Moisés, ti hombre ni gupa fe

XII NGA FE.

Biblia na fe nga ora dxandíʼ runi crenu xiixa purtiʼ nuu razón para guni crenu ni. Ni napa fe Dios nanna dxichi dxandíʼ zúnibe cani maʼ bizabiruaabe.

XIMODO BISIHUINNI MOISÉS GUENDA RIʼ.

Lu cani gudixhe íquebe gúnibe lu xquendanabánibe bisihuínnibe gúpabe fe zuni Dios cani maca bizabiruaa guni (Génesis 22:15-18). Laabe ñanda nibánibe galán ne ñápabe stale cosa risaca ndaaniʼ guidxi Egipto ne laaca «ñeche né be irá ni ñapa be, peru chupa chonna si gubidxa, ne qué ñuulaʼdxi Dios ni. Ne pur nga ulí be acaná né be ca binni xquidxi be» (Hebreos 11:25). Ñee qué niníʼ íquebe bíʼnibe nga la? Ñee guyuu ora guca arrepentirbe la? Coʼ, Biblia na «bidxii lú be neza ze be purti casi ñaca cayuuya be Dios neca qué rihuinni» (Hebreos 11:27). Ca cosa ni bíʼnibe lu xquendanabánibe pur fe ni gúpabe Dios la? qué ñuu dxi ñaca arrepentirbe pur bíʼnibe cani.

Moisés laaca biyubi gacané xcaadxi binni ti jma gápacaʼ fe Dios. Guidúʼyanu ni bizaaca dxi biʼniʼ sentir ca israelita que maʼ qué gápacaʼ paneza checaʼ purtiʼ ti ladu que zeeda ca soldadu stiʼ faraón ne sti ladu que nuu nisadóʼ Xiñáʼ que. Ora biiyacabe nuucabe zaqué, guizáʼ bidxíbicabe ne bicaacabe ridxi Jiobá ne Moisés. Xi biʼniʼ Moisés yaʼ.

Zándaca qué liica niníʼ ique Moisés pa nuxheleʼ Dios nisadóʼ Xiñáʼ que para tiidicabe ra nabidxi. Peru gúnnabe zuni Dios xiixa para gapa laacabe, ne biyúbibe guni cré ca israelita que ni. Sicaríʼ gudxi Moisés laacabe: «Cadi guidxíbitu. Laguzuhuaa dxiichiʼ ne laguuyaʼ modo chigulá Jiobá laatu yannadxí» (Éxodo 14:13). Ñee gunda gucanebe ca israelita que para jma gápacaʼ fe Jiobá la? Gunda, purtiʼ Biblia na laabe ne ca israelita que «bini cre cabe Dios, nga runi gunda udiʼdi cabe Nisadóʼ Xiñá que, casi ñaca nidiʼdi cabe ra nabidxi» (Hebreos 11:29). Fe ni gupa Moisés que gucaneni laabe ne zaqueca gucaneni ca binni ni yenanda ejemplu stibe.

XI RUSIIDIʼ EJEMPLU STIBE LAANU.

Rusiidini laanu naquiiñeʼ gápanu fe lu cani maʼ bizabiruaa Dios guni ne gusihuínninu ni lu cani quixhe íquenu gúninu. Tobi de cani maʼ guniʼbe zúnibe nga zudiibe ni iquiiñenu pa guyúbinu gúninu ni nabe primé lu xquendanabáninu (Mateo 6:33). Nagana nga para gudxíʼlunu modo riníʼ ique binni guidxilayú, purtiʼ nabé ricá íquecaʼ gápacaʼ stale cosa risaca. Peru ni naquiiñeʼ gánnanu nga zudii Jiobá laanu ni iquiiñenu pa cadi guyúbinu gápanu stale cosa ne jma guicá íquenu guni adorarnu laabe. Sicaríʼ cudii stiidxabe laanu: «Qué zusaana laatu ne qué ziaana dxie de acaniá laatu» (Hebreos 13:5).

Laaca naquiiñeʼ gacanenu cani nuu gaxha de laanu ti jma gápacaʼ fe. Casi cani napa xiiñiʼ, naquiiñeʼ gánnacaʼ laacaʼ nga cani jma zanda gacanecaʼ xiiñicaʼ para gápacabe fe Dios. Dede nahuiinicabe naquiiñeʼ gusiidicaʼ laacabe nuu Dios ne rabi Dios binni xii nga ni jneza ne ni cadi jneza guni. Laaca naquiiñeʼ gacané binni ca xiiñiʼ guni crecaʼ jma galán zabánicaʼ pa chinándacaʼ ca ley stiʼ Dios (Isaías 48:17, 18). Nga runi, casi ñaca nudii binni xiiñiʼ ti regalu nga ora racanecaʼ laacabe gápacabe fe, o guni crécabe dxandíʼ «nuu [Dios] ne rulabi be cani uyubi laabe» (Hebreos 11:6).