CANI RINABADIIDXAʼ BINNI DE BIBLIA
Xi para gucuá ca profecía zeeda lu Biblia
Xiñee ruzeeteʼ biblia guiráʼ ni cazaaca yanna riʼ (Lucas 21:10, 11)
Lu Biblia ridxélanu stale profecía ni caníʼ xipeʼ chiguizaaca. Nin ti binni qué zanda guiníʼ xipeʼ chiguizaaca. Nga runi, ora guidúʼyanu ximodo guca ca profecía ca, rudiʼnu cuenta dxandíʼ stiidxaʼ Dios Biblia. (Biindaʼ Josué 23:14; 2 Pedro 1:20, 21.)
Ca profecía ni ruzeeteʼ Biblia ni maʼ guca, racané cani laanu gápanu fe Dios (Hebreos 11:1). Laaca racané cani laanu para guidúʼyanu dxandíʼ zaca guiráʼ cani maʼ guníʼ Dios chiguni. Nga runi, guiráʼ ca profecía ca riguixhedxí cani ladxidoʼno. (Biindaʼ Salmo 37:29; Romanos 15:4.)
Ximodo racané ca profecía laanu
Nuu profecía ni racané ca xpinni Cristu gúʼyacaʼ xi gúnicaʼ. Casi dxi biiyaʼ ca xpinni Cristu de primé siglu cayaca caadxi profecía, bixooñecaʼ de Jerusalén. Despué, dxi binitilú guidxi que pur bidxiideche ca binni que Jesús, ca xpínnibe mápeca nuucaʼ zitu ne bilacaʼ. (Biindaʼ Lucas 21:20-22.)
Guiráʼ ca profecía ni maʼ guca ca dxi stinu riʼ rusihuínnicani maʼ cadi candaa zunitilú Reinu stiʼ Dios guiráʼ ca gobiernu nuu lu Guidxilayú (Daniel 2:44; Lucas 21:31). Tiempu stinu riʼ, cada tobi de laanu naquiiñeʼ guni xiixa nagueenda para chuulaʼdxiʼ Jesucristu, Rey ni gulí Dios, ni guni. (Biindaʼ Lucas 21:34-36.)