Gusíʼdinu ca xiiñinu guni respetarcaʼ binni

LU DIIDXASTIÁ riníʼcabe ti refrán ni na sicaríʼ: Ora cuee binni sombreru ique rusihuinni napa respetu ne zacá randa rapa xhamigu ne gastiʼ runiti. Ndaaniʼ stale lugar maʼ biaa ca hombre ca cueecaʼ sombreru íquecaʼ ora chuʼcaʼ ndaaniʼ ti yoo ne ora ugapadiúxicaʼ tuuxa. Ora rúnicabe zacá, rusihuínnicabe runi respetárcabe binni ne zaqueca runi respetar binni laacabe. Nga runi, ni na refrán ca nga jma ziene binni laanu ne zaca nachaʼhuiʼ né laanu pa guni respetarnu laacaʼ.

Galán nga guidúʼyanu gaca ca hombrehuiiniʼ ne ca dxaapahuiiniʼ ca nachaʼhuiʼ né binni. Guzéʼtenu de ti xpinni Cristu ni riganna ca neza binni ridagulisaa de Honduras, laabe rucheechebe diidxaʼ né ca Testigu de gadxé gadxé iza. Guniʼbe sicaríʼ: «Stale biaje ora maʼ zigucheechedu diidxaʼ ruuyaʼ pabiáʼ ridxagayaa binni modo runi respetar cani nahuiiniʼ ca laacaʼ ne jma rusisácacaʼ ni rúnicabe que ni riniéʼ».

Neca maʼ huaxiéʼ si binni nachaʼhuiʼ ca dxi stinu riʼ, galán gánnanu zabeendunu ni jneza pa guyúbinu modo guidxaaganu ca binni ni nuu gaxha de laanu. Ne Biblia laaca cayabi laanu sanu «jneza casi na stiidxa Cristu» (Fili. 1:27; 2 Tim. 3:1-5). Nga runi, nabé risaca nga gusíʼdinu ca xiiñinu guni respetarcaʼ xcaadxi binni. Ximodo zanda gacanenu laacabe gúnicabe nga yaʼ. Ne xi naquiiñeʼ gúninu para guiale de ndaaniʼ ladxidóʼcabe gúnicabe ni yaʼ.a

Né ejemplu stinu zanda gusíʼdinu xiiñinu gápacaʼ respetu binni

Cani nahuiiniʼ ca rúnicaʼ ni ruuyacaʼ guni sti binni. Nga runi, jma jneza gusíʼdinu laacabe né ejemplu stinu para gánnacabe guni respetárcabe binni (Deu. 6:6, 7). Neca naquiiñeʼ gusíʼdinu ca xiiñinu risaca nga gácacaʼ nachaʼhuiʼ né binni guiráʼ ora la? jma nga risaca gusihuínninu ni laanu.

Guidúʼyanu ni bizaaca Paula. Jñaasibe bisiniisi laabe ne bisiidiʼ laabe cani zeeda lu Biblia.b Laabe nabé runi respetarbe binni. Ximodo biziidibe gácabe zacá yaʼ. Sicaríʼ guníʼ Paula: «Cumu bidúʼyadu runi respetar jñaadu binni la? ngue runi qué raca nagana para laadu guni respetardu binni». Yanna guidúʼyanu ni bizaaca sti xpinni Cristu láʼ Walter. Laabe cusiénebe ximodo bisiidibe ca xiiñibe dede nahuiinicaʼ gácacaʼ nachaʼhuiʼ né jñaacaʼ ni cadi naca Testigu. Sicaríʼ guniʼbe: «Né ejemplu stinneʼ bisiideʼ ca xiiñeʼ guni respetarcaʼ jñaacaʼ, purtiʼ qué ñuu dxi niniéʼ mal de laabe». Walter bisiniisi ca xiiñiʼ ndaaniʼ xquidxi Dios, ne gunda bíʼnibe ni purtiʼ qué nusaana de ninábabe Jiobá gacané laabe. Xi guleendube pur ni bíʼnibe que yaʼ. Yanna riʼ, tobi de ca xiiñibe runi dxiiñaʼ ndaaniʼ tobi de ca Betel stiʼ ca testigu stiʼ Jiobá ne stobi ca naca precursor. Guirópacabe nadxiicabe ne runi respetárcabe bixhózecabe ne jñaacabe.

Biblia na «riulaʼdxi [Jiobá] gata chaahui irá cosa» ne chuʼ binni tobi si (1 Cor. 14:33). Guiráʼ ni runi Jiobá nexheʼ chaahuicani. Laanu, ca xpinni Cristu, naquiiñeʼ gúninu stipa para quixhe chaahuinu cani rúninu ndaaniʼ lídxinu cásica runi Jiobá. Nuu binni rusiaa ca xiiñiʼ quixhe chaahuicaʼ xcámacaʼ o guindétecaʼ xquíxhecaʼ ante checaʼ scuela, guindísacaʼ xhábacaʼ ne gacanecaʼ lu xcaadxi cosa ni raca ndaaniʼ yoo. Ni zucaa laacabe quixhe chaahuicabe xcuártucabe nga ora gúʼyacabe nayá nuu ralídxicabe ne nexheʼ chaahuiʼ ca cosa ca.

Xi riníʼ ique ca xiiñitu de ni caziidicaʼ ra scuela yaʼ. Ñee rudiicabe xquíxepeʼ ca maestru stícabe pur rusiidicaʼ laacabe la? Ñee rudiʼnu xquíxepeʼ ca maestru ca pur dxiiñaʼ ni rúnicaʼ la? Cani nahuiiniʼ ca riziidicaʼ gúnicaʼ ni runi bixhózecaʼ ne jñaacaʼ. Pa bixhózecabe riníʼ risaca nga gúnicabe tariá rusaanané maestru stícabe laacabe la? zuuyacabe ni zacaca. Ne pa rusihuinni bixhózecabe runi respetar ca maestru ca ora maʼ caníʼ de laacabe la? ca xiiñicabe laaca zúnini. Naquiiñeʼ gusíʼdinu laacabe gudiicabe xquíxepeʼ ca maestru stícabe pur cayacanecaʼ laacabe, purtiʼ zacá nga jma galán gusihuínnicabe runi respetárcabe ca maestru ca. Peru laaca naquiiñeʼ gusíʼdinu laacabe guni respetárcabe tutiica binni gacané laacabe, casi ti doctor, tuuxa ni rutoo ndaaniʼ xiixa tienda ne xcaadxi binni (Luc. 17:15, 16). Ca hombrehuiiniʼ ne ca dxaapahuiiniʼ xpinni Cristu rihuínnica maʼ gadxé laacaʼ que cani rizanecaʼ scuela, purtiʼ nacháʼhuicaʼ ne galán xpiaʼcaʼ. Nga runi galán gábinu laacabe jneza ni cayúnicabe.

Ne guiráʼ ca xpinni Cristu ni nuu ndaaniʼ ca neza binni ridagulisaa naquiiñeʼ gusihuínnicaʼ nacháʼhuicaʼ né xcaadxi binni. ¡Nabé galán nga guidúʼyanu ora rinabaʼ cani nahuiiniʼ ca xiixa né respetu ne rudiicaʼ xquíxepeʼ binni ora maʼ nuucaʼ ndaaniʼ Yoo stiʼ Reinu! Laanu, cani huaniisi, naquiiñeʼ gusihuínninu runi respetarnu Jiobá ora rucaadiáganu cani rieeteʼ lu ca guendaridagulisaa ca. Zacá zuni cani nahuiiniʼ cásica rúninu. Ora gúʼyacabe ndaaniʼ Yoo stiʼ Reinu runi respetarsaa cani huaniisi ca laacaʼ la? zacané nga laacabe guni respetárcabe ca xpecínucabe ora guibiguétacabe ralídxicabe. Nga nga ni runi Andrew, neca tapa si iza nápabe maʼ biziidibe modo guiniʼbe ora tiidibe nezalú chupa binni huaniisi.

Xiruʼ zanda gúninu para gusíʼdinu xiiñinu gapa respetu binni yaʼ. Zanda cueenu tiempu para güínenu laacabe de ca ejemplu stiʼ ca binni ni zeeda lu Stiidxaʼ Dios ni bisihuinni runi respetar stobi (Rom. 15:4).

Iquiiñenu ca ejemplu zeeda lu Biblia

Zanda iquiiñenu ejemplu stiʼ Samuel. Zándaca nápabe biaʼ chonna o tapa iza dxi yesaana jñaabe laabe ndaaniʼ tabernáculo stiʼ Dios. Para dxi que la? zándaca maʼ bisiidiʼ jñaabe laabe naquiiñeʼ guindeteʼ íquebe ora chuʼbe nezalú Elí, xaíque stiʼ cani ruzaaquiʼ guʼxhuʼ (1 Sam. 1:28). Ñee zanda gusíʼdinu ca xiiñinu gúnicaʼ zacaca la? Zanda quixhe íquenu gusíʼdinu laacabe ugapadiúxicabe siadóʼ, huadxí ne huaxhinni. Zacá zanda chinándacabe ejemplu stiʼ Samuel dxi guca nahuiiniʼ. Biblia na «guyuulaʼdxiʼ Jiobá modo laabe ne zaqueca biiyaʼ binni laabe» (1 Sam. 2:26).

Laaca zanda iquiiñenu Biblia para guluinu ca xiiñinu ximodo nga rusihuinni ti binni runi respetar stobi, ne ximodo nga rusihuinni tuuxa qué liica runi respetar stobi. Zanda guzéʼtenu ni bizaaca ti rey de Israel ni qué nuzuubaʼ stiidxaʼ Dios ni láʼ Ocozías dxi biseendacaabe Elías, ti riguixhená. Primeru biseendabe «cincuenta [soldadu] ne xaíque sticaʼ». Ora yendá xaíque que ra nuu Elías gúdxibe Elías naquiiñeʼ chinebe laa nezalú Ocozías, peru cadi zaqué diʼ nga naquiiñeʼ niniʼné xaíque que ti hombre ni biseendaʼ Jiobá. Xi biʼniʼ Elías óraque yaʼ. Sicaríʼ guniʼbe: «Pa dxandíʼ Dios biseendaʼ naa la? guiaba guí de guibáʼ ne gunduuxeni lii ne cincuenta hombre stiluʼ». Ne guca ni guniʼbe que: «Biaba guí de guibáʼ ne binduuxeni xaíque que ne cincuenta hombre stiʼ» (2 Rey. 1:9, 10).

Biseendaʼ Ocozías sti xaíque ne cincuenta soldadu stiʼ. Laa laaca guníʼ naquiiñeʼ chiné Elías ra nuu Ocozías. Biaba guí de guibáʼ sti biaje ne binduuxeni laa ne ca soldadu stiʼ. Despué guyé sti xaíque, peru laa maʼ gadxé modo guniʼné laabe. Lugar de ñábibe Elías naquiiñeʼ chinebe laa ra nuu Ocazías la? bizuxíbibe nezalú ne guníʼnebe laa ne respetu: «Hombre ni biseendaʼ Dios, rinabaʼ lii gusisácaluʼ xquendanabaneʼ ne xquendanabani ca cincuenta hombre riʼ. Purtiʼ maʼ biaba guí de guibáʼ ne binduuxeni guiropaʼ xaíque que ne ca cincuenta hombre sticaʼ, peru yanna rinabaʼ lii gusisácaluʼ xquendanabaneʼ». Xi raʼbuʼ biʼniʼ Elías né hombre ni nabé cadxibi que yaʼ. Ñee raʼbuʼ gunábabe gusaba Dios guí de guibáʼ para gunitilú laa ne ca xpinni neca guniʼné laabe né stale respetu la? Coʼ. Lugar de ñaca ngue la? gudxi ti ángel laabe chinebe hombre que (2 Rey. 1:11-15). Ñee cadi dxandíʼ cusihuinni historia riʼ pabiáʼ risaca nga guni respetarnu binni la?

Sti ejemplu sicarú ni nápanu nga stiʼ apóstol Pablu. Dxi gunaazeʼ ca soldadu stiʼ Roma laabe gaxha de ra yuʼduʼ, qué niníʼ íquebe nápabe derechu gábibe laacaʼ xiixa. Lugar de ngue, gunabadiidxabe xaíque ca soldadu que né stale respetu: «Zanda inié xiixa la?». Pur ngue, bidiicabe lugar guiniʼbe pur laabe (Hech. 21:37-40).

Laaca zanda guzéʼtenu ni bizaaca Jesucristu. Dxi cayuni juzgárcabe laabe gudápacabe ruaabe, ngue runi gunabadiidxabe xiñee bíʼnicabe ni laabe, peru biyúbibe modo guniʼbe ni. Sicaríʼ bicábibe: «Pa cadi jneza unié la? uníʼ nezalú irá binni ri paraa bicheeʼ, ne pa qué nuchee la? xiñee cagapa lu naa». Guirutiʼ ñanda niníʼ cadi jneza ni guniʼbe que (Juan 18:22, 23).

Nuu xcaadxi relatu ni zeeda lu Stiidxaʼ Dios ni culuíʼ laanu xi naquiiñeʼ gúninu ora uguu jneza tuuxa laanu, ora guininu dxandíʼ bicheʼnu ne ora bíninu xiixa sin niníʼ íquenu pa jneza ni (Gén. 41:9-13; Hech. 8:20-24). Casi ejemplu stiʼ Abigail. Laabe gunábabe David gutiidilaʼdxiʼ stonda xheelabe ni láʼ Nabal, purtiʼ laa cadi galán diʼ modo bidxaagalú David. Peru cadi gunabaʼ si Abigail gutiidilaʼdxiʼ David stonda xheelaʼ, sínuque laaca bisigáʼdebe laa stale guendaró. Nabé bidxagayaa David pur ni biʼniʼ gunaa nuu xpiaaniʼ que, ngue runi ora guti xheelaʼ gunaa que bichaganabe laa (1 Sam. 25:23-41).

Naquiiñeʼ gusíʼdinu ca xiiñinu gácacaʼ nachaʼhuiʼ ne gápacaʼ respetu binni guiráʼ ora ne zaqueca ora guidxaagalucaʼ xiixa guendanagana. Zacá zúninu ni na conseju bidii Jesús riʼ: «Lagaca casi biaani que ti guʼya binni pabiáʼ jneza runi tu ne usisaca ca Bixhoze tu ni nuu ibáʼ» (Mat. 5:16).

[Cani cá ñee yaza]