Ndaa Ra Rinabadiidxaʼ

◼ Ximodo zanda gacanenu cani maʼ napa stale tiempu de qué rucheeche diidxaʼ para ganda gúnicaʼ dxiiñaʼ riʼ sti biaje.

Ora tuuxa ni maʼ qué rucheeche diidxaʼ gusihuinni dxandíʼ maʼ racalaʼdxiʼ guni ni na Jiobá la? rusiecheʼ nga laanu stale (Luc. 15:4-6). Zándaca maʼ qué ñuundabe Biblia, maʼ qué nidagulisaabe ne maʼ qué nucheechebe diidxaʼ pur bicaalú binni laabe o pur ca guendanagana stibe. Ximodo jma jneza gacanenu laabe guiniisibe lu stiidxaʼ Dios yaʼ.

Primeca laanu nga naquiiñeʼ gábinu laabe dxandíʼ nadxiinu laabe. Ne nagueendaca naquiiñeʼ guʼyaʼ ca binnigola xi caquiiñebe ti chuʼbe gaxha de Dios sti biaje (Sant. 5:14, 15). Pa cadi xadxipeʼ nga de qué rucheechebe diidxaʼ la? zándaca ni caquiiñeʼ si nga gacané tobi ni maʼ xadxí rucheeche diidxaʼ laabe. Peru pa maʼ xadxí nga de bixélebe de ca xpinni Cristu la? naquiiñeʼ guidxela sti modo gacanécabe laabe. Zándaca jma galán guʼndanécabe laabe xiixa libru ni gacané laabe iguidxi fe stibe ne gusisácabe guiráʼ ni rusiidiʼ Dios laanu. Binnigola ni ruuyaʼ modo rireeche diidxaʼ nga guʼyaʼ chuʼ ti xpinni Cristu ni zuhuaa dxiichiʼ lu stiidxaʼ Dios para guʼndané laabe (Heb. 5:12-14; biiyaʼ «Ndaa ra rinabadiidxaʼ» ni beeda lu Xhiiñaʼ Reinu ni Rúninu stiʼ noviembre iza 1998). Pa runibiaʼluʼ tuuxa ni caquiiñeʼ gacanécabe laa la? guniʼné binnigola ni ruuyaʼ modo rireeche diidxaʼ.

Ante gábinu tuuxa ni maʼ napa stale tiempu de qué rucheeche diidxaʼ guireené laanu sti biaje la? jma galán guiniʼné chupa binnigola laabe para gúʼyacaʼ pa rúnibe guiráʼ ni naquiiñeʼ guni tuuxa ni rucheeche stiidxaʼ Reinu. Zaniʼnécabe laabe cásica rúnicabe ora ridagulisaanécabe tuuxa ni deruʼ chigucheeche diidxaʼ (biiyaʼ Torre stiʼ ni Rapa 15 stiʼ noviembre 1988, yaza 17 ne libru Xipeʼ ndiʼ cusiidiʼ Biblia yaza 177, párr. 9-11). Naquiiñeʼ gusihuínnibe dxandíʼ racaláʼdxibe gucheechebe ca diidxaʼ nacubi ne galán stiʼ Reinu. Laaca naquiiñeʼ gúnibe guiráʼ ni ruzeeteʼ ni rizaané Xhiiñaʼ Reinu ni Rúninu stiʼ diciembre 2006, yaza 3, o libru Organizados yaza 79 dede 81 ne chebe guiráʼ guendaridagulisaa.

Yanna, xi zanda guni tuuxa ni maʼ rucheeche diidxaʼ sti biaje para iguidxi fe stiʼ ne cadi guixeleʼ de Jiobá yaʼ. Zanda quíxhebe pora gúʼndabe Biblia ne cadi guireebe lu neza ra zanda guicaabe guendanabani ni qué zaluxe (Mat. 7:14; Heb. 10:23-25). Pa gucaa íquebe sabe «jneza» ne gápabe ca guenda ni naquiiñeʼ gapa ca xpinni Cristu la? qué ziuuruʼ dxi gusaana de gucheechebe diidxaʼ (2 Ped. 1:5-8).