Ñee maʼ biuuluʼ lu guendariziilaʼdxiʼ stiʼ Dios la?
«Stiidxa Dios la? rudii enda nabani laanu, ne nandxóʼ ni.» (HEB. 4:12)
1. Xi naquiiñeʼ gúninu para chuʼnu lu guendariziilaʼdxiʼ stiʼ Dios, ne xiñee nuu tiru rácani nagana para laanu.
LU TEMA gudídinu ca bizíʼdinu naquiiñeʼ guzúʼbanu stiidxaʼ Dios ne gacanenu gaca ni maca gudixhe íquebe ti ganda chuʼnu lu guendariziilaʼdxiʼ stibe. Peru nuu biaje rácani nagana para laanu. Casi pa ñánnanu qué riuulaʼdxiʼ Jiobá xiixa ni riuuláʼdxinu gúninu, ñee niníʼ íquenu qué zanda guchaʼnu la? Pa guiníʼ íquenu zacá la? zácanu ti binni ni qué riná guzuubaʼ diidxaʼ (Hech. 5:29). Lu tema riʼ zadúʼyanu ximodo zanda gusihuínninu pa dxandíʼ riuuláʼdxinu guzúʼbanu diidxaʼ guiráʼ ora lu caadxi cosa.
2, 3. Xi naquiiñeʼ gúninu para chuulaʼdxiʼ Jiobá modo runi adorarnu laa.
2 Nuu tiru raca nagana para laanu chinándanu ca conseju ni zeeda lu Biblia, cadi dxandíʼ la? Biblia na racalaʼdxiʼ Dios gutagulisaa «ca cosa ni jma risaca stiʼ ca guidxi ca», nga nga zeeda gaca ca binni ni ruuyabe dxandíʼ risaca purtiʼ riuuláʼdxicaʼ gúnicaʼ ni jneza (Ageo 2:7). Dxandíʼ, stale de laanu cadi jneza modo rúninu caadxi cosa ante guzulú guidúʼndanu Biblia. Peru despué nabé beeda gannaxhiinu Jiobá ne Xiiñiʼ, nga runi gupa xidé bichaʼnu modo laanu ne modo rúninu caadxi cosa. Peru cumu racaláʼdxinu chuulaʼdxiʼ Dios modo runi adorarnu laa la? gupa xidé bíninu stipa ne biʼniʼ orarnu stale para gunda bichaʼnu. Ne despué biéchenu ora bidxiña dxi guyuʼnísanu (biindaʼ Colosenses 1:9, 10).
3 Yanna, ñee racá nga biluxe dxiiñaʼ stinu la? Coʼ, cadi racá diʼ. Nánnanu naquiiñeruʼ gúninu stipa para guchaʼnu modo laanu ne para gúninu ni riuulaʼdxiʼ Dios, purtiʼ binni ruchee laanu. Peru nanna dxíchinu zaguu Jiobá ndaayaʼ stipa stinu pur gusiéchenu laa guiráʼ dxi pa qué guireʼnu gana.
Guicaanu ca conseju ni rudiicabe laanu
4. Xi riquiiñeʼ Jiobá para gudii conseju laanu.
4 Ante guchaʼnu xiixa lu xquendanabáninu, primeru naquiiñeʼ gánnanu paraa nga naquiiñeʼ guchaʼnu. Ximodo racané Jiobá laanu para gúninu nga yaʼ. Zanda iquiiñebe ti libana ni gucaa laanu guiníʼ íquenu o ti tema stiʼ ti revista ni gacané laanu gudiʼnu cuenta cadi jneza modo riníʼ íquenu o cadi jneza modo cayúninu caadxi cosa. Peru pa qué guiénenu conseju ca o pa qué gúninu ni la? zanda iquiiñebe tobi de ca xpinni Cristu para gusietenalaʼdxiʼ ni laanu (biindaʼ Gálatas 6:1).
5. Xiñee naquiiñeʼ gacané ca binnigola ca xpinni Cristu, ne xi cadi naquiiñeʼ gúninu ora gudiicabe conseju laanu.
5 Nuu tiru, neca né diidxaʼ nadóʼ gudii ti xpinni Cristu xiixa conseju laanu, zándaca gaca nagana para laanu guicaanu ni, purtiʼ nánnanu laaca binni ruchee laabe casi laanu. Neca zacá, naquiiñeʼ guietenaláʼdxinu Jiobá nga rabi cani zaniruʼ lade ca binni ridagulisaa ca diidxaʼ riʼ: «Laulidxe [ca xpinni Cristu] ne diidxa nadóʼ», o lauguu jneza laacabe né guendarannaxhii (Gál. 6:1). Pa guicaanu ca conseju ni gudiicabe laanu la? zácanu binni «jma risaca» nezalú Dios. Ora rinínenu Jiobá, rábinu laabe dxandíʼ rucheʼnu. Peru zándaca gaca nagana para laanu guininu dxandíʼ bicheʼnu ora gabi ti binnigola ni laanu. Zándaca guzulú gábinu laabe xi pur bíninu xiixa o guininu cadi naxoopeʼ ni bíninu. O zándaca guininu qué riábanu laabe o qué ñácabe nachaʼhuiʼ ora guníʼnebe laanu (2 Rey. 5:11). Nuu tiru zadxiichinu ora gabi ca binnigola laanu xiixa ni qué riuuláʼdxinu gucaadiáganu. Casi ora gábicabe laanu cayuni ti binnilídxinu xiixa ni cadi jneza o gábicabe laanu cadi jneza modo rácunu lari. Zándaca gábicabe laanu nabiidiʼ modo rihuinni xcuérpunu o qué riuulaʼdxiʼ Jiobá caadxi cosa ni rúninu para chuʼnu nayecheʼ. Pa cadxiichinu la? zándaca gueeda guininu xiixa ni cadi jneza. Zaguu nga laanu triste ne laaca ziuu xpinni Cristu ni racalaʼdxiʼ gacané laanu ca triste. Peru ora maʼ gudiʼdiʼ xiana stinu, ziénenu cadi jneza ni bíninu ne zudiʼnu cuenta biaʼsi ngue conseju ni bidiicabe laanu.
6. Ximodo rusihuinni Stiidxaʼ Dios xi nuu «ndaani ladxidóʼ no [...] ne ni cá lu xquenda biaani nu».
6 Lu versículo ni zeeda ra ruzulú tema riʼ rusietenalaʼdxiʼ laanu «nandxóʼ [...] Stiidxa Dios», o nápani poder. Racaneni laanu guchaʼnu stale cosa lu xquendanabáninu, ne cadi rúninu cani ante si chuʼnísanu, sínuque laaca racaneni laanu gucháʼrunu despué de maʼ guyuʼnísanu. Lu carta ni bicaa Pablu ra nuu ca xpinni Cristu hebreu, guníʼ sicaríʼ: «Zanda guiaazi [Stiidxaʼ Dios] dede jma gueteʼ, dede ndaani dxita. Ora ma yendá stiidxa be que ndaani ladxidóʼ no la? ribee irá ni nuu ndaani ladxidóʼ no, ne ni cá lu xquenda biaani nu, para ganna nu ximodo laanu» (Heb. 4:12). Ndiʼ nga ni racalaʼdxiʼ Pablu gusiene né ca diidxaʼ ca: ora maʼ biénenu xi cayabi Dios laanu lu Biblia la? zusihuínninu xipeʼ nga nuu ndaaniʼ ladxidoʼno pur guiráʼ ni gúninu. Yanna, xi zanda guininu de cada tobi de laanu yaʼ. Ñee gadxé ni rusihuínninu, peru gadxé nga ni nuu ndaaniʼ ladxidoʼno la? (Biindaʼ Mateo 23:27, 28.) Guiníʼ íquenu xi ñúninu lu cani chiguzéʼtenu riʼ.
Chuunu biaʼ zeʼ xquidxi Jiobá
7, 8. 1) Xiñee gucuá caadxi xpinni Cristu judíu tema gúnicaʼ ni cá lu Ley stiʼ Moisés. 2) Xiñee rininu cadi cayacanécabe para gaca ni maca gudixhe ique Jiobá.
7 Stale de laanu runibiáʼ chaahuinu xiná Proverbios 4:18: «Neza stiʼ cani nachaʼhuiʼ zeeda gaca casi biaaniʼ ridxíʼ ni zeʼ ora jma ziyaca nayaʼniʼ dede guiaaniʼ dxindxi». Ca diidxaʼ ca rusihuínnicani jma jneza modo ziénenu ni cayabi Jiobá laanu ne jma jneza modo zuni adorarnu laabe ra maʼ zidiʼdiʼ dxi.
8 Lu tema gudídinu que bidúʼyanu qué niná stale discípulo ni naca judíu nusaana ca Ley stiʼ Moisés despué de guti Jesús (Hech. 21:20). Lu ca carta ni bicaa Pablu, nayaguieʼ modo bisiene maʼ cadi naquiiñeʼ chinanda ca xpinni Cristu Ley que, peru guyuu tu qué niná ñuni ni gúdxibe laacaʼ (Col. 2:13-15, NM). Xiñee yaʼ. Purtiʼ zándaca guníʼ íquecabe maʼ qué zaladxi ca judíu laacabe pa gúnicabe neca chupa chonna de cani zeeda lu Ley que. Lu carta ni bicaa apóstol que ra nuu ca xpinni Cristu hebreu bisiene qué zanda chúʼcabe lu guendariziilaʼdxiʼ stiʼ Dios pa qué gacanécabe para gaca ni maca naguixhe ique Dios (Heb. 4:1, 2, 6; biindaʼ Hebreos 4:11).a Pa racaláʼdxicabe chuulaʼdxiʼ Dios ni rúnicabe la? naquiiñeʼ guiénecabe maʼ gudixhe Jiobá sti modo guni adorar binni laa.
9. Xi naquiiñeʼ gúninu ora guchaa mozo ni nuu xpiaaniʼ modo riénenu xiixa ni zeeda lu Biblia.
9 Ca dxi nabáninu riʼ, maʼ huadúʼyanu ximodo jma jneza zigusiene mozo ni nuu xpiaaniʼ caadxi cosa ni zeeda lu Biblia. Lugar de chuʼnu xizaa pur ni cayuni mozo riʼ, racanécani laanu para guni crenu laabe de guidubi ladxidoʼno. Grupu ni Zaniruʼ nga ni riníʼ pur mozo ni nuu xpiaaniʼ, ne ora caquiiñeʼ guʼyaʼ pa jneza nuu xiixa o pa caquiiñeʼ guchaa xiixa la? rúnibe ni tiempu stini. Ne qué ridxíbicabe xi guiníʼ binni. Ni jma risaca para mozo ni nuu xpiaaniʼ nga gacané para gaca ni maca gudixhe ique Dios. Yanna lii yaʼ. Xi ruʼnuʼ ora ruchaa mozo ca modo riénenu xiixa ni zeeda lu Biblia yaʼ. Qué racaláʼdxinu gácanu casi ca fariseu, laacaʼ jma guyuuláʼdxicaʼ guecaʼ vinu yooxhoʼ, o guiaananecaʼ guiráʼ ni maca biziidicaʼ, lugar de gánnacaʼ ca cosa nacubi cusiidiʼ Jesús, cani zeeda gaca casi vinu cubi (biindaʼ Lucas 5:39).
10, 11. Xi rizíʼdinu de ni bizaaca ora bichaa xquidxi Dios modo guireeche diidxaʼ.
10 Guzéʼtenu sti ejemplu. Ra ziluxe siglu XIX ne ra bizulú siglu XX, guyuu caadxi de ca Binni ni Ruundaʼ Biblia —zacá binibiáʼcabe ca testigu stiʼ Jiobá dxiqué— nabé galán modo rudiicaʼ libana. Laacabe guníʼ íquecabe modo jma jneza gucheechecabe diidxaʼ nga gudiicabe libana galán. Riuuláʼdxicabe guiníʼcabe nezalú stale binni, ne nuu de laacabe riéchecabe ora gusisaca binni laacabe pur modo rudiicabe libana. Peru despué biene xquidxi Dios laaca cabeza Jiobá gucheechecabe diidxaʼ de yoo pur yoo ne cadi gudiisícabe libana nezalú stale binni. Stale de cani nabé galán modo rudii libana qué liica ninacaʼ ñúnicaʼ ni. Lu ca libana ni bidiicabe bicaacabe binni guni cré dxandíʼ nadxiicabe Jiobá ne ruzuubacabe stiidxaʼ, peru ni bíʼnicabe ora guníʼ xquidxi Dios naquiiñeʼ gucheechecabe diidxaʼ bisihuínnini cadi dxandíʼ ni bicaacabe binni guni cré. Nánnanu qué ñuulaʼdxiʼ Jiobá ni bíʼnicabe que ne despué bisaanacabe xquidxi Dios (Mat. 10:1-6; Hech. 5:42; 20:20).
11 Laaca guca nagana para xcaadxi de ca Binni ni Ruundaʼ Biblia que gucheechecaʼ diidxaʼ de yoo pur yoo dxi guníʼ xquidxi Dios gácani. Peru bizuubacabe diidxaʼ ne qué nusaanacabe xquidxi Jiobá. Chaahuiʼ chaahuiʼ maʼ qué nidxíbicabe nucheechecabe diidxaʼ ne nabé guluu Jiobá ndaayaʼ laacabe. Yanna lii yaʼ. Xi ruʼnuʼ ora gábicabe lii chigucheecheluʼ diidxaʼ sti modo ni cadi biaaluʼ yaʼ. Ñee ruʼnuʼ ni la?
Ora gusaana ti binnilídxinu Jiobá
12, 13. 1) Xiñee rinabaʼ Jiobá guiree cani runi cosa malu de ndaaniʼ xquidxi pa qué nacaʼ gaca arrepentircaʼ. 2) Xi guendanagana zanda guidxaagalú caadxi de ca xpinni Cristu ni napa xiiñiʼ.
12 Nánnanu naquiiñeʼ gácanu nayá lu guiráʼ cosa para chuulaʼdxiʼ Jiobá modo runi adorarnu laa (biindaʼ Tito 2:14). Peru ziuu ora zaca nagana para laanu chinándanu conseju ca. Quíxhenu ejemplu stiʼ ti guendaxheelaʼ ni runi ni na Dios, laacaʼ cayuuyacaʼ modo cusaana tobi lucha xiiñicaʼ xquidxi Jiobá. Xiiñicabe ca jma riuulaʼdxiʼ guni cosa malu «chupa chonna gubidxa» que chuʼ galán né Dios ne bixhoze ne jñaa. Cumu maʼ cadi jneza canazabe la? guleecabe laabe de ndaaniʼ xquidxi Dios (Heb. 11:25).
13 Nabé triste biaana jñaabe ne bixhózebe. Laacabe nánnacabe rudii Biblia conseju riʼ: «Cadi idxaaga tu nin tobi de cani na hermanu laa ne napa jnadxii o ni puru si rucaa ique gapa bidxichi, o ni runi cre bidóʼ o ni riguu dí o ni rixudxi o ni ribaʼnaʼ. Ni runi zacá la? nin cadi lica go né tu laa gueta» (1 Cor. 5:11, 13). Riénecabe ora ruzeeteʼ Biblia diidxaʼ «nin tobi» laaca caníʼ ni de ca binnilídxicabe ni cadi nabezané laacabe ndaaniʼ tobi si yoo. Peru cumu nabé nadxiicabe xiiñicabe la? zándaca guiníʼ íquecabe sicaríʼ: «Naquiiñeʼ guinínedu xiiñidu biaʼ gándatiʼ. Qué zanda diʼ gacanedu laabe guibiguétabe ndaaniʼ xquidxi Jiobá pa qué guinínedu laabe».b
14, 15. Xi guendanagana ridxaagalú cani napa ti xiiñiʼ ni maʼ biree ndaaniʼ xquidxi Dios.
14 Riénenu pabiáʼ naná yuubaʼ nuu ladxidóʼ guendaxheelaʼ ca. Cadi cadíʼdicabe lu guendanagana ca purtiʼ racaláʼdxicabe. Guyuu tiempu ñanda ñuni chaahuiʼ xiiñicabe modo canazá. Peru jma gucuá íquebe gúnibe ni cadi jneza que chúʼnebe bixhózebe ne ca binni ridagulisaa galán. Nécapeʼ racalaʼdxiʼ bixhózebe ne jñaabe gacanecaʼ laabe, qué zanda diʼ gucaacaʼ laabe gúnibe ni racaláʼdxicaʼ. Nga runi, riénenu xiñee naná modo nuucabe.
15 Peru laacabe laaca naquiiñeʼ quixhe íquecabe gúnicabe ti cosa: ñee zuzuubacabe stiidxaʼ Jiobá la? Dxandíʼ, ziuu biaje zadagulisaanécabe xiiñicabe para guiníʼcabe ne gúʼyacabe ximodo gaca xiixa ni risaca ndaaniʼ lídxicabe. Peru ñee rusihuinni ca diidxaʼ ca zanda guidxaagacabe laabe ora tiisi neca cadi caquiiñeʼ gúnicabe ni la? Ora quixhe íquecabe gúnicabe xiixa, cadi naquiiñeʼ guiaandaʼ laacabe xi riníʼ ique Jiobá. Laabe maca gudíxhebe xi pur naquiiñeʼ guiree tuuxa ni qué naʼ gaca arrepentir ndaaniʼ xquídxibe: para chuʼ guidxi stibe nayá ne pa ganda la? gucaani binni ni bichee ca guibiguetaʼ ndaaniʼ xquidxi Dios. Ximodo zanda gacané cani napa xiiñiʼ gaca ni racalaʼdxiʼ Jiobá yaʼ.
16, 17. Xi rusiidiʼ ejemplu stiʼ Aarón laanu.
16 Aarón, biʼchiʼ Moisés, laaca bidxaagalú ti guendanagana casi bizéʼtenu ca né chupa de ca xiiñiʼ, Nadab ne Abihú. Jiobá biiti laacabe purtiʼ cadi jneza ni bíʼnicabe ora bizaaquicabe guʼxhuʼ. Guníʼ ique pabiáʼ naná ni biʼniʼ sentir Aarón pur ni bizaaca riʼ, maʼ qué ziuuruʼ dxi gúʼyabe ca xiiñibe, nin guiníʼnebe laacaʼ ne qué zanda chúʼnebe laacaʼ. Peru cadi ngasi. Aarón ne xcaadxi xiiñiʼ gudxi Dios laacaʼ cadi gusihuínnicaʼ nuucaʼ triste né ca diidxaʼ riʼ: «Cadi gudiitu lugar guihuinni guicha íquetu nayuxe, ne cadi guichézatu xhábatu, para cadi gátitu ne para cadi guidxiichiné [Dios] guiráʼ ca binni ridagulisaa» (Lev. 10:1-6). Nabé nayaguieʼ nuu conseju ca para laanu: naquiiñeʼ gannaxhiinu Jiobá jma que biaʼ nadxiinu ti binnilídxinu, jmaruʼ si pa qué náʼ gaca arrepentir.
17 Ca dxi riʼ, cadi nagueendaca ruuti Jiobá cani rucheené ca ley stiʼ. Nabé nadxiibe laacaʼ, nga runi rudiibe lugar gusihuínnicaʼ maʼ guca arrepentircaʼ. Peru pa cueecabe xiiñiʼ ti testigu de ndaaniʼ xquidxi Dios la? rusihuinni nga qué ninádibe nuchaabe modo canazabe. Yanna, xi zazaaca pa guidxaagacabe xiiñicabe ni maʼ biree de ndaaniʼ xquidxi Dios yaʼ. Ñee qué zuuyaʼ Jiobá ni casi ora qué nácabe guzuubacabe stiidxaʼ la?
18, 19. Xi ndaayaʼ zanda guicaa ca xpinni Cristu ni ruzuubaʼ stiidxaʼ Jiobá ora gúnicaʼ stipa para cadi guidxaagacaʼ ti binnilídxicaʼ ni maʼ biree de ndaaniʼ xquidxi Dios.
18 Stale xpinni Cristu maʼ bibiguétacaʼ ndaaniʼ xquidxi Dios yanna pur ni biʼniʼ ca binnilídxicaʼ ne ca xhamígucaʼ. Xi biʼniʼ ca binni riʼ yaʼ. Qué niníʼnecaʼ laacabe tiempu bireecabe lade ca binni ridagulisaa, purtiʼ ruzuubacaʼ stiidxaʼ Jiobá. Guzéʼtenu ni bizaaca ti baʼdudxaapaʼ. Laabe gúdxibe ca binnigola bichaabe modo nabánibe pur ni biʼniʼ bizáʼnabe. Bizáʼnabe qué nusaana Jiobá ne biʼniʼ ni na ca mandatu stiʼ Dios biaʼ tiempu bireebe de ndaaniʼ xquidxi Dios. Nga nga ni bicaa laabe guibiguétabe lade ca binni ridagulisaa.
19 Casi maʼ bidúʼyanu lu tema riʼ, cadi gudiʼnu lugar quite ladxidoʼno laanu. Neca gaca nagana para laanu gúninu ni na xiixa conseju zeeda lu Biblia, naquiiñeʼ gúninu ni, purtiʼ nánnanu zacá nga jma jneza cusiidiʼ Jiobá laanu gudxíʼlunu ca guendanagana ca.
«Stiidxa Dios la? rudii enda nabani laanu»
20. Xi chupa modo zanda guiénecabe Hebreos 4:12. (Biiyaʼ ni cá ñee yaza riʼ.)
20 Ora guníʼ Pablu lu Hebreos 4:12 ca diidxaʼ riʼ: «Stiidxa Dios la? rudii enda nabani laanu», cadi caníʼsibe de Biblia. Xcaadxi versículo ni zeeda lu capítulo ca rusihuinni caniʼbe de guiráʼ cani maʼ guníʼ Dios chiguni.c Né ca diidxaʼ riʼ guníʼ Pablu raca guiráʼ ni ruzabiruaa Jiobá. Ne ngaca nga ni cusiene Jiobá ora guníʼ ca diidxaʼ riʼ: «Zacá zaca stiidxaʼ [...]. Qué zabiguetaʼ ni ra nuaa sin gácani, sínuque [...] dxandíʼ zácani purtiʼ para nga biseendaʼ ni» (Isa. 55:11). Nga runi, qué gápanu razón para guireʼnu gana purtiʼ si cadi cayaca xiixa nagueenda casi modo ñuuláʼdxinu ñácani. «Dede yanna cayuni [Jiobá] dxiiñaʼ» ne zúnirube dxiiñaʼ dede ora guiluxe gaca guiráʼ ni maʼ gudixhe íquebe (Juan 5:17).
21. Ximodo caguu Hebreos 4:12 gana ca xpinni Cristu ni maʼ nagola.
21 Nuu stale xpinni Cristu maʼ xadxí de cayúnicaʼ ni na Jiobá (Apo. 7:9). Stale de laacabe qué niníʼ íquecabe pa nabanirúcabe ora ñuʼnuʼ lu ca últimu dxi riʼ, peru neca maʼ nagólacabe cayunirúcabe stipa para guni adorárcabe Jiobá (Sal. 92:14). Xiñee yaʼ. Purtiʼ nánnacabe rudii «Stiidxa Dios [...] enda nabani», ne cayuni Jiobá dxiiñaʼ para guni guiráʼ ni maʼ guníʼ. Para Jiobá nabé risaca ni maca gudixhe ique guni ne riéchebe ora gúʼyabe laaca risácani para laanu. Ca dxi riʼ nabáninu lu gadxe gubidxa ra caziilaʼdxiʼ Dios, peru cadi cusaana de gúnibe dxiiñaʼ para gaca ni maʼ gudixhe íquebe, ne nánnabe zacané xquídxibe laabe para gácani. Casi maʼ bizíʼdinu ca, guiranu zanda chuʼnu lu guendariziilaʼdxiʼ stiʼ Dios. Ñee maʼ nuuluʼ racá la?
[Cani cá ñee yaza]
a Nécapeʼ guyuu stale de ca xaíque stiʼ ca judíu ni yenanda módopeʼ cá lu Ley stiʼ Moisés, qué nudiicabe cuenta pa Jesús nga Mesías ni nexheʼ gueeda. Ni bizaaca nga qué ñénecabe ximodo cayuni Jiobá ni maca gudixhe ique.
b Zadxeʼluʼ jma ni caníʼ de laani lu libru Cadi guixélenu de Dios ni nadxii laanu, yaza 207 dede 209.
c Ca dxi stinu riʼ, riquiiñeʼ Dios Biblia para guiniʼné laanu, ne nápani poder para gacaneni laanu guchaʼnu modo nabáninu. Nga runi, laaca biaʼsi nga ni bisiene Pablu lu Hebreos 4:12 de Stiidxaʼ Dios.
Cani jma naquiiñeʼ guietenaláʼdxinu
• Xi naquiiñeʼ gúninu para chuʼnu lu guendariziilaʼdxiʼ stiʼ Dios.
• Xi naquiiñeʼ gúninu né ca conseju ni zeeda lu Biblia pa maʼ biénenu xi canabaʼ Dios laanu.
• Pora nga raca nagana para laanu cadi guixélenu de Dios, ne xiñee risaca guzúʼbanu diidxaʼ.
• Xi chupa modo zanda guiénenu Hebreos 4:12.
[Dibuju/foto ni zeeda lu yaza 31]
Naroʼbaʼ ne naná yuubaʼ riaana ndaaniʼ ladxidóʼ cani napa xiiñiʼ