Rapa Dios Lii

XIÑEE NUU TU QUÉ RUNI CRÉ: Ti estudiu nacubi bíʼnicabe ná, galaxia stinu riʼ nápani biaʼ ti gayuaa mil millón de planeta. Cumu nabé naroʼbaʼ guibáʼ ca la? stale binni rinabadiidxaʼ: «Xiñee naquiiñeʼ gulabi Dios ca binni nabani ndaaniʼ Guidxilayú qué risaca riʼ yaʼ».

XI RUSIIDIʼ BIBLIA: Cadi bidii diʼ Jiobáa laanu Biblia ca ne bisiaandaʼ ca laanu. Laabe cayábibe laanu: «Dxandipeʼ zudieeʼ conseju lii ne qué zaxhaluáʼ luguialuʼ» (Salmo 32:8).

Guiníʼ íquenu ejemplu stiʼ Agar, ti egipcia ni bibani lu siglu XX ante de ca dxi sti Jesús. Laabe qué ñápabe respetu Sarai, gunaa bíʼnibe xhiiñaʼ, ne laa bisituí lube. Ngue runi gupa xidé bixooñebe lu ti desiertu. Ñee bisiaandaʼ Dios laabe purtiʼ si bicheebe la? Biblia ruzeeteʼ «yendá ángel stiʼ Jiobá laabe» ne guluu gana laabe ne ca diidxaʼ riʼ: «Maʼ binadiaga Jiobá cayacanaluʼ». Óraque bicabi Agar laabe: «Lii nácaluʼ ti Dios ni ruuyaʼ naa» (Génesis 16:4-13).

Laaca ruuyaʼ Dios lii. Ximodo yaʼ. Ejemplu riʼ zacané lii guiéneluʼ ni. Ti gunaa napa xiiñiʼ rapa laacabe né stale guendarannaxhii, peru jma ruuyabe cani nahuiiniʼ purtiʼ laacaʼ jma zándaca guizaacacaʼ xiixa ne naquiiñeʼ chuʼ tu gapaʼ laacaʼ. Zacaca nga Jiobá, jma ruuyabe laanu ora cadi naguidxi nuunu ne ora ruluíʼ jma zanda guizaacanu xiixa. Sicaríʼ na Jiobá: «Ti lugar ra nasoo ne ti lugar ra nandxóʼ nga ra nabezaʼ, laaca nuaaʼ ra nuu cani naná nuu ladxidóʼ ne cani qué rudxiibaʼ laca laa, para gacaniáʼ ca binni pobre ti chuʼcaʼ galán sti biaje ne para gacaniáʼ cani cayacaná ladxidóʼ» (Isaías 57:15).

Neca zacá, zándaca guinabadiidxaluʼ: «Ximodo ruuyaʼ Dios naa yaʼ. Ñee ruuyabe ni rusihuinneʼ siaʼ la? o ruuyabe ni nuu ndaaniʼ ladxiduáʼ ne riénebe naa».