Chinándanu Cristu, ti xaíque ni qué ruchee
CA BINNI ni rizananda ca políticu ca riuucaʼ triste purtiʼ qué raca ni cabézacaʼ. Peru cani zinanda Cristu la? ricaacaʼ stale ndaayaʼ. Ne Jesús peʼ guníʼ ca diidxaʼ riʼ: «Latáʼ ra nuaa irá ni ma bidxaga de cuyubi modo guia ladxidóʼ, cani ma qué ganda guni irá ni rucaa cabe laa guni, purti para laa ruluíʼ naguixhe cabe ti ayubu xa yanni. Latáʼ ra nuaaʼ, zaziilaʼdxi ladxidóʼ to. Laudxiiba ayubu stinne xa yanni tu purti nasisi ni, cadi nanaa ni casi ni nua tu ca. Laudii lugar usiide laatu purti qué zaca nia laatu naduxhuʼ ne qué zadinde nia laatu» (Mat. 11:28, 29). Modo ruluíʼ Jesús laanu gúninu xiixa racaneni laanu ne ruquídxini fe stinu. Laabe dxandíʼ rizaaláʼdxibe cani cayuubaʼ ladxidóʼ ne cani maʼ biree gana, ne runi invitarbe laacaʼ chuʼcaʼ xaʼnaʼ ayubu stibe. Yanna, xi guiráʼ nga naquiiñeʼ gúninu para gusihuínninu zinándanu Cristu yaʼ.
Apóstol Pedru rusiéneni né ca diidxaʼ riʼ: «Ucaná Cristu pur laatu.Yanna laguni casi biʼni Cristu» (1 Ped. 2:21). Nabé risaca nga chinándanu Cristu, casi ora ninándanu ra bizuhuaa ñeebe. Quíxhenu ti ejemplu. Pa ñaca ziuunu lade ti grupu de binni ni zidiʼdiʼ lu ti layú ra nuu stale bomba huiiniʼ ni ricaguí ora guxhatañeecabe laa ne ti binni si nanna paraa guzuhuaa ñee para cadi guicaguí cani, cadi dxandíʼ niduʼyaʼ chaahuinu paraa cuzuhuaañeebe ne zándaca dede nuzuhuaañeenu ra cuxhatañeebe la? Pue ngapeʼ nga ni naquiiñeʼ guni ca xpinni Cristu. Pa racaláʼdxinu guilanu la? naquiiñeʼ chinándanu ejemplu stibe. Ne para gúninu zacá naquiiñeʼ gucaadiáganu ni gábibe laanu, guzúʼbanu stiidxabe ne gúninu ni na cani guluube casi xaíque ládenu.
Rucaadiáganu laabe ne ruzúʼbanu stiidxabe
Lade ca últimu diidxaʼ ni guníʼ Jesús lu libana ni bidiibe lu dani que guniʼbe ejemplu riʼ: «Tutiica gucaa diaga ca diidxa riʼ ne guni ni na cani la? zeda gune laa casi ti hombre ni nuu xpiaaniʼ, bicuí lidxi lu guie. Biaba nisa guie bidxá guiiguʼ, biete bi yooxhoʼ, ne irá nga bidxela saa yoo que, peru qué ñaba ni purti zuba ni lu guie» (Mat. 7:24, 25).
Jesús guníʼ «ti hombre ni nuu xpiaaniʼ» la? rucaadiaga laabe ne ruzuubaʼ stiidxabe. Xi zanda guininu de laanu yaʼ. Ñee rúninu guiráʼ ni runi mandar Cristu sin quicheruaanu ne zacá rusihuínninu runi respetarnu laabe ne rusisácanu ejemplu stibe la? O rúninu ca cosa si ni qué raca nagana para laanu ne cani jma riuuláʼdxisinu. Cadi guiaandaʼ laanu ca diidxaʼ guníʼ Jesús: «Qué riaana dxie de gune ni riulaʼdxi [Bixhozeʼ]» (Juan 8:29). Naquiiñeʼ gúninu casi biʼniʼ Jesús.
Ca apóstol ni bibani lu primé siglu que bisaanacaʼ ti ejemplu nabé sicarú para laanu ra bisihuínnicaʼ bizuubacaʼ stiidxaʼ Cristu. Tobi de laacabe nga apóstol Pedru, laa gudxi Maestru stiʼ ca diidxaʼ riʼ: «Laadu yaʼ, bisaana du irá ni napa du ne canananda du lii» (Mar. 10:28). Casi maʼ bidúʼyanu ca, ca apóstol que nabé bisaca para laacaʼ guluíʼ Jesús laacaʼ xi naquiiñeʼ gúnicaʼ, ngue runi biale de ladxidoʼcaʼ gusaanacaʼ guiráʼ ni nápacaʼ para chinándacaʼ laabe (Mat. 4:18-22).
Rúninu ni na cani naguu Cristu de xaíque
Dxi mayaca gati Jesús bizeeteʼ ximódoruʼ zanda guzúʼbanu stiidxabe, laabe guniʼbe: «Ni icaa stiidxa cani useenda la? cacaa stiidxaʼ» (Juan 13:20). Ne ora guniʼbe de ca xpínnibe ni bibí guniʼbe «hermanu» stibe laacaʼ (Mat. 25:40). Despué de biasa Cristu de lade gueʼtuʼ ne zeʼ guibáʼ, biseendaʼ laacabe lugar stiʼ. Ora maʼ gúnicabe dxiiñaʼ bidii Xpixuaanacabe laacabe zuni invitárcabe binni guibiguetaʼ chúʼnecaʼ Jiobá tobi si sti biaje (2 Cor. 5:18-20). Nga runi, para gusihuínninu naca Jesús Xaíque stinu la? laaca naquiiñeʼ guzúʼbanu stiidxaʼ ca «hermanu» stibe o ca bíʼchibe.
Guiranu naquiiñeʼ guinabadiidxanu laca laanu ximodo ricaanu ca conseju rudiibe laanu ora guidúʼndanu Biblia, ora guidúʼndanu ca libru ne ca revista ribee xquídxibe ne ni ricaanu lu ca guendaridagulisaa. Lu cani maʼ bizéʼtenu ca nga rietenaláʼdxinu ni guníʼ Xaíque stinu (2 Ped. 3:1, 2). Zusihuínninu rusisácanu ni rudii Xaíque stinu laanu pa quixhe chaahuinu pora guizíʼdinu jma de Dios ti chuʼnu jma gaxha de laa. Yanna, xi rúninu ora guieeteʼ xiixa conseju gatigá yaʼ. Guiníʼ íquenu de conseju ni caníʼ guichaganáʼ binni «ti xpinni [si] Señor» (1 Cor. 7:39). Tema ca nabé maʼ bieeteʼ ni lu revista Torre stiʼ ni rapa dede maʼ raca jma de ti gayuaa iza. Ora riree xiixa tema ni caníʼ de ni maʼ bizéʼtenu ca ne de xcaadxi tema rusihuínnini pabiáʼ nadxii ne rizaalaʼdxiʼ ca biʼchiʼ Cristu laanu. Ora chinándanu ca conseju ca, cusihuínninu zinándanu Jesús.
«Neza stiʼ cani nachaʼhuiʼ zeeda gaca casi biaaniʼ ridxíʼ ni zeʼ ora jma ziyaca nayaʼniʼ dede guiaaniʼ dxindxi.» Casi maʼ bidúʼndanu lu Proverbios 4:18, ra zidiʼdiʼ dxi jma jneza modo zigusiene Jesús laanu ximodo naquiiñeʼ gúninu xiixa. Nga runi, sti modo gusihuínninu zinándanu ca biʼchiʼ Cristu nga cadi quiche ruaanu ora gusiene mozo ni nuu xpiaaniʼ ne ni runi jneza xiixa tema de sti modo (Mat. 24:45).
Xi sti modo zanda gusihuínninu runi respetarnu ca biʼchiʼ Cristu yaʼ. Rúninu ni ora gacanenu ca binnigola ne chinándanu conseju bicaa Pablu riʼ: «Lauzuuba stiidxa cani nuu de xaíque stitu. Laguni ni gabi ca laatu» (Heb. 13:17). Zándaca uguu tuuxa binnigola gana laanu guni adorarnu Dios né binnilídxinu o gabi laanu paraa caquiiñeʼ guchaʼnu ti ganda gucheechenu diidxaʼ jma jneza. O zándaca gudii ti binnigola ni riganna ca binni ridagulisaa xiixa conseju laanu para ganda guibáninu modo naquiiñeʼ guibani ca xpinni Cristu. Ora ricaanu ca conseju ca ne rúninu cani lu xquendanabáninu la? rusihuínninu cudiʼnu lugar guluíʼ Cristu laanu xi naquiiñeʼ gúninu.
Ndaaniʼ guidxilayú ra nabézanu riʼ qué ganda guidxela binni tuu nga gaca xaíque stiʼ. Peru, ¡nabé sicarú nga nápanu Cristu casi xaíque stinu! Maʼ gudixhe íquenu guzúʼbanu stiidxabe ne gúninu ni na ca binni ni bisaanabe casi xaíque.
[Ca dibuju/foto ni zeeda lu yaza 27]
Ñee rinándanu conseju ra na guichagananu «ti xpinni [si] Señor» la?