CANI RINABADIIDXAʼ BINNI DE BIBLIA

Ximodo nga Dios

Dios naca ti espíritu ni qué zanda guʼyaʼ binni. Laabe bizaʼbe guibáʼ, Guidxilayú ne guiráʼ ni nabani ndaaniʼ ni. Guirutiʼ bizáʼ Dios ne qué gápabe dxi bizulú xquendanabánibe (Salmo 90:2). Laabe racaláʼdxibe guyubi binni laabe ne gunibiáʼ chaahuicaʼ laabe. (Biindaʼ Hechos 17:24-27.)

Zanda gunibiaʼnu Dios ne gánnanu tu láʼ. Ne laaca zanda gánnanu xi guenda nápabe ora guidúʼyanu ca cosa ni bizaʼbe (Romanos 1:20). Para gunibiáʼ chaahuinu laabe, naquiiñeʼ guidúʼndanu Biblia, Stiidxabe. Zacá zánnanu ximódopeʼ laabe. (Biindaʼ Salmo 103:7-10.)

Xi runi sentir Dios ora ruuyaʼ qué raca ni jneza

Nanalaʼdxiʼ Jiobá guiráʼ cosa ni cadi jneza runi binni ne bizaʼbe binni para gusihuinni ca guenda stibe (Deuteronomio 25:16). Nga runi stale de laanu laaca nanaláʼdxinu guiráʼ cosa ni cadi jneza ridúʼyanu runi binni. Cadi Dios diʼ napa donda pur guiráʼ cosa ni cadi jneza runi binni. Laabe rudiibe lugar binni guʼyaʼ xi quixhe ique guni, ne triste guininu ni, peru stale binni riguixhe ique guni ni cadi jneza. Riuubaʼ ladxidóʼ Jiobá ora guni binni zacá. (Biindaʼ Génesis 6:5, 6 ne Deuteronomio 32:4, 5.)

Jiobá riuulaʼdxiʼ guni binni ni jneza; nga runi, maʼ gudíxhebe dxi cueebe guiráʼ cosa malu (Salmo 37:28, 29). Biblia naʼ mayaca cueebe guiráʼ cosa ni cadi jneza raca. (Biindaʼ 2 Pedro 3:7-9, 13.)