Ricaanu stipa para cadi gucheʼnu ne para cadi guireʼnu gana
«Ora ma ucuaa tu Espíritu Santu la? zapa pe tu enda nandxóʼ sti Dios.» (HECH. 1:8)
1, 2. Xi guníʼ Jesús zacané ca discípulo stiʼ, ne xiñee zaquiiñecabe ni.
JESÚS nanna qué zanda diʼ guni ca discípulo stiʼ dxiiñaʼ bisaananebe laacaʼ pur stipa si sticaʼ. Cumu nánnabe nabé naroʼbaʼ dxiiñaʼ bisaananebe laacaʼ, pabiáʼ nadipaʼ ca xhenemígucaʼ ne racanacaʼ purtiʼ binni casi laanu laacaʼ la? rihuinni dxíchica caquiiñecabe stipa stiʼ Dios para gacané laacabe. Nga runi, ante chebe guibáʼ gúdxibe laacaʼ: «Ora ma ucuaa tu Espíritu Santu la? zapa pe tu enda nandxóʼ sti Dios, ne óraque ma zanda iree tu, chi güi tu stiidxa ndaani guidxi Jerusalén ne idubi Judea ne Samaria ne idubi naca guidxilayú» (Hech. 1:8).
2 Bizulú guca ni na ca diidxaʼ guniʼbe que lu Pentecostés stiʼ iza 33, ora gucuaa ca xpinni Jesús poder ni rudii espíritu santu, ngue gucané laacabe gucheechecabe diidxaʼ guidubi naca Jerusalén. ¡Guirutiʼ qué ñanda nucueeza laacabe! (Hech. 4:20.) Dede dxiqué hasta «dxi iluxe guidxilayú», guiráʼ ca xpinni Cristu caquiiñecaʼ poder ni rudii Dios (Mat. 28:20).
3. 1) Ximodo nga gadxé espíritu santu ne gadxé nga poder stiʼ Dios. 2) Ximodo racané poder ni rudii Jiobá laanu.
3 Guietenaláʼdxinu ni gudxi Jesús ca discípulo stiʼ: «Ora ma ucuaa tu Espíritu Santu la? zapa pe tu enda nandxóʼ sti Dios». Peru naquiiñeʼ gánnanu gadxé nga espíritu ne gadxé nga «enda nandxóʼ» o poder stiʼ Dios. Espíritu ca nga stipa stiʼ Dios ni riniibi; laani nga ni ruseendaʼ Jiobá luguiáʼ tuuxa binni o luguiáʼ xiixa cosa para gaca ni nabe. Peru poder ca nga stipa ni napa tuuxa ne «zanda iquiiñeʼ ni para guni xiixa ni racalaʼdxiʼ». Poder ca zanda guiaana ni luguiáʼ ti binni o luguiáʼ ti cosa ne zanda iquiiñecabe ni dede óraruʼ maʼ racaláʼdxicabe gúnicabe xiixa. Pur ni maʼ bizéʼtenu ca, zanda guininu zeeda gaca espíritu santu casi corriente biaaniʼ ni runi cargar ti batería, peru poder ca zanda guchaaganu ni corriente ni biaana ndaaniʼ batería ca ora maʼ biluxe guca cargar. Guenda nandxóʼ o poder ni rudii Jiobá laanu pur espíritu santu stiʼ, rudiini stipa laanu para ganda gúninu ni bidii stiidxanu laabe ne ganda gudxíʼlunu intiica cosa malu gueeda luguianu. Biblia na: «Yanna, naa la? maʼ bidii espíritu stiʼ Jiobá naa stale poder, ne racaneni naa guneʼ ni jneza ne bidiini stipa naa, para gabeʼ Jacob ximodo bicaalucaʼ ne gabeʼ Israel paraa bichee» (Miqueas 3:8; biindaʼ Efesios 3:16).
4. Xi zadúʼyanu lu tema riʼ, ne xi para zaquiiñeʼ ni laanu.
4 Ximodo rusihuínninu poder ni rudii espíritu santu laanu yaʼ. Xi guiráʼ rucaani laanu gúninu ne ximodo racaneni laanu ora guidxaagalunu xiixa cosa. Neca rúninu stipa pur gúninu ni na Jiobá sin gucheʼnu, rudxíʼlunu stale guendanagana ni rulaa Binidxabaʼ laanu, rudxíʼlunu ca cosa ni nuu lu guidxilayú ne donda gulenenu. Naquiiñeʼ tiidinu lu ca guendanagana ca, purtiʼ zacatiʼ nga qué zuchéʼnenu Dios, qué zusaana de gucheechenu diidxaʼ ne qué zusaananu de gaca xhamígunu Jiobá. Guidúʼyanu ximodo racané espíritu santu laanu para gudxíʼlunu cani ruquiinde laanu gucheʼnu ne para cadi guidxáganu ne cadi guireʼnu gana.
Poder ni zacané laanu gudxíʼlunu cani ruquiinde laanu
5. Ximodo rudii oración ca stipa laanu.
5 Jesús bisiidiʼ ca discípulo stiʼ xi naquiiñeʼ guinábacaʼ Dios ora guni orarcaʼ: «Cadi udiiu lugar cuba yu binidxaba laadu, sínuque bilá laadu de lu ná be» (Mat. 6:13). Jiobá qué zusaana ca xpinni ni ruzuubaʼ stiidxaʼ, ora runi orarcaʼ para gacanebe laacaʼ. Despué laaca gudxi Jesús laacabe ca diidxaʼ riʼ: «Bixhoze tu ni nuu ibáʼ [z]udii Espíritu Santu ni inaba laa» (Luc. 11:13). ¡Nabé ratadxí ladxidoʼno gánnanu zudii Dios laanu poder para ganda gúninu ni jneza! Peru cadi caníʼ diʼ nga zucueezabe guiráʼ ni uquiinde laanu (1 Cor. 10:13). Ni na ca diidxaʼ ca nga, jma naquiiñeʼ guni orarnu de guidubi ladxidoʼno ora chuʼ xiixa ni uquiinde laanu (Mat. 26:42).
6. Xi biquiiñeʼ Jesús para gunda bicaanáʼ cani biluíʼ Binidxabaʼ laa.
6 Ora gucalaʼdxiʼ Binidxabaʼ nucaa Jesús nuchee la? Jesús biquiiñeʼ Stiidxaʼ Dios para bicabi laabe. Rihuínnica runibiáʼ chaahuiʼ Jesús Stiidxaʼ Dios. Guidúʼyanu ca diidxaʼ ni biquiiñebe: «Maca cá lu Xquiʼchi Dios», «Peru laca cá lu Xquiʼchi Dios» ne «Biree de ra nuaa binidxabaʼ, purti cá lu Xquiʼchi Dios, Dios si nga naquiiñe usisaca cabe ne guni cabe ni na». Cumu nadxii Jesús Jiobá ne nadxii Stiidxaʼ Dios la? ngue nga ni bidii stipa laabe para gucaanabe cani biluíʼ Binidxabaʼ laabe (Mat. 4:1-10). Ora biiyabe qué ñaba Jesús lu ca trampa stibe la? bisaanabe laa.
7. Ximodo racané Biblia laanu para gudxíʼlunu xiixa ni uquiinde laanu.
7 Pa biquiiñeʼ Jesús Stiidxaʼ Dios para gunda bicaanáʼ cani biluíʼ Binidxabaʼ laa la? ¡jmaruʼ si naquiiñeʼ gúninu ni! Xi naquiiñeʼ gúninu primé para gucáʼnanu Binidxabaʼ ne cadi guiábanu lu ca trampa stiʼ yaʼ. Naquiiñeʼ quixhe íquenu gunibiaʼnu ca ley stiʼ Jiobá ne cadi gusaana de chinándanu cani. Stale binni huaguixhe íquecaʼ chinándacaʼ ley stiʼ Jiobá, despué de biziidicaʼ ni na Biblia ne biénecaʼ pabiáʼ risaca guendanuuxpiaaniʼ ne guendaruni jneza stiʼ Dios. Dxandíʼ, «Stiidxa Dios» nápani poder, purtiʼ randa ruuyani «ni cá lu xquenda biaani nu» ne xi nuu ndaaniʼ ladxidoʼno (Heb. 4:12). Ne ora jma guidúʼndanu Stiidxaʼ Dios ne guiníʼ íquenu de laani, jma zudiʼnu cuenta naca Jiobá ti Dios ni qué rusaana ca xpinni ne dxandíʼ ni riníʼ (Dan. 9:13). Cumu napa Biblia ca poder la? naquiiñeʼ cueenu tiempu para guiníʼ íquenu lu ca relatu ni caníʼ de xiixa guendanagana cadídinu.
8. Xi zacané laanu para guicaanu espíritu santu.
8 Cadi purtiʼ si nanna Jesús ni cá lu Biblia nga gunda bidxiilú cani biquiiñeʼ Binidxabaʼ para uquiinde laa, sínuque purtiʼ laaca «dxá ladxidóʼ de Espíritu Santu» (Luc. 4:1). Cásica laabe, laanu laaca zanda gácanu nadipaʼ ne zanda gudxíʼlunu intiica cosa pa chuʼnu gaxha de Jiobá. Peru ximodo zanda guidxíñanu gaxha de Dios yaʼ. Ra iquiiñenu guiráʼ cani rudiibe laanu para gápanu espíritu santu, caadxi de laacani nga, guidúʼndanu Biblia, guni orarnu ne guidxaaganu ca xpinni Cristu (Sant. 4:7, 8). Stale xpinni Cristu rudiicaʼ cuenta nabé risaca nga cadi gusaanacaʼ de gúnicaʼ jma lu xhiiñaʼ Dios. Riníʼcabe racaneni laacabe para guiníʼ íquecabe lu ca cosa ni zanda gacané laacabe chúʼcabe jma gaxha de Dios.
9, 10. 1) Xii nga cani jma rucaa binni guchee neza ra nabézaluʼ. 2) Ora guiníʼ ique chaahuinu lu ni gúʼndanu ne guni orarnu para cadi chuʼ ni uquiinde laanu, ximodo racané cani laanu jmaruʼ si ora maʼ bidxáganu.
9 Guiníʼ íquenu xi huaquiinde laanu guchéʼnenu Dios. Pa maʼ bichaganaluʼ, ñee huayuu ora gusihuínniluʼ riuuláʼdxiluʼ tuuxa neca nannuʼ cadi jneza ni la? O pa caʼruʼ guichaganaluʼ ne biʼniʼ invitar tuuxa ni cadi xpinni Cristu lii para guireeneluʼ laa, ñee guca nagana para lii gaʼbuʼ laabe coʼ la? Pa málasi biiyuʼ xiixa cosa dxabaʼ lu televisión o lu Internet, ñee biquiinde lii guiaanaluʼ para gúʼyaluʼ jma de laani la? Para cadi gapuʼ ca guendanagana ca jma jneza guiníʼ íqueluʼ dede ante xi zazaaca pa guʼnuʼ ni, bietenalaʼdxiʼ: pa guʼnuʼ ti cosa ni cadi jneza la? zanda gucaa nga lii guʼnuʼ sti cosa jma malu (Sant. 1:14, 15). Laaca naquiiñeʼ guiníʼ íqueluʼ zusiuubaluʼ ladxidóʼ Jiobá, ca binni ridagulisaa ne ca binnilídxiluʼ pa gucheeneluʼ Dios. Peru pa guni respetarluʼ ca ley stiʼ Dios la? ziuu xquendabiaaniluʼ nayá. Biblia na: «Cadi gudiiluʼ lugar guʼyaʼ luáʼ cosa qué iquiiñeʼ; gucané naa para guibaneʼ lu ca neza stiluʼ». Ne laaca caniʼni: «Binni nuu xpiaaniʼ la? rucaachilú ora guʼyaʼ maʼ zeeda xiixa guendanagana ni zuniná laa, peru ni cadi nuu xpiaaniʼ la? runi guiráʼ ni racalaʼdxiʼ ne racaná» (Salmo 119:37 ne Proverbios 22:3). Cada biaje guidxaagalunu xiixa guendanagana casi cani maʼ bizéʼtenu ca, guinábanu Dios gudii stipa laanu para tiidinu cani.
10 Laaca zanda guizíʼdinu sti cosa lu cani biquiiñeʼ Binidxabaʼ para biquiinde Jesús. Ora bidxiña Binidxabaʼ laabe lu desiertu que, maʼ bisaabe cuarenta dxi de qué huayobe. Ngue runi, biiyaʼ Binidxabaʼ biáʼsipeʼ tiempu que para gucaa laabe gucheebe (Luc. 4:13). Ngaca nga ni rúnibe né laanu yanna: ruyúbibe pora jma zanda gucaabe laanu gucheʼnu ne rucaalube laanu ora ruuyabe cadi naguídxipeʼ zuhuaʼnu. Nga runi, naquiiñeʼ gúninu stipa pur cadi gusaananu de guzuhuaʼnu dxiichiʼ lu stiidxaʼ Dios. Ora guni sentirnu maʼ bidxáganu ne maʼ careʼnu gana la? oracapeʼ nga jma naquiiñeʼ guinábanu Jiobá gapa laanu ne gudii laanu espíritu stiʼ.
Poder ni racané laanu ora maʼ cadxáganu ne ora maʼ careʼnu gana
11, 12. 1) Xiñee huaxiéʼ gana napa binni ca dxi riʼ. 2) Xi zudii stipa laanu para cadi guireʼnu gana.
11 Cumu nácanu binni ruchee la? cadi guendaridxagayaa diʼ nga chuʼ ora guireʼnu gana, ne jmaruʼ si purtiʼ nabáninu ti tiempu ra nabé nuu guendanagana, zándaca ndiʼ nga tiempu ni jma nagana ni qué huayuudxí tiidiʼ binni guidxilayú (2 Tim. 3:1-5). Cumu jma maʼ gaxha zeeda Armagedón la? jma cadale guendanagana ca dxi riʼ, stale binni qué gapa ni tiidiné dxi, nuu stale cosa ni riguu laacaʼ triste o nápacaʼ xcaadxi guendanagana. Cadi guendaridxagayaa diʼ nga zeʼ dxi jma nagana cayaca para stale binni gudii ni caquiiñeʼ binnilidxi. Nabé ricá íquecabe gúnicabe stale cosa ni guizáʼ rusidxaga laacabe. Pa zacá nuuluʼ, xi zacané lii para guni huantarluʼ ni yaʼ.
12 Bietenalaʼdxiʼ guníʼ Jesús zuseendaʼ xiixa ni zacané laanu, laani nga: espíritu santu (biindaʼ Juan 14:16, 17). Laani nga poder ni jma nandxóʼ ni nuu guibáʼ ne lu guidubi naca Guidxilayú. Riquiiñeʼ Jiobá ni para gudii laanu stipa «jma que biaʼ [riníʼ] ique nu» para gudxíʼlunu intiica guendanagana (Efe. 3:20). Apóstol Pablu guníʼ rudii espíritu ca «enda nandxóʼ stiʼ» Dios laanu, dede ora guidxaagalunu guendanagana «ladu tiisi chuu [nu]» (2 Cor. 4:7, 8). Cadi cayabi diʼ Jiobá laanu zabee guiráʼ ni runiná laanu, peru cayábibe laanu zudii espíritu stibe laanu guiráʼ stipa ni caquiiñenu (Fili. 4:13).
13. 1) Ximodo huacaa Stephanie stipa para gudxiilú ca guendanagana napa. 2) Ñee runibiaʼluʼ tuuxa ni nuu casi nuube ca la?
13 Guidúʼyanu ni bizaaca Stephanie, ti precursora regular de 19 iza. Dxi nápabe 12 iza gúpabe ti derrame ne bihuinni nápabe ti tumor ndaaniʼ íquebe. Dede dxiqué maʼ chupa biaje biʼniʼ operárcabe laabe, maʼ gucuaabe radioterapia ne maʼ gúpabe xhupa derrame, ne pur ca nga maʼ huaxiéʼ ruuyabe ne maʼ nayati biaana ti galaa de laabe ladu bigaʼ. Stephanie qué runi stale cosa ni gusidxaga laa ti ganda iquiiñeʼ ca stipa stiʼ para ca cosa jma risaca, casi ca guendaridagulisaa ca ne gucheechebe diidxaʼ. Peru ruuyabe racané Jiobá laabe de stale modo ne rudii stipa laabe para gudxiilube ca guendanagana nápabe. Casi ora ruundabe ni rizaaca ca xpinni Cristu ni reeda lu ca libru ne revista stinu la? riguixhedxícani ladxidoʼbe ora nuube triste. Ca xpinni Cristu riguucaʼ gana laabe ora ruseendacaʼ tarjeta ra nuube ne riníʼnecaʼ laabe ante ne despué de ca guendaridagulisaa ca. Ne riná caadxi binni ni riuulaʼdxiʼ guiziidiʼ de lu Biblia checaʼ dede ralídxibe para gusiidibe laacaʼ. Pur guiráʼ nga la? nabé rudii Stephanie xquíxepeʼ Jiobá ne riníʼ íquebe raca ni cá lu Salmo 41:3 luguiabe, textu ca nga ni jma riuuláʼdxibe.
14. Xii nga ni jma feu gúninu ora guni sentirnu maʼ bidxáganu, ne xiñee.
14 Pa maʼ bidxáganu o pa nuu xiixa ni cayuniná laanu, qué chuʼ dxi guiníʼ íquenu zanda gaca chaahuiʼ cani pa gusaana de gúninu xhiiñaʼ Dios. Nga nga cosa jma feu guiníʼ íquenu gúninu. Xiñee yaʼ. Purtiʼ ora ridúʼndanu Biblia laasinu ne guidúʼndanenu binnilídxinu, chigucheechenu diidxaʼ, ne chuunu ca guendaridagulisaa ca ricaanu espíritu santu ni rudii stipa laanu ne riguu gana laanu (biindaʼ Mateo 11:28, 29). Cadi dxandíʼ nuu tiru maʼ bidxáganu ora chindanu ra ridagulisaanu, peru ora maʼ bilúxeni runi sentirnu maʼ nápanu gana la? ¡Zeeda gácani casi ora ñuni cargarnu batería stinu ti gápanu stipa para gúninu jma lu xhiiñaʼ Dios!
15. 1) Ñee guníʼ Jiobá cadi naquiiñeʼ gúninu stipa para cadi guchéʼnenu laa la? Biquiiñeʼ ejemplu zeeda lu Biblia ora guicábiluʼ. 2) Xi guníʼ Dios zudii laanu, ne xi zándaca guinabadiidxanu.
15 Qué riníʼ diʼ nga qué iganna nga gácanu xpinni Cristu. Naquiiñeʼ gúninu stale stipa para cadi guchéʼnenu Dios (Mat. 16:24-26; Luc. 13:24). Peru pa guidxáganu la? Jiobá zanda gudii stipa laanu ne espíritu stiʼ. Isaías ni riguixhená bicaa ca diidxaʼ riʼ: «Cani cá lú [gacané] Jiobá [laacaʼ] la? zápacaʼ stipa sti biaje. Zapápacaʼ casi ñaca ñápacaʼ xhiaa bisiá. Zuxooñecaʼ ne qué zará stipa sticaʼ, zazacaʼ ne qué zadxágacaʼ» (Isa. 40:29-31). Yanna jneza nga guinabadiidxanu: Xiñee nuu tu riníʼ nabé ridxaga ora guni xhiiñaʼ Jiobá yaʼ.
16. Ximodo zanda gusaana de gúninu caadxi cosa ni rusidxaga laanu ne ni ribee gana laanu.
16 Biblia caguu gana ca xpinni Dios para gánnacaʼ cuicaʼ «ni dxandí risaca» (Fili. 1:10). Pablu bichaaga xquendanabani ca xpinni Cristu ne ti carrera ra ruxooñeʼ binni zitu ora guníʼ ca diidxaʼ riʼ: «Zaqueca laanu, udxíʼ lú nu sa nu lu neza ni gudixhe Dios para laanu sin ixhacalaʼdxi nu. Ne para ganda chindá nu la? naquiiñe usaana nu irá ni rucueeza laanu» (Heb. 12:1). Ni rusiidiʼ ejemplu riʼ laanu nga naquiiñeʼ gusaana de gúninu ca cosa ni cadi caquiiñepenu ni zusidxaga laanu. Zándaca racaláʼdxinu gúninu xcaadxi cosa aparte de cani maca rúninu ne nga zanda gusidxaga laanu ne uguu laanu xizaa. Pa guizaacanu zacá, galán guinabadiidxanu laca laanu: «Pabiáʼ tiempu ne stipa riquiiñeʼ para guneʼ xhiiñaʼ yaʼ. Ñee nabé riaaʼ de viaje para chizayaʼ la? Panda hora riquiiñeʼ ora maʼ zichiteʼ o guneʼ xiixa cosa ni riuuladxeʼ». Pa guiníʼ íquenu jneza ne guiénenu nuu cosa ni qué zanda gúninu la? zacané nga laanu para cadi guicá íquenu gúninu xiixa cosa ni cadi caquiiñepenu.
17. Xiñee riree caadxi xpinni Cristu gana, ne xi maʼ guníʼ Jiobá guni ni zanda uguu gana laacabe.
17 Xcaadxi xpinni Cristu zándaca maʼ bireecaʼ gana purtiʼ runi sentircaʼ maʼ gudiʼdiʼ tiempu gulézacaʼ ninitilú ca cosa malu nuu yanna riʼ, peru caʼruʼ gácani (Pro. 13:12). Xi zanda uguu gana laacabe yaʼ. Ca diidxaʼ ni zeeda lu Habacuc 2:3: «Caʼruʼ diʼ guidxiña dxi para gaca ni bihuinni lu visión que, peru cahuinni zácani dede dxi gueeda fin, ne dxandíʼ zácani. Neca guindaani la? gulézaruʼ ni; purtiʼ dxandíʼ zácani. Qué zandaani». Casi maʼ bidúʼyanu ca, zanda guni crenu ni maʼ guníʼ Jiobá, purtiʼ dxandíʼ zunitilube ca cosa malu ca órapeʼ maʼ gudíxhebe gúnibe ni.
18. 1) Xi maʼ guníʼ Jiobá chiguni ni riguu gana laanu. 2) Xi zadúʼyanu lu sti tema ca.
18 Guiráʼ ca xpinni Jiobá ni cayuni stipa para cadi gucheené laabe cabeza lélecaʼ dxi maʼ qué chuʼ ni gusidxaga ne cuee gana laacaʼ ne guibiguetaʼ gápacaʼ stipa ni gúpacaʼ dxi nahuiinicaʼ (Job 33:25). Dede ca dxi stinu riʼ zanda gudii espíritu santu stipa laanu pa cadi gusaananu de gúninu xhiiñaʼ Dios (2 Cor. 4:16; Efe. 3:16). Cadi gudiʼnu lugar gusidxaga xiixa cosa laanu ne pur nga gunítinu ca ndaayaʼ ni chigudii Dios laanu. Guiráʼ ca guendanagana gápanu —casi cani uquiinde laanu, guidxáganu o guireʼnu gana— zaluxe cani ora gueeda guidxilayú cubi ca. Lu sti tema ca zadúʼyanu ximodo rudii espíritu santu stipa laanu para guni huantarnu ora chuʼ tu sananda laanu, ora chuʼ tu gucaa laanu gúninu xiixa ni cadi jneza ne ora guidxaagalunu xcaadxi guendanagana.
Xi nicábiluʼ
• Xiñee ricaanu stipa ora ridúʼndanu Biblia.
• Xiñee riuʼnu jma naguidxi ora runi orarnu ne ora riníʼ ique chaahuinu lu ni ridúʼndanu.
• Xi zanda gúninu para cadi chuʼ ni cuee gana laanu.
[Dibuju/foto ni zeeda lu yaza 24]
Ca guendaridagulisaa ca rudiicani stipa laanu para gúninu ni na Dios