XI GÚNINU TI CADI GACA NANALÁʼDXINU BINNI
3 | Bichaa modo riníʼ íqueluʼ
Biblia ná:
«Laguchaa modo riníʼ íquetu, ti ganna chaahuitu xi racalaʼdxiʼ Dios gúnitu, ni nachaʼhuiʼ, ni chuulaʼdxiʼ ne ni jneza» (ROMANOS 12:2).
¿Xi riniʼni?
Rizaalaʼdxiʼ Dios ni riníʼ íquenu (Jeremías 17:10). Dxandíʼ, naquiiñeʼ chuʼnu cuidadu né ca ni rininu o ca ni rúninu, peru nuuruʼ ni zanda gúninu. Cumu nuu biaje ni riníʼ ique binni o ni nuu ndaaniʼ ladxidóʼ nga ni rucaa laa gaca nanalaʼdxiʼ la? nga runi caquiiñeʼ cueenu de ndaaniʼ íquenu ne de ndaaniʼ ladxidoʼno guiráʼ ni rucaa laanu gaca nanaláʼdxinu. Ndiʼ nga ni zacané laanu para cadi gaca nanaláʼdxinu ne guchaʼnu modo laanu.
Biʼniʼ stipa gúniluʼ ndiʼ:
Biiyaʼ xi runi sentirluʼ pur xcaadxi jmaruʼ si pa nácacaʼ de sti raza o de sti guidxi. Guníʼ ique ndiʼ: «¿Ximodo ruuyaʼ laacabe? ¿Ñee ruuyaʼ laacabe zacá pur ni riníʼ binni de laacabe la? o pur runeʼ biaʼyaʼ laacabe?». Sti cosa ni zanda gacané lii nga gucaanaluʼ ca entretenimientu casi película o xiixa lu red social ni napa violencia ni zanda gucaa lii gaca nanaláʼdxiluʼ.
Zanda gacané Stiidxaʼ Dios laanu cueenu de ndaaniʼ íquenu ne de ndaaniʼ ladxidoʼno guiráʼ ni rucaa laanu gaca nanaláʼdxinu
Nuu biaje raca nagana para laanu guininu ni dxandíʼ caníʼ íquenu ne ni cayuni sentirnu. Peru Stiidxaʼ Dios racané laanu gánnanu «xi riníʼ íquenu ne xi deseu nuu ndaaniʼ ladxidoʼno» (Hebreos 4:12). Nga runi, biiyaʼ xi rusiidiʼ Biblia ne bichaaga ni rusiidiʼ ni ne ni riníʼ íqueluʼ. Despué biʼniʼ stipa guiníʼ íqueluʼ modo rusiidiʼ Biblia. Purtiʼ Stiidxaʼ Dios zanda gusaba «ca cosa ni zuhuaa dxiichiʼ casi ti torre» ne cueeni guenda raca nanalaʼdxiʼ ndaaniʼ ladxidoʼno (2 Corintios 10:4, 5).