Astrología ne adivinación ¿ñee zanda gabi ca ni laanu xi chiguizaaca despué la?

ASTROLOGÍA

Rusiidiʼ astrología zanda gacané ca beleguí, beeu, ne ca planeta binni lu xquendanabani. Según ca astrólogo, ora gale ti baʼduhuiiniʼ riníʼcabe maca nexheʼ ximodo zácabe ora guiniisibe ne futuro stibe pur posición napa ca cosa ni nuu guibáʼ.

Neca maʼ xadxí nga biasastí astrología ndaaniʼ guidxi Babilonia, dede yanna nabé riquiiñeʼ binni ni para ganna xi chiguizaaca despué. Ti encuesta ni guca Estados Unidos lu iza 2012 bizeeteʼ tobi de cada chonna binni runi cré naca astrología «casi ti ciencia», ne 10% guníʼ nácani «ti ciencia». ¿Ñee dxandíʼ nga la? Coʼ. Guidúʼyanu xiñee.

• Ca estrella ne ca planeta ca, qué zanda diʼ gacané ca ni binni casi ná ca astrólogo.

• Stale biaje, tutiica si binni zanda guizaaca ni runi predecírcabe.

• Ca cálculo stiʼ astrología, rinándaruʼ ca ni creencia ni ruzeeteʼ guiráʼ ca planeta ca rudii ca ni buelta Guidxilayú, peru cadi zacá ni, purtiʼ ni dxandíʼ nga guiráʼ ca ni rudii ca ni buelta Gubidxa.

• Gadxé gadxé predicción runi cada astrólogo para ti binni.

• Rusiidiʼ astrología nuu 12 signo zodiacal ne según dxi gule binni rapa ti signo. Peru ra zidiʼdiʼ stale iza ruchaa ca cosa ni nuu lu espaciu de lugar, nga runi ca fecha ni riguíxhecabe para cada signo zodiacal maʼ cadi biaʼsi ca ni purtiʼ maʼ cadi nuu ca constelación o (grupu de estrella) ca lugar ni gudíxhecabe para cada signo.

Stale tu runi cré zanda ganna ximodo ti binni pur signo zodiacal stiʼ. Peru ni dxandíʼ nga cadi tobi si modo naca ca binni ni gule tobi si dxi. Cadi maca nexheʼ ximodo chigaca ti binni pur dxi ni gule. Lugar de guni juzgar ca astrólogo ti binni pur modo laa ne carácter stiʼ, laga riguíxhecaʼ modo naca binni pur ni riníʼ íquesicaʼ. ¿Ñee cadi rábiluʼ runi juzgárcabe binni sin gánnacabe gastiʼ de laa la?

ADIVINACIÓN

Maʼ raca stale iza nga de rié binni ra nuu ca adivinu. Stale de laacaʼ biyúbicaʼ modo «gúʼyacaʼ» futuro stiʼ binni ora biquiiñecaʼ ca órganu stiʼ binni o stiʼ maniʼ o pur modo gó ti gallu. Xcaadxi de laaca riniʼcaʼ xi chiguizaaca despué ora gúʼyacaʼ gaca ti dibuju né guiráʼ ni ribixiá ndaaniʼ taza sticaʼ despué de guecaʼ café o té. Yanna riʼ riquiiñecabe xcaadxi modo casi carta de tarot, bola de cristal o dado. Peru ¿ñee zanda guni crenu ca ni la? Coʼ. Guidúʼyanu xiñee.

Guidúʼyanu xiñee gadxé gadxé ni riníʼcabe chiguizaaca. Riquiiñecabe stale modo para guni adivinárcabe futuro stiʼ binni, peru neca iquiiñecabe ti modo si, gadxé gadxé ni riníʼ cada tobi. Guzéʼtenu ti ejemplu, pa ti binni racalaʼdxiʼ ganna futuro stiʼ ne guinabadiidxaʼ ni chupa adivinu ne laacaʼ iquiiñecaʼ ngueca carta, ¿cadi dxandíʼ ti cosa si nga nusiénecabe la? Peru stale biaje cadi zacá ni.

Nabé stale tu riníʼ cadi dxandíʼ ca modo ni riquiiñecabe para guni adivinárcabe futuro. Stale tu ruzeeteʼ ni runisícabe nga ruuyacabe modo runi reaccionar binni, ca carta ne ca bola de cristal riquiiñecabe ni para quitesícabe binni. Guzéʼtenu ti ejemplu, caadxi adivinu profesional, rúnicaʼ stale pregunta para gúʼyacaʼ xi guicabi binni ne rundaachicaʼ modo guicábicabe. Despué rudiicabe laa información sin ganna pa laca laa guníʼ ca ni casi ñaca laacabe cayuni adivinárcabe ni. Ne ora maʼ biʼniʼ ganárcabe confianza stiʼ binni ca, ráxhacabe laa stale bueltu.

¿XI RUSIIDI BIBLIA?

Rusiidiʼ astrología ne adivinación maca cá xi chiguizaaca cada binni. ¿Ñee dxandí ni la? Biblia rusiidiʼ zanda cuinu xi gúninu ne xi guni crenu, ne ca decisión guicaanu zanda gacané ca ni laanu o zanda guniná ca ni laanu despué (Josué 24:15).

Ca binni ni racalaʼdxiʼ gusiecheʼ ladxidóʼ Dios nápacaʼ stiʼ razón para cadi guni crecaʼ astrología ne adivinación: purtiʼ nanalaʼdxiʼ Dios guiráʼ ca práctica ca. Biblia ná: «Cadi naquiiñeʼ chuʼ tuuxa ládetu [...] ni runi practicar adivinación, nin tobi ni runi magia, nin tobi ni rusiene xiixa señal, nin ti hechiceru, nin tobi ni runi dañu, nin tobi ni cheʼ ra nuu ti espiritista o tuuxa ni riníʼ xi chigaca, nin tobi ni riniʼné ca gueʼtuʼ. Purtiʼ nanalaʼdxiʼ Jehováa tutiica guni guiráʼ cosa riʼ» (Deuteronomio 18:10-12).