Xi zanda gúninu ora guizaaca xiixa ni cadi jneza

1, 2. ¿Xi runi stale binni ora gúʼyacaʼ cazaaca cosa ni cadi jneza? Ne ¿xi zándaca guiníʼ íquenu ora guidúʼyanu cayacaná binni pur ca cosa ni cadi jneza cazaaca?

TIEMPU nabáninu riʼ stale binni nabé runi nácabe laacaʼ pur nácacaʼ pobre, pur modo biniisicaʼ, pur raza sticaʼ, pur modo rihuínnicaʼ ne pur xcaadxi razón. Laaca nuu caadxi gobiernu ne zaqueca ca xaíque stiʼ caadxi empresa ricaacaʼ decisión ni runi convenir si laacaʼ ne qué riníʼ íquecaʼ pabiáʼ cayuninacaʼ guidxilayú riʼ ne zaqueca binni ni nabeza ndaaniʼ ni. Ca cosa ni bizéʼtenu riʼ ne xcaadxi cosa ni cadi jneza raca runinácani laanu ne runinácani xcaadxi binni ni runibiaʼnu.

² Guiranu riuuláʼdxinu guni tratárcabe laanu galán ne gápanu guendariuudxi. Nga runi stale binni nabé ridxiichi ora gúʼyacaʼ cazaaca cosa ni cadi jneza. Nuu de laacaʼ riuucaʼ lade ca grupu ni ruyubi guni chaahuiʼ ca cosa ca. Runi apoyarcaʼ ca campaña ni ruyubi gucueeza ca cosa ni cadi jneza cazaaca, rireecaʼ calle ne runi apoyarcaʼ ca políticu ni cayuni prometer zabeecani. Peru laanu ca xpinni Cristu nánnanu cadi naquiiñeʼ gácanu «parte de guidxilayú riʼ» ne nánnanu Reinu si stiʼ Dios nga zabee guiráʼ ca cosa ni cadi jneza cayaca (Juan 17:16). Peru neca zacá racananu dede ridxiichinu ora ridúʼyanu nuu binni ni cayacaná pur ca cosa ni cadi jneza rúnicabe laa. Ne zándaca dede guiníʼ íquenu: «Ora guuyaʼ guizaaca xiixa cosa ni cadi jneza, ¿xi zanda guneʼ? ¿Ñee nuu xiixa ni zanda guneʼ para gacaniáʼ gaca chaahuini la?». Lu artículo riʼ zacábinu ca pregunta ca. Peru primé guidúʼyanu xi runi sentir Jehová ne Jesús ora rizaaca ca cosa ni cadi jneza ca.

NANALAʼDXIʼ JEHOVÁ NE JESÚS GACA COSA NI CADI JNEZA

3. ¿Xiñee gastiʼ naca nga guidxiichinu ora guidúʼyanu gaca cosa ni cadi jneza? (Isaías 5:7).

³ Rusiene Biblia xiñee gastiʼ naca nga guidxiichinu ora guidúʼyanu gaca cosa ni cadi jneza: bizáʼ Jehová laanu casi laa, nadxiibe ni jneza ne riuuláʼdxibe gaca cosa ni jneza (Sal. 33:5; Gén. 1:26). Qué ziuu dxi guni Jehová ni cadi jneza ne ngueca nga ni racaláʼdxibe guni guiráʼ binni (Deut. 32:3, 4; Miq. 6:8; Zac. 7:9). Guzéʼtenu ti ejemplu, tiempu bibani profeta Isaías, bicaadiaga Jehová ora bicaa ca israelita «ti ridxi de yuubaʼ» purtiʼ cayuniná xcaadxi israelita laacaʼ (biindaʼ Isaías 5:7). Biʼniʼ castigar Jehová ca ni qué niná ninanda Ley stibe ne runinacaʼ xcaadxi binni ni qué gapa donda (Is. 5:5, 13).

4. ¿Xi rizíʼdinu de Jesús lu relatu ra riete de ti hombre nabidxi ti chú náʼ? (Laaca zanda gúʼyaluʼ imagen ca).

⁴ Naca Jesús cásica Jehová, nadxii ni jneza ne nanalaʼdxiʼ gaca cosa ni cadi jneza. Guidúʼyanu xiixa ni bizaaca dxi guyuube lu guidxilayú. Ti dxi biiyaʼ Jesús ti hombre nabidxi ti chú náʼ, guizáʼ biabe laa ne bisiándabe laa. Peru ora biʼyaʼ ca xaíque yuʼduʼ que ni bíʼnibe bidxiichicaʼ purtiʼ para laacaʼ jma jneza nga chinándacaʼ ley stiʼ sábadu que guiacaʼ hombre ni cayacaná que. Ora biʼyaʼ Jesús qué ñuulaʼdxiʼ ca hombre que ni biʼniʼ, «biaana triste purtiʼ nabé naguidxi ladxidóʼcabe» (Mar. 3:1-6).

5. ¿Xi cadi naquiiñeʼ guiaandaʼ laanu pa ridxiichinu ora guizaaca xiixa cosa ni cadi jneza?

⁵ Ridxiichi Jehová ne Jesús ora raca ni cadi jneza, nga runi laaca runi sentirnu zacá (Efes. 4:26 ne nota de estudiu ra ná «Cuando se enojen»). Peru cadi caníʼ diʼ nga pur guidxiichinu zusaana de guizaaca ca cosa ni cadi jneza. Pa guidaʼnu xiana ne qué gucueezanu laca laanu zanda guninani ladxidoʼno ne guni huarani laanu (Sal. 37:1, 8; Sant. 1:20). Nga runi guidúʼyanu ejemplu stiʼ Jesús para gánnanu xi zanda gúninu ora guizaaca xiixa cosa ni cadi jneza.

XI BIʼNIʼ JESÚS ORA BIʼYAʼ CAZAACA COSA NI CADI JNEZA

6. ¿Xi cosa cadi jneza biʼyaʼ Jesús dxi guyuu lu guidxilayú riʼ? (Laaca zanda gúʼyaluʼ imagen ca).

⁶ Biiyaʼ Jesús stale cosa ni cadi jneza dxi guyuu lu guidxilayú. Guzéʼtenu ti ejemplu. Biiyabe gudixhe ca xaíque yuʼduʼ que stale regla ni runi gaca nagana para ca binni que chinándacaʼ ni ná ley (Mat. 23:2-4). Ne laaca biiyabe cadi jneza modo biʼniʼ tratar ca autoridad stiʼ guidxi Roma guidxi que. Guyuu stale judíu ni gucalaʼdxiʼ nireecaʼ de lu náʼ guidxi Roma, ne caadxi de laacabe nga ca judíu ni binibiáʼcabe casi ca zelote, guyuucaʼ dispuestu gucaalucaʼ guidxi Roma. Peru Jesús qué ñuu ládecabe para nucaalú gobiernu. Ora gúnnabe gudixhe ique binni guni laabe rey, nagueendaca bireebe de ra nuucaʼ (Juan 6:15).

7, 8. ¿Xiñee qué nucueeza Jesús ca cosa ni cadi jneza cayaca lu guidxilayú? (Juan 18:36).

⁷ Qué ñuu Jesús lu política para ñacané niree ca cosa ni cadi jneza cazaaca. ¿Xiñee yaʼ? Purtiʼ nánnabe qué gapa binni guidxilayú derechu para guni mandar ne qué zanda gúnini (Sal. 146:3; Jer. 10:23). Ne laaca qué zanda cueecabe guiráʼ cosa ni rucaa gaca cosa ni cadi jneza. Ne qué zanda gácani purtiʼ Binidxabaʼ nga naaze guidxilayú riʼ, ne riquiiñeʼ autoridad ni napa para gucaa binni gaca casi laa ne guni cosa malu (Juan 8:44; Efes. 2:2). Ne laaca qué zanda gácani purtiʼ nácanu binni ruchee ne nga rucueeza laanu gúninu guiráʼ ca cosa ca jneza neca de guidubi ladxidoʼno gacaláʼdxinu gúninu ni (Ecl. 7:20).

⁸ Nanna Jesús Reinu si stiʼ Dios nga zabee guiráʼ cosa ni rucaa gaca cosa ni cadi jneza. Nga runi gudixhe íquebe iquiiñebe tiempu ne stipa stibe para guni predicarbe «ca noticia galán stiʼ Reinu» (Luc. 8:1). Gúdxibe ca ni «racalaʼdxiʼ gaca justicia» zedandá dxi zaree ca guendaquéiquiiñeʼ ne ca cosa ni cadi jneza raca lu guidxilayú riʼ (Mat. 5:6 ne nota de estudiu; Luc. 18:7, 8). Ne nin ti gobiernu stiʼ guidxilayú riʼ qué zúnini, sínuque Reinu stiʼ Dios nga zúnini, laani cadi nácani parte de guidxilayú riʼ (biindaʼ Juan 18:36).

YENANDA EJEMPLU STIʼ JESÚS ORA GÚʼYALUʼ CAYACA COSA NI CADI JNEZA

9. ¿Xiñee nanna dxíchiluʼ Reinu si stiʼ Dios nga zabee guiráʼ ca cosa ni cadi jneza raca?

⁹ Cumu nabáninu lu ca «últimu dxi» la? ridúʼyanu jma stale cosa ni cadi jneza cazaaca que tiempu bibani Jesús. Peru ngueca nga ni rucaa guizaacacani: Binidxabaʼ ne ca binni ni nanda laa (2 Tim. 3:1-5, 13; Apoc. 12:12). Ne cásica Jesús, nánnanu Reinu si stiʼ Dios nga zabee guiráʼ ca cosa ni rucaa gaca cosa ni cadi jneza. Cumu Reinu si stiʼ Dios nga runi apoyarnu la? qué rucáʼlunu gobiernu, qué rireʼnu calle ne qué ruséʼgunu neza ne laaca qué riuʼnu lu xiixa grupu ni racalaʼdxiʼ gucueeza ca cosa ni cadi jneza raca. Guidúʼyanu ni bizaaca ti hermana láʼ Stacy.a Ante gánnabe ni rusiidiʼ Biblia nabé nga guyuube lade grupu ni ruyubi gaca ni jneza lu guidxilayú riʼ. Peru bizulú guníʼ íquebe pa dxandíʼ peʼ zacané ni cayúnibe que binni. Laabe guniʼbe: «Ora maʼ nuaaʼ lu ca marcha que guníʼ iqueʼ, ¿ñee ni cayúnidu riʼ nga zanda guni chaahuiʼ ca cosa ca la? Peru yanna ra maʼ cayuneʼ apoyar Reinu stiʼ Dios, nuaaʼ segura gástiruʼ stiʼ gobiernu ni zuni chaahuiʼ guiráʼ ca cosa ca. Ne nannaʼ dxiicheʼ Jehová si nga zanda guni xiixa pur ca ni qué gapa tu gacané laa» (Sal. 72:1, 4).

10. Casi ná Mateo 5:43-48, ¿xiñee qué ruyúbinu guchaʼnu modo runi mandar gobiernu? (Laaca zanda gúʼyaluʼ imagen ca).

¹⁰ Stale de ca grupu ni ruyubi guchaa modo runi mandar gobiernu puru rucaalucaʼ ne qué rinacaʼ chinándacaʼ ni ná gobiernu, peru cadi nga diʼ nga ni biʼniʼ ne ni bisiidiʼ Jesús (Efes. 4:31). Ti hermanu láʼ Jeffrey guníʼ: «Stale biaje ca ni riree calle, ora ruzulú rireecabe nuudxícabe peru ti ratuhuiiniʼ ruchaacabe, ridíndecabe ne ribáʼnacabe». Rusiidiʼ Jesús laanu gannaxhiinu guiráʼ binni, dede né ca ni qué runi cré ni runi crenu o ca ni canazananda laanu (biindaʼ Mateo 5:43-48). Ne laanu ca xpinni Cristu rúninu stipa pur chinándanu ejemplu stiʼ Jesús lu guiráʼ ni gúninu lu xquendanabáninu.

11. ¿Xiñee nuu biaje zándaca gaca nagana para laanu chinándanu ejemplu stiʼ Jesús?

¹¹ Neca nánnanu zabee Reinu stiʼ Dios guiráʼ ca cosa ni cadi jneza raca, zándaca ziuu biaje gaca nagana para laanu chinándanu ejemplu stiʼ Jesús ora gúnicabe laanu cosa ni cadi jneza. Guidúʼyanu ni bizaaca Janiya, bíʼnicabe menu laabe pur color stibe. Laabe guniʼbe: «Guizáʼ bininá ngue naa, bidxiicheʼ ne gucalaʼdxeʼ ñuu tu nuquixe ni laacabe. Ngue runi gudixheʼ iqueʼ chuaaʼ lade ti grupu ni rucaalú para maʼ cadi gúnicabe menu binni pur color stiʼ o pur modo naca. Rabeʼ ngue nga ni zacané naa para cadi guidaaʼ xiana». Peru despué biidibe cuenta caquiiñeʼ guchaabe modo riníʼ íquebe. Sicaríʼ bisiénebe: «Biiyaʼ cacá modo riníʼ ique xcaadxi naa, lugar de gapaʼ confianza Jehová maʼ bizulú cayapaʼ confianza binni guidxilayú nga zuni chaahuiʼ ca cosa ca. Ngue runi gudixheʼ iqueʼ guireeʼ lade grupu que». Ridxiichinu ora runinácabe laanu o guidúʼyanu cazaaca cosa ni cadi jneza. Peru cadi gudiʼnu lugar pur nga gusaana de gácanu neutral ne gúninu ca cosa ni runi binni guidxilayú (Juan 15:19).

12. ¿Xiñee caquiiñeʼ guiduʼyaʼ chaahuinu xi ridúʼndanu, xi rucaʼdiáganu ne xi ridúʼyanu?

¹² ¿Xi zanda gacané laanu para cadi guidxiichinu ora guidúʼyanu gúnicabe tuuxa xiixa cosa ni cadi jneza o gúnicabe ni laanu yaʼ? Ti cosa ni zanda gúninu nga guiduʼyaʼ chaahuinu xi ridúʼndanu, xi rucaʼdiáganu ne xi ridúʼyanu. Lu internet ne lu caadxi red social riete xiixa para si guchíbicabe binni ne gucaacabe laacaʼ gucaalucaʼ gobiernu. Nuu biaje ca ni rutiidiʼ noticia ca riniʼcaʼ ni riníʼ íquecaʼ ne cadi ni peʼ cazaaca. Ne neca biaʼsi información ni cudiicabe la? gastiʼ nga ni zabeendunu pa guiníʼ ique xhaatanu ni. Ne pa xadxí ridúʼyanu, ridúʼndanu o rucaʼdiáganu noticia ni caníʼ de tema ca, zándaca ni guizaacanu nga zareʼnu gana, ziuʼnu triste ne maʼ qué zadxélanu xi gúninu (Prov. 24:10). Ne ni jma feu nga zándaca gusiáʼndanu Reinu si stiʼ Dios nga zuni chaahuiʼ guiráʼ ca cosa ni cadi jneza raca.

13. Ora ridúʼndanu Biblia guiráʼ dxi, ¿ximodo racaneni laanu?

¹³ Sti cosa ni zacané laanu nga guidúʼndanu Biblia guiráʼ dxi ne guiníʼ íquenu ni nani. Ti hermana ni láʼ Alia nabé bidxiichi ora biʼyaʼ nabé feu modo runi tratárcabe ca binni xquidxi ne gastiʼ rizaaca ca ni runiná laacabe. Laabe guniʼbe: «Bidieeʼ cuenta pa dxandíʼ runeʼ cré Jehová si nga zuni chaahuiʼ guiráʼ ca guendanagana nuu caquiiñeʼ guchaaʼ modo riníʼ iqueʼ. Ne biindaʼ ni ná Job 34:22-29, ra cayeeteʼ guirutiʼ zanda gucaachilú nezalú Jehová. Laasibe nga zanda gúnibe ni jneza ne laasibe zanda guni chaahuibe guiráʼ ni rizaaca». Peru, ¿xi zanda gúninu yanna, laga cabézanu guni chaahuiʼ Reinu stiʼ Dios guiráʼ ca cosa ni cadi jneza cayaca yaʼ?

¿XI ZANDA GÚNINU YANNA?

14. ¿Xi ti cosa zanda gúninu yanna? (Colosenses 3:10, 11).

¹⁴ Qué zanda gucueezanu xcaadxi de guni cosa ni guniná tuuxa, peru ni zanda gúninu nga guicaanu decisión ximodo guni tratarnu xcaadxi. Casi maʼ bidúʼyanu zinándanu ejemplu stiʼ Jesús ra gusihuínninu nadxiinu binni. Ne guendarannaxhii ca rucaani laanu gápanu respetu guiráʼ binni, dede ca binni ni runiná xcaadxi (Mat. 7:12; Rom. 12:17). Guizáʼ riecheʼ Jehová ora ruuyaʼ nácanu nachaʼhuiʼ né guiráʼ binni ne jneza modo runi tratarnu laacaʼ (biindaʼ Colosenses 3:10, 11).

15. ¿Ximodo racanenu binni ora runi predicarnu?

¹⁵ Ti modo jma jneza gacanenu binni nga gusíʼdinu laacabe de Jehová. ¿Xiñee yaʼ? Purtiʼ «guendariziidiʼ de Jehová» zanda gucaani ti binni ni naduxhuʼ ne ni riuulaʼdxiʼ tinde guchaa ne gaca nadóʼ ne nachaʼhuiʼ (Is. 11:6, 7, 9). Guzéʼtenu ni bizaaca ti hombre láʼ Jemal ante gunibiaʼbe ni dxandíʼ guyuube lade ti grupu ni rucaalú Gobiernu purtiʼ para laabe ruquichinacaʼ binni. Laabe guniʼbe: «Qué zanda guchaaluʼ binni ra gucaaluluʼ laa, peru zanda guchaacabe ra guiziidicabe ni rusiidiʼ Biblia. Ne zacá nga bichaaʼ». Ni biziidibe lu Stiidxaʼ Dios bicaani laabe gusaanabe de gucaalube gobiernu. Ca binni ni gudii lugar guchaa Biblia modo nácacaʼ zácacaʼ ti binni ni gusaana de guni cosa ni guniná xcaadxi binni.

16. ¿Xiñee racaláʼdxiluʼ gusiidiluʼ binni de Reinu stiʼ Dios?

¹⁶ Racaláʼdxinu gábinu binni Reinu si stiʼ Dios nga zuni chaahuiʼ guiráʼ ca cosa ni cadi jneza raca ndaaniʼ guidxilayú riʼ. Zacá zanda gacanenu ca binni ni huayacaná pur xiixa ni cadi jneza bíʼnicabe laa (Jer. 29:11). Stacy, hermana ni bizéʼtenu lu párrafo gaʼ que, guníʼ: «Ra gunnaʼ ni dxandíʼ rusiidiʼ Biblia gucaneni naa guneʼ huantar guiráʼ ca cosa ni cadi jneza ruuyaʼ ne ni huazaacaʼ. Riquiiñeʼ Jehová Biblia para quixhedxí ladxidoʼno». Caquiiñeʼ chuʼnu listu para quixhedxinu ladxidóʼ binni ra gusíʼdinu laacaʼ ca promesa ni zeeda lu Biblia. Ra jma guni creluʼ Reinu si stiʼ Dios nga zabee guiráʼ ca cosa ni cadi jneza raca lu guidxilayú riʼ, jma qué zaca nagana para lii guiníʼneluʼ xcaadxi de laani casi ca ni rineluʼ scuela o ca ni runineluʼ dxiiñaʼ.b

17. ¿Ximodo racané Jehová laanu gudxíʼlunu ca cosa ni cadi jneza raca lu guidxilayú riʼ?

¹⁷ Nánnanu laga naca Binidxabaʼ «gobernante stiʼ guidxilayú riʼ», qué zusaana de gacananu. Peru cadi nuunu stúbinu cayacané Jehová laanu ne cayabibe laanu zabeebe Binidxabaʼ «ti ladu» (Juan 12:31). Ne lu Biblia cusiene Jehová laanu xiñee nuu stale cosa ni cadi jneza ne cayabibe laanu riuubaʼ ladxidoʼbe ora gúʼyabe cayacananu (Sal. 34:17-19). Né ejemplu stiʼ Jesús rusiidiʼ Jehová laanu xi gúninu ora gúnicabe laanu cosa ni cadi jneza ne ximodo Reinu stiʼ Dios zabee guiráʼ ca cosa ni runiná laanu (2 Ped. 3:13). Nga runi, cadi gusaana de guni predicarnu ca noticia galán stiʼ Reinu né stale gana dede ora guedandá dxi gaca ni ná ley ne gaca ni jneza lu guidxilayú (Is. 9:7).