Jiobá nadxii ni jneza

«Naa, Jiobá, nadxiee ni jneza.» (ISAÍAS 61:8.)

1, 2. 1) Ximodo nga rihuinni runi tuuxa ni jneza ne pora nga rihuinni qué runi ni jneza. 2) Xi riníʼ Biblia de Jiobá ne de modo runi ni jneza.

ORA runi ti binni ni na ley ne qué ribí tu gacané la? cusihuinni runi ni jneza. Peru tuuxa ni qué runi ni jneza la? racané tu gapa si gana ne runi juzgar laacabe sin gunibiáʼ laacabe, pur nga runiná laacabe neca qué gápacabe donda.

² Maʼ raca biaʼ chonna mil gaayuʼ gayuaa iza guníʼ Moisés sicaríʼ de Jiobá, Dios ni jma nandxóʼ guibáʼ ne lu Guidxilayú: «Guiráʼ neza stibe jneza cani. Dios ni runi ni riníʼ, ne qué runi ni malu» (Deuteronomio 32:4). Gudiʼdiʼ si jma de gadxe gayuaa iza, gudxi Dios Isaías ni riguixhená que gucaa ca diidxaʼ riʼ: «Naa, Jiobá, nadxiee ni jneza» (Isaías 61:8). Ne lu primé siglu que guníʼ Pablu: «Ñee cadi jneza runi Dios la? Jneza pue» (Romanos 9:14). Ne laaca lu primé siglu que guníʼ apóstol Pedru: «Ma nanna biaʼca risaca irá binni nezalú Dios. Tutiica idxibi laabe ne guni jneza, runi xiiñi be laa, gasti naca xi raza laa» (Hebreos 10:34, 35). Dxandíʼ, «Jiobá nadxii ni jneza» (Salmo 37:28; Malaquías 3:6).

Nabé maʼ qué raca ni jneza

3. Ximodo bizulú cayuni binni ni cadi jneza.

³ Yanna riʼ maʼ huaxiéʼ si binni nga runi ni jneza. Guiráʼ ladu zanda gúnicabe laanu xiixa ni cadi jneza, zándaca cani runinenu dxiiñaʼ guni laanu zacá, cani rizanenu scuela, cani runi mandar ndaaniʼ xquídxinu, ne dede ca binnilídxinu. Peru cadi deruʼ yanna nga cayaca ni cadi jneza, sínuque bizuluni dede dxi maʼ qué niná primé bixhózenu ne primé jñaanu ñúnirucaʼ ni na ley stiʼ Dios, ora bicaa ti ángel ni beeda gaca Binidxabaʼ laacaʼ gucaalucaʼ Dios cásica biʼniʼ. Nabé galán modo bizáʼ Dios Adán, Eva ne ángel ni beeda gaca Binidxabaʼ que, purtiʼ zanda cuicaʼ ni gacaláʼdxicaʼ gúnicaʼ, peru qué nibicaʼ ñúnicaʼ ni jneza. Pur ca cosa malu bíʼnicabe ca nabé naroʼbaʼ ca guendanagana rapa binni ne laaca pur nga ráticaʼ (Génesis 3:1-6; Romanos 5:12; Hebreos 2:14).

4. Dede padxí bizulú cayaca ni cadi jneza ndaaniʼ Guidxilayú riʼ.

⁴ Lu xhoopaʼ mil iza ni maʼ gudiʼdiʼ dede dxi bichee Adán ne Eva ndaaniʼ jardín ni guyuu Edén que la? rihuinni nabé huayuni binni stale cosa ni cadi jneza. Ne cadi guendaridxagayaa diʼ guidúʼyanu zacá ni purtiʼ Binidxabaʼ nga dios stiʼ guidxilayú riʼ (2 Corintios 4:4). Laabe «nabé rusiguii be ne laabe nga bixhoze gola enda rusiguii», riniʼbe mal de Jiobá ne rucaalube laa (Juan 8:44). Binidxabaʼ huayuni stale cosa ni cadi jneza ni huayuniná stale binni. Ante guiaba Nisaguié roʼbaʼ que ca dxi stiʼ Noé la? biiyaʼ Dios nabé feu modo nabani binni purtiʼ «bidale guendaquéiquiiñeʼ ni cayuni binni ndaaniʼ guidxilayú, ne guiráʼ ni rucaa ladxidóʼcabe laacabe guiníʼ íquecabe, puru cosa malu cani guiráʼ ora», ne zacá gúcani purtiʼ bicaa Binidxabaʼ binni guni ni (Génesis 6:5). Zaqueca guyuu binni dxi bibani Jesús ndaaniʼ Guidxilayú riʼ, ne rihuínnini lu ca diidxaʼ guniʼbe riʼ: «Guiráʼ dxi tiidiʼ nuu stale guendanagana», nga nga ca yuubaʼ ne cani cadi jneza rizaaca binni (Mateo 6:34, NM). Nga runi jnézapeʼ nga ca diidxaʼ ni zeeda lu Biblia ra na: «Nuu né [binni] ti yuuba roʼ, casi ti gunaa ora chi xhana, ruuna dede ricaalaʼdxiʼ» (Romanos 8:22).

5. Xiñee cayaca stale cosa ni cadi jneza yanna riʼ jma que dxiqué.

⁵ Nga runi, guiráʼ ni cadi jneza ni huayaca pur ca guendaquéiquiiñeʼ stiʼ binni la? huayácacani dede biaʼ dxi huabani binni ndaaniʼ Guidxilayú riʼ. Ne yanna riʼ jmaruʼ si rihuinni zacá ni. Xiñee yaʼ. Purtiʼ guiráʼ ca cosa malu nuu lu Guidxilayú riʼ guyuucani lu ca últimu dxi stícani maʼ raca stale iza, nga runi jmaruʼ si nagana modo nuu tiempu riʼ para guibani binni. Biblia maca guníʼ ximodo zabani binni ca dxi stinu riʼ: «Purti zuyubi binni para laa si, ne nisi bidxichi zacá ique caʼ. Zuni ca laaca nandxóʼ ne zaca ca nayáʼ, ne zaguiñe yu ca stiidxa Dios. [...] Qué zulabi ca [binni]. Zabani ca modo na ique caʼ ne nin zanna ca pa nuu Dios. Qué zanaxhii ca binni ne qué ziá ca irutiʼ, ne nisi zazá ca zaníʼ ca binni. Qué zanda ucueeza ca laca laaca de guni ca ni na ique caʼ. Zuniná cabe binni ne zaca nanalaʼdxi cabe irá ni jneza. Zutoo cabe xhamigu cabe, ne qué zuni lú cabe guni cabe intiisi, ne zudxiiba cabe laca laacabe» (2 Timoteo 3:1-5). Cumu zacá stale binni yanna la? nga runi raca stale cosa ni cadi jneza.

6, 7. Xi guiráʼ cosa ni cadi jneza huazaaca lu ca dxi stinu riʼ.

⁶ Lu ti gayuaa iza ni gudídinu ca bihuinni guca jma stale cosa ni cadi jneza biaʼ qué huayuu dxi gaca lu Guidxilayú riʼ. Lu ca iza ca jma gudinde binni guiráʼ ladu. Caadxi hombre ni rucaa historia nacaʼ guti biaʼ cincuenta o sesenta millón de binni lu guiropa guendaridinde roʼ ni guca lu guidubi naca Guidxilayú riʼ, lade ca binni ca jma guti hombre ne gunaa ne baʼduhuiiniʼ ni qué guzaabiʼ gastiʼ que soldadu. Ne dede dxi biluxe guendaridinde que, huayátiruʼ millón de binni lu stale guendaridinde ni huayaca, ne jma nga huayati binni ni qué guzaabiʼ gastiʼ que soldadu. Binidxabaʼ cadxiichi purtiʼ nanna mayaca gunitilú Jiobá laa, nga runi rucaabe binni guni ni cadi jneza. Biblia caníʼ de laabe sicaríʼ: «Ma biete binidxaba ra nuu tu ne cayó dí laa ti nanna ma huaxiéʼ dxi napa» (Apocalipsis 12:12).

⁷ Lu guidubi naca Guidxilayú riʼ riniti jma de ti billón de dólar guiráʼ iza para ca guendaridinde ca. Peru millón de binni qué gapa ni caquiiñeʼ para guibaniné. Guníʼ ique si pabiáʼ galán nibani binni pa niquiiñeʼ guiráʼ ca bueltu ca para ñacanécabe laacaʼ. Biaʼ ti mil millón de binni cadi cazaa ni go, peru nuu xcaadxi ni cayuni sobra ni laacaʼ. Grupu ni láʼ Naciones Unidas na rati biaʼ gaayuʼ millón de baʼduhuiiniʼ guiráʼ iza purtiʼ qué gápacaʼ ni gocaʼ. ¡Cadi jneza diʼ nga ni cayaca ca! Laaca guníʼ ique si panda baduriʼniʼ ni qué gapa donda ruuticabe guiráʼ iza ora rutiidicabe baʼduʼ. Nácabe biaʼ cuarenta o sesenta millón nga gunaa ni rutiidiʼ baʼduʼ. ¡Nga laaca cadi jneza diʼ!

8. Tu laa si nga zanda cuee guiráʼ ni cadi jneza.

⁸ Ca gobiernu ni nuu lu Guidxilayú riʼ qué ganda diʼ guidxélacaʼ ximodo gaca chaahuiʼ ca guendanagana napa binni, ne intiica de cani gacaláʼdxicabe gúnicabe para gaca chaahuiʼ cani qué zaquiiñeʼ diʼ. Stiidxaʼ Dios maca guníʼ xi zuni binni ca dxi stinu riʼ: «Cani canauchee ne canausiguii la? ze dxi jma rusi zinitilú caʼ. Caguite ca binni ne caguite binidxabaʼ laacaʼ» (2 Timoteo 3:13). Guiráʼ ladu cayaca stale cosa ni cadi jneza, nga runi gastiʼ zanda guni binni para cuee cani. Dios si nga zanda cueecani purtiʼ laa runi ni jneza. Laasibe nga zanda gunitilube Binidxabaʼ, ca demonio stiʼ ne guiráʼ ca binni malu ca (Jeremías 10:23, 24).

Ti binni ni gunabadiidxaʼ xiñee cayaca ni cadi jneza

9, 10. Xiñee maʼ qué ñapa Asaf gana para ñuni adorar Jiobá.

⁹ Dxiqué laaca guyuu chupa chonna hombre de cani bicaa Biblia ni gunabadiidxacaʼ xiñee qué guni Dios xiixa para guibani binni jneza. Guzéʼtenu ejemplu stiʼ tobi de laacabe. Lu ca letra ni cá ante guzulú Salmo 73 ca zeeda lá Asaf, zándaca laabe nga tobi de ca levita ni guizáʼ nanna guxhidxi saa ni bibani ca dxi stiʼ David o ca binnilídxibe ni nanna guxhidxi saa ni zá de laabe. Asaf ne ca xiiñiʼ bicaacaʼ stale canción ni biquiiñeʼ ra biʼniʼ adorárcabe Dios. Peru guyuu ora biʼniʼ sentir hombre ni bicaa Salmo riʼ casi ora maʼ cará gana ni napa para guni adorar Jiobá. Xiñee yaʼ. Purtiʼ biiyabe modo cutale ca binni malu que bidxichi sticaʼ, biiyabe casi ora ruluíʼ nuucaʼ nayecheʼ ne qué gápacaʼ nin ti yuubaʼ.

¹⁰ Laabe guniʼbe: «Beeda gapaʼ envidia de ca binni ni runi cré laca laa, ora biiyaʼ pabiáʼ nuudxí ca binni malu ca. Purtiʼ qué gápacabe yuubaʼ ora maʼ chigáticabe; ne dxaʼ tipa ndaanicabe. Qué gápacabe guendanagana ni rapa binni ni rati, ne qué gápacabe ca yuubaʼ ni napa xcaadxi binni» (Salmo 73:2-8). Peru ra gudiʼdiʼ dxi bidiibe cuenta cadi jneza diʼ ngue modo caníʼ íquebe (Salmo 73:15, 16). Bíʼnibe stipa para guchaabe modo caníʼ íquebe, peru nin ne zaqué qué ñanda ñénebe xiñee ruluíʼ jma galán nabani ca binni malu que ne ca binni runi ni jneza nápacaʼ stale yuubaʼ.

11. Gudiʼdiʼ si dxi, xi beeda guiene Asaf.

¹¹ Peru ra gudiʼdiʼ dxi beeda guiene hombre bizuubaʼ stiidxaʼ Dios riʼ zabidxi Jiobá cuenta ca binni malu ca (Salmo 73:17-19). David bicaa ca diidxaʼ riʼ: «Guleza gacané Jiobá lii ne cadi guiree cueʼluʼ lu ca neza stibe, ne laabe zusisácabe lii para guicaaluʼ guidxilayú. Zuuyuʼ ni ora guiree ca binni qué iquiiñeʼ ca» (Salmo 37:9, 11, 34).

12. 1) Xi maʼ guníʼ Jiobá chiguni ne guiráʼ guendaquéiquiiñeʼ ne ni cadi jneza cayaca ndaaniʼ Guidxilayú riʼ. 2) Xi runi sentirluʼ ora guiníʼ íqueluʼ modo chindee Jiobá cani cadi jneza cayaca yanna.

¹² Ora maʼ guedandá dxi maʼ gudixhe Jiobá la? zabee ca guendaquéiquiiñeʼ nuu lu Guidxilayú riʼ ne guiráʼ ni cadi jneza raca pur ca guendaquéiquiiñeʼ ca, zacá nga zúnibe ni maca guniʼbe. Ca xpinni Cristu ni ruzuubaʼ diidxaʼ naquiiñeʼ guiníʼ íquecaʼ guiráʼ ora dxandíʼ zaca guiráʼ ni maʼ guníʼ Dios. Qué chuʼ dxi guiaandaʼ laanu zunitilú Jiobá guiráʼ ca binni ni qué náʼ guni ni nabe ne zaguube ndaayaʼ cani guzuubaʼ stiidxabe. «Guielube cayuuyaʼ, guielube cayuuyaʼ ximodo nuu xiiñiʼ binni. Jiobá cayuuyaʼ ximodo nuu binni nachaʼhuiʼ ne binni malu, ne xhiálmabe dxandipeʼ nanalaʼdxiʼ tutiisi ni nadxii guendaridinde. Zusábabe trampa, guí ne azufre ne ti bi ni gunitilú ca binni malu [...]. Purtiʼ Jiobá runi ni jneza; laabe dxandíʼ nadxiibe ni jneza.» (Salmo 11:4-7.)

Ti guidxilayú cubi ra chigaca puru si jneza

13, 14. Xiñee zaca puru si jneza lu guidxilayú cubi ca.

¹³ Gunitilú si Jiobá guiráʼ ca binni malu ni cayuni ni na Binidxabaʼ la? maʼ zuzulú ti guidxilayú cubi guizáʼ sicarú. Dxi ca la? Reinu stiʼ Dios ni nuu guibáʼ ca nga ni chiguni mandar lu guidxilayú cubi ca, laani nga gobiernu ni naquiiñeʼ guinábanu lu oración, casi bisiidiʼ Jesús ca discípulo stiʼ guni. Óraca maʼ zaca guiráʼ cosa casi na ley ne zaca puru si ni jneza lugar de gácaruʼ jma guendaquéiquiiñeʼ ne ni cadi jneza, purtiʼ dxi ca zuni Dios guiráʼ ni rinábanu lu oración riʼ: «[Biseendaʼ reinu stiluʼ] ne gaca ni na luʼ. Cásica raca ni ibáʼ, zaqueca gaca ni ndaani guidxilayú» (Mateo 6:10).

¹⁴ Biblia cayabi laanu xi chiguni gobiernu ca, ne laani nga gobiernu ni racalaʼdxiʼ guiráʼ binni ni riuulaʼdxiʼ guni ni jneza. Óraca zaca guiráʼ ni na Salmo 145:16: «[Lii, Jiobá,] cuxháleluʼ naluʼ ne cudiiluʼ guiráʼ ni racalaʼdxiʼ cani nabani». Ne Isaías 32:1 laaca caníʼ: «¡Biiyaʼ! Ti rey [Jesucristu ni nuu guibáʼ] ni zuni mandar para gaca ni jneza, ne ca príncipe [cani bisaana Cristu ndaaniʼ Guidxilayú] ca zuni mandarcaʼ casi príncipe para gaca ca cosa ca casi na ley». Ne sicaríʼ caníʼ Isaías 9:7 de ni chiguni Rey Jesucristu: «Zuni mandarbe guiráʼ ladu, ne guendariuudxi ca qué ziuu diʼ dxi guiráʼ lu trono stiʼ David ne lu reinu stiʼ, ti chuʼni dxiichiʼ ne ziaanani zacá purtiʼ zaca ni na ley ne purtiʼ zaca ni jneza dede nagasi ne qué ziuu dxi guiluxe ni. Jiobá, Dios ni nandxóʼ ca nga chiguni ni». Ñee riníʼ íqueluʼ maʼ nabániluʼ ra chiguni mandar gobiernu chaʼhuiʼ ca la?

15. Xi chiguni Jiobá para guiráʼ binni lu guidxilayú cubi ca.

¹⁵ Lu guidxilayú cubi chiguni Dios ca maʼ qué zapa binni xi pur guiníʼ ca diidxaʼ ni zeeda lu Eclesiastés 4:1 ra na: «Ne bidxiguetaluáʼ para guuyaʼ guiráʼ ni cayúnicabe lu gubidxa para cuquiichinácabe binni, ne ¡biiyaʼ!, guiráʼ nisa cayeeteʼ lu ca binni ni cuquiichinácabe que, peru qué gápacabe tu quixhedxí ladxidóʼcabe; guizáʼ nadipaʼ ca binni ni cuquiichináʼ laacabe, ngue runi qué gapa ca binni que tu quixhedxí ladxidoʼcaʼ». Cumu binni gulené donda laanu la? raca nagana para laanu guxuíʼlunu pabiáʼ sicarú zabani binni lu guidxilayú cubi ra chigaca puru si ni jneza. Maʼ qué ziuuruʼ guendaquéiquiiñeʼ, ne guiráʼ dxi ora guirá gueelaʼ zadúʼyanu zaca stale cosa ni galán para laanu. Jiobá zuni chaahuiʼ guiráʼ cosa ni cadi nuu jneza, ne zuni chaahuibe cani jma que biaʼ riníʼ íquenu. Nga runi, biáʼsipeʼ nga gudxi Jiobá apóstol Pedru gucaa ca diidxaʼ riʼ: «Laanu cabeza nu, casi bidii stiidxa be, ti guidxilayú cubi ne ti ibáʼ cubi ra gasti enda nadxabaʼ» (2 Pedro 3:13).

16. Xiñee rininu maʼ nuu ti guibáʼ cubi, ne ximodo ndiʼ maʼ cayuu listu ti «guidxilayú cubi» yanna riʼ.

¹⁶ Guibáʼ cubi ni cuzéʼtenu riʼ (Reinu stiʼ Dios ra cayuni mandar Cristu) maʼ cayúnini dxiiñaʼ yanna. Ne lu ca últimu dxi riʼ maʼ cadagulisaa ca binni ni chigueeda gaca «guidxilayú cubi» ca (guiráʼ ca binni ni guni ni jneza). Maʼ biaʼ gadxe millón de ca binni ca, ne nuucabe lade 100,000 neza binni ridagulisaa ni nuu lu 235 guidxi. Guirácabe maʼ nabánicabe modo rusiidiʼ Jiobá, nga runi nuucabe tobi si purtiʼ nadxiisaacabe casi biʼniʼ Cristu. Laasicabe jma rihuinni nuucabe tobi si dede biaʼ dxi huabani binni ndaaniʼ Guidxilayú riʼ, ne nin ti grupu de binni ni runi ni na Binidxabaʼ cadi nabani casi laacabe. Modo nadxiisaa ca binni ca ne modo nuucaʼ tobi si cusihuinni pabiáʼ nayecheʼ zabani binni lu guidxilayú cubi stiʼ Dios, ti guidxilayú ra zaca mandar binni jneza ne casi na ley (Isaías 2:2-4; Juan 13:34, 35; Colosenses 3:14).

Qué zuni ganar Binidxabaʼ

17. Xiñee qué zuni ganar Binidxabaʼ ora gucaalube ca xpinni Jiobá.

¹⁷ Maʼ cadi candaa diʼ, Binidxabaʼ ne ca xpinni zucaalucaʼ ca xpinni Dios ne zacaláʼdxicaʼ gunduuxecaʼ laacabe (Ezequiel 38:14-23). Padxí gaca nga yaʼ. Jesús guníʼ xi zaca ora gaca ni: «Nabé naná zaca ni ca dxi que. Qué huayuu dxi gaca ni naná biaʼ qué, dede dxi bizáʼ Dios guidxilayú, ne ma qué ziuu ru dxi aca ni sti tiru» (Mateo 24:21). Ñee zuni ganar Binidxabaʼ la? Coʼ. Stiidxaʼ Dios cayabi laanu: «Jiobá nadxii guendaruni jneza, ne qué zusaanabe cani qué rixeleʼ de laabe. Qué ziuu dxi gusaana de gápabe laacaʼ; peru xiiñiʼ ca binni malu la? ca nga huaxa zanitilucaʼ. Cani runi jneza ca zacaacaʼ guidxilayú, ne zabánicaʼ luni guiráʼ dxi» (Salmo 37:28, 29).

18. 1) Xi zuni Dios ora gucaalú Binidxabaʼ ca xpinni. 2) Xi runi sentirluʼ purtiʼ maʼ nánnaluʼ mayaca gaca puru si ni jneza.

¹⁸ Últimu ni guni Binidxabaʼ ne ca xpinni nga gucaalucaʼ ca binni ni cayuni ni na Dios. Zacarías maca guníʼ xi zuni sentir Jiobá ora gucaalúcabe ca xpinni: «Ni cagaʼnaʼ laatu cagaʼnaʼ guié bezaluaʼ» (Zacarías 2:8). Cumu casi ora nudxiganaʼ tuuxa ndaaniʼ guielú Jiobá nga ora gucaalúcabe ca xpinni la? nagueendaca zunitilube ca binni ni gucaalú ca xpínnibe. De guiráʼ ca binni ni nabani ndaaniʼ Guidxilayú riʼ la? ca xpinni si Dios nga cani nuudxi, cani jma nadxiisaacaʼ, cani nuucaʼ tobi si ne rúnicaʼ ni na ley, nga runi cadi jneza diʼ nga chuʼ tu gucaalú laacabe. Dios, ni «nadxii ni jneza» ca, qué zudii lugar gaca ni, ne tobi si tiru zunitilube ca binni ni cucaalú xquídxibe, zacá zahuinni jneza rúnibe ne zulabe ca binni ni runi adorar laabe casi tobi lucha Dios ni dxandíʼ. Cadi dxandíʼ guizáʼ riéchenu purtiʼ nánnanu mayaca gaca guiráʼ ni maʼ guninu riʼ la? (Proverbios 2:21, 22.)

Xi nicábiluʼ

• Xiñee cayaca stale cosa ni cadi jneza.

• Ximodo chindee Jiobá guiráʼ ni cadi jneza cayaca ndaaniʼ Guidxilayú riʼ.

• Lade guiráʼ ni chiguni Dios para gunitilú ca cosa malu ni cayaca yanna riʼ, gunáʼ nga ni jma rusiecheʼ lii.

[Dibuju/foto ni zeeda lu yaza 9]

Guyuu stale guendaquéiquiiñeʼ ante guiaba Nisaguié roʼbaʼ que, ne laaca nuu stale lu ca últimu dxi riʼ

[Dibuju/foto ni zeeda lu yaza 10]

Lu guidxilayú cubi stiʼ Dios ca la? zaca puru si jneza lugar de gaca guendaquéiquiiñeʼ