Cani rinabadiidxaʼ binni de Biblia
Tu láʼ Dios
Guiráʼ binnilídxinu napa lá, dede ca maniʼ huiiniʼ ni nápanu yoo riguíxhenu lacaʼ. Ñee cadi jneza nga guininu laaca napa Dios lá la? Biblia riquiiñeʼ stale título ora ruzeeteʼ de Dios, casi Ni napa stale poder, Ni jma nandxóʼ ne Ni bizáʼ laanu. Peru laaca nápabe lápebe. (Biindaʼ Isaías 42:8.)
Ndaaniʼ stale Biblia, lu Salmo 83:18 cá lá Dios. Sicaríʼ na textu ca lu Traducción del Nuevo Mundo de las Santas Escrituras: «Ti ganna binni, lii, ni laluʼ Jiobá, lii si nga Ni Nuu Jma Luguiáʼ lu guidubi naca guidxilayú».
Xiñee jneza nga iquiiñenu lá Dios
Laanu rininu lá cani nadxiinu ora rinínenu laacaʼ diidxaʼ, casi cani jma xhamígunu.
Dios racalaʼdxiʼ guininu lá. Laanu rininu lá cani nadxiinu ora rinínenu laacaʼ diidxaʼ, casi cani jma xhamígunu. Yanna, ñee cadi naquiiñeʼ gúninu zacaca ora guinínenu Dios la? Ne Jesucristu peʼ bisiidiʼ laanu iquiiñenu lá Dios. (Biindaʼ Mateo 6:9; Juan 17:26.)
Peru cadi caquiiñeʼ gánnasinu lá Dios nga para gaca xhamígunu laabe, sínuque laaca caquiiñeʼ gánnanu ximodo laabe ne pa zanda chuʼnu gaxha de laabe. Biblia zanda guicabi ca guendarinabadiidxaʼ ca.