¿Ñee nannuʼ ni la?

¿Xiñee qué nidxibi Esteban dxi zuhuaa nezalú cani cucaalú laa?

ZUHUAA Esteban nezalú caadxi hombre malu ni cucaalú laa, ti grupu de 71 juez ni naca parte de Sanedrín, tribunal supremo stiʼ ca judíu. Laacabe nga caadxi de ca hombre jma risaca de guidxi riʼ. Sumo sacerdote Caifás nga cutagulisaa laacabe, laca laabe nga biʼniʼ presidirbe dxi biʼniʼ juzgárcabe Jesús dede ra biiticabe laa raca chupa chonna beeu (Mat. 26:57, 59; Hech. 6:8-12). Cadi dxandíʼ guiráʼ ni guníʼ ca testigu que de Esteban. Nga runi ora biiyadxí ca hombre de Sanedrín que Esteban la? guizáʼ bidxagayaacaʼ purtiʼ bíʼyacaʼ rihuinni lube casi lú ti ángel (Hech. 6:13-15).

¿Xiñee qué nidxibi Esteban dxi zuhuaa nezalú ca hombre malu que yaʼ? Purtiʼ ni jma cá íquebe ante chinécabe laabe ra nuu Sanedrín que nga gúnibe dxiiñaʼ ni nápabe ndaaniʼ congregación ne gucané espíritu stiʼ Dios laabe (Hech. 6:3-7). Ora cayuni juzgárcabe laabe la? gudixhedxí espíritu stiʼ Dios ladxidoʼbe ne bisietenalaʼdxiʼ ni laabe stale cosa (Juan 14:16). Lu capítulo 7 stiʼ Hechos riete ora caniʼbe nezalú tribunal que para gaca defenderbe la? bisietenalaʼdxiʼ espíritu stiʼ Dios laabe biaʼ gande relatu ni zeeda lu ca Escrituras Hebreas (Juan 14:26, TNM). Jmaruʼ si biguidxi fe stiʼ Esteban ora bíʼyabe zuhuaa Jesús ladu derechu stiʼ Dios lu ti visión (Hech. 7:54-56, 59, 60).

Zándaca ziuu dxi laaca zuni amenazárcabe laanu ne zazanándacabe laanu (Juan 15:20). Pa nápanu costumbre de guni estudiarnu Stiidxaʼ Dios ne jma guicá íquenu gúninu xhiiñaʼ Dios la? zudiʼnu lugar gacané espíritu stiʼ Jiobá laanu. Ne laaca zudii ni stipa laanu para guni huantarnu ora gucaalúcabe laanu ne zacané ni laanu para cadi gunítinu paz ni nuu ndaaniʼ ladxidoʼno (1 Ped. 4:12-14).