CANI RINABADIIDXAʼ BINNI DE BIBLIA
Ñee zanda guibani binni sin qué chuʼ dxi gatiʼ la?
Xi maʼ biʼniʼ Dios para cuee laanu de lu náʼ guendaguti
Adán, primé hombre ni guyuu lu Guidxilayú riʼ, bibani gayuaa iza, peru despué bióʼxhobe ne gútibe. Dede dxiqué nabé huayubi binni stale modo para cadi guioʼxhoʼ ne cadi gatiʼ, peru qué ganda gúnicabe gastiʼ. Xiñee yaʼ. Pur guendaruchee. Guti Adán purtiʼ bicheené Dios ra qué nuzuubaʼ stiidxabe, ne laaca ngaca nga rizaacanu purtiʼ gulenenu donda. (Biindaʼ Génesis 5:5 ne Romanos 5:12.)
Para ganda guibáninu sin qué chuʼ dxi gátinu la? caquiiñeʼ chuʼ tu quixe pur laanu (Job 33:24, 25). Zeeda gácani casi tuuxa ni deguyoo, para ganda cueecabe laabe la? caquiiñeʼ chuʼ tu quixe pur ni bíʼnibe. Zacaca nga laanu, laaca caquiiñeʼ chuʼ tu cuee laanu de lu náʼ guendaguti (Éxodo 21:29, 30). Ngue runi, bidii Jesús xquendanabani para gudixe pur laanu. (Biindaʼ Juan 3:16.)
Xi caquiiñeʼ gúninu para ganda guibáninu sin qué chuʼ dxi gátinu yaʼ
Cadi guiráʼ diʼ binni guidxilayú zabani sin qué gaca huará ne sin gatiʼ. Ca binni ni qué guzuubaʼ stiidxaʼ Dios, cásica biʼniʼ Adán la? záticaʼ. Ca binni si ni gutiidilaʼdxiʼ Dios stonda nga chiguibani sin qué chuʼ dxi gatiʼ. (Biindaʼ Isaías 33:24 ne 35:3-6.)
Para ganda gutiidilaʼdxiʼ Dios stóndanu la? caquiiñeʼ gúninu xiixa. Naquiiñeʼ guizíʼdinu de Dios ra guidúʼndanu Stiidxabe. Biblia racané laanu guibáninu galán, gúninu ni riuulaʼdxiʼ Dios ne ganda guicaanu guendanabani ni qué ziuu dxi guiluxe. (Biindaʼ Juan 17:3 ne Hechos 3:19.)