ORACIÓN

3 Ximodo guni orarnu

NDAANIʼ stale religión maʼ biaa binni guzuxibi o cuíʼ para guni orar, rusiidicabe laacaʼ xi diidxaʼ guiniʼcaʼ ne xcaadxi cosa ni naquiiñeʼ gúnicaʼ. Peru Biblia maʼ gadxé ni rusiidiʼ. Laani ruzeeteni de xcaadxi cosa jma risaca.

Ruzeeteni de ca xpinni Dios ni biʼniʼ orar gadxé gadxé lugar ne gadxé gadxé modo. Pur lugar ra nuucabe guyuu ora biʼniʼ orárcabe ndaaniʼ ladxidóʼcabe, ne xcaadxi biaje bíʼnicabe ni né ridxi nadipaʼ. Caadxi de laacabe gundisalú guibáʼ ne xcaadxi de laacabe gundeteʼ ique. Qué ñuu ora niquiiñecabe bidóʼ, rosario ne libru ra cá oración. Ni bíʼnicabe nga guníʼcabe guiráʼ ni runi sentírcabe. Xiñee guyuulaʼdxiʼ Dios ca oración ni bíʼnicabe yaʼ.

Primé la? purtiʼ biʼniʼ orárcabe Jiobá, ne nga nga caquiiñeʼ guni binni para gucaadiaga Dios ca oración stiʼ casi maʼ bidúʼyanu ca. Peru lu 1 Juan 5:14 rieeteʼ sti razón: «Nanna dxichi nu pa inaba nu ni riulaʼdxi Dios gaca la? zucaa diaga laanu». Zacá nga laani, lu ca oración ni gúninu naquiiñeʼ guinábanu ni riuulaʼdxiʼ Dios gaca. Xi laani yaʼ.

Primeru naquiiñeʼ gánnanu xii nga ni racalaʼdxiʼ Dios gaca. Ne para nga caquiiñeʼ guidúʼndanu Stiidxaʼ Dios. Jiobá qué ribeza diʼ gúʼndanu Biblia cásica runi ca erudito ni. Peru ribézabe gúninu stipa pur guiénenu ni naguixhe íquebe gúnibe ne gusihuínninu dxandíʼ riénenu ni pur modo nabáninu (Mateo 7:21-23). Cani guininu lu ca oración ni gúninu naquiiñeʼ gusihuínnicani ni maʼ bizíʼdinu de lu Biblia.

Ne ora guizíʼdinu jma de Jiobá ne de cani naguixhe íquebe gúnibe, jma rápanu fe. Ne nga nga sti cosa ni naquiiñeʼ gápanu para gucaadiaga Dios ca oración stinu, Jesús guníʼ: «Irá ni inaba tu ora iníʼ né tu Dios, pa inaba tu ni ne fe la? zacaa tu ni canaba tu que» (Mateo 21:22). Gapa binni fe nga guni cré xiixa ni qué rihuinni, peru cadi caníʼ diʼ nga guni cré binni intiica cosa. Fe ni cuzeeteʼ Jesús lu textu ca nuu stale cosa ni rusihuinni zanda gápanu ni (Hebreos 11:1). Dxandíʼ, qué zanda guidúʼyanu Jiobá, peru lu Biblia ridxélanu stale lugar ra cuzeeteʼ dxandíʼ nuube, zanda guni crenu laabe ne ricábibe oración stiʼ cani napa fe. Laabe qué ridxiichibe ora rinábanu gudiibe laanu fe; sínuque racaláʼdxibe gudiibe laanu biaʼ tiica guinábanu laabe (Lucas 17:5; Santiago 1:17).

Maʼ bizéʼtenu chupa cosa ni naquiiñeʼ gúninu para gucaadiaga Dios oración stinu, peru nuuruʼ sti cosa risaca ni naquiiñeʼ gúninu, Jesús bisiene ni sicaríʼ: «Iruti zie ra nuu Bixhoze pa cadi pur naa» (Juan 14:6). Ndiʼ nga ni cusiene textu ca: pur tobi lucha Xiiñiʼ Dios si nga zanda guidxíñanu ra nuu Bixhoze. ¡Ngahuaʼ runi bisiidiʼ Jesús ca discípulo stiʼ guni orarcaʼ lu lá! (Juan 14:13; 15:16.) Peru cadi tiisi guni orarnu lu lá Jesús ca riniʼni cayuni orarnu laabe. Runi orarnu lu labe purtiʼ zacá rusihuínninu pur laabe nga zanda guni orarnu Bixhózenu ni nuu guibáʼ, ti Dios ni qué ruchee ne nandxóʼ.

Ti biaje gudxi tobi de ca discípulo stiʼ Jesús laa: «Señor, bisiidi laadu iní né du Dios» (Lucas 11:1). Xi gucalaʼdxiʼ discípulo ca ñabi Jesús yaʼ. Laacabe maʼ nánnacabe ximodo guni orárcabe. Peru ni rápacabe gana gánnacabe nga xidé zanda guni orárcabe.

[Ni caníʼ yaza 6]

Para ganda gucaadiaga Dios ca oración stinu, naquiiñeʼ guinábanu ni racaláʼdxibe gaca, gápanu fe ne guni orarnu lu lá Jesús