«Lagusiroobaʼ guendarannaxhii stitu»
1. Xii nga naquiiñeʼ gúninu guiranu.
1 Laanu nuunu lade ca bíchinu ne bizánanu ni zinanda Cristu, nga runi guiranu naquiiñeʼ acanenu ti chuʼnu nayecheʼ ra ridagulisaanu (1 Ped. 1:22; 2:17). Guendanayecheʼ riʼ zápanu ni pa gusiróʼbanu guendarannaxhii ni nápanu laacabe (2 Cor. 6:12, 13). Xiñee galán nga gunibiáʼchaahuinu ca bíchinu ne ca bizánanu yaʼ.
2. Xiñee nga risaca gaca xhamígunu ca bíchinu ne ca bizánanu.
2 Amistá ca rácani jma naguidxi. Ra gunibiaʼnu jma ca bíchinu ne ca bizánanu la? jma zusisácanu fe stícabe ne laacabe purtiʼ cadi cusaanacabe Jiobá ne zusisácanu ca guenda nápacabe. Maʼ qué zazaláʼdxipenu ora ucheenécabe laanu, ne jma naguidxi zaca amistá ni nápanu laacabe. Ra jma gunibiáʼsaanu laanu, jma zánnanu ximodo uguusaanu gana laanu ne zanda gacanesaanu para chuʼdxi ladxidoʼno (1 Tes. 5:11). Zanda gacanesaanu para gudiʼnu stipa laanu ti ganda gudxiilunu guiráʼ cani qué iquiiñeʼ ni rucaa ca binni zinanda Binidxabaʼ ca laanu gúninu (Col. 4:11). Cumu cudxiilunu ca guendanagana ni nuu yanna riʼ, ñee cadi dxandíʼ nga riéchenu purtiʼ nápanu xhamígunu ni nadxii laanu ndaaniʼ xquidxi Jiobá la? (Pro. 18:24.)
3. Ximodo zanda gudiʼnu stipa xcaadxi yaʼ.
3 Cani jma xhamígunu nga zudiicaʼ stipa laanu ne zaguudxicaʼ ladxidoʼno ora idxagalunu xiixa guendanagana (Pro. 17:17). Ti bizánanu ni biʼniʼ stipa pur cuee de ndaaniʼ ique de que laa qué iquiiñeʼ guníʼ sicaríʼ: «Gupaʼ stale xhamigaʼ ne xhamiguaʼ ni jma guniʼcaʼ de ca guenda ni galán napaʼ para gucanecaʼ naa bichaa modo guníʼ iqueʼ dxiqué». Gápanu xhamígunu sicaríʼ la? ti ndaayaʼ stiʼ Jiobá laacabe (Pro. 27:9).
4. Ximodo zanda gaca xhamígunu jma ca bíchinu ne ca bizánanu ni ridagulisaanenu yaʼ.
4 Guluinu de que racaláʼdxinu gacanenu xcaadxi. Ximodo zanda gusiróʼbanu guendarannaxhii stinu ni nápanu ca bíchinu ne bizánanu Testigu yaʼ. Aparte de gudíʼnanu ne ugapadiúxinu laacabe ra ridagulisaanu la? gúninu stipa pur güinenu laacabe diidxaʼ ni uguu gana ne acané laacabe. Ne cadi inabadiidxanu ni cadi naquiiñeʼ gánnanu ne guluinu de que dxandíʼ racaláʼdxinu acanenu laacabe (Fili. 2:4; 1 Ped. 4:15). Sti modo zanda guluinu de que racaláʼdxinu acanenu laacabe nga guni inbitarnu laacabe ti guendaró (Luc. 14:12-14). Laaca zanda guyúbinu ti dxi para chigucheechenenu laacabe diidxaʼ (Luc. 10:1). Pa cada tobi de laanu quixhe íquenu gunibiáʼchaahuinu ca bíchinu ne ca bizánanu la? zuluinu de que nuunu tobi si ne cani ridagulisaanenu (Col. 3:14).
5. Ximodo zanda gápanu jma xhamígunu yaʼ.
5 Ñee ruyúbinu gaca xhamígunu cani naca si biaʼ laanu o cani riulaʼdxiʼ si ni riuláʼdxinu la? Qué riquiiñeʼ diʼ gudiʼnu lugar ucueeza ca nga laanu de gápanu jma xhamígunu lade cani ridagulisaanenu. Dabid ne Jonatán, Rut ne Noemí gúpacaʼ ti amistá nabé naguidxi nécapeʼ gadxé gadxé iza laacabe ne gadxé modo biniisicabe (Rut 4:15; 1 Sam. 18:1). Zanda gápaluʼ jma xhamíguluʼ la? Pa guʼnuʼ zacá la? zacaaluʼ stale ndaayaʼ ni cadi cabezuʼ.
6. Xi zabeendunu pa gusiróʼbanu guendarannaxhii ni nápanu ca bíchinu ne ca bizánanu yaʼ.
6 Ra gusiróʼbanu guendarannaxhii ni nápanu laacabe la? zanda gudiisaanu stipa laanu ne zacanenu chuʼ guendariuudxi lade cani ridagulisaanenu. Ne Jiobá laaca zaguu ndaayaʼ laanu purtiʼ nadxiinu ca bíchinu ne ca bizánanu (Sal. 41:1, 2; Heb. 6:10). Xiñee qué ucaa íqueluʼ gunibiáʼchaahuiluʼ guiráʼ ca bíchunu ne bizánanu yaʼ.