Tuu nga binni jma risaca lu xquendanabániluʼ

«Lii si nga Ni Nuu Jma Luguiáʼ lu guidubi naca guidxilayú.» (SAL. 83:18)

1, 2. Xiñee cadi lá si Jiobá nga caquiiñeʼ gánnanu para guilanu.

ZÁNDACA primé biaje bidúʼyanu lá Dios nga dxi biluíʼcabe laanu xiná Salmo 83:18, ne dede bidxagayaanu ora bidúʼndanu ni: «Ti ganna binni, lii, ni laluʼ Jiobá ca, lii si nga Ni Nuu Jma Luguiáʼ lu guidubi naca guidxilayú». Dede dxiqué maʼ riquiiñenu versículo riʼ stale biaje para gacanenu binni gunibiáʼ Jiobá, ti Dios ni nabé nadxii binni (Rom. 10:12, 13, NM).

² Nécapeʼ risaca nga gánnanu tu láʼ Dios, cadi ngasi nga ni caquiiñeʼ gánnanu para guilanu. Lu ca diidxaʼ guníʼ salmista riʼ ruzeetebe sti cosa nabé risaca: «Lii si nga Ni Nuu Jma Luguiáʼ lu guidubi naca guidxilayú». Dxandíʼ, Jiobá nga Binni ni jma risaca ni nabani. Laabe nga bizaʼbe guibáʼ ne Guidxilayú, nga runi nápabe derechu para guinábabe guzuubaʼ guiráʼ binni stiidxabe ne gúnicabe ni nabe (Apo. 4:11). Nga runi, galán guinabadiidxanu laca laanu: «Tuu nga binni jma risaca para naa yaʼ». Risaca stale guinabadiidxanu nga laanu.

Guendanagana ni bizulú ndaaniʼ jardín ni guyuu Edén

3, 4. Ximodo gudxite Binidxabaʼ ique Eva, ne xi bicaabe laa guni.

³ Guiráʼ ni bizaaca ndaaniʼ jardín ni guyuu Edén que rusihuínnicani pabiáʼ risaca ni bizéʼtenu ca. Ndaaniʼ jardín que, guyuu ti ángel ni bicaalú Dios —ni beeda gaca Binidxabaʼ despué— ne bicaabe Eva guni ni riuulaʼdxiʼ lugar de ñuni ni biʼniʼ mandar Dios laa (Gén. 2:17; 2 Cor. 11:3). Biaba Eva lu trampa que ne gudobe cuananaxhi ni gudxi Dios laacabe cadi gócabe, zaqué bisihuínnibe qué runi respetarbe Dios casi tuuxa ni runi mandar ne ni jma nandxóʼ. Qué ñuuyabe Jiobá casi ti binni ni jma risaca lu xquendanabánibe. Yanna, xi biquiiñeʼ Binidxabaʼ para gudxite laabe yaʼ.

⁴ Binidxabaʼ biyubi modo quite ique Eva ora guníʼnebe laa (biindaʼ Génesis 3:1-5). Primé la? bizeeteʼ si Binidxabaʼ de «Dios», lugar de niquiiñeʼ labe (peru hombre bicaa Génesis maʼ gadxé ni biʼniʼ, laa biquiiñeʼ lá Jiobá lu primé versículo stiʼ capítulo 3). Guiropa la? gunabadiidxabe xi «guníʼ» Dios, ne qué niníʼdibe xi biʼniʼ «mandar» (Gén. 2:16). Ne zándaca pur modo guniʼbe que racaláʼdxibe gusihuínnibe huaxiéʼ risaca mandatu bidii Dios. Ne guionna, neca nuu gunaa que stubi, guniʼné Binidxabaʼ laabe casi ora ñuu guirópacabe ora gudxi laabe: ñee dxandíʼ na Dios cadi «goto» cuananaxhi stiʼ yaga ca la? Pur modo guníʼ Binidxabaʼ, zándaca racaláʼdxibe gucaabe Eva gudxiibaʼ laca laa ne guiníʼ ique risaca, casi ora laa nga ñaca binni ni riníʼ xi gúnicabe lu xquendaxheelacabe. Pa zacá ni o pa coʼ la? ridúʼyanu dxandíʼ guníʼ Eva pur guirópacabe né ca diidxaʼ riʼ: «Ca cuananaxhi stiʼ ca yaga ni nuu ndaaniʼ jardín riʼ zanda guidoʼdo».

5. 1) Xi jma gucuá ique Eva pur cani gudxi Binidxabaʼ laa. 2) Xi bisihuinni primé gunaa que ora gudó cuananaxhi ni gudxi Dios laa cadi gó.

⁵ Laaca bichaa Binidxabaʼ modo guníʼ Dios caadxi cosa. Bicaabe Adán ne Eva guiníʼ íquecaʼ cadi jneza ngue ni gudxi Jiobá laacaʼ, purtiʼ laabe nabe guníʼ Dios cadi gócabe «de guiráʼ ca cuananaxhi stiʼ ca yaga ni nuu ndaaniʼ jardín» que. Despué bicaabe gunaa que guiníʼ ique xii nga ni jma galán para laa, ne laaca bicaabe laa guiníʼ ique zabani jma galán ora gaca «casi Dios». Né cani guníʼ Binidxabaʼ riʼ bicaacani laabe chuuláʼdxibe yaga que ne cuananaxhi stiʼ, ne qué niníʼ íquebe de Bixhózebe ni nuu guibáʼ, ni bidii laabe guiráʼ ni nápabe. Biblia na: «Ngue runi biiyaʼ gunaa que galán cuananaxhi stiʼ yaga que para gó binni, ne ora bíʼyabe ni biale de laabe gobe ni, dxandíʼ, yaga que nabé sicarú ni para gúʼyabe ni. Pur ngue gucuaabe cuananaxhi stini ne gudobe ni. Despué bidiibe ni xheelabe ora [guyuu] ra nuube, ne laa bizulú gudó ni» (Génesis 3:6). Triste guininu ni, peru gudó Eva cuananaxhi que, ne zaqué bisihuínnibe cadi Jiobá diʼ nga binni ni jma risaca lu xquendanabánibe.

Guendanagana ni bidxiilú Job

6. Xi pur ngue na Binidxabaʼ runi Job ni na Dios, ne xi bidii Jiobá lugar gusihuinni Job.

⁶ Gudiʼdiʼ si stale siglu, Job ti hombre ni qué nuchee, laaca bisihuinni tuu nga binni ni jma risaca lu xquendanabani. Ora guníʼ Jiobá qué huayuu dxi gucheené Job laa la? gudxi Binidxabaʼ laabe: «Ridxibi si Job Dios la?» (Job 1:7-10). Binidxabaʼ qué niníʼ diʼ pa ruzuubabe diidxaʼ, sínuque xi rucaa laabe gúnibe ni. Guniʼbe runi Job ni na Dios purtiʼ rudii Dios laa guiráʼ ni caquiiñeʼ ne cadi purtiʼ nadxii Dios. Tuu laa si nga zanda gusihuinni cadi dxandíʼ ni guníʼ Binidxabaʼ yaʼ. Job si nga zanda gúnini, ngue runi bidii Dios lugar gusihuínnibe ni.

7, 8. Xi guendanagana gudiʼdiʼ Job, ne xi bisihuínnibe pur biʼniʼ huantarbe ne ra qué nucheebe.

⁷ Jiobá bidii lugar guseendaʼ Binidxabaʼ caadxi guendananá luguiáʼ Job (Job 1:12-19). Xi biʼniʼ hombre riʼ ora beeda ca desgracia que luguiáʼ yaʼ. Biblia na «qué nuchee Job, ne qué niniʼbe cadi jneza ni cayuni Dios» (Job 1:22). Peru qué nuseeguʼ ngue ruaa Binidxabaʼ, ne laa bicabi né ca diidxaʼ riʼ: «Guidiladi pur guidiladi, ne guiráʼ ni napa binni zudii ni pur xhialma» (Job 2:4).a Casi maʼ bidúʼyanu ca, laabe guniʼbe, pa Job peʼ gaca xiixa la? zusihuinni pur cani guni cadi Jiobá diʼ nga binni ni jma risaca lu xquendanabani.

⁸ Gupa Job ti guendahuará yuudxuʼ ni biʼniʼ feu ladi, ne despué de ngue gudxi xheelabe laabe ca diidxaʼ riʼ: «¡Guluu dí Dios, ne guti!». Peru cadi ngasi, últimu que beeda chonna hombre ni na xhamígucaʼ laabe para si gábicaʼ laabe zaqué nga caguíxebe cani bíʼnibe (Job 2:11-13; 8:2-6; 22:2, 3). Peru neca cadíʼdibe ca guendanagana que la? qué nucheenebe Dios. Biblia na: «Para na xheelabe rabi laabe: “Ñee dede yanna nga cayúniluʼ ni jneza la? ¡Guluu dí Dios, ne guti!”. Peru laabe gúdxibe laa: “Caniʼluʼ casi riníʼ ti gunaa ni gastiʼ xpiaaniʼ. Xiñee dxi cudiibe laanu guiráʼ ni galán qué niguiche ruaanu yaʼ. Yanna tisi maʼ cazaacanu ca desgracia riʼ maʼ quiche ruaanu la?”. Lu guiráʼ ndiʼ qué nuchee Job» (Job 2:9, 10). Modo biʼniʼ huantarbe ne ra qué nucheebe bisihuínnibe Jiobá nga binni ni jma risaca para laabe. Ne laaca biluiʼbe sti cosa, neca nácanu binni ruchee la? zanda gusihuínninu cadi dxandíʼ guiráʼ ni riníʼ Binidxabaʼ (zanda gúʼndaluʼ Proverbios 27:11).

Jneza modo bidxiilú Jesús guendanagana que

9. 1) Ximodo gucalaʼdxiʼ Binidxabaʼ nucaa Jesús nuchee. 2) Xi biʼniʼ Jesús óraque.

⁹ Guidúʼyanu xi bizaaca casi biluxe guyuunisa Jesús. Gucalaʼdxiʼ Binidxabaʼ nucaa laabe nuyúbibe puru si para laabe ne nusaana de ñuuyabe Jiobá casi binni ni jma risaca lu xquendanabánibe. Biluíʼ Binidxabaʼ laabe chonna cosa para gucaa laabe gucheebe. Primé la? gudxi Binidxabaʼ laabe gúnibe caadxi guié pan, purtiʼ biiyaʼ candaanabe (Mat. 4:2, 3). Cadi guiaandaʼ laanu maʼ ziné Jesús cuarenta dxi de caʼruʼ gobe, ngue runi zanda guininu nabé candaana dxítabe. Xi biʼniʼ Jesús ora gudxi Binidxabaʼ laa iquiiñeʼ poder stiʼ para guni ni nabe yaʼ. Lugar de ñuni Jesús casi biʼniʼ Eva la? nagueendaca bicaanáʼ ni gudxi Binidxabaʼ laa ne guníʼ ni cá lu Stiidxaʼ Jiobá. Sicaríʼ na Biblia gudxi Jesús Binidxabaʼ: «Maca cá ni lu Stiidxaʼ Dios: “Cadi de pan si nga naquiiñeʼ guibani binni, sínuque de guiráʼ diidxaʼ ni riree ruaa Jiobá”» (Mateo 4:4).

10. Xiñee gudxi Binidxabaʼ Jesús guireeyaande dede ique yuʼduʼ ra jma nasoo.

¹⁰ Ora gudxi Binidxabaʼ Jesús guireeyaande dede ique yuʼduʼ ra jma nasoo que la? cucaabe Jesús guiníʼ ique laa nga binni ni jma risaca (Mat. 4:5, 6). Xi racalaʼdxiʼ Binidxabaʼ cueendú né ngue yaʼ. Laa na zusihuínnibe laabe nga «Xiiñiʼ Dios» pa qué gacanabe ora guiábabe. Binidxabaʼ gucalaʼdxiʼ nucaa Cristu ñuu xizaa de xi guiníʼ binni de laa dede nucaani laa ñuni ti cosa ni nidxagayaa binni. Binidxabaʼ nanna riuulaʼdxiʼ binni cuʼ xquendanabani ra naxoo purtiʼ ruchá bi yanni ne para cadi guiníʼcabe mal de laa. Gucalaʼdxiʼ Binidxabaʼ niguite laabe ora cadi jneza modo bisiene ti textu zeeda lu Biblia, peru Jesús bisihuinni runibiáʼ chaahuiʼ Stiidxaʼ Jiobá. Laabe gúdxibe Binidxabaʼ: «Cadi naquiiñeʼ guinabuʼ xiixa Jiobá, Dios stiuʼ, para si guʼyuʼ pa dxandíʼ zuni ni» (Mateo 4:7). Ora bicaanáʼ Cristu ni gudxi Binidxabaʼ laa, bisihuinni Jiobá nga binni ni jma risaca para laa.

11. Xiñee bicaanáʼ Jesús guiráʼ ca reinu ni nuu lu guidxilayú riʼ ora biluíʼ Binidxabaʼ ni laa.

¹¹ Cumu maʼ qué guidxela Binidxabaʼ ximodo gusaba Jesús la? biluíʼ laabe guiráʼ ca reinu ni nuu ndaaniʼ guidxilayú (Mat. 4:8, 9). Peru óraqueca bicaanáʼ Jesús ni biluíʼ Binidxabaʼ laa que, purtiʼ pa nicaabe ni la? nusihuínnibe qué gapa Jiobá derechu de guni mandar casi Rey ni jma nandxóʼ. Sicaríʼ guníʼ Jesús: «¡Biree de luaʼ, Binidxabaʼ! Purtiʼ maca cá lu Stiidxaʼ Dios: “Jiobá, Dios stiuʼ nga naquiiñeʼ guni adorarluʼ, ne ni gábisibe lii nga naquiiñeʼ guʼnuʼ”» (Mateo 4:10). Lu guionnaʼ biaje gucalaʼdxiʼ Binidxabaʼ niguite Jesús, laa bicabi laabe né caadxi textu zeeda lu Biblia ra cá lá Dios.

12. Xi guendanagana bidxaagalú Jesús dxi mayaca gati, ne xi rizíʼdinu de ni bíʼnibe.

¹² Dxi mayaca gati Jesús ndaaniʼ Guidxilayú riʼ, bidxaagalube sti guendanagana jma naroʼbaʼ. Biaʼ tiempu bicheechebe diidxaʼ bisihuínnibe zudiibe xquendanabánibe para guilá binni, ne de laabe biale gúnibe ni (Mat. 20:17-19, 28; Luc. 12:50; Juan 16:28). Peru laaca nánnabe zuni juzgar ca judíu laabe né ca ley sticaʼ ne zaniʼcaʼ gátibe purtiʼ nacaʼ guniʼbe mal de Dios. Nabé guyuube xizaa pur modo chigátibe. Ngue runi biʼniʼ orarbe sicaríʼ: «Padre stinneʼ, pa zanda la? ulee enda naná ri de naa». De raqué guniʼbe: «Peru cadi aca ni rabe sínuque ni na luʼ» (Mat. 26:39). Cumu qué nuchee Jesús dede ora guti la? bisihuínnibe Jiobá nga binni ni jma risaca lu xquendanabánibe.

Xi naquiiñeʼ gusihuínninu lu xquendanabáninu

13. Xi rizíʼdinu de ejemplu stiʼ Eva, Job ne Jesucristu.

¹³ Xi maʼ bizíʼdinu lu ca párrafo ni maʼ bidúʼndanu ca yaʼ. Ni bizaaca Eva rusiidini laanu ti cosa, pa gácanu binni ni rudxiibaʼ laca laa ne guyúbinu puru si para laanu la? zusihuínninu cadi Jiobá diʼ nga binni ni jma risaca lu xquendanabáninu. Peru modo bibani Job rusiidiʼ laanu sti cosa, neca binni ruchee laanu zanda gudxíʼlunu intiica guendanagana dede né cani qué riénenu xi pur cadídinu laacaʼ. Ora gúninu zacá rusihuínninu nuu Jiobá primeru lu xquendanabáninu (Sant. 5:11). Ne últimu la? ejemplu stiʼ Jesús rusiidiʼ laanu ti cosa nabé risaca: naquiiñeʼ gúninu ni na Dios neca guidxaagalunu intiica guendanagana, ne cadi guizaaláʼdxinu pa gusituícabe lunu o guiníʼcabe mal de laanu (Heb. 12:2). Yanna, ximodo zanda gúninu cani maʼ bizíʼdinu ca yaʼ.

14, 15. Ximodo nga gadxé ni biʼniʼ Eva ne ni biʼniʼ Jesús ora guyuu xiixa ni biquiinde laacaʼ, ne ximodo zanda chinándanu ejemplu stiʼ Xiiñiʼ Dios. (Guníʼ de ni zeeda lu dibuju ni cá lu yaza 18.)

¹⁴ Qué chuʼ dxi gusiáʼndanu Jiobá ora chuʼ xiixa ni uquiinde laanu. Eva bidii lugar gucaa Binidxabaʼ laa chuulaʼdxiʼ ni culuiʼbe laa. Ngue runi biiyabe «galán cuananaxhi stiʼ yaga que para gó binni, ne ora bíʼyabe ni biale de laabe gobe ni, dxandíʼ, yaga que nabé sicarú ni para gúʼyabe ni» (Gén. 3:6). ¡Nabé gadxé ni biʼniʼ Jesús ora gucalaʼdxiʼ Binidxabaʼ nucaa laabe nucheebe chonna biaje! Lu cada tobi de ca guendanagana que guníʼ íquebe xi zazaacabe pa guiábabe lu cani. Laaca biquiiñebe Biblia ne guniʼbe lá Dios.

¹⁵ Xi jma ricá íquenu ora chuʼ xiixa ni uquiinde laanu guchéʼnenu Jiobá yaʼ. Pa qué gusaananu de guiníʼ íquenu de laani la? jma nagueenda ziábanu lu trampa ca (Sant. 1:14, 15). Nga runi, nagueendaca naquiiñeʼ cueenu ca cosa malu ca de ndaaniʼ ladxidoʼno, neca gácani nagana para laanu casi ora nuganu ti ndaa de xcuérpunu (Mat. 5:29, 30). Cásica Jesús, naquiiñeʼ guiníʼ íquenu xi zazaacanu pur cani gúninu, jmaruʼ si pa pur laacani guixélenu de Bixhózenu ni nuu guibáʼ. Naquiiñeʼ guietenaláʼdxinu xi rusiidiʼ Biblia de laani. Zacatiʼ nga zanda gusihuínninu Jiobá nga binni ni jma risaca para laanu.

16-18. 1) Xii nga ca guendanagana ni zándaca gusiuubaʼ ladxidoʼno. 2) Xi zacané laanu gudxíʼlunu ca cosa nagana ni gueeda luguianu.

¹⁶ Qué chuʼ dxi guidxiichinenu Jiobá pur ca guendanagana guidxaagalunu (Pro. 19:3). Cumu jma maʼ zidxiña dxi guinitilú guidxilayú malu riʼ la? jma stale xpinni Jiobá racaná ora guizaaca xiixa cosa ni runiná binni casi ti xu o ti desgracia. Maʼ nánnanu qué zanda diʼ cuézanu guni Jiobá ti milagru para gapa laanu. Peru cásica Job, laaca riuubaʼ ladxidoʼno ora gati ti binnilídxinu ne ora gápanu xcaadxi guendanagana.

¹⁷ Job qué ñene diʼ xiñee bidii Dios lugar guca caadxi cosa. Zacaca nga yanna, zándaca qué ziénenu xiñee rudiibe lugar guizaaca caadxi desgracia. Zándaca gueeda gánnanu guti caadxi xpinni Cristu ora guca ti xu, casi ni guca Haití. O zándaca gábicabe laanu bicaalúcabe ti xpinni Cristu o guti tobi de laacabe ra guca ti accidente. Ne zándaca tobi de laanu cadiʼdiʼ lu xiixa guendanagana nabé naroʼbaʼ, o lu xcaadxi cosa ni ruluíʼ cadi jneza ne zándaca dede cayuubaʼ ladxidoʼno ora guininu: «Xiñee pue Jiobá. Xiñee luguiaʼyaʼ beeda ni pue. Paraa bicheeʼ pue» (Hab. 1:2, 3). Xi zacané laanu ora guizaacanu ca desgracia ca yaʼ.

¹⁸ Qué chuʼ dxi guiníʼ íquenu cadiʼdiʼ ti xpinni Cristu lu xiixa guendanagana purtiʼ maʼ cadi caguu Jiobá ndaayaʼ laa. Jesús bisihuinni cadi jneza diʼ guiníʼ íquenu zacá ora bizeeteʼ de chupa desgracia ni bizaaca ca dxi stiʼ (biindaʼ Lucas 13:1-5). Ne nuu tiru «málasi rizaaca» stale de ca desgracia ca (Ecl. 9:11). Peru modo tiica laani, zanda gudxíʼlunu ca yuubaʼ ca pa guiníʼ íquenu «riguixhe dxí [Dios] ladxidóʼ no», ne rudiibe stipa lanu para cadi gusaananu de gúninu ni nabe (2 Cor. 1:3-6).

19, 20. Xi gucané Jesús para biʼniʼ huantar guiráʼ ni bíʼnicabe laa, ne xi zanda gacané laanu guni huantarnu.

¹⁹ Qué chuʼ dxi gusiáʼndanu Jiobá pur gudxíʼbanu laca laanu o pur gusituícabe lunu. Jesús qué nudxiibaʼ diʼ laca laa, sínuque «bisaana be [de gácabe casi Dios] para beda gaca be casi ti mozo» (Fili. 2:5-8). Gunda biʼniʼ huantarbe guiráʼ ni gudíʼdibe purtiʼ gunábabe Bixhózebe ni nadxii laabe gacané laabe (1 Ped. 2:23, 24). Ora bíʼnibe zacá bisihuínnibe rúnibe ni na Jiobá primeru lu xquendanabánibe ne gucuaabe ti puestu ni jma risaca guibáʼ (Fili. 2:9). Zacaca nga na Jesús naquiiñeʼ guibáninu (Mat. 23:11, 12; Luc. 9:26).

²⁰ Nuu biaje ridxaagalunu guendanagana ni zándaca gusituí lunu. Peru naquiiñeʼ guni crenu Dios cásica biʼniʼ cré Pablu, laa guníʼ: «Nga runi cayacanaʼya yanna. Peru cadi catuí luaʼ, purti ma nanna dxiʼche tu rune cre, ne nanna dxiʼche zanda gapa be irá ni gudixhe lu ná be dede dxi gueeda be» (2 Tim. 1:12).

21. Neca nabé nuu binni ni ruyubi puru si para laa, xi maʼ gudixhe íquenu gúninu.

²¹ Sicaríʼ na Biblia zabani binni ca dxi stinu: «Zuyubi binni para laa si» (2 Tim. 3:2). Nga runi cadi guendaridxagayaa diʼ nga nuunu lade binni ni ruyubi puru si para laa. Qué chuʼ dxi gúʼyanu laanu casi tuuxa jma risaca cásica rúnicabe. Ora chuʼ xiixa ni uquiinde laanu, guizaacanu xiixa desgracia o chuʼ tu gusituí lunu la? naquiiñeʼ quixhe íquenu gusihuínninu Jiobá nga binni ni jma risaca lu xquendanabáninu.

[Cani cá ñee yaza]

Bisiene xi rizíʼdinu de cani chiguzéʼtenu riʼ:

• Modo bisiguii Binidxabaʼ Eva.

• Ni biʼniʼ Job ora beeda ca desgracia que luguiáʼ.

• Ni jma gucuá ique Jesús guni.

[Dibuju/foto ni zeeda lu yaza 17]

Qué niníʼ ique Eva pabiáʼ risaca nga chuʼ gaxha de Jiobá

[Dibuju/foto ni zeeda lu yaza 18]

Jesús bicaanáʼ cani biquiinde Binidxabaʼ laa guni ne jma gucuá ique guni ni na Jiobá

[Ca dibuju/foto ni zeeda lu yaza 20]

Cucheechecabe diidxaʼ ndaaniʼ ca yoo de lari gudiʼdiʼ si xu ni guca Haití

[Ca dibuju/foto ni zeeda lu yaza 20]

Ora guidxaagalunu guendanagana naquiiñeʼ guni crenu «[za]guixhe dxí [Dios] ladxidóʼ no»