CANI RINABADIIDXAʼ BINNI DE BIBLIA

Xiñee naquiiñeʼ guni orarnu

Dios racalaʼdxiʼ guinínenu laa gatigá ne cadi guidxíbinu ora gábinu laabe cani riguu xizaa laanu (Lucas 18:1-7). Laabe rucaadiágabe laanu purtiʼ risácanu para laabe. Pabiáʼ nachaʼhuiʼ Bixhózenu ni nuu guibáʼ ra biʼniʼ invitar laanu para guinínenu laa. Ñee qué ñuuláʼdxiluʼ nicaaluʼ invitación stibe la? (Biindaʼ Filipenses 4:6.)

Cadi para guinábasinu gacané Dios laanu nga riquiiñeʼ oración ca, laaca racaneni para ganda guidxíñanu gaxha de laabe (Salmo 8:3, 4). Guiráʼ biaje gábinu laabe ni cayuni sentirnu, jma raca xhamígunu laabe. (Biindaʼ Santiago 4:8.)

Ximodo guni orarnu

Qué rinabaʼ diʼ Dios iquiiñenu diidxaʼ nagana nin ca guni repetirnu ni maʼ bizíʼdinu de memoria ora guni orarnu laa. Laaca qué rábibe laanu ximódopeʼ naquiiñeʼ guzuhuaʼnu ora guni orarnu. Ni racaláʼdxibe nga guni orarnu laabe ne diidxaʼ ni guiree de ndaaniʼ ladxidoʼno (Mateo 6:7). Casi tiempu bibani ca israelita que, ti gunaa láʼ Ana biʼniʼ orarbe Dios pur ti guendanagana gúpabe ndaaniʼ familia stibe. Ne despué, dxi maʼ cayéchebe maʼ gudiʼdiʼ yuubaʼ que, laaca biʼniʼ orarbe Dios para gudiibe xquíxepeʼ laa. (Biindaʼ 1 Samuel 1:10, 12, 13, 26, 27 ne 2:1.)

¡Pabiáʼ naroʼbaʼ ndaayaʼ nápanu! Zanda gábinu ni Bizáʼ laanu guiráʼ ca guendanagana gápanu. Laaca zanda gusisácanu laabe ne gudiʼnu xquíxepeʼ laabe pur guiráʼ ni rúnibe. Nga runi, qué chuʼ dxi gusaananu de iquiiñenu guenda sicarú bidii Dios laanu riʼ. (Biindaʼ Salmo 145:14-16.)