Ca soldadu dxiʼbaʼ maniʼ ni cá lu Apocalipsis ni ziulaʼdxuʼ gannuʼ de laacaʼ
1, 2. Ximodo ndiʼ laaca cayacané ca sierbu stiʼ Dios yanna para gaca cani bihuinni lu bisión ni cá lu Apocalipsis 9:13-19.
1 Biluxe bixhidxi si ra bizaa «xhoopaʼ ángel que [x]trompeta» la? ca soldadu dxiʼbaʼ maniʼ, «biaʼ chupa [gayuaa] millón» que, ziguxooñecaʼ nadipaʼ. Cadi tutiica si soldadu ni nanda guiibaʼ nga laacabe. «Ique [...] [ca cabayu que] zeda aca casi ique lion.» «Ne caree bele ne guʼxhu ne azufre ndaani ruaa came» ne «casi beenda xcola came». Ca soldadu dxiʼbaʼ maniʼ, ni bihuinni lu bisión riʼ la? cunduuxecaʼ ra zidíʼdicaʼ (Apo. 9:13-19). Ñee nannuʼ ximodo cayacaneluʼ ra cayaca ca guendaridxagayaa ni bihuinni lu bisión ca la?
2 Xcaadxi de cani bibí ca ne cani runinécabe dxiiñaʼ, ca xcaadxi dendxuʼ ca, tobi si nuucabe para iníʼcabe de juisiu stiʼ Dios, ne zacá nga rusihuínnicabe de que ca relijión ni nacaʼ zinándacaʼ Cristu la? nuucaʼ casi gueʼtuʼ qué gánnacaʼ gastiʼ de Dios. Chigúʼndanu chupa cosa stiʼ bisión riʼ ni ruluíʼ xiñee nabé racané dxiiñaʼ ni runi ca sierbu stiʼ Dios.
3. Xi huayacané lii para guiziidiluʼ gucheecheluʼ stiidxaʼ Dios jneza.
3 Maʼ nuunu listu para gábinu binni ni na Dios. Ne Scuela stiʼ cani Rucheeche Diidxaʼ ne xcaadxi guendaridagulisaa ni raca ca la? maʼ biziidiʼ ca sierbu stiʼ Dios para guiniʼcaʼ stiidxaʼ Dios sin idxíbicaʼ. Cásica biʼniʼ Jesús ne ca disípulo stiʼ la? cuyúbicabe cani naquiiñeʼ ucaadiaga ne cucheechecabe diidxaʼ ratiica guidxélacabe binni (Mat. 10:11; Mar. 1:16; Luc. 4:15; Hech. 20:18-20). Ra zinándacabe modo na Biblia guireecheʼ diidxaʼ ca la? huabeendúcabe stale ni galán.
4. Xii ndiʼ cani nápanu para iquiiñenu ora ma zigucheechenu diidxaʼ yaʼ.
4 Laanu ca sierbu stiʼ Dios huasaananu stalepeʼ Biblia, libru, foyetu ne rebista ora maʼ zigucheechenu stiidxaʼ Dios. Riree cani biaʼ tapagayuaa diidxaʼ, huayeedané cani de guiráʼ clase tema ne huayaca cani para gadxé gadxé binni ti ganda chuláʼdxicabe ni. Ñee caquiiñeluʼ cani jneza la?
5, 6. Ximodo nánnanu de que dede ibáʼ cayacané Jiobá xquidxi.
5 Dede ibáʼ culuíʼcabe ne cayacanécabe laanu. Bisión ca laaca culuiʼni nayá guieʼ de que Dios cayacané gaca dxiiñaʼ ni cayuni ca soldadu dxiʼbaʼ cabayu ni bihuinni lu bisión ca (Apo. 9:13-15). Dxiiñaʼ ni cayaca lu guidubi naca Guidxilayú riʼ la? cadi cayaca diʼ ni pur guendabiaaniʼ stiʼ hombre o pur poder sticaʼ, sínuque pur espíritu stiʼ Dios (Zac. 4:6). Jiobá caquiiñeʼ ca ánjel stiʼ para gaca dxiiñaʼ riʼ (Apo. 14:6). Nga runi, cadi ca Testigu si nga cayúnicaʼ dxiiñaʼ riʼ, Jiobá laaca cuseendaʼ dede ibáʼ tu gacané para cuidxi cani nachaʼhuiʼ (Juan 6:45, 65).
6 Xquíxepeʼ Jiobá pur cusiidichaahuiʼ laanu ti ganda gucheechenu stiidxaʼ, ne pur cuseendabe ca ánjel para gacané laanu la? xquidxi Jiobá nácacaʼ ti stipa nadipaʼ ni qué zanda cueza. Cadi gusaananu de gúninu xhiiñanu yanna ra maʼ cayaca cani bihuinni lu bisión ca.