zahuinni: «Jma nagana zaca ni ora mayaca izaa xhi guidxilayú. Purti zuyubi binni para laa si, ne nisi bidxichi zacá ique caʼ. Zuni ca laaca nandxóʼ ne zaca ca nayáʼ, ne zaguiñe yu ca stiidxa Dios. Ma qué zuzuuba ca stiidxa jñaa ca ne bixhoze caʼ ne qué zulabi ca laacabe. Zabani ca modo na ique caʼ ne nin zanna ca pa nuu Dios. Qué zanaxhii ca binni ne qué ziá ca irutiʼ, ne nisi zazá ca zaníʼ ca binni. Qué zanda ucueeza ca laca laaca de guni ca ni na ique caʼ. Zuniná cabe binni ne zaca nanalaʼdxi cabe irá ni jneza. Zutoo cabe xhamigu cabe, ne qué zuni lú cabe guni cabe intiisi, ne zudxiiba cabe laca laacabe. Zuyubi cabe ni chuʼlaʼdxi cabe lugar de nuyubi cabe Dios» (2 Timoteo 3:1-5).

Zareeche diidxaʼ lu guidubi Guidxilayú ne zácani lu gayuaa de diidxaʼ. Jesús guníʼ: «Ne zuiʼ cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú riʼ» (Mateo 24:14).

3 Xi chiguizaaca despué

Stiidxaʼ Dios qué rusiidiʼ zié guiráʼ binni nachaʼhuiʼ guibáʼ para guibánicaʼ ra nuu Dios sin gáticaʼ. Ndiʼ nga ni rusiidiʼ Biblia: bizáʼ Dios binni para guibani ndaaniʼ Guidxilayú sin gati, ne bisiidiʼ Jesús dxandíʼ zaca ni gudixhe ique Dios riʼ: «Dichoso ni nadóʼ purti zudii Dios laaca guidxilayú» (Mateo 5:5; 6:9, 10). Yanna, xi gácaxa né guiráʼ ca binni ni gati ante guinitilú ca cosa malu ca yaʼ. Biblia na zabánicabe sti biaje (Job 14:14, 15; Juan 5:28, 29). Xi gaca óraca yaʼ.

Zuni mandar Jesús dede guibáʼ casi rey lu Reinu stiʼ Dios. Daniel ni riguixhená que bicaa ca diidxaʼ riʼ: «Biiyaruaʼ ca visión de huaxhinni que, ne, ¡biiyaʼ! lu ca za de guibáʼ zeeda tuuxa casi ti xiiñiʼ hombre [Jesús ni biasa lade gueʼtuʼ]; ne gunda guyuube ra nuu Binnigola de Dxi [Jiobá Dios], ne bichíñacabe laabe gaxha, [nezalú Binnigola que]. Ne gucuaa [Jesús] guendaruni mandar ne guendarisaca ne reinu, para guni guiráʼ ca guidxi ca, ca guidxi roʼ ne guiráʼ diidxaʼ ni nabe. Guendaruni mandar stibe nga ti guendaruni mandar ni qué zaluxe diʼ ne ni qué zadiʼdiʼ, ne reinu stibe tobi ni qué zanitilú» (Daniel 7:13, 14; Lucas 1:31, 32; Juan 3:13-16).

Ziuu binni nazaaca, guirutiʼ qué zuchibi laacaʼ ne qué ziuu dxi gáticaʼ. Sicaríʼ guníʼ Isaías, ni riguixhená que: «Zucuícabe yoo, ne zaquiiñecabe ni, ne dxandipeʼ zudxiibacabe uva lu layú ne zócabe ni gudiini. Qué zucuícabe [lídxicabe] ne stobi iquiiñe ni; qué zudxiibacabe ne stobi gó ni» (Isaías 65:21-23). Ne sicaríʼ guníʼ apóstol Juan de tiempu ca: «Ma nabeza Dios lade binni. Laape be zabeza né be laacaʼ. Zaca ca xpinni be, ne laabe zaca be Dios sticaʼ. Zuchaa be nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ, purti ma udiʼdi irá ni uyuu chiqué (Apocalipsis 21:3, 4).

4 Xi naquiiñeʼ guʼnuʼ para guilaluʼ

Apóstol Pedru bizeeteʼ ziuu caadxi binni ni zuni burla de ni chiguni Dios ne zaniʼcaʼ cadi dxandíʼ diʼ nga zunitilube guiráʼ cosa malu nuu lu Guidxilayú (2 Pedro 3:3, 4). Neca zacá, gudixhená Pedru ca binni ni guibani tiempu ca ne gúdxibe laacaʼ gúnicaʼ ndiʼ:

Guiziidicaʼ de ni bizaaca dxiqué. Pedru bisiene: «Qué ñá [Dios] ca binni ni qué nulabi laabe chiqué, sínuque biseenda be ti nisa roʼ dede bilaahua caʼ, ne guti irá caʼ. Peru bilá be Noé ni gudxi laaca nusaana ca irá enda ruchee sticaʼ, laasi ne xcadxe binni» (2 Pedro 2:5). Ne guniʼbe ca diidxaʼ riʼ de ca binni ni guni burla: «Ndi nga ni qué na ca binni que guiene, dede chiqué maca nuu ibáʼ, ne ra uníʼ Dios cha guidxilayú, uyáʼ ni. Ndaani nisa biree guidxilayú, ne lu nisa nuu ni de yanna. Ne laca nisa binitilú guidxilayú chiqué, dxi bilaahua ni que. Peru ibáʼ ne guidxilayúa ni nuu yanna ri la? cadi nisa di unitilú cani, sínuque ma gudixhe Dios unitilú ni ne gui. Ne laca gui que unitilú irá cani qué rulabi laabe, dxi cuidxi be cuenta laacaʼ» (2 Pedro 3:5-7).

Gúnicaʼ ni na ca ley stiʼ Dios. Pedru guníʼ xi naquiiñeʼ guni ca binni ni racalaʼdxiʼ guilá dxi ca, guniʼbe napa xidé «udii[caʼ] idubi xpida[caʼ] Dios para guni[caʼ] ni na» (2 Pedro 3:11). Ora guníʼ Pedru naquiiñeʼ gudii binni xpida Dios para guni ni nabe la? cusiene nuuruʼ xi naquiiñeʼ guni binni para ganda guilá, ne cadi guiníʼ si napa fe o gacalaʼdxiʼ gusihuinni runi ni na Dios ora guidxiña dxi ca.

Yanna, ximodo nga gudii binni xpida Dios ne guni ni nabe yaʼ. Ñuuláʼdxiluʼ ñánnaluʼ xi ricabi Biblia stiluʼ de guendarinabadiidxaʼ ca la? Ca testigu stiʼ Jiobá ziuuláʼdxicaʼ gacanecaʼ lii. Zacá zánnaluʼ zanda gaca chaahuiʼ ca cosa ca ne maʼ qué zadxíbiluʼ.

[Cani cá ñee yaza]

[Ni caníʼ yaza 7]

Cadi Guidxilayú riʼ nga chigunitilú Dios, sínuque cani cunitilú ni