Zanda guni ganarluʼ Binidxabaʼ

1. 1) Xiñee risaca cadi gusaana de gudxiilunu Binidxabaʼ tiempu riʼ. 2) Ximodo nánnanu zanda gudxiilunu Binidxabaʼ.

CA DXI riʼ cucaalú Binidxabaʼ guiráʼ xpinni Jiobá. Cucaalube ca xpinni Cristu ni bibí né espíritu santu ne laaca cucaalube ca «xcaadxi dendxu» (Juan 10:16). Cumu nánnabe maʼ huaxiéʼ dxi riaana laabe la? racaláʼdxibe gusirabe fe stiʼ guiráʼ ca xpinni Jiobá (biindaʼ Apocalipsis 12:9, 12). Nga runi nabé risaca nga cadi gusaana de gudxiilunu laabe. Peru, ñee dxandíʼ zanda gudxiilunu laabe la? Zanda pue, purtiʼ Biblia na: «Cadi ulabi tu binidxabaʼ, stubi stubi zaxele de laatu» (Santiago 4:7).

2, 3. 1) Xiñee racalaʼdxiʼ Binidxabaʼ guni cré binni cadi dxandíʼ nuu. 2) Xiñee nánnanu dxandíʼ nuu Binidxabaʼ.

² Stale binni runi cré cadi dxandíʼ nuu Binidxabaʼ. Para laacabe lu ca libru, película ne videojuego si nga rihuinni Binidxabaʼ ne ca demonio stiʼ. Ne riníʼ íquecabe ca binni huati si nga runi cré ca espíritu malu. Ngapeʼ nga ni racalaʼdxiʼ Binidxabaʼ guiníʼ ique binni, guni crecaʼ cadi dxandíʼ nuube. Xiñee yaʼ. Purtiʼ zacá qué zaca nagana para laabe quítebe binni (2 Corintios 4:4). Nga runi para laabe guiráʼ dxi ñuu jma binni niníʼ ique zacá.

³ Peru ca xpinni Jiobá nánnanu dxandíʼ nuu Binidxabaʼ. Xiñee yaʼ. Purtiʼ lu Biblia rieeteʼ biquiiñebe ti beendaʼ para guníʼnebe Eva (Génesis 3:1-5). Laaca guníʼnebe Jiobá ora gúdxibe laa runi Job ni na Dios pur guiráʼ ni rudiibe laa (Job 1:9-12). Laaca guníʼnebe Jesús ora gucaláʼdxibe nuchee (Mateo 4:1-10). Ne dxi guca Jesús rey lu iza 1914, bizulú bicaalú Binidxabaʼ ca xpinni Cristu ni bibí né espíritu santu, cani nabániruʼ lu Guidxilayú (Apocalipsis 12:17). Ca dxi riʼ, cucaaluruʼ Binidxabaʼ guiráʼ tu cayuni ni na Dios. Para cadi guiábanu lu ca trampa stibe, naquiiñeʼ gudxiilunu laabe ne gaca fe stinu naguidxi. Lu tema riʼ zazíʼdinu ximodo zanda gucáʼnanu chonna de ca trampa stiʼ Binidxabaʼ.

CADI GUDXÍʼBANU LACA LAANU

4. Xiñee zanda guininu Binidxabaʼ nga binni ni jma rudxiibaʼ laca laa.

⁴ Binidxabaʼ nga binni ni jma rudxiibaʼ laca laa. Xiñee rininu zacá yaʼ. Purtiʼ qué nidxíbibe ora guniʼbe qué gapa Jiobá derechu de guni mandar laanu. Ne laaca gucaláʼdxibe ñuni adorar binni laabe lugar de ñuni adorarcaʼ Jiobá. Casi maʼ bidúʼyanu ca, nabé rudxiibaʼ Binidxabaʼ laca laa. Nga runi, pa racaláʼdxinu gudxiilunu laabe, cadi naquiiñeʼ diʼ gudxíʼbanu laca laanu (biindaʼ 1 Pedro 5:5). Peru, xii nga gudxiibaʼ ti binni laca laa yaʼ. Ñee guiráʼ biaje nga malu gudxiibaʼ tuuxa laca laa la?

5, 6. 1) Bisiene xiñee cadi guiráʼ diʼ biaje nga malu gudxiibaʼ tuuxa laca laa. 2) Xi zándaca gueeda gácanu pa gudxíʼbanu laca laanu. 3) Bizeeteʼ chupa chonna ejemplu de ca binni ni bidxiibaʼ laca laa.

⁵ Nuu guidxi riníʼcabe rudxiibaʼ tuuxa laca laa ora ridxá tipa ladxidóʼ pur biʼniʼ xiixa cosa galán o pur ni cayuni sti binni. Ne cadi malu diʼ guni sentir binni zacá. Zacá biʼniʼ sentir apóstol Pablu ti dxi. Laabe guniʼbe rudxiibabe laca laabe o ridxá tipa ladxidoʼbe purtiʼ cadi cucheené ca xpinni Cristu de Tesalónica Dios neca cadíʼdicaʼ ra nagana ne canazanándacabe laacaʼ (2 Tesalonicenses 1:4). Laaca cadi malu diʼ nga gudxíʼbanu laca laanu pur xiixa ni galán bíninu o ni biʼniʼ sti binni. Cadi naquiiñeʼ guituílunu pur binnilídxinu, cultura stinu o lugar ra gúlenu (Hechos 21:39).

⁶ Peru pa gudxíʼbanu laca laanu zanda guixeleʼ ca xhamígunu de laanu, peru ni jma feu nga zaxeleʼ Jiobá de laanu. Pa gudxíʼbanu laca laanu qué ziuuláʼdxinu ora gudiicabe ti conseju laanu ne qué zúninu ni gábicabe laanu (Salmo 141:5). Ca binni ni rudxiibaʼ laca laa runi crecaʼ nabé risácacaʼ que xcaadxi. Nanalaʼdxiʼ Jiobá ca binni zacá (Ezequiel 33:28; Amós 6:8). Peru Binidxabaʼ nabé riuulaʼdxiʼ gudxiibaʼ binni laca laa casi modo rudxiibabe laca laabe. Nánnanu biéchebe ora bidxiibaʼ Nemrod laca laa, Absalón ne rey stiʼ Egipto (Génesis 10:8, 9; Éxodo 5:1, 2; 2 Samuel 15:4-6). Laaca bidxiibaʼ Caín laca laa. Ti biaje gudxi Jiobá laabe xi gúnibe, peru qué nuzuubabe diidxaʼ. Bíʼnibe ni nabe ne bicheenebe Jiobá. Ngue runi maʼ qué ñaca xhamigu Jiobá laabe (Génesis 4:6-8).

7, 8. 1) Xi riníʼ gusisaca tuuxa raza stiʼ. 2) Xiñee stale binni rusisaca raza stiʼ. 3) Xiñee malu nga gudxíʼbanu laca laanu ra ridagulisaanu.

⁷ Ora rudxiibaʼ binni laca laa zanda gucaani laacaʼ guninasaacaʼ laacaʼ. Guzéʼtenu ti ejemplu, stale binni ni rudxiibaʼ laca laa nabé rusisaca raza stiʼ. Gusisaca tuuxa raza stiʼ nga guiníʼ ique jma risaca chupa chonna raza que xcaadxi o guiníʼ ique qué risaca guiráʼ binni de xiixa raza. Xiñee rusisaca stale binni raza stiʼ yaʼ. Purtiʼ ora rudxiibaʼ binni laca laa rucaani laacaʼ guiníʼ íquecaʼ jma risácacaʼ que xcaadxi binni. Pur modo riníʼ íquecabe riʼ rucaani stale binni tinde, gutisaacaʼ o guuticaʼ stale binni.

⁸ Dxandíʼ, cadi naquiiñeʼ guizaaca ndiʼ ra ridagulisaanu. Peru pa gudxíʼbanu laca laanu zándaca gucaani laanu tinde diidxanu o gápanu guendanagana jma nadipaʼ. Nga nga ni bizaaca chupa chonna xpinni Cristu ni bibani lu primé siglu. Nga runi, apóstol Santiagu gunabadiidxaʼ: «Xiñee ridinde tu» pue (Santiago 4:1). Pa gúninu menu xcaadxi ne guiníʼ íquenu jma risácanu que laacaʼ, zándaca gúninu xiixa o guininu xiixa ni guniná laacaʼ (Proverbios 12:18). Nanna dxíchinu pa gudxíʼbanu laca laanu zanda gutinde ni ca binni ridagulisaa.

9. Ximodo racané Biblia laanu para cadi gudxíʼbanu laca laanu ne cadi guiníʼ íquenu jma risácanu que xcaadxi binni. (Biiyaʼ foto ni zeeda ra ruzulú tema riʼ.)

⁹ Racané Biblia laanu para cadi gudxíʼbanu laca laanu ne cadi guni crenu jma risácanu que xcaadxi binni. Lu Proverbios 16:5 rieeteʼ nanalaʼdxiʼ Jiobá guiráʼ cani rudxiibaʼ laca laa. Ne lu Hechos 17:26 na de ti hombre si nga zeeda guiráʼ raza. Nga runi zanda guininu de ti raza si nga laanu purtiʼ guiranu zanu de Adán. Ne gastiʼ nin ti razón para guiníʼ íquenu bizáʼ Dios caadxi raza jma risaca que xcaadxi. Nga runi guinabadiidxanu laca laanu: «Ñee jma risacaʼ que xcaadxi binni de sti raza o de sti guidxi la?». Pa guiníʼ íquenu zacá, zándaca gudiʼnu lugar gucaa Binidxabaʼ laanu gusaana de gannaxhiinu ca binni ridagulisaa ne zándaca chuʼdindenenu laacaʼ (Juan 13:35). Peru pa qué racaláʼdxinu guiábanu lu trampa stiʼ Binidxabaʼ la? naquiiñeʼ gúninu stipa pur cadi gudxíʼbanu laca laanu (Proverbios 16:18).

CADI GANNAXHIINU GUIDXILAYÚ NIN BIDXICHI

10, 11. 1) Xi runi Binidxabaʼ para gucaa laanu gannaxhiinu guidxilayú stiʼ. 2) Xi bizaaca Demas pur gunnaxhii guidxilayú stiʼ Binidxabaʼ.

¹⁰ Binidxabaʼ nga cayuni mandar guidxilayú ra nabáninu riʼ (Juan 12:31; 1 Juan 5:19). Stale cosa ni runi binni guidxilayú nabé malu cani. Dxandíʼ, cadi guiráʼ diʼ cani malu. Zándaca iquiiñeʼ Binidxabaʼ guiráʼ ni nuu lu guidxilayú riʼ para gucaa laanu chuuláʼdxinu cani ne guchéʼnenu Dios. Zuyúbibe modo gannaxhiinu guidxilayú jma ne maʼ cadi gúninu stipa pur guzúʼbanu stiidxaʼ Jiobá (biindaʼ 1 Juan 2:15, 16).

¹¹ Nga nga ni bizaaca chupa chonna de ca primé xpinni Cristu. Casi apóstol Pablu gupa ti hombre ni gucané laa láʼ Demas. Peru Pablu guníʼ bisaana xpinni Cristu riʼ laa purtiʼ gunnaxhii guidxilayú stiʼ Binidxabaʼ (2 Timoteo 4:10). Xipeʼ nga gunnaxhii Demas yaʼ. Qué rieeteʼ diʼ ni lu Biblia. Zándaca purtiʼ jma gunnaxhiibe bidxichi que gúnibe xhiiñaʼ Jiobá. Pur nga maʼ qué ñanda ñuni Demas stale cosa risaca lu xhiiñaʼ Jiobá. Peru guleendube xiixa ni galán la? Coʼ. Guidxilayú malu riʼ qué ñuu dxi nudii laabe cosa jma risaca que ni nudii Jiobá laabe (Proverbios 10:22).

12. Ximodo riquiiñeʼ Binidxabaʼ ca cosa ni riuuláʼdxinu para gucaa laanu gucheʼnu.

¹² Cumu nácanu xpinni Cristu la? riuuláʼdxinu gápanu bueltu para gudiʼnu ni caquiiñeʼ binnilídxinu (1 Timoteo 5:8). Ne racalaʼdxiʼ Jiobá guibáninu galán. Nánnanu ni purtiʼ guluube Adán ne Eva ndaaniʼ ti paraísu sicarú (Génesis 2:9). Cásica biʼniʼ Binidxabaʼ né Demas, zándaca iquiiñebe ca cosa ni riuuláʼdxinu para gucaabe laanu gucheʼnu. Ximodo yaʼ. Ora rudiʼnu «lugar quite bidxichi [íquenu]» (Mateo 13:22). Binidxabaʼ racalaʼdxiʼ guni crenu zabáninu nayecheʼ pa guni ganarnu stale bidxichi ne sinu stale cosa. Peru pa guni crenu nga zunítinu ni jma risaca nápanu, gaca xhamígunu Jiobá. Jesús maca guníʼ ca diidxaʼ riʼ: «Iruti zanda gapa chupa xpixuaana ne guni ni na iropa cabe tobi si tiru, purti jma zanaxhii be tobi ne zaca nanalaʼdxi be stobi, o pacaa jma zacá nú be ngue ne qué zazaalaʼdxi be stobi que. Zaqueca qué zanda di ganaxhii tu Dios ne ganaxhii ca tu bidxichi» (Mateo 6:24). Pa ni jma risaca para laanu nga bidxichi zeeda gácanu esclavu stini. Ne zacá zaca nagana para laanu gúninu xhiiñaʼ Jiobá. Ne ngapeʼ nga ni racalaʼdxiʼ Binidxabaʼ. Pa qué racaláʼdxinu guiábanu lu trampa stibe, qué chuʼ dxi guiníʼ íquenu jma risaca nga guni ganarnu stale bidxichi ne sinu stale cosa que gaca xhamígunu Jiobá (biindaʼ 1 Timoteo 6:6-10).

CADI CHÚʼNENU NI CADI XHEELANU

13. Xi riníʼ ique stale binni ca dxi riʼ.

¹³ Stobi de ca trampa ni riquiiñeʼ Binidxabaʼ nga gucaa laanu chúʼnenu ni cadi xheelanu. Tiempu riʼ, stale binni riníʼ ique guichaganáʼ tuuxa ne cuezané xheelaʼ si maʼ gudiʼdiʼ ni de moda ne qué randa runi ni gapa gana. Casi ti actriz guníʼ guizáʼ nagana nga cuezané binni xheelaʼ si ne qué runibiáʼ tuuxa ni nabezané xheelaʼ si o gacalaʼdxiʼ guibani zacá. Ne ti actor guníʼ para laa cadi jneza nga guibaniné binni xheelaʼ si guidubi xquendanabani. Guizáʼ riecheʼ Binidxabaʼ guiníʼ binni ni nabé runibiáʼcabe laacaʼ zacá de guendaxheelaʼ. Laa ndaʼ ni nga ni bisigaʼdeʼ Dios binni. Laabe racaláʼdxibe guilaa guiráʼ guendaxheelaʼ. Pa qué racaláʼdxinu guiábanu lu trampa stibe, naquiiñeʼ guidúʼyanu guendaxheelaʼ casi ruuyaʼ Jiobá ni.

14, 15. Xi zanda gúniluʼ pa uquiinde lii gúniluʼ xiixa cosa dxabaʼ.

¹⁴ Guiráʼ ca xpinni Cristu cásica cani maʼ bichaganáʼ ne zaqueca cani caʼruʼ guichaganáʼ naquiiñeʼ gúnicaʼ stipa para cadi chúʼnecaʼ sti binni. Peru nagana para gácani. Purtiʼ ca hombrehuiiniʼ ne ca dxaapahuiiniʼ ca runadiágacaʼ riníʼ ca xcompañérucaʼ riuunecaʼ tutiicaʼ gápacaʼ gana. Laaca runadiágacabe laacaʼ guiniʼcaʼ ruseendacaʼ mensaje ne foto ra cayúnicaʼ cosa dxabaʼ pur teléfono. Nuu guidxi ruuyacabe ca mensaje riʼ casi ora nuseendacabe pornografía ra zeeda baʼduhuiiniʼ. Ne laaca riníʼ Biblia tu riuuné ni cadi xheelaʼ la? «laca laa cuchee ne cuerpu stiʼ» (1 Corintios 6:18). Stale binni huayati purtiʼ ricá xiixa guendahuará laa ora ratané ni cadi xheelaʼ. Ne stale de ca hombrehuiiniʼ ne ca dxaapahuiiniʼ ni ratané tuuxa ante guichaganáʼ raca arrepentircaʼ despué. Stale libru, película ne canción rucaacani laanu guiníʼ íquenu qué zacananu pa guchéʼnenu ca ley stiʼ Dios. Peru cadi zacá diʼ ni. Pa qué gápanu cuidadu zanda «uchee tobi de laa[nu] sin ganna» (Hebreos 3:13).

¹⁵ Pa ruquiinde lii gúniluʼ xiixa cosa dxabaʼ, xi zanda gúniluʼ yaʼ. Gunna nuu ti cosa ni cucaa lii gucheeluʼ (Romanos 7:22, 23). Biʼniʼ orar Jiobá ne gunabaʼ laabe gudiibe stipa lii para guni huantarluʼ (Filipenses 4:6, 7, 13). Ne bixeleʼ de ca cosa ni zanda gucaa lii gucheeluʼ (Proverbios 22:3). Ne ora uquiinde lii gúniluʼ ni cadi jneza la? nagueendaca bicaanáʼ ni (Génesis 39:12).

16. 1) Xi biʼniʼ Jesús ora biquiinde Binidxabaʼ laa nuchee. 2) Xi rizíʼdinu de ejemplu stiʼ Jesús.

¹⁶ Xi biʼniʼ Jesús ora biquiinde Binidxabaʼ laa guchee. Qué ñuni crebe ni gudxi Binidxabaʼ laabe. Ne qué lica niníʼ íquebe ni gudxi laabe. Nagueendaca biquiiñebe Stiidxaʼ Dios ne gúdxibe laa: «Maca cá lu Xquiʼchi Dios» (biindaʼ Mateo 4:4-10). Xi rizíʼdinu de ejemplu stiʼ Jesús yaʼ. Laabe binibiáʼ chaahuibe Stiidxaʼ Dios. Nga runi, ora biquiinde Binidxabaʼ laabe nagueendaca bietenaláʼdxibe de ca relatu ni zeeda lu Stiidxaʼ Dios. Pa qué racaláʼdxinu guiábanu lu trampa stiʼ Binidxabaʼ, naquiiñeʼ gucáʼnanu intiica ni zanda uquiinde laanu gatanenu ni cadi xheelanu (1 Corintios 6:9, 10).

CADI GUIREʼNU GANA

17, 18. 1) Xi xcaadxi trampa riquiiñeʼ Binidxabaʼ. 2) Xiñee qué ridxagayaanu ca trampa stiʼ Binidxabaʼ. 3) Xi chiguizaaca Binidxabaʼ. 4) Xiñee riéchenu gánnanu gastiʼ ni galán cabeza Binidxabaʼ.

¹⁷ Lu tema riʼ bidúʼyanu chonna trampa stiʼ Binidxabaʼ: gudxiibaʼ tuuxa laca laa, gannaxhii guidxilayú ne bidxichi, ne chuʼné ni cadi xheelaʼ. Peru stáleruʼ trampa nápabe. Casi nuu caadxi Testigu ni qué náʼ binnilidxi gúnicaʼ ni na Jiobá. Ne nuu tu runi burla ca xcompañeru de ra scuela laa. Ne nuu tu nabeza ndaaniʼ guidxi ra qué rudii gobiernu lugar guireeche diidxaʼ. Peru qué ridxagayaadinu, purtiʼ maca guníʼ Jesús zazaaca ca cosa riʼ. Laabe guniʼbe: «Zaca nanalaʼdxi cabe laatu purti xpinne laatu. Peru cani qué ixhacalaʼdxi dede dxi iluxe irá ni la? zalá» (Mateo 10:22).

¹⁸ Ximodo zanda gudxiilunu Binidxabaʼ yaʼ. Jesús guníʼ, pa guni huantarnu la? zanda guilanu (Lucas 21:19). Nin ti binni guidxilayú qué zanda guniná laanu xadxí. Pa guzúʼbanu stiidxaʼ Jiobá, guirutiʼ zucaa laanu gusaana de gaca xhamígunu laabe (Romanos 8:38, 39). Ne pa cayúninu ni na Jiobá ora gátinu la? laaca qué zuni ganar diʼ Binidxabaʼ laanu, purtiʼ Jiobá zusibani laanu sti biaje (Juan 5:28, 29). Peru xi zazaaca né Binidxabaʼ yaʼ. Despué de guinitilú guidxilayú malu riʼ, zuseguyoo Cristu laabe 1,000 iza para cadi gucaalube guirutiʼ (Apocalipsis 20:1-3). Despué zalaa Binidxabaʼ ne últimu biaje zuyúbibe modo quítebe binni guidxilayú. Ne despué zanitilube (Apocalipsis 20:7-10). Casi maʼ bidúʼyanu ca, gastiʼ ni galán cabeza Binidxabaʼ. ¡Peru nuu xiixa ni galán cabeza lii! Nga runi cadi guireeluʼ gana, cadi gusaanaluʼ de gudxiiluluʼ Binidxabaʼ ne cadi gusaana de gaca fe stiluʼ naguidxi. Gunna dxichi zanda gudxiiluluʼ Binidxabaʼ.