Guendananna stálepeʼ stiʼ Dios jma dxíʼbani que stiʼ hombre
1 Nuu tu runi cré de que ni naquiiñeʼ ñuni ca testigu stiʼ Jiobá nga nuyúbicabe ximodo ñacanécabe niluxe ca guendanagana napa binni yanna. Ca binni riníʼ ique zacá la? qué ruuyadíʼcabe pabiáʼ risaca dxiiñaʼ stinu de gusiidinu binni ni na Biblia. Cásipeʼ guníʼ apóstol Pablu, «purti ora riete xi pur guti Cristu lu [yaga] la? ruluíʼ enda huati si ni para cani cananiti, peru laanu nanna nu laani nga enda nandxóʼ sti Dios purti pur laani ma bilá nu» (1 Cor. 1:18). Peru laanu nannadxíchinu de que guendarucheeche diidxaʼ ni runi cani zinanda Cristu nga ti dxiiñaʼ jma risaca ni cayaca guidubi naca Guidxilayú.
2 Ti guendanabani sicarú yanna. Stipa ni cayuni binni pur gunichaahuiʼ ca guendanagana ca la? huaxiéʼ ni ribeendú cani. Ca ley ni rudii ca jués ca, cadi cucueeza diʼ cani ca guendaquéiquiiñeʼ ca. Cani ruzabiruaa ca hombre ca, ne ca soldadu ni nuu para cuu dxi binni la? qué ganda diʼ gucueezacabe ca guendaridinde ca. Guiráʼ ni cayuni hombre pur gacané binni la? qué huayanda cuee cani guendapobre (Sal. 146:3, 4; Jer. 8:9). Peru, stiidxaʼ Reinu huayacané miyón binni guchaa xquendanabani casi riulaʼdxiʼ Dios (Rom. 12:2; Col. 3:9, 10). Ne sicaríʼ la? zanda gápacabe ti guendanabani sicarú yanna (1 Tim. 4:8).
3 Ti guendanayecheʼ ni zeeda. Aparte de gacané ni laanu para gudxiilunu ca guendanagana stinu la? guendananna stálepeʼ stiʼ Dios racané ni laanu chuʼnu listu ne jma galán para ca dxi zeeda ca (Sal. 119:105). Rucueeza ni laanu de gúnisinu stipa pur guyúbinu gacachaahuiʼ modo nabeza binni lu guidxilayú riʼ (Ecl. 1:15; Rom. 8:20). Dxandíʼ nga nayecheʼ nuunu purtiʼ cadi caguítesinu xtiémpunu para chinándanu guiráʼ ni riguixhe ique binni guni ne qué ganda ugaanda. Sínuque caquiiñenu xtiémpunu para chinándanu ni maʼ bizabiruaa Jiobá de guzáʼ «ti guidxilayú cubi ne ti ibáʼ cubi» ra zaca puru si ni jneza. Ora idxiña dxi stiʼ Jiobá la? zahuínnica de que cani biʼniʼ cré de idubi ladxidóʼ lu guendananna stálepeʼ stibe la? bíʼnicaʼ ni jneza (2 Ped. 3:10-13; Sal. 37:34).
4 Neca guendananna stálepeʼ stiʼ Dios ruluíʼ huaxiéʼ riquiiñeʼ ni para cani runi cré «xquenda biaani binni guidxilayú» la? ni dxandíʼ nga laasi ni nga naquiiñeʼ chinándanu (1 Cor. 1:21; 2:6-8). Nga runi, zucheecherunu stiidxaʼ Dios guidubi naca Guidxilayú purtiʼ laabe nga «tobi lucha Dios [ni] riene chaahui irá cosa» (Rom 16: 27).