Rietenalaʼdxuʼ la?
Ñee maʼ biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:
• Xi chonna cosa zanda gacané laanu para cadi chuuláʼdxinu gúninu ni cadi jneza casi runi binni guidxilayú.
Ndiʼ nga laacani: 1) guidxíbinu guchéʼnenu Dios (1 Ped. 3:12); 2) gusíʼdinu xquendabiaaninu guni ni na Biblia, ne 3) chuʼnu nayecheʼ né ni nápasinu (15/4, yaza 6 ne 7).
• Xiñee zanda chuʼnu nayecheʼ ora gúninu ni na Dios modo riuulaʼdxiʼ sin gácanu naduxhuʼ.
Ejemplu stiʼ Jesús zanda gacané laanu. Nánnanu guleebe tiempu para gudonebe ca xhamígube, para guxidxinebe laacaʼ ne qué ñácabe naduxhuʼ. Dede ca baʼduhuiiniʼ que riéchecaʼ chuʼcaʼ gaxha de laabe (15/4, yaza 10).
• Xii nga zeeda gaca casi yaga olivo ni ruzeeteʼ Romanos capítulo 11.
Zanda guchaaganu yaga riʼ né xcaadxi de ca binni ni za de Abrahán, Israel stiʼ Dios. Xcu yaga ca nga Jiobá, ne tronco stini nga Jesús. Cumu stale de ca judíu que bidxiidéchecaʼ Jesús la? gupa xidé guluu Jiobá ca xpinni Cristu ni cadi judíu para gunda bizaa guiráʼ cani za de Abrahán, zacá nga casi ora ñúnibe ti injertu (15/5, yaza 22 dede 25).
• Pa ñaca ñapa Jesús xiiñiʼ ni qué ñapa donda, ñanda niquiiñecabe para nulácabe binni de donda ne guendaguti la?
Coʼ. Neca ñanda ñapa Jesús stale mil millón de xiiñiʼ ni qué ñapa donda la? qué ñanda niquiiñecabe para nulácabe binni. Guendanabani si sin donda stiʼ Jesús nga risaca biaʼ guendanabani ni gupa Adán (1 Tim. 2:6) (15/6, yaza 13).
• Xi diidxaʼ nacubi ne galán nuu para ca binni pobre.
Maʼ biʼniʼ Dios Xiiñiʼ Rey. Jesús nga binni ni jma nannaʼ guni mandar, purtiʼ nápabe poder para guni mandarbe guiráʼ binni, riabe ca binni pobre, ne zanda gacanebe binni gusaana de guyubi puru para laa si, purtiʼ pur nga nuu guendapobre (1/7, yaza 7).
• Xi zanda guni ti guendaxheelaʼ pa cayapa guendanagana despué de gule primé baʼduhuiiniʼ stiʼ.
Risaca gusihuínnicabe nadxiisaacabe. Hombre ca naquiiñeʼ guni stipa para cadi guni xiixa ni gucaa xheelaʼ guiníʼ ique sti cosa. Ne naquiiñeʼ guiníʼ guirópacabe ni runi sentírcabe ne ni caquiiñeʼ cada tobi de laacabe (1/7, yaza 10 ne 11).
• Gunáʼ nga caadxi cosa ni cadi jneza bíʼnicabe ora guca juzgar Jesús.
Qué ninabaʼ tribunal que ñuu tuuxa niníʼ pur laabe. Biyúbicabe testigu para guindisaʼ falsu luguiabe. Biʼniʼ juzgárcabe laabe huaxhinni. Dxi ca bizulú biʼniʼ juzgárcabe laabe dxi queca bilúxeni (1/7, yaza 20).
• Xi gucalaʼdxiʼ Jesús niníʼ ora bicábibe Caifás sicaríʼ: «Laaca lii guniʼluʼ ni» (Mat. 26:63, 64, NM).
Ruluíʼ si nabé biquiiñeʼ ca judíu diidxaʼ riʼ para gusihuínnicaʼ dxandíʼ xiixa ni gunabadiidxacabe laacaʼ. Caifás xaíque stiʼ cani ruzaaquiʼ guʼxhuʼ gunabadiidxabe Jesús pa laabe nga Cristu, Xiiñiʼ Dios. Ora bicabi Jesús laabe: «Laaca lii guniʼluʼ ni», cusihuínnibe dxandíʼ ni gunabadiidxaʼ hombre que laabe (1/7, yaza 31).
• Ximodo rusihuínninu rucaadiáganu conseju ni na cadi guidxaaganu ca maestru ni qué rusiidiʼ ni dxandíʼ ni cuzeeteʼ Hechos 20:29, 30.
Ra qué guinínenu laacabe ne cadi gudiʼnu lugar chúʼcabe ndaaniʼ lídxinu (Rom. 16:17; 2 Juan 9-11). Qué liica ridúʼndanu ca libru ne ca revista stícabe ne qué rucaadiáganu guiráʼ ni rutiidicabe lu televisión o lu Internet (15/7, yaza 15 ne 16).