Gusihuínninu runi respetarnu xcaadxi binni

1. ¿Xiñee risaca guni sentirnu runi respetárcabe laanu? (Proverbios 22:1).

GUIRANU riuuláʼdxinu guni respetárcabe laanu ne runi sentirnu nayecheʼ ora rúnicabe ni. Ne guiráʼ binni caquiiñeʼ guni sentir runi respetárcabe laa. Ne pur nga Biblia cayabi laanu «jma galán guni respetárcabe lii que gápaluʼ plata ne oro» (biindaʼ Proverbios 22:1).

2, 3. ¿Xiñee nuu biaje raca nagana para laanu guni respetarnu xcaadxi binni, ne xi zadúʼyanu lu artículo riʼ?

² Neca zacá, zándaca nuu biaje gaca nagana para laanu gusihuínninu runi respetarnu xcaadxi binni. ¿Xiñee yaʼ? Purtiʼ ridúʼyanu ra cuchee binni ne purtiʼ nabáninu ti tiempu ra jma maʼ huaxiéʼ rusihuinni binni respetu. Peru laanu racaláʼdxinu guni respetarnu binni purtiʼ Jehová nga canabaʼ laanu gusisácanu binni, ni caninu raríʼ nga guni respetarnu «guiráʼ clase binni» (1 Ped. 2:17).

³ Lu artículo riʼ, zadúʼyanu xi riníʼ guni respetarnu xcaadxi binni ne ximodo zanda gusihuínninu cualidad riʼ, primé, né familia stinu, guiropa, né ca hermanu ne guionna, né ca binni ni cadi naca Testigu. Ne laaca zadúʼyanu ximodo zanda gusihuínninu respetu dede ora gácani nagana para laanu.

¿XI RINÍʼ GUNI RESPETARNU XCAADXI BINNI?

4. ¿Xi riníʼ guni respetarnu xcaadxi binni?

⁴ ¿Xii nga respetu? Lu Biblia, diidxaʼ respetu ne gusisácanu naazenáʼ cani. Respetu nga modo ridúʼyanu ti binni. Ora runi respetarnu xcaadxi binni, rusihuínninu risácacaʼ para laanu ne rucaʼdiáganu laacaʼ, zándaca pur ca cualidad nápacaʼ, pur ca cosa galán ni maʼ bíʼnicaʼ o purtiʼ nápacaʼ xiixa autoridad. Gusisácanu tuuxa nga modo guni tratarnu ti binni. Ora rusisácanu xcaadxi binni, qué rúninu menu laacaʼ ne rúninu cosa ni rusihuinni dxandíʼ risácacaʼ para laanu. Para gusihuínninu dxandíʼ peʼ risaca binni ca para laanu, caquiiñeʼ de ndaaniʼ ladxidoʼno nga guiale gusisácanu laabe (Mat. 15:8).

5. ¿Xi rucaa laanu guni respetarnu binni?

⁵ Racalaʼdxiʼ Jehová guni respetarnu binni. Guzéʼtenu ti ejemplu, cayabibe laanu gusisácanu «ca autoridad» (Rom. 13:1, 7). Peru zándaca tuuxa guiníʼ: «Naa runeʼ respetar ca ni naquiiñeʼ si guneʼ respetar». Peru ¿ñee jneza nga guiníʼ íquenu zacá la? Coʼ. Laanu, ca xpinni Jehová, nánnanu caquiiñeʼ guni respetarnu guiráʼ binni, peru cadi pur ca cosa ni rúnicaʼ, sínuque pur ti razón ni jma risaca: purtiʼ nadxiinu Jehová ne racaláʼdxinu gusiéchenu laabe (Jos. 4:14; 1 Ped. 3:15).

6. ¿Ñee zanda guni respetarnu ti binni ni qué runi respetar laanu la? (Laaca zanda gúʼyaluʼ imagen ca).

⁶ Zándaca guiníʼ íquenu: «¿Ñee zanda guneʼ respetar tuuxa ni qué runi respetar naa la?». Zanda pue. Guidúʼyanu chupa chonna ejemplu ni rusihuinni zacá ni. Ti dxi bisituí rey Saúl lú, xiiñiʼ, Jonatán nezalú stale binni (1 Sam. 20:30-34). Neca bisituibe lú peru qué nusaana Jonatán de ñuni respetar bixhoze ne yenebe laa lu guerra para tindené ca xhenemigu dede dxi gutiʼ (Éx. 20:12; 2 Sam. 1:23). Ne sumo sacerdote Elí la? guniʼbe naxudxi Ana (1 Sam. 1:12-14). Peru Ana guniʼné laabe né stale respetu, neca nanna guidubi guidxi Israel cadi caguu jneza Elí ca xiiñiʼ, laaca nánnacabe cadi jneza cayuni xhiiñaʼ casi sumo sacerdote (1 Sam. 1:15-18; 2:22-24). Ne caadxi de ca binni de guidxi Atenas bicaalucaʼ Pablo ne guniʼcaʼ nácabe «muxteru» (Hech. 17:18). Peru laabe qué nusaana de niníʼnebe laacaʼ né respetu (Hech. 17:22). Rusihuinni ca ejemplu riʼ pabiáʼ nadxiicabe Jehová ne qué racaláʼdxicabe guninácabe laa ngue bicaa laacabe guni respetárcabe xcaadxi binni dede ne ora gúcani nagana para laacabe. Yanna, guidúʼyanu tuu nga caquiiñeʼ guni respetarnu ne xiñee.

GUNI RESPETARNU FAMILIA STINU

7. ¿Xiñee zándaca gaca nagana para laanu guni respetarnu familia stinu?

⁷ Guendanagana. Cumu nabezanenu familia stinu la? runibiaʼnu ca cosa galán ni nápacabe, peru zaqueca ra rucheecabe. Zándaca nápanu ti familia ni napa xiixa guendahuará ne pur nga gaca nagana para laanu gápanu laabe, o zándaca cayuniná ansiedad laabe. O zándaca chuʼ tu gabi laanu o guni laanu xiixa ni guniná laanu. Ne xcaadxi la? huaxiéʼ galán modo runi tratarcaʼ familia sticaʼ ne qué rusihuínnicaʼ respetu, ne pur nga stale biaje maʼ cadíndecabe ne qué riuucabe tobi si. Guiráʼ ni bizéʼtenu riʼ rucaani maʼ cadi chuʼ ca familia ca tobi si. Guzéʼtenu ti ejemplu: zanda guchaaganu familia ca né ti cuerpu, ora napa tuuxa ti guendahuará rucueezani guni xcuerpu dxiiñaʼ jneza, zacaca pa qué runi respetarsaa ca familia ca laacaʼ rucueezani de chuʼ familia ca tobi si. Peru cásica stale guendahuará napa tratamientu, zacaca zanda guiziidiʼ ca familia gápacaʼ respetu ne gusihuínnicaʼ ni.

8. ¿Xiñee caquiiñeʼ gusihuínninu runi respetarnu familia stinu? (1 Timoteo 5:4, 8).

⁸ Xiñee caquiiñeʼ gusihuínninu respetu (biindaʼ 1 Timoteo 5:4, 8). Lu primé carta ni bicaa Pablo ra nuu Timoteo bisiénebe xi caquiiñeʼ guni cada tobi de ca ni nuu ndaaniʼ ti familia para gapasaacaʼ. Laaca guniʼbe caquiiñeʼ gusisácanu familia stinu cadi purtiʼ si caquiiñeʼ gúninu ni, sínuque pur ti razón nabé risaca: nabáninu «modo ná Dios», ni caninu nga, purtiʼ nadxiinu Jehová ne ridúʼyanu ni casi xiixa ni rúninu para gusisácanu laabe. Jehová nga ni bizáʼ familia (Efes. 2:19; 3:14, 15). Nga runi, ora rusisácanu familia stinu ni cayúninu nga cusisácanu Jehová. ¡Cadi dxandíʼ ndiʼ nga tobi de ca razón jma risaca para gusihuínninu respetu la?!

9. ¿Ximodo zanda gusihuinni ca ni maʼ bichaganáʼ nápacaʼ respetu xheelacaʼ? (Laaca zanda gúʼyaluʼ ca imagen ca).

⁹ Ximodo zanda gusihuínninu nápanu respetu. Hombre ni rusisaca xheelaʼ rusihuinni rusisaca laabe ora nuucabe lade binni ne zaqueca ora nuucabe stúbicabe (Prov. 31:28; 1 Ped. 3:7). Qué riguíñebe laa, qué rusituibe lú ne qué rúnibe xiixa ni gucaa laa guni sentir qué risaca. Ti hermanu de guidxi Argentina ni láʼ Ariela guníʼ: «Pur guendahuará ni napa xheelaʼ, nuu biaje riniʼbe diidxaʼ ni runiná naa. Ni runeʼ nga rietenalaʼdxeʼ ca diidxaʼ ni rábibe naa cadi nga diʼ nga ni dxandíʼ peʼ runi sentirbe. Ne ora gaca nagana para naa guieneʼ laabe riníʼ iqueʼ ni ná 1 Corintios 13:5, ne nga racané naa guinieniáʼ laabe né respetu ne chuaaʼ tranquilu» (Prov. 19:11). Yanna, ca gunaa ni rusihuinni napa respetu xheelaʼ riniʼcaʼ cosa galán de xheelacaʼ nezalú xcaadxi (Efes. 5:33). Qué riníʼ chiste ni guniná xheelaʼ, qué runi burla, qué riguixhe apodo ni guniná ne qué ridindené xheelaʼ, purtiʼ nanna zeeda gaca ca cosa riʼ casi tini: runinani guendaxheelaʼ (Prov. 14:1). Ti hermana de guidxi Italia ni napa xheelaʼ ansiedad guníʼ: «Nuu biaje runeʼ sentir nabé riuu xheelaʼ xizaa pur ca cosa ni rizaaca. Dxiqué pur modo runeʼ luaʼ ne pur ca diidxaʼ ni rabeʼ laabe rusihuinneʼ qué gapaʼ respetu laabe. Peru ra bidxaagaʼ binni ni riníʼ né respetu racaneni naa gapaʼ respetu xheelaʼ».

10. ¿Ximodo zanda gusihuinni ca joven nápacaʼ respetu bixhózecaʼ ne jñaacaʼ?

¹⁰ Pa nácaluʼ joven, bizuubaʼ stiidxaʼ bixhózeluʼ ne jñaaluʼ ne guniʼné laacabe né respetu (Éx. 21:17; Efes. 6:1-3). Ora maʼ ziniisi bixhózeluʼ ne jñaaluʼ, zándaca caquiiñeʼ chuʼ tu gapa laacabe. Nga runi, biʼniʼ guiráʼ ni nuu lu naluʼ para gápaluʼ laacabe. Guzéʼtenu ni bizaaca ti hermana láʼ María. Dxi guca huará bixhózebe, ni cadi naca Testigu, bizulú gúpabe laa peru laa rabi laabe diidxaʼ ni runiná laabe. María guníʼ: «Rinabaʼ Jehová gacané naa guneʼ respetar bixhozeʼ ne gusihuinneʼ napaʼ respetu laa. Riníʼ iqueʼ, pa Jehová rinabaʼ gusisacaʼ bixhozeʼ ne jñaaʼ, laabe zudiibe stipa naa para guneʼ ni. Ra gudiʼdiʼ tiempu bieneʼ caquiiñeʼ guneʼ respetar bixhozeʼ neca feu modo guni tratarbe naa». Ora gusisácanu familia stinu neca rucheecaʼ, rusihuínninu nápanu respetu Jehová, Dios ni bizáʼ familia.

GUSIHUÍNNINU NÁPANU RESPETU CA HERMANU

11. ¿Xiñee zándaca gaca nagana para laanu guni respetarnu ca hermanu?

¹¹ Guendanagana. Dxandíʼ runi ca hermanu ne ca hermana stipa pur chinándacaʼ ni rusiidiʼ Biblia. Peru zándaca nuu biaje huaxiéʼ galán modo guni tratarcaʼ laanu, riníʼ íquecaʼ cosa ni cadi jneza de laanu o ruchiichicaʼ laanu. Ne pa bíʼnicaʼ laanu xiixa zándaca gaca nagana para laanu guni respetarnu binni ca (Col. 3:13). Yanna, ¿xi zanda gacané laanu yaʼ?

12. ¿Xiñee nabé risaca guni respetarnu ca hermanu stinu? (2 Pedro 2:9-12).

¹² Xiñee caquiiñeʼ gusihuínninu respetu (biindaʼ 2 Pedro 2:9-12). Lu guiropa carta bicaa Pedro, pur espíritu santu, bizeetebe guyuu caadxi xpinni Cristu de primé siglu caniʼcaʼ mal de «ca binni risaca para Dios», ni caninu nga ca ancianu. ¿Peru xi biʼniʼ ca ángel yaʼ? Bisiene Pedro «pur respetu ni nápacaʼ Jehová» qué nugaanicaʼ donda ique ca hombre ni qué gapa respetu ne rudxiibaʼ laca laa riʼ. Guizáʼ ridxagayaanu ni biʼniʼ ca ángel neca nácacaʼ perfectu qué niniʼcaʼ xiixa cosa malu de ca hombre que, sínuque bisaanacaʼ ni lu náʼ Jehová laa guni juzgar ne cuʼ jneza laacabe (Rom. 14:10-12; bichaaga ni né Judas 9). Pa ca ángel bisihuínnicaʼ respetu ca hombre ni bicaalú que. Laanu jmaruʼ si naquiiñeʼ gusihuínninu runi respetarnu ca hermanu ne ca hermana stinu ni nadxiicaʼ Jehová. Nga runi, primeca laanu nga naquiiñeʼ gusihuínninu runi respetarnu xcaadxi binni (Rom. 12:10). Zacá zusihuínninu runi respetarnu Jehová.

13, 14. ¿Ximodo rusihuínninu runi respetarnu ca hermanu? (Laaca zanda gúʼyaluʼ ca imagen ca).

¹³ Ximodo zanda gusihuínninu nápanu respetu. Laatu ca ancianu, lagusiidiʼ né guendarannaxhii (Filem. 8, 9). Pa caquiiñeʼ cuʼ jnézaluʼ tuuxa, cadi gudiiluʼ lugar ni cazaaca ca guchiichini lii, sínuque guníʼ ne diidxaʼ nadóʼ. Laatu ca hermana, cadi guyúbitu guiniʼtu chisme ne cadi guiniʼtu cosa ni cadi dxandíʼ de tuuxa, zacá zacanetu chuʼ respetu ndaaniʼ congregación (Tito 2:3-5). Guiranu zanda gusihuínninu runi respetarnu ca ancianu. ¿Ximodo yaʼ? Ra guninenu laacabe dxiiñaʼ juntu ne ra gudiʼnu xquixe peʼ laacabe pur guiráʼ ni rúnicabe para gápanu reunión, para ganda guni predicarnu ne pur racanécabe ca ni cuchee (Gál. 6:1; 1 Tim. 5:17).

¹⁴ Ti hermana láʼ Rocío guca nagana para laa guni respetar ti ancianu ni bidii laa conseju. Laabe guniʼbe: «Bineʼ sentir qué nusihuínnibe guendarannaxhii ora bidiibe naa conseju que. Ora maʼ nuaaʼ ra yoo rinieeʼ mal de laabe. Bineʼ stipa cadi gusihuinneʼ ni, peru guníʼ iqueʼ cadi dxandíʼ rizaaláʼdxibe naa ne pur ngue qué ninandaʼ conseju ni bidiibe naa». ¿Xi gucané hermana riʼ yaʼ? Laabe bizeetebe: «Biindaʼ ni ná 1 Tesalonicenses 5:12, 13 ne bidieeʼ cuenta cadi cayuneʼ respetar hermanu que. Ngue runi bizulú bichiiñaʼ conciencia stinneʼ naa. Bineʼ orar Jehová ne biyubeʼ lu ca publicación stinu información ni zanda gacané naa guchaaʼ modo riníʼ iqueʼ. Ra gudiʼdiʼ tiempu bidieeʼ cuenta biaʼsi ngue ni biʼniʼ hermanu que, naa nga qué naʼyaʼ guicaaʼ conseju que purtiʼ nacaʼ ti binni orgulloso. Yanna maʼ bieneʼ para racalaʼdxeʼ gusihuinneʼ napaʼ respetu, caquiiñeʼ gacaʼ humilde. Cayuneʼ stipa guneʼ respetar xcaadxi binni ne ratadxí ladxiduáʼ gannaʼ ruuyaʼ Jehová stipa ni cayuneʼ».

GÁPANU RESPETU CA NI CADI NACA TESTIGU

15. ¿Xiñee zándaca gaca nagana para laanu gusihuínninu nápanu respetu ca ni cadi naca Testigu?

¹⁵ Guendanagana. Stale biaje ridxélanu binni lu predicación ni qué naʼ guiziidiʼ de Dios (Efes. 4:18). Nuu de laacaʼ qué rinacaʼ gucaadiágacaʼ mensaje ni zinenu pur ni runi crecaʼ dede dxi nahuiinicaʼ. Zándaca nápanu compañeru ni rinenu scuela o ni runinenu dxiiñaʼ ni huaxiéʼ rusihuínnicaʼ respetu, o zándaca patrón stinu o ca maestru ni nápanu qué rusisácacaʼ dxiiñaʼ ni rúninu. Zándaca chaahuiʼ chaahuiʼ gusaana de gápanu respetu laacaʼ ne cadi guni tratarnu laacaʼ casi ñuuláʼdxinu ñuni tratárcabe laanu.

16. ¿Xiñee risaca guni respetarnu ca binni ni qué runibiáʼ Jehová? (1 Pedro 2:12; 3:15).

¹⁶ Xiñee caquiiñeʼ gusihuínninu nápanu respetu. Cadi guiaandaʼ laanu ruuyaʼ Jehová modo runi tratarnu ca ni cadi naca Testigu. Bisietenalaʼdxiʼ apóstol Pedro ca xpinni Cristu que naquiiñeʼ gaca conducta sticaʼ galán purtiʼ zanda gacaneni xcaadxi binni gusisácacaʼ Dios. Ngue runi bidiibe conseju riʼ laacaʼ, ora guiniʼcaʼ ni runi crecaʼ gúnicaʼ ni «né diidxaʼ nadóʼ ne stale respetu» (biindaʼ 1 Pedro 2:12; 3:15). Ora guzuhuaacaʼ nezalú justicia o nezalú tutiica binni para guni defendercaʼ ni runi crecaʼ, caquiiñeʼ gúnicaʼ ni né respetu, casi ñaca zuhuaacaʼ nezalú Dios. Ne purtiʼ rucaadiaga Jehová ni rininu ne ruuyabe ximodo rúninu ni. Ndiʼ nga razón jma risaca para guni respetarnu ca ni cadi naca Testigu.

17. ¿Ximodo zanda gusihuínninu runi respetarnu ca ni cadi naca Testigu?

¹⁷ Ximodo zanda gusihuínninu nápanu respetu. Ora runi predicarnu, qué racaláʼdxinu gusihuínninu jma nánnanu de lu Biblia que ca binni ni canínenu. Cadi guiaandaʼ laanu risácacabe para Dios ne ridúʼyanu laacabe casi binni ni jma risaca que laanu (Ageo 2:7; Filip. 2:3). Pa tuuxa gulaa laanu diidxaʼ pur ni runi crenu, rúninu stipa cadi guquíxenu ni laacaʼ. Nga runi, qué ricábinu laacaʼ para si gusituinu lucaʼ (1 Ped. 2:23). Pa málasi gábinu laabe xiixa ni cadi naquiiñeʼ nininu, nagueendaca guinábanu laabe gutiidiláʼdxibe laanu. Yanna, ¿ximodo zanda gusihuínninu nápanu respetu ra dxiiñaʼ yaʼ? Ra gúninu dxiiñaʼ jneza ne ra gúninu stipa guidúʼyanu ca cosa galán ni runi ca xcompañérunu ne zaqueca ca patrón stinu (Tito 2:9, 10). Laaca risaca gácanu honradu ne gúninu dxiiñaʼ né stale gana. Zacá neca cadi gusiéchenu guiráʼ binni, peru nánnanu zusiéchenu Jehová (Col. 3:22, 23).

18. ¿Xiñee galán nga guni respetarnu xcaadxi binni?

¹⁸ Nápanu stale razón para guni respetarnu xcaadxi binni. Maʼ bidúʼyanu pa guni respetarnu familia stinu, cusisácanu Jehová, Dios ni bizáʼ familia. Ne zaqueca, pa guni respetarnu ca hermanu, ni zeeda gaca familia stinu, laaca cusisácanu Bixhózenu ni nuu guibáʼ. Ne pa guni respetarnu ca binni ni cadi naca Testigu, zacá cayacanenu laacaʼ quixhe íquecaʼ gusisácacaʼ Dios stinu. Ne dede ca binni ni qué runi respetar laanu galán guni respetarnu laacaʼ purtiʼ zaguu Jehová ndaayaʼ laanu pur ni gúninu. Ne laabe cayábibe laanu: «Zusisacaʼ ca ni gusisaca naa» (1 Sam. 2:30).