Sanu modo na Espíritu ti gápanu guendanabani ne gatadxí ladxidoʼno
«Laanu ma cadi nabani nu modo na ique nu, sínuque modo na Espíritu Santu.» (ROM. 8:4)
1, 2. 1) Xi guendanagana rapa binni ora guni sti cosa laga zigusá carru. 2) Xi zazaaca né modo runi adorarnu Jiobá pa qué gatananu.
SICARÍʼ guníʼ secretariu de Transporte de Estados Unidos: «Cada iza tiidiʼ jma zidale binni ni riuulaʼdxiʼ guni sti cosa laga zigusá carru». Tobi de cani rúnicabe nga riníʼcabe lu teléfono celular stícabe, peru ora rúnicabe zacá maʼ qué ruuyaʼ chaahuicabe pa neza zécabe. Xi rizaaca ora maʼ zigusá binni carru ne guiníʼ pur teléfono yaʼ. Stale binni riníʼ maʼ huadxelasaacabe laacaʼ, o bilá nilácabe laacaʼ pur laani. Nuu tu riníʼ zanda guni sti cosa laga zigusá carru, peru pa gúnicabe zacá, zanda gacanácabe o guninácabe sti binni.
2 Ti chofer ni cayuni sti cosa laga zigusá carru la? qué zanda guuyaʼ chaahuiʼ xi nuu neza zeʼ. Zacaca nga laanu, pa qué chuʼnu cuidadu la? zanda guixélenu de Jiobá. Pablu na zará fe stinu, pa gudiʼnu lugar chuʼ xcaadxi cosa ni cueechú laanu de neza stiʼ Dios ne pur laacani maʼ qué zúninu ni na Dios modo riuulaʼdxiʼ (1 Tim. 1:18, 19). Apóstol Pablu maca gudixhená ca xpinni Cristu de Roma, ora guníʼ: «Cani ruyubi ni chuʼlaʼdxi si la? rati, peru cani ruyubi guni ni chuʼlaʼdxi Espíritu Santu la? ricaa ca enda nabani» (Rom. 8:6). Xidé ndiʼ caníʼ Pablu yaʼ. Xi zanda gúninu para cadi guyúbinu «ni chuʼlaʼdxi si[nu]», sínuque guyúbinu «ni chuʼlaʼdxi Espíritu Santu» yaʼ.
«Ma qué zudxiiba Dios donda» luguiácabe
3, 4. 1) Xi guendanagana gupa Pablu. 2) Xiñee galán gánnanu ni gudiʼdiʼ Pablu.
3 Lu carta ni bicaa Pablu ra nuu ca romanu bizeetebe de ti guendanagana ni gúpabe. Guniʼbe nuudinde xquendabiaanibe né cani riuuláʼdxibe gúnibe (biindaʼ Romanos 7:21-23). Qué niníʼdibe zacá para gusihuínnibe qué gápabe donda o pur cayabe laabe. Qué ñuu dxi niniʼbe qué zanda gúnibe ni jneza. Laabe nácabe ti xpinni Cristu ni maʼ huaniisi lu stiidxaʼ Dios, maʼ bibibe pur espíritu ne nácabe «apóstol sti cani cadi judíu» (Rom. 1:1; 11:13). Yanna, xiñee guniʼbe nuudinde xquendabiaanibe né cani riuuláʼdxibe gúnibe yaʼ.
4 Pablu nanna qué zanda guni adorar Dios laasi módopeʼ racalaʼdxiʼ Dios gúnibe ni. Xiñee yaʼ. Laabe guniʼbe: «Guiráʼ xixé binni maʼ bichee ne qué zanda gusihuínnicaʼ ca guenda sicarú stiʼ Dios» (Rom. 3:23, NM). Cásica guiráʼ xiiñiʼ Adán, Pablu laaca ti binni napa donda laa ne ruchee. Riénenu laabe, purtiʼ laaca binni gulené donda laanu. Guiráʼ dxi rúninu stipa para cadi guchéʼnenu Dios, cásica biʼniʼ Pablu. Ne nuu stale cosa ni zanda cueechú laanu de guni adorarnu Dios ne laaca zanda cueecani laanu de neza ra zacaanu «enda nabani» (Mat. 7:14). Peru pa gunda biʼniʼ Pablu ni jneza la? laanu laaca zanda gúninu ni.
5. Tu gucané Pablu para gutadxí ladxidóʼ.
5 Apóstol Pablu bicaa: «Tuu nga cuee naa de enda guti ni naaze naa ri pue. [...] Rudiee diuxquixe Dios purti Jesucristu zabee naa de laani. Laabe nga Señor stinu» (Rom. 7:24, 25). De raqué guníʼnebe ca xpinni Cristu ni bibí, cani «ma nuu né Cristu Jesús tobi si» (biindaʼ Romanos 8:1, 2). Bisiénebe laacaʼ biquiiñeʼ Dios espíritu santu para gucuaa laacaʼ casi xiiñiʼ ti guicaacaʼ de ni chigudii Dios Cristu (Rom. 8:14-17). Espíritu stiʼ Dios ne fe ni nápacabe lu guendaguti stiʼ Cristu racaneni laacabe guni ganárcabe guendaridinde ni guníʼ Pablu. Nga runi maʼ «qué zudxiiba Dios donda» luguiácabe. Zacá nga maʼ bireecabe «de lu ná pecadu ni rudii enda guti».
6. Xiñee naquiiñeʼ guiene guiráʼ ca xpinni Dios ca diidxaʼ guníʼ Pablu.
6 Pablu bicaa ca diidxaʼ ca para ca xpinni Cristu ni bibí, peru ni guniʼbe de espíritu stiʼ Dios ne de guendaguti stiʼ Cristu laaca racaneni ca xpinni Jiobá ni nabani yanna, cásica ni cheʼ guibáʼ ne cani chiguibani lu Guidxilayú. Neca para cani cheʼ guibáʼ si nga gucuá conseju riʼ, galán guiene guiráʼ ca xpinni Dios ni ne gúnicaʼ stipa pur cueenducaʼ ni galán de laani.
Pur ni biʼniʼ Dios «ma qué ziuu ru dxi guni mandar pecadu»
7, 8. 1) Ximodo «guca ni qué ñanda ñuni ley que». 2) Xi maʼ biʼniʼ Dios pur espíritu santu stiʼ ne pur guendaguti stiʼ Jesús.
7 Lu capítulo 7 stiʼ Romanos, guníʼ Pablu rucaa donda ni gulenenu laanu gúninu cosa ni cadi jneza. Lu capítulo 8, guniʼbe pabiáʼ nadipaʼ espíritu santu stiʼ Dios. Laaca bisiénebe ximodo racané espíritu ca xpinni Cristu para gudxiilucaʼ donda gulenecaʼ, ti ganda guibánicaʼ modo na Jiobá ne chuuláʼdxibe ni rúnicaʼ. Ne laaca bisihuinni Pablu biquiiñeʼ Dios espíritu santu ne guendaguti stiʼ Cristu para biʼniʼ ti cosa ni qué ñanda ñuni Ley stiʼ Moisés.
8 Ley que rudxiibaʼ donda ique binni purtiʼ qué randa rúnicaʼ guiráʼ ni rinábani laacaʼ. Dede né cani ruzaaquiʼ guʼxhuʼ de guidxi Israel, cani rudii sacrificiu para guixá stonda binni, qué zanda gudiicaʼ ti sacrificiu para guixá stóndacaʼ. Ngue runi, «qué ñanda di niquiiñe ley sti Moisés pur ni naca binni guidxilayú». «Peru ra biseenda Dios Xiiñi [né ti] cuerpu casi cuerpu sti binni guidxilayú» para quixe pur donda stiʼ binni la? «ma qué ziuu ru dxi guni mandar pecadu» zaqué «guca ni qué ñanda ñuni ley que». Nga runi, ca xpinni Cristu ni bibí ruuyaʼ Jiobá laacaʼ casi binni runi ni jneza purtiʼ nápacaʼ fe lu guendaguti stiʼ Jesús. Apóstol Pablu cayabi laacabe: «Ma cadi nabani nu modo na ique nu, sínuque modo na Espíritu Santu» (biindaʼ Romanos 8:3, 4). Naquiiñeʼ gúnicabe zacá dede ora guiluxe xquendanabánicabe ndaaniʼ Guidxilayú riʼ ti guicaacabe «enda nabani casi ti premiu» (Apo. 2:10).
9, 10. 1) Xi guníʼ Pablu lu Romanos 8:2. 2) Ximodo beeda guiaananu lu náʼ «pecadu ni rudii enda guti».
9 Pablu laaca guníʼ: «Purti rudii Espíritu Santu enda nabani cani ma nuu né Cristu Jesús tobi si, ne zacá ma bilá ca de lu ná pecadu ni rudii enda guti» (Rom. 8:2). Yanna, ximodo beeda guiaananu lu náʼ «pecadu ni rudii enda guti» yaʼ.
10 Apóstol Pablu bicaa: «Pur tobi hombre biuu enda ruchee ndaani guidxilayú, ne guti be purti bichee be, ne zacá ucuá enda guti que irá xixé binni, purti laca bichee caʼ» (Rom. 5:12). Cumu ziúpanu de Adán la? nuunu lu náʼ pecadu ne rátinu. Donda ni gulenenu rucaani laanu gúninu ni qué riuulaʼdxiʼ Dios. Peru laaca ruuticani laanu. Ora bicaa Pablu de «cani zinanda ni na ique» lu carta stiʼ Gálatas la? caniʼbe de xpiaʼ binni ne de cani runi. De raqué guniʼbe: «Qué ziuu cani runi irá nga ra runi mandar Dios» (Gál. 5:19-21). Laacabe nga ca binni ni runi ni na ique (Rom. 8:4). Laacabe rúnicabe stale cosa ni riuuláʼdxicabe, neca nánnacabe cadi jneza cani. Peru ñee ca binni si ni rapa jnadxii, ni runi adorar bidóʼ ne cani runi espiritismo nga cani runi casi na ique la? Coʼ, purtiʼ lade ca binni «ni zinanda ni na ique» ni bizeeteʼ Gálatas, laaca nuu cani riníʼ ique zanda guni xcaadxi cosa, neca cadi jneza cani. Casi cani raca nanalaʼdxiʼ stobi, cani rapa envidia, cani ridxiichi pur intiica cosa ne cani ridinde. Nga runi, qué chuʼ dxi guiníʼ íquenu cadi naquiiñeʼ gúninu stipa para gudxíʼlunu guiráʼ cosa malu ni riuuláʼdxinu gúninu.
11, 12. Xi maʼ gudixhe Jiobá para ganda guilanu de pecadu ne de guendaguti. Xi naquiiñeʼ gúninu para chuulaʼdxiʼ Dios ni rúninu.
11 Riéchenu stale pur ni biʼniʼ Jiobá para gulee laanu de lu náʼ pecadu ne de lu náʼ guendaguti. Jesús guníʼ: «Purti nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe». Pa gusihuínninu nadxiinu Dios pur modo nabáninu ne gápanu fe lu guendaguti stiʼ Jesucristu la? zanda guilanu de pecadu ni bisaanané Adán laanu (Juan 3:16-18). Nga runi, nápanu stale razón para guininu cásica guníʼ Pablu: «Rudiee diuxquixe Dios pur [...] Jesucristu [...] Señor stinu».
12 Modo nuunu zeeda gácani casi ti tratamientu ni chigudiicabe tuuxa ni napa ti guendahuará malu. Pa racaláʼdxinu guianda chaahuinu la? naquiiñeʼ gúninu guiráʼ ni gabi ti doctor laanu. Zanda guilanu de pecadu ne de guendaguti purtiʼ nápanu fe lu guendaguti stiʼ Jesús, neca zacá, nácarunu binni ruchee ne nápanu donda. Nga runi, para ganda chuʼnu gaxha de Jiobá ne chuuláʼdxibe ni rúninu la? caquiiñeruʼ gúninu sti cosa. Pablu guníʼ naquiiñeʼ sanu modo na espíritu santu.
Ximodo zanda sanu modo na espíritu santu
13. Ximodo nga rizanu modo na espíritu.
13 Ora maʼ zizanu la? chaahuiʼ chaahuiʼ maʼ zidxíñanu ra racaláʼdxinu chindanu. Yanna, para ganda sanu modo na espíritu, naquiiñeʼ guiniisinu lu stiidxaʼ Dios gatigá (1 Tim. 4:15). Nécapeʼ qué zanda gúninu ni módopeʼ riuulaʼdxiʼ Dios, guiráʼ dxi naquiiñeʼ gúninu stipa ti ganda gúninu ni rusiidiʼ espíritu laanu lu xquendanabáninu. Pa sanu «modo rusiidi Espíritu Santu» la? ziuulaʼdxiʼ Dios cani rúninu (Gál. 5:16).
14. Xii nga jma runi ca binni ni zinanda modo na ique.
14 Lu carta ni bicaa Pablu ra nuu ca romanu, guniʼbe de chupa clase binni, ca binni riʼ gadxé modo riníʼ ique cada tobi de laacaʼ (biindaʼ Romanos 8:5). Pablu guníʼ nuudinde xquendabiaaninu né donda gulenenu. Peru stale binni ni nabani yanna qué rúnicaʼ gastiʼ pur gucueezacaʼ laacaʼ de gúnicaʼ cosa malu, sínuque zinándacaʼ ni na íquecaʼ. Lugar de ñúnicabe ni rinabaʼ Dios laacabe ne ninábacabe laabe ñacanebe laacaʼ la? jma ricá íquecabe guyúbicabe puru si para laacabe ne gúnicabe guiráʼ ni riuuláʼdxicabe. Peru cani canazá modo na espíritu rudiicaʼ lugar gabi Jiobá laacaʼ xi naquiiñeʼ gúnicaʼ.
15, 16. 1) Xi rucaa ni riníʼ ique binni laa guni. 2) Xii nga ni jma ricá ique binni yanna.
15 (Biindaʼ Romanos 8:6.) Ante guni ti binni ti cosa galán, o ti cosa malu la? riníʼ ique ni primeru. Ca binni ni riuulaʼdxiʼ chinanda modo na ique, qué rindaa riaacaʼ guibánicaʼ zacá. Guiráʼ ni riníʼ íquecabe, ni runi sentírcabe ne cani riuuláʼdxibe rusihuínnicani zinándacabe modo na íquecabe.
16 Xii nga ni jma riuulaʼdxiʼ ca binni ni nabani yanna yaʼ. Apóstol Juan guníʼ: «Ndaani guidxilayú riʼ riulaʼdxi binni guni ni na ique ne gapa irá ni guʼyaʼ, ne gaca tuuxa nezalú ca xcaadxi. Peru cadi de Dios zeeda irá nga, sínuque de binni guidxilayú» (1 Juan 2:16). Ca dxi stinu riʼ, cadale binni ni riuulaʼdxiʼ gapa jnadxii, ni riuulaʼdxiʼ gaca tuuxa ni jma risaca ne cani riuulaʼdxiʼ gapa bidxichi. Cani bizéʼtenu riʼ, nabé rieeteʼ cani lu libru, revista, periódicu, ne rihuinni cani lu televisión, película ne lu Internet. Puru si laacani nga maʼ cá ique binni yanna. Peru «cani ruyubi ni chuʼlaʼdxi si la? rati» nezalú Dios yanna, ne despué laaca zuniti xquendanabani. Xiñee yaʼ. Purtiʼ «ni rucaa ique guni ni chuʼlaʼdxi si la? nanalaʼdxi Dios. Qué runi ni na ley sti Dios, ne neca pe niná ñuni ni, qué ñanda diʼ. Nga runi, ni nabani casi na ique la? qué zanda ibani casi na Dios» (Rom. 8:7, 8).
17, 18. Ximodo zanda gudiʼnu lugar gabi espíritu stiʼ Dios laanu xi gúninu, ne xi zabeendunu pa gúninu ni.
17 Peru «cani ruyubi guni ni chuʼlaʼdxi Espíritu Santu la? ricaa ca enda nabani ne raʼta dxí ladxidóʼ caʼ», riuucaʼ tobi si né Dios ne zabánicaʼ sin gáticaʼ despué. Ximodo zanda gúninu «ni chuʼlaʼdxi Espíritu Santu» yaʼ. Ra gudiʼnu lugar gabi Dios ne espíritu santu laanu xi gúninu, zacá zazíʼdinu guiníʼ íquenu casi riníʼ ique Jiobá. Pa chinándanu ni na conseju riʼ, zuni xquendabiaaninu ni na Dios. Ora guidxaagalunu xiixa guendanagana ni gucaa laanu gucheʼnu la? maca nánnanu xi naquiiñeʼ gúninu. Zúninu ni jneza, purtiʼ zinándanu ni na espíritu santu.
18 Nga runi, risaca nga quixhe íquenu gúninu ca cosa ni riuulaʼdxiʼ espíritu. Laacani nga guni orarnu Jiobá, guidúʼndanu Biblia, chuunu ca guendaridagulisaa ne gucheechenu diidxaʼ (1 Ped. 1:13). Cadi gudiʼnu lugar guni mandar cani riníʼ íquenu laanu, sínuque jma galán guiníʼ íquenu casi riníʼ ique Dios ne gúninu ni cayabi espíritu laanu. Zacaanu stale ndaayaʼ pa gúninu zacá, zápanu guendanabani ne zatadxí ladxidoʼno (Gál. 6:7, 8).
Ñee zanda gusiéneluʼ ni la?
• Xii nga «ni qué ñanda ñuni ley que», peru ximodo gunda biʼniʼ Dios ni.
• Ximodo zanda guilanu de lu náʼ pecadu ne de lu náʼ guendaguti.
• Xi naquiiñeʼ gúninu para guibáninu «casi na espíritu».
[Ca dibuju/foto ni zeeda lu yaza 12, 13]
Ñee rinándanu ni na si íquenu la? o ni na espíritu
[Cuadru ni zeeda lu yaza 14]