Gacanenu binni guiree bacaandaʼ lú
«Laganna ma ora ireeche bacaandaʼ.» (ROM. 13:11)
ÑANDA NUSIÉNELUʼ NI LA?
Xiñee cadi naquiiñeʼ gasi ca xpinni Cristu nezalú Dios.
Xiñee naquiiñeʼ gucaadiaga chaahuiʼ ti xpinni Cristu ne guʼyaʼ chaahuiʼ xi caquiiñeʼ binni ora maʼ zigucheeche diidxaʼ.
Pabiáʼ risaca gácanu nachaʼhuiʼ ora maʼ zigucheechenu diidxaʼ.
1, 2. Xi caquiiñeʼ guni ca binni ni nisiaasiʼ nezalú Dios.
GUIRÁʼ iza rati stale binni purtiʼ ora maʼ zigusacaʼ carru maʼ zidxaga xcaandacaʼ o pacaa maʼ ziyásicaʼ. Xcaadxi runiti xhiiñaʼ purtiʼ qué riasa tempranu para cheʼ dxiiñaʼ o purtiʼ rasi ra dxiiñaʼ. Peru nuu sti clase bacaandaʼ ni jma naxoo. Laani nga modo nuu stale binni purtiʼ cadi cayúnicaʼ ni na Dios, casi ora nisiaasicaʼ nezalube. Nga runi, Biblia cayabi laanu ca diidxaʼ riʼ: «Dichoso ni nexhená» (Apo. 16:14-16).
2 Neca jma maʼ gaxha nuu dxi stiʼ Jiobá, stale binni cadi cucaa ique guiziidiʼ de Dios, casi ñaca nisiaasicaʼ nezalube. Dede ca xaíque stiʼ ca religión ni na zinanda Cristu riniʼcaʼ nisiaasiʼ guiráʼ ca xpínnicaʼ. Ximodo nga nisiaasiʼ binni nezalú Dios yaʼ. Xiñee cadi naquiiñeʼ gasi cani dxandíʼ xpinni Cristu. Ximodo zanda gacanenu xcaadxi binni guiree bacaandaʼ lú.
XIMODO NGA NISIAASIʼ BINNI NEZALÚ DIOS
3. Ximodo rusihuinni tuuxa nisiaasiʼ nezalú Dios.
3 Ora maʼ nisiaasiʼ ti binni qué zanda guni gastiʼ. Peru ca binni ni nisiaasiʼ nezalú Dios, o cani cadi cayuni ni nabe la? zándaca nabé nuu xhiiñacaʼ, peru cadi lu xhiiñaʼ Dios. Nabé nuu xhiiñacabe purtiʼ cá íquecabe gápacabe ni guibaninécabe ne nisi maʼ cá íquecabe xi gúnicabe para guibánicabe galán, gácacabe tuuxa o gápacabe jma bidxichi. Nabé nuu xhiiñacabe dede huaxiéʼ tiempu nápacabe para guyúbicabe ximodo chúʼcabe gaxha de Dios. Peru cani nexhená nezalú Jiobá, nánnacaʼ nabánicaʼ lu ca últimu dxi, nga runi riquiiñecaʼ guiráʼ tiempu sticaʼ para gúnicaʼ ni nabe (2 Ped. 3:3, 4; Luc. 21:34-36).
4. Xiñee risaca chinándanu conseju ra na cadi gásinu casi nisiaasiʼ «cani qué runi cre».
4 (Biindaʼ 1 Tesalonicenses 5:4-8.) Lu ca versículo riʼ cayabi apóstol Pablu ca xpinni Cristu cadi gásicaʼ casi runi xcaadxi binni. Xi gucaláʼdxibe niniʼbe né ca diidxaʼ riʼ yaʼ. Rusihuínninu nisiáʼsinu ora qué rinándanu ca conseju stiʼ Dios ra cá xii nga jneza ni xii nga ni cadi jneza. Sti modo rusihuínninu nisiáʼsinu nga ora riníʼ íquenu cayaadxaruʼ stale para gunitilú Dios guiráʼ ca binni qué ruzuubaʼ stiidxabe. Nga runi, naquiiñeʼ chuʼnu cuidadu ti cadi guicá xpiaʼ ca binni riʼ laanu ne modo riníʼ íquecaʼ.
5. Ximodo riníʼ ique ca binni ni nisiaasiʼ nezalú Dios.
5 Nuu tu qué runi cré pa nuu Dios, nga runi riníʼ íquecaʼ guirutiʼ zabidxi cuenta laacaʼ (Sal. 53:1). Xcaadxi riníʼ ique qué rizaalaʼdxiʼ Dios binni guidxilayú, pur nga qué rizaaláʼdxicaʼ laabe. Ne qué riaadxaʼ tu guiníʼ zanda gaca xhamígucaʼ Dios pa chuʼcaʼ ndaaniʼ xiixa religión. Guiráʼ ca binni riníʼ ique zacá, casi ñaca nisiaasicaʼ nezalú Dios. Yanna, ximodo zanda gacanenu laacabe guiree bacaandaʼ lúcabe yaʼ.
CADI GÁSINU
6. Xiñee cadi naquiiñeʼ gasi ti xpinni Cristu.
6 Para ganda gucuáʼninu xcaadxi binni la? primeru naquiiñeʼ gusihuínninu cadi nisiáʼsinu. Ximodo nga yaʼ. Biblia ruzeeteʼ xi guiráʼ runi ca binni ni nisiaasiʼ nezalú Dios: rúnicaʼ «ni cadi jneza ni raca lu guelacahui», casi guidxé íquecaʼ ora gúnicaʼ xiixa saa, gueʼ xhaatacaʼ nisadxuʼniʼ, chúʼnecaʼ ni cadi xheelacaʼ, qué liica rituílucaʼ gúnicaʼ cosa malu, ridíndecaʼ ne rápacaʼ envidia (biindaʼ Romanos 13:11-14). Nagana zaca para gucáʼnanu ca cosa malu ca. Nga runi, caquiiñeʼ gatananu. Ti binni ni zigusá carru naquiiñeʼ ganna zándaca gueeda gati pa gasi ora maʼ zigusá. Nabé risaca para ti xpinni Cristu gudii cuenta caquiiñeʼ chuʼ gaxha de Dios pacaa zándaca gueeda gati. Ti xpinni Cristu naquiiñeʼ gataná guiráʼ ora, purtiʼ pa gueeda gasi nezalú Dios zándaca gati.
7. Xi zazaaca pa guiníʼ íquenu qué zaná binni gucaadiaga laanu ora maʼ chigucheechenu diidxaʼ.
7 Zándaca guiníʼ ique ti xpinni Cristu maʼ qué zaná ca binni ni nuu neza ra rucheeche diidxaʼ gucaadiágacaʼ stiidxaʼ Dios (Pro. 6:10, 11). Zándaca guiniʼbe: «Pa maʼ guirutiʼ qué zaná guiziidiʼ, xi para gunítinu stipa stinu pur gacaláʼdxinu gacanenu laacabe yaʼ». Dxandíʼ nisiaasiʼ stale binni nezalú Dios, peru zanda guchaa modo nabánicabe ne modo riníʼ íquecabe. Zanda cuézanu chuʼ tu cuee bacaandaʼ lú ne chuulaʼdxiʼ guiziidiʼ ni cá lu Biblia. Ne zanda gacanenu laacabe pa laapenu gusihuínninu nexhenanu, ne zanda gúninu ni pa guyúbinu xcaadxi modo para chuulaʼdxiʼ binni gucaadiaga stiidxaʼ Dios. Tobi de ca cosa ni zusihuinni pa dxandíʼ nexhenanu nga gudiʼnu cuenta pabiáʼ risaca gucheechenu diidxaʼ.
XIÑEE NABÉ RISACA GUCHEECHENU DIIDXAʼ
8. Xiñee nabé risaca gucheechenu diidxaʼ.
8 Pa gucaadiaga binni laanu o pa coʼ la? naquiiñeʼ gatananu, purtiʼ rusisaca dxiiñaʼ riʼ Jiobá ne cayacaneni para gaca cani maca gudixhe íquebe gúnibe. Maʼ cadi candaa zuni juzgar Jiobá ca binni ni riuulaʼdxiʼ si gucaadiaga stiidxabe, peru qué rinacaʼ guiziidicaʼ jma ne zunitilube guiráʼ cani qué na guni ni nabe (2 Tes. 1:8, 9). Ne cadi purtiʼ si «zusibani Dios gueʼtuʼ, cásica ni nachaʼhui zaqueca ni cadi nachaʼhuiʼ», guiníʼ íquenu pur gana si gucheechenu diidxaʼ (Hech. 24:15). Biblia na cani guiníʼ Dios zeeda gaca casi «chiba» záticaʼ ne qué ziuu dxi guibánicaʼ. Ora rucheechenu diidxaʼ rusihuínninu pabiáʼ rilaselaʼdxiʼ Dios binni, purtiʼ pa gucaadiágacaʼ laanu zanda guchaacaʼ modo laacaʼ ne ugaandacaʼ ti «enda nabani ni qué zaluxe» (Mat. 25:32, 41, 46; Rom. 10:13-15). Pa qué gucheechenu diidxaʼ, ximodo gucaadiaga binni ca diidxaʼ ni zanda gacané laacaʼ guilacaʼ yaʼ.
9. Ora rucheechenu diidxaʼ, ximodo racaneni laanu ne ximodo racaneni binni.
9 Ora rucheechenu stiidxaʼ Dios laaca racaneni laanu (biindaʼ 1 Timoteo 4:16). Ñee maʼ bidiʼnu cuenta riguidxi fe stinu ne jma rannaxhiinu Jiobá ora rininu de laabe ne de Reinu stibe la? Ñee cadi dxandíʼ huayacaneni laanu gápanu ca guenda ni naquiiñeʼ gapa ca xpinni Cristu la? Cadi dxandíʼ riuʼnu jma nayecheʼ ora rucheechenu diidxaʼ purtiʼ rusihuínninu pabiáʼ nadxiinu Dios la? Stale xpinni Cristu ni huasiidiʼ xcaadxi binni gunibiáʼ Dios riuucaʼ nayecheʼ purtiʼ huayuuyacaʼ modo huayacané espíritu santu binni para guchaa modo laa.
GUʼYAʼ CHAAHUINU XI CAQUIIÑEʼ BINNI
10, 11. 1) Ximodo bisihuinni Jesús ne Pablu bidiicaʼ cuenta xi caquiiñeʼ binni. 2) Xi caquiiñeʼ guidúʼyanu para ganda gucheechenu diidxaʼ jma galán.
10 Zanda guidxélanu stale modo para gacanenu binni chuulaʼdxiʼ guiziidiʼ de Dios. Nga runi, caquiiñeʼ gatananu ora maʼ zigucheechenu diidxaʼ. Jesús bisaana ti ejemplu ni zanda chinándanu. Cumu gúcabe ti binni ni qué ñapa donda la? gunda bidiibe cuenta dxi cadxiichi ti fariseu neca qué nusihuinni ni. Laaca bidiibe cuenta maʼ guca arrepentir ti gunaa de guiráʼ ni biʼniʼ ne dxi bidii ti viuda guiráʼ ni napa (Luc. 7:37-50; 21:1-4). Ngue runi gunda bisiidibe cada tobi de cani bicaadiaga laabe xi caquiiñeʼ gánnacaʼ. Neca binni ruchee nga ca xpinni Dios, zanda gudiicaʼ cuenta xi caquiiñeʼ binni. Nápanu ejemplu stiʼ apóstol Pablu. Laabe biyúbibe gadxé gadxé modo gucheechebe diidxaʼ ti chuulaʼdxiʼ guiráʼ binni gucaadiaga laabe dede ca binni ni gadxé gadxé modo riníʼ ique (Hech. 17:22, 23, 34; 1 Cor. 9:19-23).
11 Pa gúninu stipa pur guuyaʼ chaahuinu xi caquiiñeʼ binni, cásica biʼniʼ Jesús ne Pablu la? zándaca zadxélanu modo jma galán para gacanenu laacaʼ chuuláʼdxicaʼ gucaadiágacaʼ laanu. Ora guinínenu tuuxa, galán guidúʼyanu padé laabe, xi riuuláʼdxibe gánnabe, pa maʼ bichaganabe o maʼ nápabe xiiñibe. Galán guʼyaʼ chaahuinu xi cayuni binni ni zigánnanu ne guininu de laani casi guzulunu.
12. Xiñee naquiiñeʼ gápanu cuidadu ti cadi güípenu diidxaʼ né xcompañérunu ora maʼ ziuunu de yoo pur yoo.
12 Xi cadi naquiiñeʼ gúninu ora maʼ cucheechenu diidxaʼ yaʼ. Cadi gudiʼnu lugar chuʼ xiixa ni guchiiñaʼ laanu ora maʼ cayúninu dxiiñaʼ riʼ. Neca riuʼnu gana ora güinu diidxaʼ né xcompañérunu, cadi naquiiñeʼ guiaandaʼ laanu xi dxiiñaʼ cayúninu: cucheechenu stiidxaʼ Dios (Ecl. 3:1, 7). Nga runi, naquiiñeʼ gápanu cuidadu ti cadi pur güinu diidxaʼ maʼ qué gúninu xhiiñanu jneza. Zanda gábinu xcompañérunu xi caníʼ íquenu güínenu ca binni ni guidxélanu ora maʼ zigucheechenu diidxaʼ ti cadi guiréʼchunu de dxiiñaʼ ni cayúninu. Neca cadi malu sané binni celular ora maʼ zigucheeche diidxaʼ, naquiiñeʼ gapa cuidadu ti cadi xhídxini ora maʼ caniʼné binni.
GUSIHUÍNNINU RIZAALÁʼDXINU BINNI
13, 14. 1) Ximodo zanda gánnanu xi riuulaʼdxiʼ binni ni cucaadiaga laanu. 2) Xi zanda gúninu para chuulaʼdxiʼ binni guiziidiʼ de Dios.
13 Ca xpinni Cristu ni nexhená rucaadiaga chaahuicaʼ ora maʼ caníʼ binni. Xi zanda guinabadiidxanu binni para gabi laanu xi naguu xizaa laa yaʼ. Ñee nuube xizaa purtiʼ nuu stale religión, nabé cadale guendaridinde neza ra nabézabe o purtiʼ qué ganda guni chaahuiʼ ca gobiernu ca modo nabani binni la? Zanda güínenu laabe pabiáʼ sicarú guiráʼ cani bizáʼ Dios ti chuuláʼdxibe guiziidibe jma de laa ne xi zabeendube pa chinándabe ca conseju zeeda lu Biblia. Casi guiráʼ binni ni nabani lu Guidxilayú riʼ riuulaʼdxiʼ ganna ximodo guni orar, dede ca binni ni qué runi cré Dios. Stale de laacaʼ rinabadiidxacaʼ pa nuu tu rucaadiaga oración sticaʼ. Xcaadxi rinabadiidxaʼ pa rucaadiaga Dios guiráʼ ca oración sticaʼ, ne pa qué rúnibe ni, xi zanda gúnicaʼ para gucaadiágabe laacaʼ.
14 Zanda gánnanu modo guzulú guinínenu binni ora maʼ zigucheechenu diidxaʼ pa guidúʼyanu ximodo runi xcaadxi xpinni Cristu ni. Guidúʼyanu ximodo rúnicabe para cadi guihuinni cabeecabe diidxaʼ binni o caguu ruaacabe lu xpídacaʼ. Ximodo rusihuínnicabe rúnicabe stipa para guiénecabe binni pur modo riniʼnécabe laa ne pur modo ruuyadxícabe laa yaʼ (Pro. 15:13).
GÁCANU NACHAʼHUIʼ NE GUYÚBINU MODO GACANENU BINNI
15. Xiñee naquiiñeʼ gácanu nachaʼhuiʼ ora maʼ zigucheechenu diidxaʼ.
15 Ñee riuuláʼdxinu gucuaanicabe laanu ora maʼ nisiáʼsinu la? Stale binni ridxiichi ora rucuaanicabe laacaʼ nagueendaca, nga runi jma galán gucuaanicabe laacaʼ chaahuidugá. Zacaca rizaaca ora deruʼ chigusíʼdinu binni de Dios, purtiʼ casi ñaca deruʼ cucuáʼninu laacaʼ. Yanna, xi zanda gúninu pa chuʼ tu guidxiichi pur zigánnanu laa yaʼ. Galán guiénenu binni ca, gudiʼnu xquíxepeʼ laa pur cayabi laanu ximodo cayuni sentir ne guireʼnu sin guidxiichinu (Pro. 15:1; 17:14; 2 Tim. 2:24). Pa gácanu nachaʼhuiʼ né laabe, zándaca gucaani laabe gucaadiágabe sti xpinni Cristu ni chiganna laabe despué.
16, 17. Ximodo zanda gácanu nachaʼhuiʼ ora qué náʼ tuuxa gucaadiaga laanu.
16 Laaca zanda guidxélanu xi guicábinu binni ora qué naʼ gucaadiaga laanu. Nuu tu laa riníʼ «Xquíxepeʼ lii, peru maʼ napaʼ religión stinneʼ», o «Qué racaladxediáʼ gastiʼ» para si cadi gucaadiágacaʼ laanu. Peru pa gácanu nachaʼhuiʼ né binni ne guinabadiidxanu laacaʼ xiixa ni racaláʼdxicaʼ gánnacaʼ la? ziuuláʼdxicaʼ gánnacaʼ jma de cani rusiidiʼ Biblia (biindaʼ Colosenses 4:6).
17 Pa guidxélanu tuuxa ni gabi laanu nabé nuu xhiiñaʼ, jma galán guibiguétanu sti dxi. Peru nuu tiru zadxélanu tuuxa ni ganda guinínenu neca ti ratu huiiniʼ ne gusíʼdinu laa xiixa ni risaca. Nuu xpinni Cristu ruundané binni ti versículo ni chuulaʼdxiʼ ne rinabadiidxacaʼ xiixa ni guicábicaʼ sti dxi ne riquiiñecaʼ biaʼ ti minutu si. Cumu huaxiéʼ ni riníʼcabe la? nuu tiru rucaani binni chuulaʼdxiʼ guiziidiʼ jma ne rudii lugar guiniʼnécabe laa jma tiempu. Xiñee qué gúniluʼ zacaca ora gúʼyaluʼ zanda yaʼ.
18. Ximodo zanda gucheechenu diidxaʼ ratiica nuunu.
18 Pa nuunu listu para güínenu binni de stiidxaʼ Dios ratiica nuunu, zanda gacanenu laacaʼ chuuláʼdxicaʼ guiziidicaʼ de laabe. Stale xpinni Cristu rinecaʼ xiixa libru o revista cueʼcaʼ o ndaaniʼ bolsa sticaʼ. Zándaca laaca maʼ guníʼ íquecaʼ xi textu zanda iquiiñecaʼ ora gúʼyacaʼ zanda guiníʼnecaʼ tuuxa. Laaca zanda guinabadiidxanu binnigola ni ruuyaʼ modo rireeche diidxaʼ ne ca precursor ni ridagulisaanenu xi zanda gúninu para guinínenu binni ratiica nuunu.
GUCUÁʼNINU CA BINNILÍDXINU CHAAHUIDUGÁ
19. Xiñee cadi naquiiñeʼ guireʼnu gana ora gacanenu ca binnilídxinu guiziidicaʼ de Dios.
19 Guiranu nga riuuláʼdxinu pa ñanda si guiráʼ xixé binnilídxinu nucaadiágacaʼ laanu ora ñuínenu laacaʼ de Dios (Jos. 2:13; Hech. 10:24, 48; 16:31, 32). Zándaca guireʼnu gana, purtiʼ qué nucaadiágacabe laanu primé biaje gucaláʼdxinu ninínenu laacabe. Ne zándaca guiníʼ íquenu qué ziuu dxi guchaacabe, neca guyúbinu modo guinínenu laacabe. Peru zándaca bizaacacabe xiixa ni bichaa modo nabánicabe ne modo riníʼ íquecabe. O zándaca yanna jma maʼ nánnanu ximodo gusiene chaahuinu laacabe ni cazíʼdinu ne gacanenu laacabe.
20. Xiñee galán gácanu nachaʼhuiʼ ora guinínenu ca binnilídxinu.
20 Laaca naquiiñeʼ guiénenu xi runi sentir ca binnilídxinu (Rom. 2:4). Laaca naquiiñeʼ gácanu nachaʼhuiʼ ora guinínenu laacabe, cásica rúninu né binni ora maʼ zigucheechenu diidxaʼ. Galán guinínenu laacabe né diidxaʼ nadóʼ ne guni respetarnu laacabe. Jma galán gusihuínninu ximodo huayacané Stiidxaʼ Dios laanu que gábinu laacabe xi guiráʼ zabeendúcabe pa guiziidicabe de laani (Efe. 4:23, 24). Gúninu stipa pur gúʼyacabe ximodo huaguu Jiobá ndaayaʼ laanu ne modo huabeendunu ni galán pur zinándanu ca conseju stibe (Isa. 48:17). Galán gúʼyacabe nácanu ti ejemplu purtiʼ nabáninu casi naquiiñeʼ guibani ti xpinni Cristu.
21, 22. Bizeeteʼ ti ejemplu ni rusihuinni pabiáʼ risaca nga cadi guireʼnu gana de gacanenu ca binnilídxinu guiziidicaʼ de Dios.
21 Cadi tan xadxí bicaa ti gunaa Testigu ca diidxaʼ riʼ, né laabe biaʼsi 14 xiiñiʼ jñaabe: «Pur stale iza bineʼ stipa para gusiideʼ ca bizanaʼ ne ca bendaʼ de Dios [...], peru laaca gucaʼ ti ejemplu para laacabe. Guiráʼ iza rucaaʼ ra nuu guiráʼ xixécabe. Peru naasiaʼ gucaʼ Testigu ndaaniʼ familia stinneʼ pur jma de treinta iza».
22 Gunaa Testigu riʼ guniʼruʼ: «Ti dxi gunieniáʼ tobi de ca bendaʼ pur teléfono, laa nabeza gayuaa kilómetru de ra nuaaʼ. Gúdxibe naa gunábabe binni ni rusiidiʼ ndaaniʼ yuʼduʼ stibe gusiene laabe cani zeeda lu Biblia, peru qué ñuu dxi ñúnini. Ora gudxeʼ laabe ñuuladxeʼ ñacaniáʼ laabe, bicábibe naa: “Biaʼsi, peru racalaʼdxeʼ gannuʼ qué ziuu dxi gacaʼ testigu stiʼ Jiobá”. Biseendasiaʼ libru Xipeʼ ndiʼ cusiidiʼ Biblia ra nuube, rinieniáʼ laabe pur teléfono cada chupa chonna gubidxa. Peru cumu qué nabe guxhélebe ni la? gupa xidé gudxeʼ laabe chicaabe libru stibe, biindaniáʼ laabe biaʼ quince minutu ne gunidu de ca textu ni zeeda luni. Despué de gunieniáʼ laabe chupa chonna biaje, gunábabe naa guidúʼndadu jma de quince minutu. Nin qué nindaa maʼ laabe ribídxibe naa para guidúʼndadu, nuu tiru siadoʼroʼ, ante guibaneʼ, ne nuu biaje riníʼnebe naa chupa biaje lu ti dxi. Guyuunísabe lu sti iza que, ne gudiʼdiʼ si sti iza maʼ gúcabe precursora».
23. Xiñee cadi naquiiñeʼ gusaana de gacanenu binni guiziidiʼ de Dios.
23 Para ganda gacanenu binni chuulaʼdxiʼ guiziidiʼ de Dios la? cadi naquiiñeʼ guireʼnu gana, purtiʼ casi ora deruʼ cucuáʼninu laacaʼ. Peru nuuruʼ stale binni nadóʼ ni zudii lugar gacanenu laa. Guiráʼ beeu cayuunisa jma de gande mil binni para gácacaʼ testigu stiʼ Jiobá. Nga runi, naquiiñeʼ chinándanu conseju bidii Pablu tobi de ca xpinni Cristu de primé siglu ni láʼ Arquipo. Laabe gúdxibe laa «guʼya unduuxe chaahui dxiiña ni bisaana Señor ladxi náʼ» (Col. 4:17). Lu sti tema ca zadúʼyanu xiñee nabé risaca gucheechenu diidxaʼ nagueendaca.
[Cuadru ni zeeda lu yaza 13]
XI GUʼNUʼ PARA CADI GÁSILUʼ
▪ Cadi gusaana de guʼnuʼ xhiiñaʼ Jiobá
▪ Bixeleʼ de «ni cadi jneza ni raca lu guelacahui»
▪ Bietenalaʼdxiʼ zándaca guizaacaluʼ xiixa pa gueeda gásiluʼ nezalú Dios
▪ Guníʼ ique nuu tu zucaadiaga lii ora maʼ zigucheecheluʼ diidxaʼ
▪ Biyubi xcaadxi modo gucheecheluʼ diidxaʼ
▪ Cadi guiaandaʼ lii pabiáʼ risaca gucheecheluʼ diidxaʼ