Ca dxi riʼ, stale tu ribeechú ti ndaa bueltu ne rusábacaʼ ni ndaaniʼ caja ra ná «Obra mundial» ni nuu ndaaniʼ congregación sticaʼ (1 Corintios 16:2). Guiráʼ beeu ruseendaʼ ca congregación bueltu riʼ ra Yoo Betel stiʼ ca testigu stiʼ Jiobá ni ruuyaʼ dxiiñaʼ ni rúnicaʼ. Pa naluʼ la? zanda guseendaluʼ donación stiluʼ ra nuu corporación stiʼ ca testigu stiʼ Jiobá xquídxiluʼ. Para gánnaluʼ gunáʼ nga lá ni riquiiñecabe la? guníʼ ra sucursal ni ruuyaʼ dxiiñaʼ raca xquídxiluʼ. Zadxeʼluʼ dirección stícabe lu www.jw.org/es. Raríʼ zeeda caadxi modo zanda gudii binni donación stiʼ:
CANI ZANDA GUSIGÁʼDELUʼ
Zanda cheluʼ ra bancu ne guʼnuʼ ti transferencia electrónica né tarjeta de débitu o de créditu o transferencia de bueltu pur ca dispositivo móvil ca para guni donarluʼ. Nuu sucursal riquiiñeʼ sitiu jw.org o sti sitiu ni nápacaʼ lu Internet para ganda gudii binni donación.
Zanda guni donarluʼ bueltu, oro ne xcaadxi cosa ni risaca stiluʼ. Biseendaʼ ti carta ra gusiéneluʼ cusigáʼdeluʼ cani.
ZANDA QUÍXHELUʼ MODO GUDIILUʼ
XCAADXI MODO ZANDA GUDIILUʼ
Raríʼ zeeda ti lista ra cá xcaadxi modo zanda gacané binni lu xhiiñaʼ Reinu ni raca lu guidubi Guidxilayú. Pa racaláʼdxiluʼ iquiiñeluʼ tobi de laacani la? rinábadu lii guiniʼluʼ ra sucursal para gánnaluʼ pa zanda gaca ni zacá. Ndaaniʼ cada guidxi nuu gadxé gadxé ley ra cá xi naquiiñeʼ guni tuuxa ni racalaʼdxiʼ guni donar, nga runi, galán guiníʼneluʼ tuuxa ni nanna de laacani para gánnaluʼ gunáʼ nga ni jma zanda gúniluʼ
Seguru: Zanda gucaaluʼ lá ti corporación ni riquiiñeʼ ca testigu stiʼ Jiobá para gaca beneficiariu stiʼ ti seguru de vida o ti plan de jubilación.
Cuenta de bancu: Ca cuenta de bancu, ca certificadu de depósitu ne bueltu napa tuuxa para gaca jubilar, zanda guiaana cani lu ti fideicomisu, o pa gueeda gati binni ca la? zanda guiaxa ca bueltu ca lu náʼ ti corporación ni riquiiñeʼ ca testigu stiʼ Jiobá, peru naquiiñeʼ gaca ni modo ná ley stiʼ ca bancu nuu xquídxiluʼ.
Acción ne bono: Zanda gaca donar cani para ti corporación ni riquiiñeʼ ca testigu stiʼ Jiobá o gaca ti contratu ra guicá guiaana cani para laacabe pa gueeda gati binni ca.
Bienes raíces: Zanda guni donar binni xiixa ni zanda guidoo, casi ti layú. Zanda gudii binni xiixa ne cadi guinabaʼ gudiicabe laa xiixa pur laani, peru pa ti yoo ra zanda cueza binni ni la? zanda iquiiñebe ni o cuézabe ndaaniʼ ni biaʼ dxi nabánibe.
Donación né renta: Raca ti contratu ra runi donar binni bueltu o título stiʼ ti cosa risaca para ti corporación ni riquiiñeʼ ca testigu stiʼ Jiobá, ne ricaa binni riʼ interés stini cada iza biaʼ dxi nabani. Ora runi donar binni modo riʼ la? racaneni para guiete lu impuestu ni quíxebe iza gudiibe donación stibe.
Testamentu ne fideicomisu: Zanda gusaana binni layú o bueltu para ti corporación ni riquiiñeʼ ca testigu stiʼ Jiobá, peru naquiiñeʼ guni ti notariu testamentu riʼ. Laaca zanda guiaana corporación riʼ casi beneficiariu stiʼ ti contratu de fideicomisu. Ora runi tuuxa clase contratu riʼ la? laaca racaneni laa ora maʼ chitixe impuestu.
Cani chuulaʼdxiʼ guni donar casi bisiénedu ra ná «xcaadxi modo zanda gudiiluʼ», primeru naquiiñeʼ guʼyaʼ chaahuicaʼ ximodo zanda gúnicaʼ ni. Para gacanedu cani racalaʼdxiʼ gudii xiixa para dxiiñaʼ runi ca testigu stiʼ Jiobá lu guidubi Guidxilayú la? maʼ guyáʼ ti folletuhuiiniʼ lu diidxaʼ inglés ne diidxastiá ni láʼ Donaciones planificadas para favorecer el servicio del Reino en todo el mundo. Lu folletu riʼ zeeda xi guiráʼ modo zanda gudii binni donación o ximodo gusigáʼdecabe xiixa. Zándaca qué zanda guʼnuʼ guiráʼ ni zeeda lu folletu riʼ, purtiʼ gadxé ley napa cada guidxi ne gadxé impuestu ruquíxecaʼ. Nga runi, ora maʼ biindaluʼ folletu riʼ, naquiiñeʼ guiníʼneluʼ ti abogadu o ti contador para gusiene chaahuiʼ lii de laani. Stale binni maʼ huadii xiixa casi bisiénedu raríʼ, zacá racanécabe religión stinu ne riquiiñenu ni rudiicabe para gacanenu binni ora guizaaca xiixa ni guniná laa, casi ti xu, peru laaca maʼ qué runi cobrar gobiernu laacabe stale impuestu. Pa nuu folletu riʼ xquídxiluʼ, zanda guinábaluʼ tobi de laani secretariu stiʼ neza binni ridagulisaa ra rieluʼ.
Pa racaláʼdxiluʼ gannuʼ jma la? bidii ti clic ra na «Quiero hacer una donación para nuestra obra mundial», ni nuu xagueteʼ de yaza ra ruzulú jw.org, o guníʼ ra sucursal ni ruuyaʼ dxiiñaʼ raca xquídxiluʼ.