Ñee riníʼneluʼ Dios la?

Cani dxandíʼ xhamigu la? qué rusaana de güicaʼ diidxaʼ ora gúʼyacaʼ, guiniʼcaʼ pur teléfono, guseendacaʼ correu, gúʼyacaʼ pur videoconferencia o gucaacaʼ carta. Zacaca nga para gaca xhamígunu Dios, laaca naquiiñeʼ guinínenu laabe gatigá. Peru, ximodo zanda gúninu ni yaʼ.

Rinínenu Dios ora runi orarnu. Peru qué zanda diʼ guinínenu Dios cásica rinínenu ti binni casi laanu. Naquiiñeʼ gánnanu ora runi orarnu la? canínenu binni ni jma risaca nuu guibáʼ ne Guidxilayú, laabe nga Dios ni bizáʼ laanu, nga runi naquiiñeʼ gúninu ni né stale respetu. Ne para ganda gucaadiaga Dios laanu la? naquiiñeʼ gúninu cani canábabe laanu. Guidúʼyanu chonna de laacani.

Primé la? Jiobá nga naquiiñeʼ guinínenu ora guni orarnu, cadi Jesús diʼ nin ca bidóʼ ca (Éxodo 20:4, 5). Biblia na sicaríʼ: «Cadi chuʼ tu xizaa de gastiʼ, sínuque lainíʼ né Dios. Lainaba laa irá ni caquiiñe tu, ne laudii diuxquixe laa» (Filipenses 4:6). Guiropa la? naquiiñeʼ guni orarnu lu lá Xiiñiʼ Dios, Jesucristu. Laapeʼ guníʼ: «Iruti zie ra nuu Bixhoze pa cadi pur naa» (Juan 14:6). Guionna la? naquiiñeʼ guinábanu ni riuulaʼdxiʼ Dios. Biblia na: «Nanna dxichi nu pa inaba nu ni riulaʼdxi Dios gaca la? zucaa diaga laanu» (1 Juan 5:14).a

Cadi xadxí zaca xhamigu chupa binni pa tobi si de laacaʼ riníʼ; guirópacabe naquiiñeʼ gánnacabe pora guiníʼcabe ne pora gucaadiágacabe. Zacaca naquiiñeʼ gúninu, naquiiñeʼ guizíʼdinu gucaʼdiáganu Dios ora guiniʼné laanu. Peru, ximodo riníʼnebe laanu yaʼ.

Yanna riʼ, riquiiñebe Biblia, Stiidxabe para guiníʼnebe laanu (2 Timoteo 3:16, 17). Quíxhenu ti ejemplu, bixuiʼlú biseendaʼ ti xhamíguluʼ ti carta ra nuuluʼ. Ora gúʼndaluʼ ni, cadi dxandíʼ casi ñaca cucaadiágaluʼ ni caniʼbe la? Zacaca nga ora guidúʼndanu Biblia, casi ñaca nudiʼnu lugar niniʼné Dios laanu. Nga runi, sicaríʼ guníʼ Gina, gunaa ni bizéʼtenu lu primé tema stiʼ revista riʼ: «Pa racalaʼdxeʼ gaca xhamiga Dios naa la? naquiiñeʼ guundaʼ “carta” stibe, Biblia». Ne guníʼrube: «Cumu ruundaʼ Biblia guiráʼ dxi la? huayacaneni naa guidxiñaʼ jma gaxha de Dios». Ñee ruundaluʼ Biblia guiráʼ dxi la? Pa gúniluʼ ni la? cudiiluʼ lugar guiniʼné Jiobá lii ne zuni sentirluʼ nuuluʼ jma gaxha de laabe.