Gúninu ni jneza casi modo runi Jiobá
1 «Jiobá nadxii guendaruni jneza.» (Sal. 37:28.) Nga runi, neca maʼ guniʼbe de que zunitilube guiráʼ binni malu ni nuu yanna riʼ la? caguixhenabe laacaʼ ante gúnibe ni maʼ guniʼbe (Mar. 13:10). Zacá zanda uyúbicabe aca arrepentírcabe ne ilácabe (2 Ped. 3:9). Rúninu stipa pur gúninu ni jneza casi modo runi Jiobá la? Ñee cadi dxandíʼ nga rucaa guiráʼ endananá ni cadiʼdiʼ ca binni ca laanu gábinu laacabe xi chiguedané Reinu stiʼ Dios la? (Pro. 3:27.) Ganaxhiinu guendaruni jneza ca zucaa laanu gúninu jma lu guendarucheeche diidxaʼ.
2 Gucheechenu diidxaʼ sin cuinu tu ininenu. Rúninu ni jneza ora rininu cani chiguni Dios ra nuu guiráʼ binni sin cuinu tu ininenu (Miq. 6:8). Cumu binni napa donda laanu la? naquiiñeʼ gúninu stipa ti cadi ininu binni ante gunibiaʼnu laa (Sant. 2:1-4, 9). Ni «racalaʼdxi [Jiobá nga] ulá irá binni, ne ganna ca ni dxandíʼ» (1 Tim. 2:3,4). Ni dxandíʼ ni cá lu Stiidxaʼ Dios ca zanda acaneni binni uchaa xquendanabani ne zahuínnica de que dxandíʼ cuchaacabe (Heb. 4:12). Guiénenu nga zucaa laanu ininenu laacabe sin idxíbinu, dede ne cani qué huacaadiaga laanu.
3 Ti bizánanu ni biʼniʼ dxiiñaʼ ndaaniʼ ti tienda, bidxíbibe stale ti hombre ni nabé risíʼ ra rutoobe que pur modo ruuyabe laa. Neca zaqué, ora gunda la? guníʼnebe laa de Paraisu ni maʼ bizabiruaa Dios chiguni. Hombre que bicabi laabe naduxhuʼ ne na qué runi cré diʼ cuentu ne de que jipi laa ne riguʼbaʼ guixi. Peru bizánanu que qué nidxaga diʼ de niniʼne laabe. Ti dxi maʼ laabe unabadiidxabe bizánanu que ximodo ruuyaʼ guicha íquebe purtiʼ ziuulaʼ ni, bizánanu que biyubi ximodo bisiene laabe xi riníʼ Biblia de laani (1 Cor. 11:14). Bidxagayaabe ora biuu hombre riʼ ti dxi maʼ bigá guicha ique ne guicha ruaa. Gunábabe guʼndanécabe laabe Biblia, ne ti bíchinu ne stale endanayecheʼ guná gúʼndané laabe, biniisibe lu Stiidxaʼ Dios dede bidiibe laabe Jiobá ne guyuunísabe. Cásica hombre riʼ, stale de cani maʼ naca testigu stiʼ Jiobá yanna, rudiicaʼ xquíxepeʼ ca bíchinu ne ca bizánanu ni qué nibicaʼ tu niníʼnecaʼ ne qué nidxágacaʼ de ninecaʼ stiidxaʼ Reinu ra nuucabe.
4 Maʼ cadi zandaa diʼ zabee Jiobá guiráʼ ni cadi jneza nuu lu Guidxilayú riʼ (2 Ped. 3:10, 13). Lu xcaadxi dxi ni nápanu riʼ, gúninu jneza casi runi Jiobá ra acanenu binni para idxélacaʼ modo ilacaʼ ora maʼ initilú guiráʼ ca binni malu ni cayuni ni ná Binidxabaʼ (1 Juan 2:17).