Ricaanu stipa para tiidinu lu intiica guendanagana

«Yanna la? hermanu caʼ, lachuu né Señor tobi si, ti uzuhuaa chaahui tu, purti nabé nandxóʼ be ne zacané be laatu.» (EFE. 6:10)

1. Xiñee ridxaagalú ca xpinni Jiobá guiráʼ clase guendanagana.

LAANU, ca xpinni Jiobá laaca rápanu guendanagana cásica guiráʼ binni. Rápanu ca guendanagana ca purtiʼ binni gulené donda laanu, nabáninu ndaaniʼ ti guidxilayú malu o purtiʼ nanalaʼdxiʼ ca xhenemigu Dios laanu (Gén. 3:15). Dede dxi guyuu binni lu Guidxilayú, huayacané Jiobá ca xpinni para guni huantarcaʼ ora chuʼ tu gucaalú laacaʼ pur fe sticaʼ, ora gacalaʼdxiʼ tuuxa gucaa laacaʼ gúnicaʼ xiixa ni cadi jneza ne ora guidxaagalucaʼ intiica sti guendanagana. Zanda guni crenu dxandíʼ zudii espíritu stibe stipa ni caquiiñeʼ cada tobi de laanu para cadi gusábacabe laanu.

Zanda guni huantarnu ora sanándacabe laanu pur fe stinu

2. Xiñee rucaalúcabe laanu pur fe stinu, ne ximodo rúnicabe ni.

² Ora rizanándacabe laanu o gucaalúcabe laanu pur fe stinu la? rúnicabe ni para gucaacabe laanu gusaana de guni crenu ni maʼ nánnanu ne gucueezacabe laanu de gusíʼdinu ni binni o para gusaana de gúninu ni na Dios. Ne gadxé gadxé modo nga rucaalú Binidxabaʼ laanu. Biblia ruchaaga cani casi ora rucaalú ti lión huiiniʼ binni pa gueedapeʼ ca binni ca dede ra nuunu para guninacaʼ laanu, ne casi runi ti cobra pa gúnicabe sin gudiʼnu cuenta. Biblia na: «Zuzuhuaañeeluʼ luguiáʼ ti lión ni nahuiiniʼ ne luguiáʼ cobra; zutuñeeluʼ lión ni napa jluxu ne beendaʼ ngola» (Salmo 91:13).

3. Ximodo rucaalú Binidxabaʼ laanu casi runi ti lión ne casi runi ti cobra.

³ Cásica rucaalú ti lión ni naduxhuʼ, zacaca rucaalú Binidxabaʼ laanu ora riquiiñeʼ binni ni guniná laanu, ni guseguyoo laanu ne gucueezacaʼ laanu de gucheechenu diidxaʼ (Sal. 94:20). Lu Anuario, libru ra reeda ximodo cayuni ca testigu stiʼ Jiobá dxiiñaʼ tiempu riʼ, ruzeeteʼ stale relatu de modo rucaalú Binidxabaʼ laanu. Stale lugar la? huayasa grupu de binni ni guirutiʼ qué randa gucueeza laacaʼ —nuu biaje ca xaíque yuʼduʼ ca nga rucaa laacabe gúnicabe ni ne nuu tiru ca políticu— ne huayuninacaʼ ca xpinni Dios. Huayuu xpinni Cristu ni huaxeleʼ de Dios ora rucaalúcabe laa zacá. Ne nuu biaje rucaalú Binidxabaʼ laanu casi runi ti beendaʼ. Zanda guininu rucaachilube ne málasi ruquiichibe casi runi ti beendaʼ, zacá nga casi ñaca niguube venenu ndaaniʼ íquenu ne quítebe laanu para gúninu ni racaláʼdxibe. Ora rucaalube laanu zacá la? rúnibe ni para guninabe laanu ne guxhélebe laanu de Dios. Peru cumu nápanu espíritu santu la? zanda gudxíʼlunu laabe ora gucaalube laanu guiropaʼ modo bizéʼtenu ca.

4, 5. Xii nga ni jma galán gúninu para chuʼnu listu ante sanándacabe laanu, ne xiñee. Bizeeteʼ ti ejemplu.

⁴ Nécapeʼ guiranu naquiiñeʼ chuʼnu listu ante sanándacabe laanu la? ni cadi jneza gúninu nga guiníʼ íquenu dede ante xi guendanagana zándaca guidxaagalunu. Xiñee yaʼ. Purtiʼ qué zanda diʼ gánnanu xi chiguizaaca despué, nga runi pur gana si chuʼnu xizaa pur ti cosa ni zándaca qué ziuu dxi gaca. Peru nuu ti cosa ni zanda gúninu: chinándanu ejemplu stiʼ ca xpinni Cristu neca guyuu tu guzananda laacaʼ. Stale de laacabe biʼniʼ huantárcabe cani bicaalú laacabe, purtiʼ guníʼ íquecabe de ejemplu stiʼ ca xpinni Dios ni ruzeeteʼ Biblia ni qué nuchee, ne zaqueca guníʼ íquecabe lu cani bisiidiʼ Jesús ne ejemplu ni bisaana. Zacá gunnaxhiicabe Jiobá ne ngue gucané laacabe gudíʼdicabe guiráʼ guendanagana ni bidxaagalúcabe.

⁵ Guidúʼyanu ni bizaaca chupa gunaa xpinni Cristu de Malahui. Ti biaje gucalaʼdxiʼ ti grupu de binni ni cadxiichi nucaa laacabe nizíʼcabe ti tarjeta para ñácacabe de ti partidu. Gudíñecaʼ laacabe ne bisaanacaʼ laacabe xiee ládicabe ne laaca guniʼcaʼ zaláxoocaʼ laacabe pa qué gúnicabe ni nacaʼ. Ne gucaláʼdxicaʼ niguítecaʼ laacabe ora guniʼcaʼ maʼ guzíʼ ca betelita tarjeta stiʼ partidu que. Xi biʼniʼ ca gunaa riʼ ya. Laacabe bicábicabe: «Jiobá si nga runi adorardu, nga runi, pa maʼ guzíʼ ca bizáʼnadu ne ca béndadu ni nuu Betel tarjeta ca la? laadu qué zúnidu ni. ¡Qué zúnididu ni natu neca guutitu laadu!». Ora biʼyaʼ ca binni que pabiáʼ nadxibalúcabe la? bidiicaʼ lugar chécabe.

6, 7. Ximodo racané Jiobá ca xpinni para guni huantarcaʼ ora sanándacabe laacaʼ.

⁶ Apóstol Pablu guníʼ, gudiʼdiʼ ca binni de Tesalónica «ra nagana» dxi binibiaʼcaʼ Dios, neca zaqué «bisieche Espíritu Santu» laacaʼ (1 Tes. 1:6). Stale xpinni Cristu ni ruzuubaʼ stiidxaʼ Dios ni bibani dxiqué ne cani nuu yanna, huaniʼcaʼ ratadxí ladxidoʼcaʼ ora jmapeʼ naná modo guzanándacabe laacaʼ. Ora ratadxí ladxidóʼcabe ca, zeeda gácani tobi de ca guenda ni rudii espíritu stiʼ Dios ne gúpani xquendabiaanicabe ne ladxidóʼcabe (Gál. 5:22). Dxandíʼ, Jiobá rudii stipa ca xpinni pur espíritu stiʼ para ganda guni huantarcaʼ ca guendanagana guidxaagalucaʼ ne gúnicaʼ ni jneza ora tiidicaʼ ra jma nagana.a

⁷ Nuu binni nabé ridxagayaa ora ruuyacaʼ qué riná ca xpinni Cristu gucheenecaʼ Dios neca nabé naná modo canazanándacabe laacaʼ. Rudiicabe cuenta casi ora ricaa ca binni ca stipa de sti lugar, ne dxandíʼ zacá nga laani. Biaʼsi ngapeʼ nga ni guníʼ apóstol Pedru: «Dichoso de laatu pa cuʼ dí cabe laatu tisi xpinni Cristu laatu, purti nuu né Espíritu sti Dios ni nandxóʼ laatu. Laacabe riníʼ cabe laabe peru laatu rusisaca tu laabe» (1 Ped. 4:14). Né ca diidxaʼ ca cusihuínnibe ti cosa: pa guninácabe laanu purtiʼ runi respetarnu ca ley stiʼ Dios la? cusihuinni nga riuulaʼdxiʼ Dios ni cayúninu, ne nga nga tobi de ca razón nápanu para chuʼnu nayecheʼ (Mat. 5:10-12; Juan 15:20).

Ora gacalaʼdxiʼ tuuxa gucaa laanu gúninu xiixa ni cadi jneza

8. 1) Ximodo gunda biʼniʼ huantar Josué ne Caleb ni guníʼ ca israelita que. 2) Xi rusiidiʼ ejemplu stiʼ Josué ne Caleb laanu.

⁸ Laanu, ca xpinni Cristu laaca rucaalúcabe laanu de sti modo: laani nga ora gacalaʼdxiʼ tuuxa gucaa laanu gúninu xiixa ni cadi jneza. Peru nápanu espíritu stiʼ Jiobá, ne laani jma nadipaʼ ni que espíritu stiʼ guidxilayú riʼ. Pur laani randa rudxíʼlunu ca binni ni runi burla laanu, cani riníʼ mal de laanu o cani racalaʼdxiʼ gucaa laanu guibáninu modo nabánicaʼ. Guiníʼ íquenu ni bizaaca Josué ne Caleb. Laacabe nuucabe lade doce hombre ni guyé Canaán, peru qué ñuuláʼdxicabe ni guníʼ chii de ca hombre que ora bibiguétacabe de yeguuyacabe guidxi que. Xi bicaa laacabe guiníʼ íquecabe zaqué yaʼ. Espíritu stiʼ Dios nga bicaa laacabe guiníʼ íquecabe zaqué. Biblia na: «Josué [...] ne Caleb [...], cani nuu lade cani yeguuya layú que [...], bizulú gúdxicaʼ ndiʼ guiráʼ ca israelita: [...] “Pa cayechené Jiobá laanu la? dxandipeʼ zaguube laanu lu layú ca ne zudiibe ni laanu, layú ra ridá leche ne dxiña yaga. Xi si la? cadi gucheenetu Jiobá; ne laatu, cadi guidxíbitu ca binni ni nuu lu layú ca [...]. Jiobá nuuné laanu”. [...] Peru guiráʼ ca binni que guniʼcaʼ guchacaʼ guié laacabe dede gáticabe». «Peru Caleb xpinneʼ, cumu gadxé modo riníʼ ique ne qué nusaana de nuzuubaʼ stiidxaʼ la? zaguaaʼ laa lu layú ra guyé ca.» (Números 14:6-10, 24.)

9. Xiñee naquiiñeʼ quixhe íquenu cadi gúninu ni runi sti binni.

⁹ Lu primé siglu que, bidii espíritu santu poder ni caquiiñeʼ ca apóstol que para guzuubacaʼ stiidxaʼ Dios ne para cadi guiabayucaʼ nezalú ca maestru ni gupa binni casi ni rusiidiʼ ni dxandíʼ (Hech. 4:21, 31; 5:29, 32). Ca dxi riʼ, stale binni rinanda modo zeʼ xcaadxi binni para cadi tíndenecaʼ binni ne para cadi gápacaʼ guendanagana né stobi. Peru laanu ca xpinni Cristu, cadi naquiiñeʼ chinándanu casi runi ca binni ca, sínuque riguixhe íquenu gúninu ni jneza purtiʼ nga nga ni cazíʼdinu. Ne cumu rudii espíritu santu stipa laanu la? qué rizaaláʼdxinu ni guiníʼ binni (2 Tim. 1:7). Guidúʼyanu ti ejemplu ra cadi naquiiñeʼ gudiʼnu lugar gucaa binni laanu gúninu ni cayuni.

10. Xi guendanagana ridxaagalú caadxi xpinni Cristu.

¹⁰ Nuu stale hombrehuiiniʼ ne dxaapahuiiniʼ qué ridxélacaʼ xi gúnicaʼ ora gánnacaʼ cayuni ti xhamígucaʼ xiixa cosa ni cadi jneza. Riníʼ íquecabe casi ora zucheenécabe laabe pa guiníʼcabe xi cayúnibe. Ne riníʼ íquecabe jneza nga gucaachicabe ni cayuni xhamígube ca. Nuu biaje ni cuchee ca ruundaca lube para cadi guiniʼbe xi cayuni. Peru cadi lade si cani nahuiiniʼ nga rizaaca ni bizéʼtenu ca. Nuu caadxi de cani maʼ huaniisi raca nagana para laacaʼ checaʼ ra nuu ca binnigola ora guni tobi de ca xhamígucaʼ o ti binnilídxicaʼ xiixa cosa malu. Xi naquiiñeʼ gúninu ora guizaaca nga yaʼ.

11, 12. Bisiene xi naquiiñeʼ gúninu pa guinabaʼ ti xpinni Cristu laanu gucáʼchinu xiixa cosa malu biʼniʼ.

¹¹ Guxuíʼlunu ni bizaaca Luis ne Carlos, chupa hombrehuiiniʼ ni nuu ndaaniʼ ti neza binni ridagulisaa. Ora gunna Luis nabé ruuyaʼ xhamigu idxa guidxa o cosa dxabaʼ la? gúdxibe laa cadi jneza ni cayuni ne naquiiñeʼ gabi ni ca binnigola. Qué nizaalaʼdxiʼ Carlos ni gudxi Luis laa, qué nicaa conseju stibe ne gúdxibe Luis, pa dxandíʼ xhamigu laabe la? qué zabee xtaabe lu gubidxaʼ o qué zaníʼ xi cayúnibe. Ñee zadxibi Luis gusaana de gaca xhamígube laa la? Zándaca guiníʼ íquebe sicaríʼ: «Pa chaaʼ ra nuu ca binnigola ne guiníʼ Carlos cadi dxandíʼ ni, tu laa guni crécabe óraque yaʼ». Peru nánnabe pa gucaachibe ni cayuni xhamígube la? qué zacanédibe laa, ne ni jma feu nga, zándaca dede guixeleʼ Carlos de Jiobá. Ne laaca rietenalaʼdxiʼ Luis conseju sicarú riʼ: «Pa tuuxa ridxibi binni la? ziaba lu ti trampa, peru Jiobá rapa cani runi cré laa» (Pro. 29:25). Peru cumu rápabe gana gacanebe Carlos la? gúcabe nadxibalú ne guníʼnebe laa sti biaje, ne ribézabe gudii Carlos cuenta dxandíʼ nga rápabe gana gacanebe laa gaca chaahuiʼ guendanagana stiʼ. Luis rabi laabe naquiiñeʼ guiníʼnebe ca binnigola, ne pa qué gúnibe ni biaʼ dxi quixhe gúnibe ni la? laa zabi ni ca binnigola (Lev. 5:1).

¹² Zándaca ziuu ora zazaacanu xiixa casi ni bizéʼtenu ca. Pa guizaaca ni la? zándaca xhamígunu ca qué ziuulaʼdxiʼ ora gábinu laa cadi jneza ni cayuni. Peru despué zándaca guiénebe cayúninu ni purtiʼ racaláʼdxinu guibánibe galán. Yanna, pa de guidubi ladxidoʼbe gudiibe lugar gacanécabe laabe la? zándaca zudiibe xquíxepeʼ laanu pur gúcanu nadxibalú ne bisihuínninu dxandíʼ xhamígunu laabe. Peru, pa guidaabe xiana né laanu, ñee dxandíʼ risaca gaca xhamígunu laabe la? Ni jma jneza gúninu nga gusiéchenu Jiobá, xhamígunu ni jma risaca. Pa quixhe íquenu cadi guchéʼnenu Dios neca guizaaca intiica cosa la? laaca zuni respetar ca binni ni nadxii Dios laanu ne zuuyacaʼ laanu casi tobi ni dxandíʼ xhamígucaʼ. Qué chuʼ dxi gudiʼnu lugar guyubi Binidxabaʼ modo gucaa ca binni ridagulisaa gúnicaʼ ni cadi jneza. Pa gudiʼnu lugar laabe la? zuninanu espíritu santu, purtiʼ maʼ cadi cayúninu ni nani. Nga runi, dxiiñaʼ stinu nga gacanenu chuʼ neza binni ridagulisaa nayá nezalú Dios (Efe. 4:27, 30).

Zanda gudxíʼlunu intiica guendanagana

13. Xi guendanagana rapa ca xpinni Dios, ne xiñee nabé cayaca cani ca dxi riʼ.

¹³ Ca guendanagana ca reedacani pur stale razón, nuu biaje purtiʼ gastiʼ bueltu, pur guiládxicabe tuuxa de ra runi dxiiñaʼ, ora gaca xiixa desgracia casi xu, ora gati tuuxa ni nadxii binni ne ora gápacaʼ xiixa guendahuará malu. Nabézanu lu ca dxi «jma nagana», nga runi qué ridxagayaanu pa málasi gápanu guendanagana (2 Tim. 3:1). Ora guizaaca nga la? cadi galán diʼ guiníʼ íquenu maʼ biluxe guidxilayú para laanu. Espíritu santu zudii stipa laanu para gudxíʼlunu intiica guendanagana.

14. Xi gucané Job para biʼniʼ huantar ca guendanagana beeda luguiáʼ.

¹⁴ Job gupa stale guendanagana ne deche ca deche beedacani luguiabe. Binítibe guiráʼ ni nápabe, guti ca xiiñibe, bisaana ca xhamígube laabe ne guca huarabe, ne ni jma feu la? bisaana xheelabe de guni cré Dios (Job 1:13-19; 2:7-9). Peru ora cadíʼdibe ca tiempu naná que, beeda ti hombrehuiiniʼ ni láʼ Elihú ne gudxi laabe caadxi diidxaʼ ni gudixhedxí ladxidoʼbe. Ndiʼ nga ni gudxi Elihú laabe: «Guleza ne biiyaʼ chaahuiʼ guiráʼ ca cosa sicarú ni bizáʼ Dios», ne despué guníʼ Jiobá jneza ca diidxaʼ guniʼbe ca (Job 37:14). Ca diidxaʼ ca rusihuínnicani guyuu xiixa ni gucané laabe para bidxiilube ca guendanagana que. Ñee maʼ bidiʼnu cuenta xii nga gucané laabe la? Guníʼ íquebe xi guiráʼ modo biquiiñeʼ Jiobá espíritu ne poder stiʼ (Job 38:1-41; 42:1, 2). Ngaca nga ni zacané laanu. Zándaca rietenaláʼdxinu ca biaje maʼ bisihuinni Jiobá rizaalaʼdxiʼ laanu. Ne dede yanna rizaaláʼdxibe laanu zacá.

15. Xi gucané Pablu para biʼniʼ huantar ca guendanagana gupa.

¹⁵ Pablu bidxiilú stale guendanagana ni guluu xquendanabani ra naxoo pur fe stiʼ (2 Cor. 11:23-28). Xi gucané Pablu para cadi guni jma pur ti cosa que pur stobi ne para cadi chuʼ ni guchiiñaʼ xquendabiaaniʼ yaʼ. Biʼniʼ orarbe ne biʼniʼ crebe zacané Jiobá laabe. Tiempu gudíʼdibe caadxi guendanagana guizáʼ naná, zándaca dxiqué nga biiticabe laabe, bicaabe ca diidxaʼ riʼ: «Peru Señor huaxa qué nixele de naa ne ucané naa biree de raqué. Casi ñaca bilá naa de ruaa lion, ne zacá gunda yegüé stiidxa Cristu lade irá cani cadi judíu» (2 Tim. 4:17). Ngue runi, nanna Pablu xidé ngue caníʼ ora gúdxibe ca xpinni Cristu ca diidxaʼ riʼ: «Cadi chuʼ tu xizaa de gastiʼ» (biindaʼ Filipenses 4:6, 7 ne Efesios 6:10).

16, 17. Bizeeteʼ ti ejemplu ni gusihuinni ximodo racané Jiobá ca xpinni para gudxiilucaʼ ca guendanagana sticaʼ.

¹⁶ Ti precursora ni láʼ Roxana laaca maʼ biiyaʼ qué rusaana Jiobá de gapa ca xpinni. Ti biaje, dxi gunábabe patrón stibe gudii laabe permisu para chebe ti guendaridagulisaa roʼ la? naduxhuʼ bicabi laabe ne guníʼ zaladxi laabe pa guiaadxabe dxiiñaʼ. Neca guníʼ patrón stibe zaqué, gudixhe ique Roxana cheʼ guendaridagulisaa roʼ que. Gunábabe Jiobá gacané laabe ti cadi gunítibe dxiiñaʼ que ne gucané ngue laabe para cadi chuʼbe xizaa. Lunes gudiʼdiʼ si guendaridagulisaa que, biʼniʼ patrón stibe que ni maca gudxi laabe, óraque huaxa maʼ guyuube xizaa, purtiʼ neca huaxiéʼ ngue riáxabe raqué la? riquiiñebe ni para guyaanabe binnilídxibe. Biʼniʼ orarbe Dios sti biaje. Guníʼ íquebe, pa bidii Jiobá laabe ni caquiiñebe para chuʼbe gaxha de laa lu guendaridagulisaa que la? laaca zanda gudii ni guibáninebe. Neza zebe ralídxibe biiyabe ti guiʼchiʼ ra cá caquiiñecabe binni ni nanna guni dxiiñaʼ ne máquina ni riguiba lari. Ora guyuube ra nuu gerente que biiyaʼ huaxiéʼ nánnabe iquiiñebe ca máquina que. Neca zaqué bidii laabe dxiiñaʼ que, ne gudixe laabe casi chupa biaje jma que ni maca runi ganarbe. Bidii Roxana cuenta dxandíʼ ricabi Dios ca oración stiʼ. Peru ni jma galán nga gunda bicheechebe diidxaʼ ra nuu ca xcompañérube, ne biziidiʼ gaayuʼ de laacaʼ ni rusiidiʼ Biblia ne guyuunísacaʼ, dede né gerente que.

¹⁷ Nuu tiru zándaca guni sentirnu ruluíʼ qué ricabi Jiobá ca oración stinu, o qué ricábibe cani nagueenda o modo ñuuláʼdxinu. Ne nánnanu jneza nga rúnibe ni zacá, neca guindaa para guiénenu ni. Peru nuu ti cosa ni cadi naquiiñeʼ gusiáʼndanu: laabe qué rusaanabe ca xpínnibe ni ruzuubaʼ stiidxabe (Heb. 6:10).

Zanda tiidinu lu intiica guendanagana ne cani uquiinde laanu

18, 19. 1) Xiñee qué ridxagayaanu ora gápanu guendanagana ne ora chuʼ tu gacalaʼdxiʼ uquiinde laanu. 2) Xi zacané laanu tiidinu ca guendanagana guidxaagalunu.

¹⁸ Laanu, ca xpinni Jiobá nabáninu ti tiempu ra nabé runinácabe laanu, nga runi qué ridxagayaanu ora chuʼ ni uquiinde laanu, ora guireʼnu gana, ora sanándacabe laanu ne ora gacaláʼdxicabe gucaacabe laanu gúninu ni cadi jneza (Juan 15:17-19). Peru zanda gacané espíritu santu laanu para tiidinu lu intiica guendanagana ni guidxaagalunu ora maʼ cayúninu ni na Jiobá. Laabe qué zudiibe lugar chuʼ tu guniná laanu dede ra maʼ qué zanda guni huantarnu (1 Cor. 10:13). Qué zusaanabe laanu ne qué zusaana de gacanebe laanu (Heb. 13:5). Rápabe laanu ne rúnibe laanu naguidxi purtiʼ rúninu ni cá lu Stiidxabe. Ne riquiiñebe espíritu stibe para gucaabe ca xpinni Cristu gacanecaʼ laanu órapeʼ jma caquiiñenu ni.

¹⁹ Cadi gusaana de guyúbinu espíritu santu stiʼ Dios ora guni orarnu ne ora guidúʼndanu Stiidxaʼ Dios. Ne ora «udii be stipa laa[n]u ne enda nandxóʼ stibe» zanda guni huantarnu, ne «guieche [nu] neca gueeda stale enda naná luguiá [nu]» (Col. 1:11).

[Cani cá ñee yaza]

Xi nicábiluʼ

• Xii nga ni jma jneza gúninu ante chuʼ tu sananda laanu.

• Xi naquiiñeʼ gúninu pa chuʼ tuuxa gabi laanu gucáʼchinu xiixa cosa malu biʼniʼ.

• Xi naquiiñeʼ gánnanu ora guidxaagalunu intiica guendanagana.

[Dibuju/foto ni zeeda lu yaza 28]

Xi rusiidiʼ ejemplu stiʼ Josué ne Caleb laanu

[Dibuju/foto ni zeeda lu yaza 29]

Ximodo zanda gacanenu ti xhamígunu ni biʼniʼ xiixa cosa malu