CANI RINABADIIDXAʼ BINNI DE BIBLIA
Dxandíʼ nga gundisaʼ Jesús gueʼtuʼ la?
Maʼ tapa gubidxa de guti Lázaro dxi gundisaʼ Jesús laa
Ndaaniʼ Biblia zeeda caadxi relatu ra gundisaʼ Jesús gueʼtuʼ. Ca relatu riʼ cadi cuentu si cani; lu cani rieeteʼ paraa ne padxí guca cani. Casi, biaʼ galaa de iza 31, biree Jesús de Capernaum zé Naín zinanda caadxi binni laa. Ora yendabe raqué bidxaagabe xcaadxi binni zigucaachicaʼ ti hombrehuiiniʼ ni gutiʼ ndaaniʼ guidxi que. Oraqueca gundisaʼ Jesús gueʼtuʼ que. Zanda guni crenu dxandíʼ guca milagru riʼ, cadi purtiʼ si zeedani lu Biblia, sínuque purtiʼ stale tu biʼyaʼ ora guca ni. (Biindaʼ Lucas 7:11-15.)
Cadi xadxí de ngue, gundisaʼ Jesús xhamigu, Lázaro, ni maʼ napa tapa gubidxa de guti. Dxi guca milagru que laaca stale binni biʼyaʼ ni, ne nga rusihuinni dxandíʼ gundísabe gueʼtuʼ que. (Biindaʼ Juan 11:39-45.)
Xiñee gundísabe gueʼtuʼ
Bidxiguetaʼ Jesús xquendanabani ca binni que purtiʼ biabe laacaʼ. Laca bíʼnibe ni para gusihuínnibe Bixhózebe, ni bizáʼ guiráʼ ni nabani, nga bidii poder laabe para guindísabe cani maʼ guti. (Biindaʼ Juan 5:21, 28, 29.)
Ora gánnanu gundisaʼ Jesús gueʼtuʼ racaneni laanu guni crenu dxandíʼ zaca cani maʼ bidii stiidxabe laanu. Laabe zandísabe millón de binni dede né cani qué ñunibiáʼ Dios. Ziásacaʼ para gunibiaʼcaʼ Dios ne gannaxhiicaʼ laabe. (Biindaʼ Hechos 24:15.)