Ora redandá «ca dxi nagana»

«CUNDUUXEʼ ca yuubaʼ riʼ naa», zacá guníʼ Ernesto ti hombre ni napa jma de 70 iza.a Ñee huayunadiágaluʼ sti binni guiníʼ zacá la? Pa runi sentirluʼ maʼ huaraluʼ ne maʼ cará stipa stiluʼ purtiʼ maʼ nagólaluʼ, jma ziéneluʼ ca diidxaʼ ni cá lu capítulo 12 stiʼ Eclesiastés. Casi na versículo 1, ora maʼ bioʼxhoʼ binni reeda «ca dxi nagana». Peru cadi gúʼyaluʼ xquendanabániluʼ casi puru yuubaʼ. Neca maʼ nagólaluʼ zanda chuʼluʼ nayecheʼ ra gúniluʼ xhiiñaʼ Jiobá.

LAGUQUIDXI FE STITU

Laatu ca hermanu ni maʼ nagola, laganna dxichi cadi stúbitu nuutu. Dxiqué stale xpinni Dios gúpacaʼ guendanagana cásica ni nápatu yanna pur maʼ nagólatu. Casi, Isaac, Jacob ne Ahíya maʼ qué ñuuyacaʼ (Génesis 27:1; 48:10; 1 Reyes 14:4). Pur ca iza ni napa Sara runi sentir maʼ bioʼxhoʼ (Génesis 18:11, 12). Ne rey David nabé guca nanda (1 Reyes 1:1). Barzilai maʼ qué ñó gueta nanixe ne maʼ qué ñanda ñunadiaga saa (2 Samuel 19:32-35). Cásica Abrahán ne Noemí guti xheelacaʼ (Génesis 23:1, 2; Rut 1:3, 12).

Xi gucané laacabe para qué nusaanacabe de nuzuubacabe stiidxaʼ Dios ne chúʼcabe nayecheʼ yaʼ. Casi Abrahán la? binibiáʼcabe laa pur fe ni gupa lu ni bizabiruaa Dios gudii laa (Romanos 4:19, 20). Laatu laaca naquiiñeʼ gaca fe stitu naguidxi, ne fe ca zanda gapa binni ni biaʼ tiica si iza napa, biaʼ zanda guni lu xquendanabani. Casi Jacob, bixhozegola ca israelita, qué nusaana de ñuni cré cani bizabiruaa Dios neca maʼ qué gapa stipa, maʼ qué ruuyaʼ ne maʼ huará (Génesis 48:1-4, 10; Hebreos 11:21). Ca dxi riʼ laaca nuu tu napa ca guendanagana riʼ. Casi Inés ti hermana de 93 iza, napa ti guendahuará ni rusirá stipa ca músculo stiʼ. Neca nápabe guendahuará riʼ laabe guniʼbe: «Guiráʼ dxi riníʼ iqueʼ Paraísu ni chigudii Dios, nga ruchá tipa ladxiduáʼ. Para naa, cada dxi tiidiʼ nácani ti regalu stiʼ Jiobá». ¡Guizáʼ nayecheʼ riuu hermana riʼ!

Para gaca fe stícabe naguidxi la? naquiiñeʼ guni orárcabe, gúʼndacabe Biblia ne chécabe guendaridagulisaa. Profeta Daniel biʼniʼ orar chonna biaje ti dxi ne qué ñuu dxi nusaana de ñuundaʼ Stiidxaʼ Dios (Daniel 6:10; 9:2). Zaqueca Ana neca naca ti viuda ni maʼ nagola, «qué riree be ndaani yuʼdu roʼ» (Lucas 2:36, 37). Ora rietu ca guendaridagulisaa ca ne guicábitu lúcani zaguuni gana laatu ne zaqueca cani gucaadiaga laatu. Cadi guiaandaʼ laatu rusisaca Jiobá ca oración stitu, neca maʼ huaxiéʼ rúnitu lu xhiiñaʼ (Proverbios 15:8).

Yanna pa raca nagana para laatu gúʼndatu o chetu ra Yoo stiʼ Reinu yaʼ. Laguiníʼ ique lu ni zanda gúnitu. Casi pa maʼ qué randa rietu reunión zanda gucaadiágatu ni pur teléfono. Isabel, ni napa 79 iza ne maʼ qué ruuyaʼ chaahuiʼ, racané ti hermanu laabe para gúʼndabe ca revista ni chiguiuundaʼ ra ridagulisaabe peru runi imprimir ni né letra guizáʼ naroʼbaʼ.

Zándaca guizáʼ nápatu tiempu ne nga nga ni riaadxaʼ xcaadxi hermanu. Galán iquiiñetu tiempu stitu para gucaadiágatu ca grabación stiʼ Biblia, ca libru ne ca revista stinu, audiodrama o ca libana ca. Laguiniʼné ca hermanu pur teléfono ne laguiniʼné laacaʼ de xiixa tema stiʼ Biblia. «Zacá zacané saa nu pur fe stinu» (Romanos 1:11, 12).

CADI GUSAANATU DE GUCHEECHETU DIIDXAʼ

Cristina, ti xpinni Cristu ni napa jma de 80 iza guníʼ: «Ni jma feu ora maʼ bioʼxhoʼ binni nga qué randa runi jma lu xhiiñaʼ Dios». Pa runi sentirtu cásica runi sentirbe, xi zanda gúnitu para cadi chuʼtu triste yaʼ. Peter, ti xpinni Cristu de 75 iza guníʼ: «Cadi guiníʼ íqueluʼ ni qué zanda gúniluʼ, sínuque guníʼ ique lu ni zanda gúniluʼ».

Xi zanda gúnitu para cadi gusaana de gucheechetu diidxaʼ neca maʼ nagólatu yaʼ. Heidi maʼ qué randa rucheeche diidxaʼ de yoo pur yoo, peru neca maʼ nápabe 90 iza biziidibe iquiiñebe computadora para gucaabe carta. Xcaadxi hermanu ni maʼ nagola rucheechecaʼ diidxaʼ laga zúbacaʼ ra parque o ra parada carru. Ne cani nabeza ndaaniʼ xiixa yoo ra rápacabe ca binni ni maʼ nagola zanda guiníʼnecaʼ ca binni ni runi dxiiñaʼ raqué ne xcaadxi binnigola ni nabeza raqué.

Nabé biʼniʼ rey David xhiiñaʼ Jiobá neca maʼ nagola. Bidiibe bueltu ne gudixhe chaahuibe xcaadxi cosa ti ganda cuí yuʼduʼ que (1 Crónicas 28:11–29:5). Zacaca zanda gúnitu, zanda gacanetu para guireeche diidxaʼ biaʼ zanda gúnitu. Ximodo yaʼ. Ra cuʼtu gana ca precursor ne xcaadxi hermanu ni nabé runi xhiiñaʼ Jiobá ra ridagulisaatu. Zanda gusigáʼdetu laacabe xiixa, guni invitartu laacabe ti guendaró o gábitu laacabe caadxi diidxaʼ ni uguu gana laacabe. Sti cosa ni zanda gúnitu nga guinábatu Jiobá gacané cani nahuiiniʼ, ca familia, cani runi jma lu xhiiñabe, cani huará ne cani runi dxiiñaʼ nadipaʼ ndaaniʼ xquídxibe.

Nabé risácatu ne risaca dxiiñaʼ rúnitu para Jiobá; qué chuʼ dxi guiníʼ íquetu zusaanabe laatu (Salmo 71:9). Nadxii Jiobá laatu stale. Maʼ cadi candaa, zusaʼnu stale iza, peru qué zióʼxhonu. Zápanu stale stipa, zácanu binni nazaaca ne qué zusaana de gúninu xhiiñaʼ Jiobá, Dios ni nadxiinu.