Riguu ndaayaʼ Jiobá ca binni ni rudii ni napa
BISIHUINNI Jiobá rusisaca binni guidxilayú ora bidiibe laacaʼ ti regalu risaca: laani nga cuicaʼ xi gúnicaʼ. Ne riguube ndaayaʼ cani ribí guni ni jneza sin cueza guicaa xiixa para gacané binni guni adorar Dios, gusisácacabe Lá o Xlá ne gacanécabe gaca ni maʼ gudixhe ique Dios. Jiobá qué racalaʼdxiʼ guzúʼbanu stiidxaʼ purtiʼ si naquiiñeʼ gúninu ni o pur ridxíbinu laa. Ni riuuláʼdxibe nga gúninu ni nabe purtiʼ nadxiinu laabe de guidubi ladxidoʼno ne rudiʼnu xquíxepeʼ laabe.
Casi dxi nuu ca israelita lu desiertu stiʼ Sinaí, gudxi Jiobá laacabe xi naquiiñeʼ gúnicabe para gucuícabe ti lugar guni adorárcabe laa. Gúdxibe laacaʼ: «De ládetu lagutopa ti ofrenda para Jiobá. Guiráʼ cani guiale de ladxidóʼ gudii gueedaneni casi ti ofrenda para Jiobá» (Éx. 35:5). Cada tobi de ca israelita naquiiñeʼ gudii ni ganda, ne intiica gudiicabe ne biaʼ gudiicabe zanda iquiiñeni para gaca ni maʼ gudixhe ique Dios. Xi biʼniʼ guidxi que yaʼ.
«Guiráʼ cani biale de ladxidóʼ gudii» bidiicaʼ de laasicaʼ, «guiráʼ tu bicaa ladxidóʼ laa gúnini». Cásica hombre zaqueca gunaa bidiicaʼ xiixa para gaca xhiiñaʼ Jiobá: prendedor, arete, aníu, oro, plata, cobre, hilu azul, lari dieʼ de púrpura, fibra escarlata, lino fino, guicha ladi chiva, guidiladi dendxuʼ dieʼ de naxiñáʼ ne guidi ladi foca, yaga acacia, guié sicarú, stale tipu de aceite. Ne despué, «nabé stale ni bidii ca binni que para dxiiñaʼ ni chigaca que, bidiicaʼ jma de ni caquiiñeʼ» (Éx. 35:21-24, 27-29; 36:7).
Peru ni jma guyuulaʼdxiʼ Jiobá nga bidiicabe de guidubi ladxidóʼcabe para gacanécabe guni adorar binni Jiobá, ne cadi pabiáʼ diʼ risaca cani bidiicabe que. Bidii guidxi que tiempu stiʼ ne gucanecaʼ ra cayaca dxiiñaʼ que. Relatu que na: «Guiráʼ ca gunaa ni nanna que bíʼnicaʼ hilu ne nacaʼ». Ne laaca nani: «Guiráʼ gunaa ni bicaa ladxidoʼcaʼ laacaʼ ne nuu xpiaanicaʼ bíʼnicaʼ hilu né guicha ladi chiva». Jiobá laaca bidii Bezalel guendanuuxpiaaniʼ, guendariene, guendananna, ti «ganna guni intiica cosa raca lu náʼ binni». Zacá nga laani, bidii Jiobá Bezalel ne Oholiab guenda ni caquiiñecaʼ para gúnicaʼ guiráʼ dxiiñaʼ ni bisaananebe laacaʼ (Éx. 35:25, 26, 30-35).
Dxi biʼniʼ invitar Jiobá ca israelita gudiicaʼ de ni nápacaʼ, nanna dxíchibe zudii «guiráʼ tu [gucaa] ladxidóʼ laa gúnini» para gacané guni adorar binni Jiobá. Ne pur ndiʼ guluube ndaayaʼ ca binni ni bidii de guidubi ladxidóʼ ra gúdxibe laacaʼ xi gúnicaʼ ne bibánicaʼ nayecheʼ. Zacá bisihuinni Jiobá riguu ndaayaʼ ca xpinni ni rudii ni napa, ne rúnibe ni ora rudiibe laacaʼ ca guenda ni caquiiñecaʼ para gúnicaʼ ni nabe (Sal. 34:9). Pa gúninu ni na Jiobá ne gudiʼnu ni nápanu de guidubi ladxidoʼno la? laabe dxandipeʼ zaguube ndaayaʼ laanu.