Ñee rusisácanu ca ndaayaʼ nápanu la?

¡NABÉ nayecheʼ nuu ca israelita que purtiʼ maʼ zanda guni adorárcabe Dios sin guchiiñaʼ gastiʼ laacabe! Ximodo guca ndiʼ yaʼ. Purtiʼ biʼniʼ Jiobá ti milagru para gulee laacabe de esclavu ndaaniʼ guidxi Egipto (Éxo. 14:29–15:1, 20, 21). Peru málasi bichaa modo riníʼ íquecabe ne bizulú gudiche ruaacabe. Lugar de ñetenaláʼdxicabe ni biʼniʼ Jiobá pur laacabe la? jma guníʼ íquecabe nabé feu modo nabánicabe lu desiertu que. Ngue runi gúdxicabe Dios ne Moisés ca diidxaʼ riʼ: «Xiñee guleetu laadu de Egipto ne beedanetu laadu lu desiertu riʼ para gátidu yaʼ. Purtiʼ gastiʼ pan ne gastiʼ nisa, ne xhiálmadu maʼ bixhacalaʼdxiʼ [maná,] pan feu ca» (Núm. 21:5).

Peru gudiʼdiʼ si stale siglu, rey David biindaʼ para Dios sicaríʼ: «Naa la? runeʼ cré lu guendanachaʼhuiʼ stiluʼ; riecheʼ ladxiduáʼ purtiʼ rulaluʼ naa. Dxandipeʼ zuundaʼ para Jiobá, purtiʼ qué rusaana de gacanebe naa» (Sal. 13:5, 6). Laabe gúcabe rey ndaaniʼ guidxi Israel ne qué nusiaandabe guiráʼ biaje bisihuinni Dios nadxii laabe. Laabe qué nusaana de niníʼ íquebe modo gucané Jiobá laabe (Sal. 103:2). Bixhózenu ni nuu guibáʼ laaca nabé maʼ huadii náʼ laanu, peru pa qué chuʼnu cuidadu laaca zanda gusaana de gusisácanu guiráʼ ni maʼ bíʼnibe pur laanu. Ni zanda gacané laanu para gusisácanu cani nga guietenaláʼdxinu chupa chonna de ca ndaayaʼ nápanu ca dxi riʼ.

Nuunu gaxha de Jiobá

Sicaríʼ biʼndaʼ salmista que: «Cani ridxibi Jiobá nuucaʼ gaxha de laabe» (Sal. 25:14). ¡Ti ndaayaʼ naroʼbaʼ para laanu nga gaca xhamigu dxíñanu Jiobá, neca nácanu binni ruchee! Triste nga guininu ni, peru zándaca pur ca dxiiñaʼ ni rúninu guiráʼ dxi maʼ cadi guinínenu Bixhózenu ni nuu guibáʼ. Pa zacá nuunu, naquiiñeʼ gánnanu zanda guixélenu de laabe. Cumu xhamígunu Jiobá la? ribézabe gusihuínninu runi crenu laabe ne guxhélenu ladxidoʼno para gábinu laabe xi cuchibi laanu, xi racaláʼdxinu ne xi naguu xizaa laanu (Pro. 3:5, 6; Fili. 4:6, 7). Dxandíʼ, risaca nga guidúʼyanu ximodo runi orarnu.

Guzéʼtenu de ti hombrehuiiniʼ Testigu láʼ Paul. Laabe bizulú guníʼ íquebe de modo runi orarbe ne bidiibe cuenta naquiiñeʼ guchaabe modo rúnibe.a Laabe bisiénebe: «Lu ca oración stinneʼ nabé guniéʼ ngueca ca ngueca». Hombrehuiiniʼ riʼ gudixhe ique guyubi lu Índice de las publicaciones Watch Tower xi caniʼni de oración ne biiyabe zeeda biaʼ ti gayuaa ochenta oración lu Stiidxaʼ Dios. Lu ca oración que bisihuinni ca xpinni Dios xi nuu ndaaniʼ ladxidoʼcaʼ. Paul guníʼ: «Ora guníʼ iqueʼ lu ca ejemplu que biziideʼ gabeʼ Dios xipeʼ racalaʼdxeʼ, ne nga huayacané naa guinieniáʼ Jiobá de guidubi ladxiduáʼ. Yanna nabé riuuladxeʼ guneʼ orar laabe para chuaaʼ gaxha de laabe».

Ricaanu ni caquiiñenu

Sti ndaayaʼ ni nápanu nga guiráʼ cosa sicarú ni maʼ bizíʼdinu de Dios lu Biblia, ni zeeda gaca casi ti lugar ra nuu stale guendaró. Nga runi, cadi guendaridxagayaa diʼ nga guzeeteʼ Biblia «zúni[nu] ridxi purtiʼ nayecheʼ ziuu ladxidoʼ[no]» (Isa. 65:13, 14). Peru naquiiñeʼ gápanu laanu, purtiʼ qué racaláʼdxinu chuʼ xiixa ni cuee gana laanu ne gusaana de guizíʼdinu de cani zeeda lu Biblia. Casi pa gucaadiáganu guiráʼ ni riníʼ ca binni ni guca Testigu peru maʼ bidxiidéchecaʼ Dios la? zándaca gueeda guchenda cani laanu ne guni nga maʼ qué chuuláʼdxinu guiráʼ ni rudii Jiobá laanu pur «mozo ni nuu xpiaaniʼ ne ni runi jneza» órapeʼ caquiiñenu ni (Mat. 24:45-47).

Zacapeʼ nga ni bizaaca André, ne nabé triste ni purtiʼ maʼ zinebe stale iza de cayúnibe ni na Jiobá. Bizulú guyuuláʼdxibe modo riníʼ ique ca binni ni maʼ bidxiideche Dios, purtiʼ biʼniʼ crebe cadi malu diʼ gúʼndabe ni rucaa ca binni ca lu Internet. Laabe bietenaláʼdxibe: «Ora bizuluáʼ cayuundaʼ cani rucaa ca binni que, guyuuladxeʼ ca cosa ni ruluíʼ dxandíʼ rusiénecabe. Ra jma ziyuundaʼ ni, jma ziyuneʼ cré jneza nga gusaanaʼ xquidxi Dios. Peru despué biindaʼ chaahueʼ guiráʼ ni riníʼcabe cadi jneza cayuni ca testigu stiʼ Jiobá ne bidieeʼ cuenta pabiáʼ nánnacabe quítecabe binni ne guiráʼ ni riníʼcabe. “Ca cosa ni ruluíʼ dxandíʼ” riníʼcabe de laanu que cadi zaqué diʼ ni, sínuque ricaacabe caadxi cosa ni rusíʼdinu ne rusiénecabe ni sti modo. Ngue runi, gudixheʼ iqueʼ guundaʼ guiráʼ ca libru ne ca revista ni ricaanu ne chaaʼ guiráʼ ca guendaridagulisaa ca sti biaje. Qué nindaa bidieeʼ cuenta xi guiráʼ ngue cuniteʼ». Galanpeʼ nga yanna maʼ bibiguetaʼ André ndaaniʼ xquidxi Dios.

«Laganaxhii irá ca hermanu»

Laaca sti ndaayaʼ stiʼ Jiobá nga chuʼnu lade guiráʼ ca xpinni Cristu ni nadxiisaacaʼ, ni zeeda gaca casi ti familia ni nuu lu guidubi naca Guidxilayú (Sal. 133:1). Nga runi bicaa Pedru: «Laganaxhii irá ca hermanu» (1 Ped. 2:17). Dxandíʼ, ora nácanu de xquidxi Dios, runi sentirnu nadxiicabe laanu ne racanécabe laanu, cani zeeda gaca casi bixhózenu, jñaanu, bíʼchinu, bizáʼnanu, ne béndanu neza Cristu (Mar. 10:29, 30).

Peru zándaca pur guizaacanu xiixa ne ca xpinni Cristu maʼ gueeda gápanu xiixa guendanagana ne laacabe. Zándaca guidxiichinu nagueenda ora guchee tuuxa ne guzulú guyúbinu puru si ra cuchee. Pa chuʼ dxi gudiʼnu cuenta zacá laanu la? galán guietenaláʼdxinu nadxii Jiobá ca xpinni neca rucheecaʼ. Laaca cadi naquiiñeʼ guiaandaʼ laanu ca diidxaʼ riʼ: «Pa gabi nu qué huachéʼ nu la? cusiguii nu laca laanu ne qué lica ganna nu xii nga ni dxandíʼ» (1 Juan 1:8). Zusihuínninu nuu xpiaaninu pa chinándanu conseju riʼ: «Cadi ixhacalaʼdxi saa tu, ne laguni perdonar guiráʼ ni guni stobi laatu» (Col. 3:13).

Ti baʼdudxaapaʼ láʼ Ann nabé naná ra gudiʼdiʼ para biziidiʼ pabiáʼ risaca nga cadi guiree binni de ndaaniʼ xquidxi Dios. Cásica hombrehuiiniʼ ni gudxite xpueltu bixhoze ni bizeeteʼ Jesús lu ejemplu stiʼ que, bixélebe de ndaaniʼ xquidxi Dios, peru despué guyuu xpiaanibe ne bibiguétabe (Luc. 15:11-24). Xi biziidibe pur ni bizaacabe que yaʼ. Laabe guniʼbe: «Dede dxi maʼ bibiguetaʼ, jma rusisacaʼ guiráʼ ca xpinni Cristu neca rucheecaʼ. Dxiqué la? qué liica raxha iqueʼ para guiniéʼ mal de laacabe, peru yanna qué zudieeʼ lugar chuʼ xiixa ni guxheleʼ naa de laacabe, purtiʼ ti ndaayaʼ stiʼ Jiobá ni. Lade ca binni ridagulisaa nuunu nayecheʼ purtiʼ zeeda gácani casi ti paraísu. Ti guendahuati nga guireʼnu de ndaaniʼ xquidxi Dios, purtiʼ qué iquiiñeʼ guiráʼ ni rudii guidxilayú stiʼ Binidxabaʼ riʼ laanu».

Qué chuʼ dxi gusaana de gudiʼnu xquíxepeʼ pur ca ndaayaʼ ricaanu

Cabézanu guidxiña dxi guni chaahuiʼ gobiernu stiʼ Dios guiráʼ ca guendanagana napa binni, ne ni cabézanu ca zeeda gácani casi ti tesoro nabé risaca. Xi biʼniʼ sentirnu primé biaje binadiáganu ni chiguni Reinu stiʼ Dios yaʼ. Ñee cadi dxandíʼ guyuʼnu nayecheʼ la? Dxandíʼ pue, ne bíninu cásica biʼniʼ hombre ni rizíʼ ni bizeeteʼ Jesús lu ejemplu stiʼ que. Hombre que «yeutoo irá ni napa» para guzíʼ ti «perla chaʼhui» (Mat. 13:45, 46). Jesús qué niníʼ diʼ pa bisaana hombre que de nusisaca perla que ra gudiʼdiʼ tiempu. Zacaca nga laanu, qué chuʼ dxi gusaana de gusisácanu ni cabézanu guni Dios para laanu (1 Tes. 5:8; Heb. 6:19).

Guiníʼ íquenu de ejemplu stiʼ Jean, laa maʼ ziné jma de sesenta iza de cayuni ni na Jiobá. Laabe guniʼbe: «Ti cosa ni racané naa para cadi gusiaandaʼ Reinu stiʼ Dios nga guzeeteni ora maʼ canieniáʼ binni. Nabé galán runeʼ sentir ora ruuyaʼ dede riaaniʼ lú ca binni ni cucaadiaga naa ora guiénecaʼ xii nga Reinu stiʼ Dios. Ne ora ruuyaʼ modo ruchaa tuuxa pur ni caziidiʼ de lu Biblia la? qué randa rusaanaʼ de guiníʼ iqueʼ: “¡Nabé sicarú ca diidxaʼ risaca ni canagusíʼdinu binni!”».

Casi maʼ bidúʼyanu ca, nápanu stale razón para gudiʼnu xquíxepeʼ Dios pur guiráʼ ndaayaʼ ni nápanu. Dxandíʼ nga ridxaagalunu stale guendanagana, casi ora sanándacabe laanu, ora gaca huaranu, rióxhonu, riuʼnu triste, rati tuuxa binnilídxinu o nuu tiru qué gápanu bueltu. Peru nánnanu tobi zidiʼdiʼ si guiráʼ ca guendanagana ca. Lu guidxilayú cubi ca, zabee Reinu stiʼ Dios guiráʼ guendananá cadídinu yanna ne ziuʼnu jma nayecheʼ purtiʼ zacaarunu jma ndaayaʼ (Apo. 21:4).

Laga cabézanu nga la? quixhe íquenu gusisácanu ca ndaayaʼ ni nápanu, cásica biʼniʼ salmista que ora guníʼ: «Stale cosa sicarú nga ni maʼ bíʼniluʼ para laadu, Jiobá, Dios stinneʼ, nabé nga riníʼ íqueluʼ laadu; guirutiʼ zanda guchaagadu lii. Pa ñacalaʼdxeʼ nusieneʼ ne niniéʼ de laacani, qué ñanda ñuneʼ ni, purtiʼ nabé stale cani para guzeeteʼ de laacani» (Sal. 40:5).

[Ni cá ñee yaza]

[Dibuju/foto ni zeeda lu yaza 18]

Jiobá riguu ndaayaʼ laanu para gudxíʼlunu ca guendanagana ni rápanu