Biiyaʼ Eliseo carru de bele ñee laaca ruuyaluʼ ni la?

Bixuiʼlú ni cazaaca raríʼ. Canazananda rey stiʼ Siria Eliseo. Ora gunna rey riʼ nuu profeta stiʼ Dios que Dotán, ti guidxi ni napa lindaa ni nuu ique ti dani, biseendabe «maniʼ ne carru ni rié lu guerra ne stale soldadu» ti huaxhinni para guinaazecaʼ profeta que. Ora birá gueelaʼ, mápeca naguu ca soldadu stiʼ rey riʼ leʼ guidxi ra nuu Eliseo (2 Rey. 6:13, 14).

Ora biasa mozo stiʼ Eliseo que ne biree fuera, nabé bidxibi ora biʼyaʼ guiráʼ ca enemigu que ne guníʼ: «¡Señor stinneʼ! Xi gúninu yanna yaʼ». Óraque bicabi Eliseo laabe: «Cadi guidxíbiluʼ, purtiʼ jma stale nga tu nuuné laanu que cani nuuné laacabe». Óraque biʼniʼ orar Eliseo: «Jiobá, rinabaʼ lii guxhéleluʼ lube ti ganda gúʼyabe». Relatu que na «oraqueca bixheleʼ Jiobá lú mozo que, ne gunda biiyaʼ; ne ¡biaguʼyuʼ!, guidubi lu ca dani que zeeda stale maniʼ ne stale carru de bele ni rié lu guerra ne guiracaʼ naguucaʼ leʼ Eliseo» (2 Rey. 6:15-17). Xi rusiidiʼ ni bizaaca Eliseo riʼ laanu yaʼ.

Qué nidxibi Eliseo ora biʼyaʼ ca soldadu stiʼ Siria, purtiʼ runi crebe Jiobá ne nánnabe cayapa laabe. Yanna riʼ maʼ qué ribézanu guni Jiobá milagru, peru ridúʼyanu ximodo rápabe xquídxibe. Zeeda gaca ni casi ora nidúʼyanu cayapa «stale maniʼ ne stale carru de bele ni rié lu guerra» laanu.  Pa dxandíʼ nápanu fe ne runi crenu cayapa Jiobá laanu la? qué zazaacanu gastiʼ ne zacaanu ca ndaayaʼ stiʼ Jiobá (Sal. 4:8). Yanna guidúʼyanu xi zanda guizíʼdinu de xcaadxi cosa ni bizaaca Eliseo.

GUCUAA ELISEO TI DXIIÑAʼ

Ti biaje, dxi cacheza Eliseo layú stiʼ, beeda profeta Elías ra nuube ne bigacu laabe lari ni riquiiñeʼ casi profeta. Nagueendaca biene Eliseo xi racalaʼdxiʼ Elías, ngue runi, bíʼnibe ti saa para gábibe bixhózebe ne jñaabe chigusaanabe laacaʼ para gácabe mozo stiʼ Elías (1 Rey. 19:16, 19-21). Cumu de guidubi ladxidóʼ Eliseo gudixhe ique guni ni na Dios la? biquiiñeʼ Jiobá laabe para gúnibe caadxi cosa nabé risaca ne despué gúcabe profeta lugar stiʼ Elías.

Zándaca guca Eliseo mozo stiʼ Elías biaʼ xhoopaʼ iza. Guiráʼ ca iza que, laabe nga gúcabe hombre ni «ruchá nisa lu náʼ Elías» (2 Rey. 3:11). Xi zanda guiénenu né ca diidxaʼ riʼ yaʼ. Dxiqué la? qué riquiiñeʼ binni gudxara ora maʼ cayó. Ngue runi, ora maʼ biluxe gudó tuuxa, ruchá mozo stibe nisa lu nabe para ganda quíbinabe. Racá ridúʼyanu ruluíʼ huaxiéʼ risaca ca dxiiñaʼ biʼniʼ Eliseo, peru para laabe nabé risaca ngue gácabe mozo stiʼ Elías.

Yanna riʼ laaca nuu stale xpinni Cristu ni riuulaʼdxiʼ guni guiráʼ clase dxiiñaʼ ora maʼ cayuni xhiiñaʼ Dios, ne rúnicabe ni purtiʼ nápacabe fe ne rápacabe gana gúnicabe biaʼ gándatiʼ lu xhiiñaʼ Jiobá. Nuu tu maʼ bisaana binnilidxi ne ca xhamigu para chiguni dxiiñaʼ Betel, chigacané ra cabí Yoo stiʼ Reinu, ne rúnicabe ni neca nuu tu riníʼ huaxiéʼ risaca cani, peru laanu cadi naquiiñeʼ guiníʼ íquenu zacá. Para Jiobá nabé risaca dxiiñaʼ ni cayuni ca xpinni. Ñee cadi laaca zacaca nga naquiiñeʼ guidúʼyanu cani la? (Heb. 6:10.)

QUÉ NUSAANA ELISEO DXIIÑAʼ GUCUAA

Ante chiné Dios «Elías guibáʼ lu ti bi yooxhoʼ», gúdxibe laa guiree de Guilgal ne cheʼ guidxi Betel. Neca cadi caníʼ ique profeta Elías chinanda Eliseo laa, peru sicaríʼ guníʼ Eliseo: «Naa qué zusaanaʼ lii». Laga zécabe, gudxi Elías laabe xhupa biaje cadi chinándabe laa (2 Rey. 2:1-6). Peru qué niná Eliseo nibiguetaʼ. Bíʼnibe cásica biʼniʼ Rut, dxi qué niná nusaana Noemí (Rut 1:8, 16, 17). Racá ridúʼyanu pabiáʼ bisisácabe dxiiñaʼ bidii Dios laabe: gácabe mozo stiʼ profeta Elías.

Ximodo zanda chinándanu ejemplu stiʼ Eliseo yaʼ. Ra gusisácanu intiica dxiiñaʼ gudiicabe laanu ndaaniʼ xquidxi Dios, purtiʼ cayúninu ni para guni adorarnu Jiobá. ¡Gástiruʼ stiʼ ndaayaʼ jma naroʼbaʼ que laani! (Sal. 65:4; 84:10.)

«XI RACALÁʼDXILUʼ GUNEʼ PUR LII»

Ora zécabe neza, gudxi Elías Eliseo: «Guníʼ xi racaláʼdxiluʼ guneʼ pur lii ante gusaanaʼ lii». Sicaríʼ bicabi Eliseo: «Canabaʼ guicaaʼ chupa ndaa espíritu stiluʼ». Racá ridúʼyanu gunábabe ni zanda iquiiñebe para gúnibe ni na Dios, cásica gunabaʼ Salomón dxiqué (1 Rey. 3:5, 9; 2 Rey. 2:9). Peru xipeʼ ngue canabaʼ Eliseo yaʼ. Dxiqué, ora maʼ chigudii ti israelita herencia ca xiiñiʼ, baʼduʼ lugola que nga ricaa chupa tantu de biaʼ ricaa ca biʼchiʼ (Deut. 21:15-17). Ni canabaʼ Eliseo nga guiaana casi profeta lugar stiʼ Elías. Ne laaca racaláʼdxibe gusihuínnibe nadxibalube casi Elías, purtiʼ laa «biʼniʼ ni na Jiobá né stale gana» (1 Rey. 19:13, 14).

Óraque bicabi Elías laabe: «Nabé nagana ni gunábaluʼ riʼ. Pa gúʼyaluʼ ora gusaanaʼ lii la? zaca ni guniʼluʼ, peru pa qué gúʼyaluʼ naa la? qué zaca diʼ ni» (2 Rey. 2:10). Zanda guiénenu chupa cosa lu ca diidxaʼ riʼ: primé, Jiobá si nga zanda gudii laabe ni canábabe, ne guiropa, pa rápabe gana guicaabe ni la? napa xidé guiaananebe Elías neca guizaaca intiica cosa.

VISIÓN GUCUAA ELISEO

Ñee guyuulaʼdxiʼ Dios ni gunabaʼ Eliseo que la? Guidúʼyanu xiruʼ cusiene relatu que: «Laga zizácabe, ziyuíʼcabe diidxaʼ, málasi bihuinni ti carru de bele ni rié lu guerra ne maniʼ de bele, bixhélecani guirópacabe; ne zeʼ Elías guibáʼ lu ti bi yooxhoʼ. Biiyaʼ Eliseo ora guca guiráʼ ca ndiʼ».a Zacá nga bicabi Jiobá ni gunabaʼ Eliseo. Biiyabe ora zeʼ Elías, óraque gucuaabe chupa ndaa espíritu stiʼ ne biaanabe lugar stiʼ profeta que (2 Rey. 2:11-14).

Gundisaʼ Eliseo lari stiʼ Elías ne gucu ni. Ora guʼyaʼ binni maʼ nácube lari que zánnacaʼ maʼ laabe nga profeta ni gulí Dios. Ne bihuinni zacá ni ora biʼniʼ Eliseo ti milagru para bixheleʼ guiiguʼ Jordán.

Ora biʼyaʼ Eliseo zeʼ Elías lu bi yooxhoʼ que, nabé bidxagayaa. Xiñee yaʼ. ¡Purtiʼ qué huayuu dxi guʼyaʼ binni ti carru de bele ne maniʼ de bele casi ni bíʼyabe que! Zaqué nga bicabi Jiobá ni gunábabe. Yanna riʼ maʼ qué ricaanu visión casi ni biʼyaʼ Eliseo, peru zanda gudiʼnu cuenta riquiiñeʼ Jiobá poder stiʼ para gacané laanu ne para guni ni naguixhe ique. Ora ridúʼyanu modo riguube ndaayaʼ xquídxibe ni nuu lu Guidxilayú riʼ racaneni laanu guidúʼyanu pabiáʼ nagueenda riniibi carru stiʼ Jiobá guibáʼ (Ezeq. 10:9-13).

Biiyaʼ Eliseo stale cosa ni bicaa laa guni cré pabiáʼ naroʼbaʼ poder stiʼ Jiobá. Cumu gucané espíritu santu stiʼ Dios laabe la? gunda bíʼnibe 16 milagru, jma que biaʼ biʼniʼ Elías.b Guiropa biaje biʼyaʼ Eliseo carru ne maniʼ de bele nga dxi guluu ca siriu leʼ laabe guidxi Dotán, ni bizéʼtenu ra bizulú tema riʼ.

BIʼNIʼ CRÉ ELISEO JIOBÁ

Qué nidxibi Eliseo ora biʼyaʼ naguu ca xhenemigu leʼ laa guidxi Dotán. Xi gucané laabe yaʼ. Fe stibe. Laanu laaca naquiiñeʼ gápanu fe cásica gúpabe. Nga runi, naquiiñeʼ guinábanu Jiobá espíritu santu stiʼ para gusihuínninu nápanu fe ne xcaadxi guenda ni racané espíritu laanu gápanu (Luc. 11:13; Gál. 5:22, 23).

Ni biʼyaʼ Eliseo ndaaniʼ guidxi Dotán que gucaneni laa guni cré zacané Jiobá laa ne laaca zacané ca ángel stiʼ Dios laa. Biiyaʼ profeta que modo naguu ca ángel stiʼ Dios leʼ guidxi que ne laaca naguucaʼ leʼ ca xhenemígube. Bilabe ne bilá mozo stibe ora bisichepaʼ Jiobá lú ca xhenemígucabe (2 Rey. 6:17-23). Órapeʼ cadíʼdibe ra jma nagana que bisihuínnibe dxandíʼ runi crebe Jiobá de guidubi ladxidoʼbe, cásica maca bíʼnibe dxiqué.

Guni crenu Jiobá, cásica biʼniʼ Eliseo (Prov. 3:5, 6). Pa gúninu zacá, «ziuulaʼdxiʼ Dios ni gúninu ne zaguu ndaayaʼ laanu» (Sal. 67:1). Neca qué ridúʼyanu carru ne maniʼ de bele yanna, peru nánnanu cayapa Jiobá xquidxi tiempu riʼ ne zúnirube ni ora maʼ guzulú ca dxi jma nagana (Mat. 24:21; Apoc. 7:9, 14). Laga cabézanu guedandá dxi ca, guietenaláʼdxinu «ra nuu Dios nga zanda guilanu» (Sal. 62:8).