Jiobá nga herencia stinu
«Naa nga herencia ni raca caber guicaaluʼ lade ca xiiñiʼ Israel.» (NÚM. 18:20)
1, 2. 1) Xi bizaaca né tribu stiʼ Leví dxi biaaziʼ Layú ni Bizabiruaa Dios lu ca israelita. 2) Xi gudxi Jiobá ca levita.
DXI mayaca guicaa Israel guidubi naca Layú ni Bizabiruaa Dios, bidxiña tiempu para guiaaziʼ biaʼ maʼ nápacabe que lúcabe. Tu lu náʼ biaana dxiiñaʼ que yaʼ. Lu náʼ Josué ne Eleazar, xaíque stiʼ cani ruzaaquiʼ guʼxhuʼ ne lu náʼ ca xaíque stiʼ ca tribu que (Núm. 34:13-29). Bidiicabe ti ndaa layú cada tribu, peru tribu stiʼ Leví qué nicaa nin ti ndaa (Jos. 14:1-5). Xiñee yaʼ. Ñee biaandaʼ ca binni que laacabe la? O qué raca caber guicaacabe herencia.
2 Jiobá cadi cá ique gusiaandaʼ ca levita. Ngue runi gúdxibe Aarón, ni riníʼ pur tribu que ca diidxaʼ riʼ: «Naa nga herencia ni raca caber guicaaluʼ lade ca xiiñiʼ Israel» (Núm. 18:20). ¡Nabé sicarú ca diidxaʼ gudxi Jiobá laacabe! Ximodo ñuni sentirnu pa ñabi Dios laanu xiixa zacá yaʼ. Zándaca ninabadiidxanu laca laanu: «Ñee nibí Dios ni jma nandxóʼ naa para ñapaʼ laa casi ti herencia la? Ñanda ñapaʼ guenda sicarú ca neca ti binni ruchee naa la?». Nabé risaca cani gunabadiidxanu ca, purtiʼ nuu xquendanabáninu ne stiʼ ca binnilídxinu luni. Yanna guidúʼyanu xi riníʼ ca diidxaʼ gápanu Jiobá casi ti herencia stinu. De racá maʼ zadúʼyanu ximodo zanda gácabe herencia stiʼ cani cabeza cheʼ guibáʼ o cani cabeza guibani lu Guidxilayú riʼ.
Gupa Jiobá tribu stiʼ Leví
3. Ximodo gulí Dios tribu stiʼ Leví para gúnicaʼ dxiiñaʼ stibe.
3 Dxiqué la? cada xaíque stiʼ ti familia nga biʼniʼ dxiiñaʼ casi ti ni ruzaaquiʼ guʼxhuʼ para ca binnilidxi, ne gúcani zacá ante gudii Jiobá Ley stiʼ Moisés ca israelita. Peru dxi maʼ gudixhe Dios Ley que, biaana dxiiñaʼ ca lu náʼ ca binni si ni nuu lu tribu stiʼ Leví, ca hombre si ni nuu lu tribu que nga chiguni dxiiñaʼ casi ni ruzaaquiʼ guʼxhuʼ o ni gacané cani guni dxiiñaʼ ca. Ximodo beeda gaca ndiʼ yaʼ. Cadi guiaandaʼ ndiʼ laanu, dxi biiti Jiobá guiráʼ hombre ni naca baʼduʼ lugola ndaaniʼ guidxi Egipto la? bisiénebe guleechube guiráʼ ca baʼduʼ lugola stiʼ ca israelita para laabe ti gúnicaʼ xhiiñabe. Peru despué gudixhe Jiobá iquiiñeʼ ca levita si «lugar stiʼ guiráʼ ca baʼduʼ lugola xiiñiʼ ca israelita». Yanna, cumu napa xcaadxi tribu que jma stale baʼduʼ lugola que ca levita la? guníʼ Jiobá quíxecabe saca ca binni ni jma stale que (Núm. 3:11-13, 41, 46, 47). Dede dxiqué maʼ bizulú tribu stiʼ Leví biʼniʼ ti dxiiñaʼ risaca ndaaniʼ guidxi que.
4, 5. 1) Ximodo nga beeda gaca Jiobá herencia ni raca caber guicaa ca levita. 2) Ximodo gupa Jiobá ca levita.
4 Casi maʼ bidúʼyanu ca, qué nicaa ca levita nin ti ndaa layú; ni gucuaacabe casi herencia nga gácacabe ni ruzaaquiʼ guʼxhuʼ para Jiobá (Jos. 18:7). Nga runi gúdxibe laacaʼ ni cá lu Números 18:20: «Naa nga herencia ni raca caber guicaaluʼ». Yanna, ñee ziaanacabe casi binni pobre purtiʼ si qué gápacabe layú la? Guidúʼyanu xi riníʼ xcaadxi versículo de laani. Biblia na: «Purtiʼ diezmu ni ribee ca xiiñiʼ Israel, ni guleechúcabe para gudiicabe Jiobá, maʼ gudixheʼ guicaa ca levita ni casi herencia. Nga runi maʼ gudxeʼ laacabe: “Lade ca xiiñiʼ Israel cadi naquiiñeʼ guyúbitu herencia para laatu”» (Números 18:24). Pur dxiiñaʼ ni cayúnicabe, napa xidé gudii ca israelita laacabe chii por ciento de cosecha ni rindísacaʼ ne de ca maniʼ ni gale sticaʼ. Peru ca levita que laaca ribeecaʼ chii por ciento de ni ricaacaʼ para gudiicabe ni cani ruzaaquiʼ guʼxhuʼ (Núm. 18:25-29).a Cani ruzaaquiʼ guʼxhuʼ laaca ricaacaʼ ca cosa risaca ni riné ca israelita para Dios. Nga runi, zanda guni crécabe zudii Jiobá guiráʼ ni caquiiñecabe.
5 Ruluíʼ si laaca ruzeeteʼ Ley que naquiiñeʼ cuee ca israelita sti diezmu de lu ni runi ganarcaʼ para gápacaʼ ni iquiiñecaʼ ora checaʼ ca guendaridagulisaa ni raca cada iza (Deu. 14:22-27). Peru laaca biquiiñecabe diezmu riʼ sti modo. Cada gusaa chonna iza ne cada gusaa xhoopaʼ iza rusaanacabe diezmu riʼ ra puertaʼ santuariu para gacanécabe ca pobre ne ca levita. Xiñee né ca levita yaʼ. Purtiʼ qué ñápacabe «herencia» ndaaniʼ guidxi Israel (Deu. 14:28, 29).
6. Paraa chindeza ca levita pa qué nicaacaʼ nin ti ndaa layú.
6 Yanna, pa qué nicaa ca levita nin ti ndaa layú, paraa chindézacabe yaʼ. Gulí Jiobá cuarenta y ocho guidxi para laacabe né ca layú stícani, raqué nga cuézabe tiempu cadi cayúnicabe dxiiñaʼ ndaaniʼ santuariu que (Núm. 35:6-8). Racá ridúʼyanu bidii Jiobá guiráʼ xixé ni caquiiñeʼ ca binni ni cayuni xhiiñabe. Ximodo zanda gusihuínnicabe dxandíʼ ruuyacabe Jiobá casi herencia stícabe yaʼ. Ra guzuubacabe stiidxabe ne guni crécabe zanda gapa Dios laacabe ne gánnacabe racaláʼdxibe gúnibe ni.
7. Xi naquiiñeʼ gusihuinni ca levita para gaca Jiobá herencia sticaʼ.
7 Guyuu biaje qué niná caadxi israelita nudii diezmu stiʼ. Nécapeʼ qué rusabanáʼ Ley stiʼ Moisés laacabe pur qué rudiicabe diezmu la? ca levita ne cani ruzaaquiʼ guʼxhuʼ qué rápacaʼ ni iquiiñecaʼ. Nga nga ni bizaaca tiempu bibani Nehemías. Cumu maʼ gastiʼ ni iquiiñecabe la? gupa xidé bíʼnicabe dxiiñaʼ lu layú ne bisaana de gúnicabe xhiiñaʼ Dios. Biblia na: «Gunnaʼ maʼ cadi cacaa diʼ ca levita ni nexheʼ guicaacaʼ, ngue runi guyé ca levita ne cani ruundaʼ lu layú sticaʼ para gúnicaʼ dxiiñaʼ» (Nehemías 13:10). Nga runi, pa guzuubaʼ guidxi que diidxaʼ, zanda gapa ca binni ni nuu lu tribu stiʼ Leví ni gocaʼ. Naquiiñeʼ gusihuínnicabe runi crécabe zacané Jiobá laacabe ne zápacabe ni iquiiñecabe purtiʼ maʼ gudixhe Dios modo gapa laacabe.
Ca Levita ni gúpacaʼ Jiobá casi herencia sticaʼ
8. Xi guendanagana gupa ti levita láʼ Asaf.
8 Nécapeʼ gupa guidubi naca tribu stiʼ Leví Jiobá casi ti herencia ni raca caber laacaʼ, guyuu tu laa guníʼ: «Jiobá nga ni raca caber naa guicaaʼ», ne guníʼcabe zacá para gusihuínnicabe nuucabe gaxha de Dios ne runi crécabe laabe (Lam. 3:24). Tuu nga tobi de ca binni ni guníʼ zacá yaʼ. Zándaca Asaf o tobi de cani za de laa nga guníʼ zacá ora bicaa Salmo 73. Ne laca laabe nga gudíxhebe ximodo guʼndaʼ ca levita ni bibani tiempu stiʼ David (1 Cró. 6:31-43). Neca qué gánnanu tupeʼ nga bicaa salmo riʼ, bisihuínnibe cadxiichibe xiñee galán cayeni ca binni malu. Dede guniʼbe: «Pur gana si bisiayaʼ ladxiduáʼ ne gudiibe nayaʼ para guneʼ ni jneza». Ruluíʼ si biaandaʼ laabe nabé risaca gúnibe ni na Jiobá ne gúʼyabe laa casi ti herencia stibe. Peru bisaana de guiníʼ íquebe zacá dxi guyuube «ndaaniʼ santuariu nabé nandxóʼ stiʼ Dios» (Sal. 73:2, 3, 12, 13, 17).
9, 10. Xiñee gunda guníʼ Asaf: «Dios [...] nga ni raca caber naa guicaaʼ biaʼ dxi guibaneʼ».
9 Dxi maʼ nuu Asaf ndaaniʼ santuariu que, bizulú biiyabe ca cosa que casi modo ruuyaʼ Dios cani. Stale xpinni Cristu laaca maʼ gudiʼdiʼ ra nagana casi gudiʼdiʼ hombre ca. Zándaca laaca biaandaʼ laacabe pabiáʼ risaca gúnicabe xhiiñaʼ Jiobá ne jma gucuá íquecabe gápacabe stale cosa risaca. Peru ora biindacabe Stiidxaʼ Dios ne guyécabe ra ridagulisaa xquidxi Dios, bichaacabe modo riníʼ íquecabe. Asaf bidii cuenta zadxiña dxi quixe ca binni malu guiráʼ ni rúnicaʼ. Ora bietenaláʼdxibe ca ndaayaʼ ni maʼ gucuaabe, biénebe zacané Jiobá laabe, casi ora ninaazeʼ nabe ne ñabi laabe paneza chebe. Ngue runi guniʼbe: «Aparte de lii, gástiruʼ sti cosa ni gusiecheʼ naa lu guidxilayú» (Sal. 73:23, 25). Neca guizaaca intiica cosa —casi pa gaca huarabe o guireebe gana—, zanda guiniʼbe ca diidxaʼ riʼ: «Dios [...] nga ni raca caber naa guicaaʼ biaʼ dxi guibaneʼ» (Salmo 73:26). ¡Guizáʼ gutadxí ladxidoʼbe ora bietenaláʼdxibe xhamígube Jiobá ne qué ziuu dxi gusiaandaʼ modo cayúnibe xhiiñaʼ! (Ecl. 7:1.) Ngue runi dede biindabe sicaríʼ: «Guizáʼ galán runeʼ sentir chuaaʼ gaxha de Dios. Runeʼ cré zanda gapa Jiobá naa, Señor ni jma nandxóʼ» (Sal. 73:28).
10 Ora guníʼ Asaf naca Jiobá herencia ni raca caber laa guicaa, cadi caníʼsibe de guiráʼ ni ricaabe purtiʼ levita laabe. Laabe caniʼbe de guenda sicarú ni nápabe de guni adorarbe Dios ndaaniʼ yuʼduʼ stiʼ ne gaca xhamígube laa (Sant. 2:21, 22). Para cadi guixélebe de Jiobá, naquiiñeʼ gápabe fe laa ne guni crebe zieni laabe jma galán pa guzuubabe stiidxaʼ. Cadi dxandíʼ laaca naquiiñeʼ gápanu fe Jiobá ne guni crenu zacanebe laanu la?
11. Xi guluu xizaa Jeremías, ne xi bicabi Dios laabe.
11 Jeremías nga sti levita ni biquiiñeʼ diidxaʼ «Jiobá nga ni raca caber naa guicaaʼ». Guidúʼyanu xi gucaláʼdxibe niniʼbe. Ni riguixhená riʼ bibani ndaaniʼ guidxi Anatot, ti guidxi nuu gaxha de Jerusalén ra guyuu ca levita (Jer. 1:1). Ti biaje laaca bidxiichibe xiñee cayapa ca binni malu stale cosa galán, peru ca binni nachaʼhuiʼ nápacaʼ stale guendanagana (Jer. 12:1). Laabe nánnabe runi Jiobá ni jneza, ngue runi, ora biiyabe xi guiráʼ cayaca ndaaniʼ guidxi Jerusalén ne Judá, gúdxibe laa pabiáʼ cadxiichibe. Xi bicabi Jiobá laabe yaʼ. Gudxi Dios laabe guiniʼbe zanitilú guidxi que ne biʼniʼ Dios guiráʼ ni gudxi laabe: cani qué nucaadiaga laabe gúticaʼ, peru cani bizuubaʼ diidxaʼ, bilacaʼ (Jer. 21:9).
12, 13. 1) Xi bisihuinni Jeremías ora guníʼ: «Jiobá nga ni raca caber naa guicaaʼ». 2) Xiñee cadi naquiiñeʼ guiree ca tribu stiʼ Israel gana.
12 Despué binitilú guidxi que. Ora biiyaʼ Jeremías pabiáʼ triste modo nuuni, biʼniʼ sentirbe casi ora cananítibe, casi ora nudii Jiobá lugar nizabe ra nacahui. Biʼniʼ sentirbe casi ora ñácabe ti gueʼtuʼ, «casi binni ni maʼ xadxí de guti» (Lam. 1:1, 16; 3:6). Binitilú Jerusalén ne Judá purtiʼ qué niná ca israelita nusaanacaʼ guiráʼ cosa malu cayúnicaʼ ne nibiguétacaʼ ra nuu Bixhózecaʼ ni nuu guibáʼ. Jeremías qué ñapa donda pur ni bizaaca guidxi que, purtiʼ maca gudixhenabe laacaʼ, neca zaqué nabé guyuube triste. Peru bidiibe cuenta qué nudii Jiobá lugar ninitilú guidubi guidxi que pur «guendanachaʼhuiʼ stiʼ», ne purtiʼ rilaselaʼdxiʼ laacabe «guiráʼ siadóʼ». Ne cumu qué ñaandaʼ laabe risaca dxiiñaʼ gúpabe de quixhenabe binni la? guniʼbe ca diidxaʼ riʼ: «Maʼ guniéʼ, Jiobá nga ni raca caber naa guicaaʼ, nga runi, zabezaʼ laabe» (Lamentaciones 3:24).
13 Ora guníʼ Jeremías: «Jiobá nga ni raca caber naa guicaaʼ», laaca bisihuínnibe runi crebe riá Dios binni, ne gucané nga laabe para cadi guireebe gana. Guiráʼ ca tribu stiʼ Israel laaca cadi naquiiñeʼ guireecaʼ gana, purtiʼ biníticaʼ guiráʼ layú sticaʼ ne guirutiʼ qué zabeza luni 70 iza (Jer. 25:11). Jiobá si nga zanda gacané laacabe. Ne qué nusiaandabe ca binni ni gupa laabe casi ti herencia. Setenta iza despué, bidxiguétabe ca israelita xquídxicaʼ ne bidiibe lugar guni adorarcaʼ laabe raqué sti biaje (2 Cró. 36:20-23).
Xcaadxi binni laaca zanda gápacaʼ Jiobá casi herencia sticaʼ
14, 15. Aparte de ca levita, tu sti binni gupa Jiobá casi ti herencia, ne xiñee.
14 Nga runi, cadi ca levita si —casi Asaf ne Jeremías— nga zanda gápacaʼ Dios casi ti herencia sticaʼ. Zacá bisihuinni David ni, purtiʼ ante gácabe rey stiʼ Israel gúdxibe Jiobá ca diidxaʼ riʼ: «Lii nga [...] ni raca caber naa guicaaʼ ndaaniʼ guidxilayú ra nabani binni» (Sal. 142:1, 5). Ora gudíxhebe salmo riʼ, cadi nuudibe ndaaniʼ ti palaciu ne laaca cadi nuube ndaaniʼ ti yoo, sínuque nuube ndaaniʼ ti cueva, ra nucaachilube de ca xhenemígube. Zándaca bicaachilube ndaaniʼ chupa cueva biaʼ dxi bibánibe, ti biaje guyuube ndaaniʼ tobi ni nuu gaxha de guidxi Adulam ne sti biaje guyuube ndaaniʼ tobi ni nuu lu desiertu stiʼ En-guedí. Nga runi, zándaca bicaabe Salmo 142 dxi nuube ndaaniʼ tobi de ca cueva ca.
15 Guietenaláʼdxinu rey Saúl peʼ ngue canazananda guuti laabe. Dxi cuxooñeʼ David de laabe, biuu ndaaniʼ ti cueva ra nabé nagana para chuʼ binni (1 Sam. 22:1, 4). Dxi nuube lugar zitu que, biʼniʼ sentirbe stúbibe ne guirutiʼ tu gacané laabe (Sal. 142:4). Ngue runi biyúbibe Dios para gapa laabe.
16, 17. 1) Xiñee biʼniʼ sentir David guirutiʼ tu cayacané laa. 2) Tu zanda guinábabe gacané laabe guiráʼ ora.
16 Para dxi gudixhe David Salmo 142, zándaca maʼ nánnabe xi bizaaca Ahimélec. Cumu qué ganna ni ruzaaquiʼ guʼxhuʼ riʼ pa ládxicabe laabe la? gucané laabe, ngue runi, biʼniʼ mandar Saúl gati Ahimélec ne binnilidxi (1 Sam. 22:11, 18, 19). Nabé triste biʼniʼ sentir David purtiʼ guníʼ íquebe nápabe donda pur guti hombre chaʼhuiʼ que. Casi ñaca laapebe ñuutibe laa. Tuu laa qué nugaaniʼ donda ique pa nizaaca xiixa zacá yaʼ. Ne ni jma triste nga qué gápabe nin ti ratu para guiziiláʼdxibe, purtiʼ maʼ gaxha nanda Saúl laabe.
17 Peru cadi ngasi nga laani. Cadi xadxí de ngue guti Samuel ni riguixhená, hombre ni gulí laabe para gácabe rey (1 Sam. 25:1). Nécapeʼ jma biʼniʼ sentir David nuu stubi ora gunna ni la? qué ñuu dxi ñaandaʼ laa nuu Dios para gacané laa. Dxandíʼ qué nudii Dios laabe dxiiñaʼ risaca casi gupa ca levita, peru gulí laabe para gúnibe sti dxiiñaʼ stiʼ: gácabe rey ndaaniʼ guidxi Israel (1 Sam. 16:1, 13). Ngue runi, biʼniʼ orarbe Dios de guidubi ladxidoʼbe ne qué nusaana de ñápabe fe laa. Laaca zanda gacané Jiobá laanu yanna. Pa guicaanu Jiobá casi ti herencia stinu ne guni crenu zulabe laanu la? laaca zacanebe laanu gúninu ni nabe de guidubi ladxidoʼno.
18. Ximodo bisihuinni stale de ca xpinni Dios gúpacaʼ Jiobá casi herencia sticaʼ.
18 Lu tema riʼ maʼ bidúʼyanu gupa David ne ca levita Jiobá casi herencia sticaʼ ne zaqueca biʼniʼ xcaadxi binni de guidxi Israel. Ca diidxaʼ ca cusiene cani laanu bidii Jiobá laacabe ti dxiiñaʼ para gúnicabe ne runi crécabe zapa Dios laacabe ora maʼ cayúnicabe ni. Cada tobi de laanu laaca zanda guininu Jiobá nga herencia ni raca caber laanu guicaanu. Lu sti tema ca zadúʼyanu ximodo zanda gúninu ni.
[Cani cá ñee yaza]
a Para gannuʼ jma de ximodo gupa Jiobá cani ruzaaquiʼ guʼxhuʼ, biiyaʼ Perspicacia para comprender las Escrituras, volumen 2, yaza 890 ne 891.
Xi nicábiluʼ
• Xiñee gunda guníʼ tribu stiʼ Leví Jiobá nga ni raca caber laacaʼ guicaacaʼ.
• Ximodo bisihuinni Asaf, Jeremías ne David Jiobá nga herencia sticaʼ.
• Xi guenda caquiiñeʼ gusihuínniluʼ para gaca Dios casi ti herencia stiluʼ.
[Ni caníʼ yaza 8]
Qué nicaa ca levita nin ti ndaa layú casi herencia, sínuque gulí Jiobá laacabe para gúnicabe xhiiñaʼ
[Ca dibuju/foto ni zeeda lu yaza 7]
Ximodo ndiʼ beeda gaca Jiobá ni raca caber guicaa cani ruzaaquiʼ guʼxhuʼ ne ca levita
[Ca dibuju/foto ni zeeda lu yaza 9]
Xi gucané Asaf para cadi nusaana de ñuuyaʼ Jiobá casi herencia stiʼ