«Guzíʼ ni dxandíʼ ne cadi gutooloʼ ni»

1, 2. a) ¿Xi cosa jma risaca nápanu lu xquendanabáninu? b) ¿Xii nga ni rusiidiʼ Jiobá laanu ni guizáʼ rusisácanu ne xiñee? (Biiyaʼ ca dibuju ne foto ni zeeda ra ruzulú tema riʼ).

¿XI COSA jma risaca nápanu lu xquendanabáninu yaʼ? ¿Ñee nuunu dispuestu guchaʼnu ni pur sti cosa ni huaxiéʼ risaca la? Cadi nagana respuesta riʼ para ca xpinni Dios purtiʼ ni jma risaca para laanu nga amistad ni nápanu né Jiobá ne qué ziuu dxi guchaʼnu ni pur sti cosa. Laaca guizáʼ risaca para laanu cani dxandíʼ ni rusiidiʼ Biblia, purtiʼ pur laacani randa raca xhamígunu Bixhózenu ni nuu guibáʼ (Col. 1:9, 10).

² Jiobá nga maestru ni jma nanna gusiidiʼ, ne rusiidibe laanu stale cosa risaca ni zeeda lu Biblia. Luni rábibe laanu tu labe, xi riníʼ labe ne ruluiʼbe laanu ca cualidad sicarú ni nápabe. Rusiénebe pabiáʼ nadxiibe laanu ra bidiibe Xiiñibe, Jesús, gatiʼ pur laanu. Laaca caníʼ ni de ti Reinu mesiánicu ne de esperanza ni napa ca ungidu de guibánicaʼ guibáʼ ne esperanza ni napa ca «xcaadxi dendxu» de guibánicaʼ ndaaniʼ ti paraísu lu Guidxilayú riʼ (Juan 10:16). Laaca rusiidibe laanu ximodo guibáninu jma jneza. Guizáʼ risaca guiráʼ ni rusiidiʼ Jiobá laanu purtiʼ racané cani laanu guidxíñanu laabe ne pa chinándanu cani zapa guendanabani stinu sentidu.

3. ¿Xi qué riníʼ diidxaʼ «guzíʼ ni dxandíʼ»?

³ Ora ruzeeteʼ Biblia sinu cani dxandíʼ rusiidiʼ Stiidxaʼ Dios, ¿ñee caníʼ ni naquiiñeʼ sinu ni né bueltu la? Coʼ. Cumu guizáʼ generoso Jiobá la? dede bidii Xiiñiʼ ni jma nadxii gatiʼ pur binni ne bíʼnibe ni gratis. Ora ruuyaʼ Jiobá cuyubi ti binni ganna ni dxandíʼ de lu Biblia, racanebe binni ca guidxela ni ne qué ziuu dxi guinábabe bueltu laa. Ti biaje gucalaʼdxiʼ ti hombre láʼ Simón nudii bueltu apóstol Pedro para nudii laabe autoridad ti ganda gudiibe espíritu santu xcaadxi binni, Pedro gudxi laabe cadi jneza ni canábabe que ne ná rabi laabe: «Gatineluʼ bueltu stiluʼ, purtiʼ guníʼ íqueluʼ zanda siluʼ ni bisigaʼdeʼ Dios laadu» (Hech. 8:18-20, TNM). Yanna, ¿xi riníʼ diidxaʼ «guzíʼ ni dxandíʼ» yaʼ?

¿XI RINÍʼ DIIDXAʼ SINU NI DXANDÍʼ?

4. ¿Xi zazíʼdinu de cani dxandíʼ rusiidiʼ Biblia lu tema riʼ?

⁴ (Biindaʼ Proverbios 23:23). Caquiiñeʼ gúninu stipa ne laaca naquiiñeʼ chuʼnu dispuestu gúninu intiica sacrificiu para ganda guizíʼdinu cani dxandíʼ rusiidiʼ Stiidxaʼ Dios. Casi guníʼ hombre ni bicaa libru stiʼ Proverbios, ora maʼ bizíʼdinu cani dxandíʼ rusiidiʼ Stiidxaʼ Dios la? caquiiñeʼ chuʼnu cuidadu cadi gutoʼno ni o gusaana de gusisácanu ni. Zadúʼyanu xi riníʼ sinu cani dxandíʼ rusiidiʼ Biblia ne pabiáʼ caquiiñeʼ quíxenu ti gápanu cani. Ndiʼ zacané laanu gusisácanu ni ne zucaa ni laanu cadi lica gutoʼno ni. Laaca zazíʼdinu xiñee nabé risaca gúninu intiica sacrificiu para sinu cani dxandíʼ rusiidiʼ Stiidxaʼ Dios.

5, 6. a) ¿Ximodo zanda sinu cani dxandíʼ rusiidiʼ Biblia sin quíxenu gastiʼ? Bizeeteʼ ti ejemplu. b) ¿Xi zabeendunu pa sinu cani dxandíʼ rusiidiʼ Biblia?

⁵ Dede ora cudiicabe laanu xiixa gratis la? zándaca caquiiñeʼ gúninu xiixa o gudiʼnu xiixa ti guicaanu ni. Diidxaʼ hebreu ni biquiiñecabe lu Proverbios 23:23 para biʼniʼ traducírcabe diidxaʼ «guzíʼ» laaca zanda gaca significar ni «gucuaa». Ni ná diidxaʼ riʼ nga caquiiñeʼ gúninu stipa para ganda guicaanu xiixa o guchaʼnu ni pur sti cosa jma risaca. Guzéʼtenu ti ejemplu, guxuíʼlunu nuu ti letreru ra luguiaa ni ná zanda guicaa binni biduaa gratis. Peru ¿ñee zindá ca biduaa ca lu mexaʼ stinu sin gúninu gastiʼ la? Coʼ njaʼ. Neca cusigáʼdesicabe ni laanu la? caquiiñeʼ gúninu stipa ne cueenu tiempu para chuunu ra luguiaa ne guicaanu cani. Zacaca zeeda gaca cani dxandíʼ rusiidiʼ Stiidxaʼ Dios, cadi naquiiñeʼ sinu cani né bueltu, peru caquiiñeʼ gúninu xiixa para guicaanu ni.

⁶ (Biindaʼ Isaías 55:1-3). Ca diidxaʼ stiʼ Jiobá ni cá lu libru stiʼ Isaías racané cani laanu guiénenu xi riníʼ sinu cani dxandíʼ rusiidiʼ Stiidxaʼ Dios. Lu relatu riʼ cuchaaga Dios stiidxaʼ casi nisa, leche ne vinu. Cani dxandíʼ rusiidiʼ Stiidxaʼ Dios zeeda gaca cani casi ti vasu nisa ni nayá ne ni rusigaandaʼ ti binni ni cayati nisa. Ne cásica racané leche para guiniisi cani nahuiiniʼ la? zacaca racané stiidxaʼ Jiobá laanu para guiniisinu en sentidu espiritual. Yanna, ¿ximodo nga zeeda gaca stiidxaʼ Jiobá casi vinu yaʼ? Ora ruzeeteʼ Biblia de vinu la? caníʼ ni de ora riuu binni nayecheʼ (Sal. 104:15). Nga runi, ora rabi Dios laanu sinu vinu la? cayábibe laanu caquiiñeʼ chinándanu ca norma stibe para guibáninu nayecheʼ (Sal. 19:8). Né ca ejemplu riʼ, cayacané Jiobá laanu guiénenu xi zabeendunu pa guizíʼdinu de cani dxandíʼ rusiidiʼ Stiidxabe ne gúninu ni ná cani lu xquendanabáninu. Nga runi, guidúʼyanu gaayuʼ cosa ni bisaananu para sinu cani dxandíʼ rusiidiʼ Stiidxaʼ Dios.

¿XI COSA MAʼ BISAANANU PARA GUSINU CANI DXANDÍʼ?

7, 8. a) ¿Xiñee caquiiñeʼ cueenu tiempu para sinu cani dxandíʼ rusiidiʼ Stiidxaʼ Dios? b) ¿Xi guyuu ti baʼdudxaapaʼ dispuesta guni, ne xi beneficiu gupa?

⁷ Tiempu. Ndiʼ nga ti cosa ni caquiiñeʼ para ganda sinu cani dxandíʼ rusiidiʼ Stiidxaʼ Dios. Caquiiñeʼ cueenu tiempu para gucaʼdiáganu mensaje stiʼ Reinu, guidúʼndanu Biblia ne ca publicación stinu, gápanu estudiu personal, gaca prepararnu para ca reunión ne cadi guiaadxanu. Ne caquiiñeʼ cueenu tiempu riʼ de ca cosa ni cadi tan risaca ni rúninu (biindaʼ Efesios 5:15, 16). ¿Pabiáʼ tiempu caquiiñeʼ ti binni para guiziidiʼ cani dxandíʼ rusiidiʼ Biblia yaʼ? Cadi biáʼqueca tiempu riquiiñeʼ cada binni purtiʼ gadxé circunstancia napa cada tobi. Peru gastiʼ ti límite para guiziidiʼ binni pabiáʼ nuu xpiaaniʼ Jiobá, de personalidad stibe ne de guiráʼ cani maʼ bizaʼbe (Rom. 11:33). Primé númeru stiʼ revista riʼ lu diidxaʼ inglés bichaaga ni cani rusiidiʼ Stiidxaʼ Dios casi «ti guiéʼhuiiniʼ», ne sicaríʼ bizeeteʼ ni: «Cadi chuʼluʼ conforme pa maʼ nápaluʼ ti guiéʼhuiiniʼ de cani rusiidiʼ Stiidxaʼ Dios. Pa ñaca tobi si caquiiñenu la? qué nudii Dios laanu stale de laacani. Cadi gusaanuʼ de guchuuguluʼ guiéʼhuiiniʼ de cani rusiidiʼ Stiidxaʼ Dios». Gunabadiidxaʼ laca lii: «¿Panda guiéʼhuiiniʼ de cani dxandíʼ rusiidiʼ Stiidxaʼ Dios napaʼ yaʼ?». Ne dxi guibáninu para siempre qué zusaana de guizíʼdinu de Jiobá. Yanna riʼ, ni jma risaca gúninu nga iquiiñenu tiempu stinu para sinu guiráʼ cani dxandíʼ rusiidiʼ Dios. Guidúʼyanu ejemplu stiʼ ti binni ni biziidiʼ de cani dxandíʼ rusiidiʼ Dios.

⁸ Ti baʼdudxaapaʼ de Japón ni láʼ Marikoa yendeza Nueva York (Estados Unidos) para guni estudiar ti carrera. Maʼ riebe ndaaniʼ ti religión ni biasastí Japón. Ti dxi guniʼné ti precursora laabe ora canayuni predicar de yoo pur yoo. Ne ora bizulú biziidiʼ Mariko cani dxandíʼ rusiidiʼ Biblia guizáʼ biecheʼ dede gunábabe precursora riʼ guni estudiarné laabe chupa biaje lu ti semana. Neca nuu xhiiñabe purtiʼ cayuni estudiarbe carrera stibe ne rúnibe dxiiñaʼ la? nagueendaca guyebe ca reunión stinu. Ne laaca bisaanabe de gúnibe caadxi cosa ne guleebe tiempu para guiziidibe ni rusiidiʼ Biblia. Pur bíʼnibe ca sacrificiu riʼ gucané ni laabe guiniisibe en sentidu espiritual. Menu de ti iza guyuunísabe ne xhoopaʼ beeu despué, lu iza 2006, gúcabe precursora ne dede yanna nácarube ni.

9, 10. a) ¿Ximodo ruchaa xquendanabáninu ora rizinu cani dxandíʼ rusiidiʼ Biblia? b) ¿Xi bisaana ti baʼdudxaapaʼ, ne ximodo runi sentirbe pur ni bíʼnibe?

⁹ Cosa material. Para ganda sinu cani dxandíʼ rusiidiʼ Stiidxaʼ Dios la? zándaca caquiiñeʼ gusaananu dxiiñaʼ stinu o ti profesión ra runi ganarnu stale bueltu. Guiníʼ íquenu ejemplu stiʼ Pedro ne Andrés, laacaʼ gúpacaʼ negocio benda. Dxi biʼniʼ invitar Jesús laacabe para guyúbicabe binni cásica ruyúbicabe benda la? nagueendaca bisaanacabe tarraya stícabe ne zinándacabe laa (Mat. 4:18-20). Peru cadi guiráʼ binni ni guiziidiʼ cani dxandíʼ rusiidiʼ Biblia caquiiñeʼ gusaanacaʼ dxiiñaʼ sticaʼ, purtiʼ caquiiñeʼ gúnicaʼ dxiiñaʼ para gudiicaʼ ni caquiiñeʼ familia sticaʼ (1 Tim. 5:8). Peru ora riziidiʼ tuuxa ni dxandíʼ zándaca guchaa modo ruuyaʼ ca cosa material ne gudii cuenta xii nga jma risaca lu xquendanabani. Ne zacá guníʼ Jesús ora gudxi laanu «cadi guyubi tu gapa tu stale ni risaca ndaani guidxilayú riʼ. Sínuque laguyubi gapa tu ni risaca ibáʼ» (Mat. 6:19, 20). Guidúʼyanu ni bizaaca ti baʼdudxaapaʼ.

¹⁰ Ante cheʼ María scuela biziidiʼ quiteʼ golf. Ne dxi maʼ nuube secundaria, bidiicabe laabe ti beca para chebe ti universidad purtiʼ guizáʼ nánnabe quítebe golf. Guizáʼ riuuláʼdxibe quítebe golf, ne gúpabe meta gácabe ti jugadora profesional ne guni ganarbe stale bueltu. Peru ti tiempu despué de bireebe de universidad la? bizulú biʼniʼ estudiarbe Biblia. Nabé riuuláʼdxibe ni caziidibe que ne pabiáʼ racané ni laabe lu xquendanabánibe. Laabe guniʼbe: «Ra jma bineʼ cani caziideʼ lu xquendanabaneʼ la? jma nayecheʼ guyuaaʼ». Biénebe qué zanda gápabe cosa espiritual ne gápacabe cosa material (Mat. 6:24). Ngue runi guyuube dispuesta gusaanabe ni cá íquebe gúnibe que, gácabe ti golfista profesional, gápabe stale bueltu ne gácabe famosa. Tiempu riʼ precursora María ne guniʼbe jma nayecheʼ nabánibe ne maʼ napa xquendanabánibe sentidu.

11. ¿Xi zanda guizaaca né amistad ni nápanu né ca xhamígunu ne ca familia stinu ora sinu cani dxandíʼ rusiidiʼ Biblia?

¹¹ Amistad ni nápanu né ca xhamígunu ne familia stinu. Ora ricá íquenu gúninu ni ná ca norma stiʼ Dios lu xquendanabáninu zándaca chuʼ tu guixeleʼ de laanu. ¿Xiñee yaʼ? Purtiʼ ora canabaʼ Jesús pur ca xpinni la? gúdxibe Jiobá ca diidxaʼ riʼ: «Biquiiñeʼ stiidxaluʼ para guni santificarluʼ laacabe, purtiʼ stiidxaluʼ nga ni dxandíʼ» (Juan 7:17, TNM). Diidxaʼ «santificar» laaca riníʼ ni «guleechú laacabe». Ora rinándanu cani rusiidiʼ Stiidxaʼ Dios la? rixélenu de cani runi binni guidxilayú. Gadxé modo ruuyaʼ binni laanu purtiʼ maʼ gadxé laanu ne maʼ rinándanu cani rusiidiʼ Biblia. Cadi nuunu guixélecabe de laanu, peru zándaca guixeleʼ caadxi de ca xhamígunu o familia stinu de laanu o dede zándaca gucaalucaʼ laanu pur ni runi crenu. Ne zacá guníʼ Jesús zazaaca ca xpinni ora guníʼ ca diidxaʼ riʼ: «Ca binni lidxi pe hombre zaca nanalaʼdxi laa» (Mat. 10:36). Ne laaca gúdxibe laanu neca gusaana de gúninu stale cosa risaca jma stale ni zabeendunu pa sinu cani dxandíʼ rusiidiʼ Stiidxaʼ Dios (biindaʼ Marcos 10:28-30).

12. ¿Pabiáʼ guyuu ti empresariu dispuestu quixheʼ para síʼ cani dxandíʼ rusiidiʼ Stiidxaʼ Dios?

¹² Ti empresariu judíu láʼ Aarón bisiidicabe laa dxi nahuiiniʼ cadi naquiiñeʼ guiníʼ lá Dios. Peru nuube gánnabe ni dxandíʼ de Dios. Ti dxi bisiidiʼ ti Testigu laabe pa guicá caadxi vocal cueʼ guidapaʼ consonante ni ricané lá Dios lu diidxaʼ hebreu la? ñanda ñuundaʼ binni ni sicaríʼ: «Jiobá». Guizáʼ biéchebe dede yetidxibe ca maestru rabinu ni biziidibe. Peru gadxé modo gucuaacabe ni, lugar de ñéchecabe purtiʼ maʼ biziidibe cani dxandíʼ rusiidiʼ Biblia de láʼ Dios la? laga bichaxhínnicaʼ ládibe ne guládxicaʼ laabe de raqué. Laaca bixeleʼ familia stibe de laabe. Peru neca zaqué, qué nusaanabe de niziidibe de Jiobá. Guyuunísabe ne biʼniʼ servirbe Dios biaʼ dxi bibánibe. Cásica Aarón, laaca nuunu dispuestu guni aceptarnu intiica si cambiu lu xquendanabáninu o xiixa tratu ni nápanu né familia stinu para ganda sanu lu neza ni dxandíʼ.

13, 14. Para ganda sinu ni dxandíʼ, ¿xi cambiu caquiiñeʼ guninu ne ximodo zanda gúninu ni? Bizeeteʼ ti ejemplu.

¹³ Cadi guiníʼ íquenu cosa malu ne cadi gúninu ni cadi jneza. Pa racaláʼdxinu guizíʼdinu ni dxandíʼ ne guibáninu modo ná Dios la? caquiiñeʼ chuʼnu dispuestu guchaʼnu modo riníʼ íquenu ne ni rúninu. Para ganda gúninu ni la? zanda chinándanu conseju ni bidii Pedro: «Lagaca casi baʼdu ni ruzuuba diidxaʼ, ne ma cadi guni tu ni na ique tu casi biʼni tu dxi caʼru gunibiáʼ tu Dios». Ne laaca guniʼbe: «Lu guiráʼ ni gúnitu la? lagusihuinni nácatu santo, cásica naca Dios ni gulí laatu Santo» (1 Ped. 1:14, 15, TNM). Guzéʼtenu ti ejemplu, ndaaniʼ guidxi Corinto, ti lugar ra biʼniʼ binni puru cosa malu bizulú biziidiʼ binni cani dxandíʼ rusiidiʼ Stiidxaʼ Dios ne bichaacaʼ modo nabánicaʼ (1 Cor. 6:9-11). Zacaca tiempu nabáninu riʼ, stale binni maʼ bichaa modo laa para ganda guiziidiʼ cani dxandíʼ rusiidiʼ Biblia. Laaca gudxi Pedro ca primé xpinni Cristu ca diidxaʼ riʼ: «Ma biaʼ cati de guni tu irá ni runi cani qué runibiáʼ Dios. Chiqué uyuu né tu laacabe tobi si lu irá viciu. Ucuá ique tu ni cadi jneza, uxudxi tu, biʼni tu saa para xhudxi si tu, ne yenanda tu ca bidóʼ, neca nexhe cadi chi nanda tu laacaʼ» (1 Ped. 4:3).

¹⁴ Maʼ stale iza de rixudxi Devynn ne Jasmine. Naca Devynn ti contador ni nanna stale, peru pur guendarixudxi stibe riládxicabe laabe de ra dxiiñaʼ. Ne Jasmine naca ti gunna naduxhuʼ ne nagueenda ridxiichi. Peru ti dxi, naxudxi Jasmine zizá lu carretera bidxaagabe ti guendaxheelaʼ de misioneru, biaana ca hermanu riʼ chigánnacaʼ laabe ra lídxibe para guni estudiárnecaʼ laabe Biblia. Peru ora yendá ca hermanu riʼ ra lídxicabe la? naxúdxicabe. Qué niníʼ íquecabe pa niganna ca misioneru riʼ laacabe. Peru sti dxi guyé ca hermanu riʼ la? bicaadiágacabe laacaʼ. Ne dede dxi bizulú biʼniʼ estudiárcabe la? gudixheʼ íquecabe gúnicabe ni caziidicabe. Menu de chonna beeu gucuaacabe decisión de maʼ cadi xúdxicabe ne despué bichaganácabe. Ne guiráʼ binni xquídxicabe gúnnacaʼ maʼ bichaa cani rusiidiʼ Biblia laacabe ne stale de laaca gucuaacaʼ estudiu.

15. ¿Xi ti cosa zanda gucueeza binni para cadi síʼ cani dxandíʼ rusiidiʼ Stiidxaʼ Dios, ne xiñee?

¹⁵ Costumbre ne tradición ni cadi zeeda lu Biblia. Nuu binni qué raca nagana para laacaʼ gusaana caadxi costumbre ne tradición ni qué riuulaʼdxiʼ Dios. Peru xcaadxi la? raca nagana para laacaʼ sicaʼ cani dxandíʼ rusiidiʼ Stiidxaʼ Dios. Purtiʼ riníʼ íquecaʼ qué zanda gusaanacaʼ ca costumbre nápacaʼ pur ni guiníʼ familia sticaʼ, ca compañeru de dxiiñaʼ ne ca xhamígucaʼ. Ne jmaruʼ si raca ni nagana para laacabe pa rúnicabe xiixa para gusisácacabe ca binnilídxicabe ni maʼ guti (Deut. 14:1). Ora ridúʼyanu pabiáʼ valor napa stale hermanu zanda gacané ni laanu guchaʼnu modo laanu. Guidúʼyanu ni biʼniʼ caadxi binni bibani ndaaniʼ guidxi Éfeso lu primé siglu.

16. ¿Xi biʼniʼ caadxi binni de Éfeso para guziʼcaʼ cani dxandíʼ rusiidiʼ Biblia?

¹⁶ Nabé binibiáʼ binni guidxi Éfeso purtiʼ nabe biʼniʼ practicar ca binni que brujería. ¿Xi biʼniʼ ca binni de Éfeso ni guca xpinni Cristu yaʼ? Biblia ná: «Zaqueca stale de ca ni runi brujería. Bedané ca libru stica para icá gui nezalú irá binni que. Ne ulee cabe cuenta pabiáʼ risaca cani. Biaʼsi bidii ni cincuenta mil moneda de plata. Zaqué jma rusi bireeche stiidxa Señor [Jiobá] ne biʼni ni dxiiña ndaani ladxidóʼ stale binni» (Hech. 19:19, 20). Guyuu ca xpinni Cristu riʼ dispuestu guzaaquicaʼ ca libru caru que, ne pur ngue jma risaca ca ndaayaʼ gucuaacabe.

17. a) ¿Xi cosa zándaca bisaananu para sinu cani dxandíʼ rusiidiʼ Stiidxaʼ Dios? b) ¿Xi pregunta zacábinu lu sti tema ca?

¹⁷ ¿Xi maʼ bisaanaluʼ para guziʼluʼ cani dxandíʼ rusiidiʼ Stiidxaʼ Dios yaʼ? Guiranu nga maʼ guleenu tiempu para guchúʼgunu guiéʼhuiiniʼ ni zeeda gaca cani rusiidiʼ Stiidxaʼ Dios. Peru nuu tu laa caquiiñeʼ gusaana de guyubi cosa material ne chuʼ dispuestu pa guixeleʼ familia ne ca xhamigu de laa. Ne stale tu caquiiñeʼ guchaa ni riníʼ ique ne ni runi, ne dede gusaana ca costumbre ne tradición ni cadi zeeda de Dios. Nuunu seguru jma risaca cani guleendunu ra guzinu cani dxandíʼ rusiidiʼ Stiidxaʼ Dios que intiica sacrificiu ni maʼ bíninu. Ne pur nga maʼ nápanu ti cosa jma risaca, amistad ni nápanu né Jiobá. Ora runi meditarnu lu guiráʼ ni ribeendú ti binni ora riziidiʼ de cani dxandíʼ rusiidiʼ Stiidxaʼ Dios raca nagana para laanu guiníʼ íquenu chuʼ tu gutoo ni. ¿Ximodo zanda gutoo binni ni yaʼ? ¿Ne xi zacané laanu cadi lica guiníʼ íquenu gutoʼno ni yaʼ? Zacábinu ca pregunta riʼ lu sti tema ca.