CANI RINABADIIDXAʼ BINNI DE BIBLIA

Ñee de Dios zeeda Biblia la?

Biblia ca nácani ti libru ni zeeda de Dios, nga runi, gadxé ni de xcaadxi libru ni nuu. Ne huayúnicabe millón de laani lu stale diidxaʼ. Ca diidxaʼ cá luni ca rusihuínnicani pabiáʼ nuu xpiaaniʼ ni bicaani ne nápani poder para guchaani xquendanabani binni. (Biindaʼ 1 Tesalonicenses 2:13 ne 2 Timoteo 3:16.)

Zanda guni crenu zeeda Biblia ca de Dios purtiʼ qué ruchee diʼ ni ora riniʼni xi chiguizaaca despué, ti cosa ni qué zanda guni binni. Casi ndaaniʼ ti cueva nuu gaxha de mar Muerto bidxélacabe ti copia stiʼ libru stiʼ Isaías ni gucuá jma de ti gayuaa iza ante gale Jesús. Luni rieeteʼ maʼ guirutiʼ tu zabeza ndaaniʼ guidxi Babilonia. Ca diidxaʼ riʼ guca cani stale iza despué de guti Jesús. (Biindaʼ Isaías 13:19, 20 ne 2 Pedro 1:20, 21.)

Ximodo gucuá Biblia

Biquiiñeʼ biaʼ cuarenta hombre para gucuá Biblia lu jma de ti mil xhoopaʼ gayuaa iza, ne tobi si ni rusiidiʼ ni dede ra bizulú ni ne dede ra bilúxeni, ne qué rirenda diʼ cani cá luni. Ximodo gunda bíʼnicabe ni zacá yaʼ. Dios peʼ gucané laacabe. (Biindaʼ 2 Samuel 23:2.)

Guyuu biaje biquiiñeʼ Dios ca ángel stiʼ para guniʼné cani bicaa Biblia, ne nuu tiru guníʼnebe laacaʼ lu visión o lu bacaandaʼ. Laabe guluube ndaaniʼ íquecaʼ ni rápabe gana gucaacaʼ ne bidiibe lugar laacaʼ cuicaʼ xi diidxaʼ iquiiñecaʼ para gusiénecaʼ ni racaláʼdxibe que. (Biindaʼ Apocalipsis 1:1; 21:3-5.)