Bidxiña Dios
«Gundisaʼ xiiñiluʼ»
TOBI de ca desgracia ni jma rusiuubaʼ ladxidóʼ binni nga ora gati ti xiiñiʼ. Peru zanda guni crenu zadxiña dxi guibani ca gueʼtuʼ ca sti biaje. Xiñee naquiiñeʼ guni crenu ni yaʼ. Purtiʼ Biblia ruzeeteʼ bidii Jiobá Dios poder caadxi hombre para gusibánicaʼ binni ni maʼ guti. Tobi de laacabe nga Eliseo, ni riguixhená que. Guidúʼndanu 2 Reyes 4:8-37 ne guidúʼyanu ximodo bisibani hombre riʼ ti xcuidi.
Historia riʼ bizaacani guidxi Sunem, ra guleza ti guendaxheelaʼ ni nabé gúpacaʼ Eliseo de biuuzaʼ ne nabé bidiicaʼ ni gudobe. Ti dxi bidii Eliseo xquíxepeʼ gunaa que pur guiráʼ ni biʼniʼ pur laabe ne gúdxibe laa sicaríʼ: «Laaca tiempu riʼ, lu sti iza ca maʼ zaguiidxiluʼ ti xiiñiluʼ». Cumu nácabe ti gunaa ni qué zanda gapa xiiñiʼ la? nánnabe qué ziuu dxi gápabe tobi, peru Eliseo guníʼ zápabe ti xiiñibe. Bedandá dxi que, ne guca ni guníʼ Eliseo que. Peru qué nindaa guendanayecheʼ stibe que. Gudiʼdiʼ si chupa chonna iza, dxi nuu baʼduhuiiniʼ que rañaa, bizulú biuubaʼ ique. Oraqueca yenécabe laabe ralídxicabe, peru guti baʼduhuiiniʼ que ndaaniʼ náʼ jñaa (versículo 16, 19 ne 20). Guizáʼ cayuubaʼ ladxidóʼ gunaa que ne chaahuidugá gudixhe laabe lugar ra gusiʼ ni riguixhená que stale biaje.
De raqué gudxi gunaa que xheelaʼ pa zaa cheʼ ra nuu Eliseo, ne nagueendaca bireebe ziyúbibe laa. Guzásibe 30 kilómetru, yendabe lu dani Carmelo, ra nuu ni riguixhená que. Qué ñuunadibe ora bíʼyabe Eliseo, ne qué ñúnibe sti cosa ni nusihuinni pabiáʼ cayuubaʼ ladxidoʼbe. Ñee qué ñuunabe purtiʼ nánnabe bisibani Elías —ni riguixhená ni guyuu ante de Eliseo— xiiñiʼ ti viuda la? (1 Reyes 17:17-23.) Ñee biʼniʼ crebe laaca zanda gusibani Eliseo xiiñibe ni nadxiibe la? Qué gánnadinu nga. Pa zacá ni o pa coʼ, peru qué ninabe nibiguétabe ralídxibe dede qué nucuudxibe Eliseo para niné laabe.
Ora yendá ni riguixhená que la? stubi si biuu ndaaniʼ cuartu ra maca riaana que. Raqué biiyabe nexheʼ hombrehuiiniʼ que lu cama stiʼ maʼ guti (versículo 32). Óraque biʼniʼ orar Eliseo Jiobá de guidubi ladxidóʼ. De raqué gúʼtabe luguiáʼ gueʼtuʼ huiiniʼ que, ne chaahuiʼ chaahuiʼ «bidxaa ladi hombrehuiiniʼ que». Guca ti milagru: ¡bibani hombrehuiiniʼ ni maʼ guti que! Óraque biseendacaa Eliseo gunaa que, guizáʼ biéchebe ne zeca yuubaʼ nuu ladxidoʼbe ora gudxi ni riguixhená que laabe: «Gundisaʼ xiiñiluʼ» (versículo 34 ne 36).
Guizáʼ riguixhedxí historia riʼ ladxidóʼ ca binni ni maʼ guti ti xiiñiʼ ne rucaani laacaʼ guiníʼ íquecaʼ zadxiña dxi guiasa ca gueʼtuʼ ca. Nanna dxíchinu riene Jiobá pabiáʼ naná nga yuubaʼ riuu ladxidóʼ binni ora gati xiiñiʼ. Ne cumu nánnabe pabiáʼ naná riuu binni óraca la? racaláʼdxibe pa ñanda si maʼ ñedandá ora nusibánibe xiiñicaʼ ti guiree yuubaʼ nuu ladxidoʼcaʼ (Job 14:14, 15). Ne cadi ngasi, laaca maʼ guniʼbe zusibánibe millón de binni ni maʼ guti. Relatu ni bidúʼndanu riʼ, ne xcaadxi casi laani ni zeeda lu Biblia, laacani nga caadxi de ca cosa ni cusihuinni xi chiguni Dios lu guidxilayú cubi ni maʼ bizabiruaa.a
Yanna, cadi purtiʼ si maʼ nánnanu riníʼ Biblia zabani ca gueʼtuʼ ca maʼ qué ziuu yuubaʼ ladxidoʼno ora gati ti binni ni nadxiinu. Ti xpinni Cristu guníʼ sicaríʼ dxi guti tobi lucha xiiñiʼ: «Yuubaʼ nuu ladxiduáʼ riʼ zadiʼdiʼ ni ora maʼ guuyaʼ xiiñeʼ sti biaje ne quiidxeʼ laa». Pa zacaca cayuni sentirnu la? zatadxí ladxidoʼno ora guiníʼ íquenu zadxiña dxi guidúʼyanu ca binnilídxinu ne ca xhamígunu sti biaje, ne zacaneni laanu guni huantarnu yuubaʼ ca. Bixuiʼlú si xi zuni sentirnu ora quiidxinu laacabe sti biaje. Nga runi, nabé risaca nga chuʼnu gaxha de Jiobá, purtiʼ laa maʼ guníʼ zusibani ca gueʼtuʼ ca, nga nga tobi de ca cosa sicarú ni cabézanu gaca.
[Cani cá ñee yaza]
a Zadxélaluʼ jma ni caníʼ de laani lu capítulo 7 stiʼ libru Xipeʼ ndiʼ cusiidiʼ Biblia, ni biʼniʼ ca testigu stiʼ Jiobá.